Nimlivolivon 6

Nimanma nipamnekan da a somidong sira do vazay da

1No kanang rana am meyparo sira omraralay ni Yeso. Am amyan so tao do Yotay a mapeyciring so ciring da no Sila a meyoyaoya. Ta ikarahet da sira o tao do Yotay a mapeyciring so ciring da no Sipolay. Ta ano meyvonong sira so isidong da sira am ji da pa vononga sira o vao a mavakes a meyzezyak so ciring da no tao do Sila. 2Am ori o nilovotan da so aro a sinjya no rarwa so ikakarwan a nipamnekan ni Yeso a omlivolivon no ciriciring na a kapanci da nya jira so, “Si iptad namen o kapeylimwang namen no ciriciring na ni Ama ta do to a amvonong so isidong ta so tao am marahet o akman sang, ta ikasanga namen. 3Am ori o ipamnek nyo so papito a ka tao a katenngan no tao apiya so icicirawat a kano mateneng a oyatan no Seyzi, ta sira rana o to namen rana pahanhana a omvonong sya. 4Am yamen rana am kasazap namen so kapeynozi a meylimwang no ciriciring na ni Ama ta do to.”

5Mamizing da no aro a sinjya am mamimin sira amya sya. Am ori o nipamnekan da ji Setiven, ta meysominogat o nakenakem na ji Ama ta do to a oyatan no Seyzi, a kapamnek da pa ji Veydipo a kani Polokelo a kani Nike a kani Timen a kani Pamona kani Nikela. Si Nikela rana am beken a tao do Yotay, ta tao do Antia a mahap rana so iwawalam da no tao do Yotay. 6So nipancyan da nira meytatanek do tangain da no nipamnekan ni Yeso a omlivolivon no ciriciring na a meynozi nira maparapong so lima da jira ipowyat da sira do akman sang a vazay da.

7Am ori o nipeylimwang na rana no ciriciring na ni Ama ta do to. Am ori o to da raparapai jira no omanoyong ji Yeso do Yelosaleng a karo da rana. Tana mapatanatanang so nakem da si Ama ta do to am aro sira omanoyong rana ji Yeso.

No karakep da si Setiven

8Si Setiven rana am aro mapeyzokab a vazay na do tangain da no tao, ta sidongen na ni Ama ta do to a kowyat na jya no Seyzi. 9Am amyan so tao a macioya jya a somkad jya. O tatasa jira am tao do Yotay apo do Cidinay a kado Yadisanta. Sira rana am manaralay do ngaranan da so Peyneynozyan da no somaliway rana tao. O karwan da am tao do Yotay apo do Cidicya kado Yasiya. 10Am ji da tenngi a pasapan o ciring ni Setiven, ta nipanta na no Seyzi so teneteneng na. 11Am ori o nipeykala da so tao a katoro da jira so nizpi a meykala so karatan na ni Setiven. Maniring sira am, “O tao rana ya am namen nimamizing a yamraherahet si Moyse a kani Ama ta do to.” 12Ori o nisozi da no aro a tao a kano kamanrarakehan a kano mangnanao no iwawalam ni Ama ta do to. Ori o nirakpan da si Setiven a yangay do rako a peykeykaygyan. 13So niyan da do dang no nipanta da so nizpi a tao a mangamaog so malas a ciring a iraherahet da sya. Maniring sira am, “O tao rana ya am yamangday a yamraherahet so rako a panaralayan ta ya kano iwawalam ni Moyse. 14O nimamizing namen a nipanci na am si Yeso a tao do Nasale am kavahen na o rako a panaralayan eya, kablis na do iwawalam ni Moyse a nitaid na jyaten.” 15So nikamimin da no myan do peykeykaygyan a tao a tomita si Setiven. Karahan am macita da o moing na akmey moimoing no tinsi.

Currently Selected:

Nimlivolivon 6: snt

Highlight

Copy