Nimlivolivon 7

Ipacisirsiring na o kataotao na ni Setiven

1Pacicin no rako a panirsirngen da no mapatanatanang so nakem da si Ama ta do to si Setiven. Maniring sira am, “Manngwa, yamanoyong o na keyyan no akman sang a vazay mo an?”

2Pasapan na ni Setiven am, “Manga maran, manga kakteh, amizngen nyo yaken an. No kakwa pa am nimapacita o mazway a si Ama ta do to ji Apolahan no keyyan na pa do Meysopotamiya a meypanam pa a meyvahay do Alan a ili. 3Maniring jya am, ‘Karwan mo o ili nyo a kano apapnan mo a mangay do tovoyan ko jimo an.’#7:3 Tswang Se Ci 12:1. 4Am ori o nikarwan na jya ni Apolahan do Cyaloti a pongso a kangay na meyvahay do Alan. Mawakwak si ama na am ori o nyangay na rana do meyngongyod a tovoyan na sya ni Ama ta do to, do ili ta ya. 5No kanang am abo pa nitoro na jya ni Ama ta do to a iheyhakaw na. Am nipanci na pa jya ni Ama ta do to no kakwa am itoro na jya o ili ta ya a lisanan da no apwapo na. Am no kanang am abo pa o anak na ni Apolahan. 6Maniring pa jya si Ama ta do to am, ‘O sivosivovoong mo am meyvahay sira do teysa ka mahataw an, a kapeylamlamsoy da sira dang a peyrarehten so sikapat a poo (400) so awawan. 7Am pasingsingtan ko sira o mapeylamlamsoy sira a tao do teysa ka mahataw a kakaro da rana do dang a meysinaoli do jya kararalay da nyaken.’#7:7 Tswang Se Ci 15:13-14. 8Meyratateng am ipanci na ni Ama ta do to ji Apolahan o keyyan na no yongkad na jira do ananak na mahakay, do kaji da makahamangan do nipanci na jira ni Ama ta do to. Am matazak a tao si Isa am niyongkadan na o kataotao na do ikawao na pa araw.#7:8 Amyongkad do kataotao - Citahen nyo do Panitanitan so jyatenngi a ciring do ney manowji na rana no vakong eya. Akman sang vazay ni Isa do anak na si Yakebo. Akman sahang o vazay na ni Yakebo do rarwa so ikakarwan a ananak na mahakay a ineynapo ta tao do Yotay no kakwa.”

9Maniring pa si Setiven am, “Asa do anak ni Yakebo a meyngaran so Yoseyvo am nikeynanahet da no kakakteh na. Am ori o nipanazangan da nya do tao do Ayci. Am mina kapzat na jya ni Ama ta do to, 10do meycyamadadayan a kanginanawan na. Nipanta na ni Ama ta do to so teneteneng na. Am ori o nikakza na nya no rako a panirsirngen da do Ayci a meyngaran so Valaw. Am ori o nipamnekan na nya tomonton jya meypanirsirngen do Ayci a tomalamozong no kangangay na kano kanekanen na.

11“Mownay am meykabcil do Ayci a kado Cyanan a pongso. Am ori o nikaro no alalaw da no ineynapo ta, ta abo rana o kanekanen da do Cyanan. 12Mamizing na ni Yakebo o kabsoy da no Ayci am tovoin na sira o anak na a ineynapo ta mangay do Ayci. Ori am ikeypisa da pa ori a yanimangay. 13Ipidwa so kangay da am ipanci na ni Yoseyvo o kataotao na da kakakteh na. Ori o nipakatenngan na rana ni Valaw do kakakteh na ni Yoseyvo. 14So nipanovoy na so tao ni Yoseyvo a manci ni ama na kano aro a zipozipos da mai do Ayci. O nimai a apapnan na am lalima o ikasikawao da (75). 15Am ori o nyai da rana do Ayci a meyvahay a kato da wakwakan do dang ni Yakebo a kano ananak na a ineynapo ta. 16Mownay am anaten da o totowang da yangay do Secyan a ili do ninginangina na ni Apolahan a heseb no kakwa pa do ananak na ni Hamo.

17“Toda jyarateng o mina ciring na ni Ama ta do to ji Apolahan am nisomaod sira o ineynapo ta do dang. 18No kanang rana am amyan so nimacipalit a vayo a panirsirngen no tao do Ayci. Am ji na pa nimamizing si Yoseyvo no kakwa pa. 19Am ori o nikarahet na no niyokodan na no ineynapo ta a peyrarehten. Ipanci na o kapipowa da no anak da kawakwak da. 20No kanang rana am nimatazak a tao si Moyse. Apiya o kamahamahakay na. Ikatlo na vehan am nitayo da do vahay da a peyveyveknen. 21Marateng rana o araraw no nipasazokaw da sya am macita na no mavakes a anak na ni Valaw. Am ori o nyahapan na sya azwazovwen a kabnek na sya anak na. 22So ninanawan da sya no iwawalam da do Ayci. So ikateneng na mapehtaw so ciring a mateneng do ahahapan na so vazay na.

23“Sikapat a ngarnan (40) o kakawakawan ni Moyse am naknakmen na o kangay na tomita so keylyan na Isedi a tao. 24Makaranes am to na cita o asa ka keylyan da ji dasnesnekan no tao do Ayci. Am ori o nyangay na mabong no keylyan na, kazakat na so tao do Ayci. 25O nakenakem na ni Moyse am, ‘Ala katenngan da yaken no keylyan namen a nipamnekan na ni Ama ta do to a makasidong sira do peyrarehten da sira no tao do Ayci.’ Am ji da tenngi ori no keylyan da. 26Ikadwa na araw am macita na o rarwa ka keylyan da meyliman. Am ori o nipeyyawwan na sira. Maniring jira am, ‘Manga kahakay, inyo rana am kamo meykeylyan. Ikongo nyo ipeyliman.’ 27Am o mapeymetdeh so kararay na am nimapadondon si Moyse. Maniring jya am, ‘Sino nimanci nimo a yamyokod nyamen. 28Mo zakaten yaken a akman so nizakat mo no kakyab a asa ka tao do Ayci?’#7:28 Soayci Ci 2:14. 29Mamizing na ni Moyse am malalayo a komaro rana do Ayci a mangay meyvahay rana do Miteyang a ili, kapeytaodtod na dang so rarwa ka mahakay.

30“Mahatas rana o sikapat a ngarnan (40) awawan am mangay si Moyse do kabwan no nihakawan no tao a meyngaran so Sinay a tokon. So nipakacita na dang so asa ka tinsi amyan do amlila tazici. 31Macita na ori ni Moyse am mina to ogto a kapeypasngen na tomita sya. Karahan am to na amizing o ciring na ni Ama ta do to a manci no, 32‘Yaken rana am Tao do to da yaken no ineynapo nyo si Apolahan a kani Isa kani Yakebo.’#7:32 Soayci Ci 3:6. So nizikzik na ni Moyse a maonib nya. Ori ji na nitomitai sya. 33Maniring pa jya si Ama ta do to am, ‘Pakaro o tokap mo, ta o mo peytatankan eya am yako yanan. 34Ko nimacita rana sira o ko yaponged a tao a yamyan do Ayci. Ko nimamizing o da ipasyasi jyaken, do na katey yaro no alalaw da. Am ori o ko ipeygegcin a mapasaway sira do da peyrarehtan sira no tao do Ayci. Ko tovoin imo sicyaikwaya a yamangay omagag sira do Ayci.’#7:34 Soayci Ci 3:5,7,8,10.

35“Si Moyse rana am ji dakzan no keylyan na a somidong sira. Maniring sira am, ‘Sino nimamnek jimo a yatomalamozong nyamen.’ Am iya rana am nipamnekan ni Ama ta do to a amyokod nira a komaro do Ayci, do kanisomidong na sya no tinsi a nimacisirsiring jya do amlila tazici ang. 36Si Moyse o nitomirara so ineynapo ta a komaro do Ayci. So nikaro no mapeyzokab a vazay na, no kaji da pa ngarwan do Ayci a kano kapangonong da do meyngaran so Mabazangbang awa kano keyyan da pa do kabwan no nihakawan no tao so sikapat a ngarnan (40) so awawan. 37Si Moyse o nimanci nya do Isedi a tao so, ‘No makwa am amyan pa do sivosivovoong nyo so panoyonoywan na so ciring ni Ama ta do to a tovoin na jinyo akman jyaken a nitovoy na jinyo a Isedi.’#7:37 Sen Ming Ci 18:15. 38Si Moyse o nipacisirsirngan no tinsi do tokon a meyngaran so Sinay, no keyyan da pa no ineynapo ta do kabwan no nihakawan no tao. Iya o torwan na no nivatvatkan a to meyyonong a Ciriciring ni Ama ta do to a nitaid na jyaten.

39“Am ji da nyamizing si Moyse no ineynapo ta, ta manakem da o kapeysinaoli da pa do Ayci. 40Amyan pa si Moyse do tokon am nimangay sira do kakteh na a meyngaran so Yalon a manci no, ‘Ipamaring mo pa yamen so iraralay namen an, a kapangonong na nyaten do rarahan. Ta namen jyatenngi rana o vazay ni Moyse a niomagag jyaten do Ayci.’#7:40 Soayci Ci 32:1. 41So nipamaring da so likta baka a iraralay da a papazosan da, kapamaring da so kanen a somaray no nipariparing da a iraralay da. 42Am ori o nikarwan na jira ni Ama ta do to, ta ioya na sira a omraralay no mata no hanit akman so nivatvatkan da no panoyonoywan na so ciring ni Ama ta do to a manci no,

‘Inyo rana Isedi a tao am nimanzakat kamo so vinyay a ipazos nyo do iraralay nyo no keyyan nyo pa do kabwan no nihakawan no tao so sikapat a ngarnan (40) so awawan. Am beken a yaken o nitorwan nyo nya.

43Nipalolo nyo o vahay no iraralay nyo a meyngaran so Molo a kano akmey mata no hanit a meyngaran so Layvan. Niparing nyo sira ori a iraralay nyo. Am ori o angayan ko ninyo do Papilon a ili.’ ”#7:43 Yamose 5:25-27.

44Maniring pa si Setiven am, “No kanang na am amyan so vilad a niparing da a panaralayan da no ineynapo ta. Ori rana am inarahen da o niyokodan na ni Moyse ni Ama ta do to, ipakateneng da do kaji na ngarwan jira ni Ama ta do to. 45Macipalit rana si Jyesoya ji Moyse am palolwen da rana o nipariparing da panaralayan da a yangay do ili ta ya. Nibalinas da sira o beken a tao do Yotay, ta nisidong na sira ni Ama ta do to. Am ori o nipakaranes da rana jya. O nipariparing da panaralayan am mangay do araraw no ipeypanirsirngen ni Tawey. 46Nikaglaw na si Tawey ni Ama ta do to. Am ori o nipancyan na nya ni Tawey ji Ama ta do to so kapamaring na so apiya raralayan da nya. Iya rana am niraralay na no kakwa ni Yakebo. 47Am ji na mya ni Ama ta do to. Ta o anak na ni Tawey a meyngaran so Solomen am ori o nimakaparing sya.

48“Am si Ama ta do to rana am ji meyvahay do nipariparing da no tao a vahay. Ta akman so nivatvatkan no panoyonoywan na so ciring na no kakwa. Maniring am,

49‘O teyngato rana am lisnan ko. O teyrahem rana am pazasagan ko so ai ko. Akman so wanjin paringen nyo a peyvahayan ko a kano peywalaman ko.

50Yaken saon o nimangamaog so karawan eya am.’ ”#7:50 Isayya 6:1-2.

51Maniring pa si Setiven am, “Inyo rana ji mangap so ciring a tao am kamo meyyangay a kano ji manaralay a tao a ji ngahap so ciriciring ni Ama ta do to. Ta nyo to nginara sira o ineynapo nyo a ji ngahap so Seyzi. 52Amyan so asa ka panoyonoywan na so ciring ni Ama ta do to a ji da nipakakasi no ineynapo nyo an? Yabo. Niwakwak da sira o meylimwang no omanam a mai a Misayya. Iya rana am tey yapya o nakenakem na a omahap so vazay ni Ama ta do to a nipacinginangina nyo a niwakwak nyo. 53Inyo o nitorwan da nya no tinsi so iwawalam ni Ama ta do to am nyo ji peyvazaya.”

No kawakwak da si Setiven

54Mamizing da no panipanirsirngen no tao do Yotay o ciring na ni Setiven am meyoyaoya sira a mangisem. 55Am nioyatan no Seyzi si Setiven. Tangarahen na o hanit am macita na o azwazway ni Ama ta do to a kani Yeso a meytatanek do wanan na ni Ama ta do to. 56Maniring si Setiven am, “Ko macita o teyngato a yameywang. O Nipamnekan ni Ama ta do to a tao am yameytatanek do wanan na.” 57Amlololos sira somengseng do cicilwan da kakarakararwa da ji Setiven a rakpen, 58kalolo da sya a yangay do asked no ili da kabhebhes da jya, kazakat na rana. O nitorwan da so nizpi a tao a mangamaog so karatan na ni Setiven am nitoro da o talili da do asa ka malavayo a tao a meyngaran si Sawlo a citahen na a kapacyangay da a ombhebhes jya. 59Abhebhesan da si Setiven am meynozi. Maniring am, “Mo Yeso, Panirsirngen ko, ahapen mo o pahad ko an,” 60a kapeylilitod na amlolos. Maniring am, “Mo Panirsirngen, ji mo naknakma o raraten da jyaken an.” Teyka na ipanci am mawakwak rana.

Currently Selected:

Nimlivolivon 7: snt

Highlight

Copy