Nimlivolivon 5

Malas a vazay da Ananiya kani Saveyla

1Am amyan so asa ka tao a meyngaran si Ananiya kano mavakes na meyngaran so Saveyla. Sira rana am nipamalit da so nizpi o nihakawan da. 2Nipeysirisiring da na meyyaven do vahay o kavezed da so katey no nizpi. O mapanpan am ori o nitoro ni Ananiya jira do nipamnekan na ni Yeso a omlivolivon no ciriciring na. 3Maniring jya si Pite am, “Mo Ananiya, ikongo mo apyan si Satan a yamapasala so onowned mo a yaomalalas do Seyzi, do mo katayo so katey no nizpi a ngina no nihakawan nyo. 4No kaji nyo pa macinginanginan no nihakawan nyo am inyo an o tomalamozong nya. Am nyo ipamalit rana so nizpi am inyo saon o maponged nya am. Am ikongo nakenakem mo ya. Beken a mo alalasan o tao an, ta mo alalasan si Ama ta do to.”

5Mamizing na ni Ananiya o ciring ni Pite am mavazakwang a kawakwak na. So nikamogaw da no tao a makamizing sya. 6Meyratateng am pongosan da rana o kataotao na no milakayob no malalavayo a mahakay a kangay da rana nya ibobo.

7Hatasen na o ikatlo na vatvatek am mai rana o mavakes na. Am ji na tenngi pa o vazay ang. 8Maniring jya si Pite am, “Manoyong ya karwaro no ngina no nihakawan nyo?” Maniring am, “Noon, manoyong ori.” 9Maniring si Pite am, “Ikongo nakenakem nyo. Nyo kalalas do Seyzi ni Ama ta do to. Manngwa, ‘Abo oyyan na nyamen ni Ama ta do to,’ kwan nyo? Cita pala o yanimbobo no mahakay mo a yakai pa. So ikakman mo sang a yangay da ibobo.” 10Karahan am mavazakwang rana a mawakwak o mavakes ang. Somdep sira o malalavayo a tao a tomita sya am nimawakwak rana kahap da sya ipakowbot a mangay ibobo do katangked no mahakay na. 11Mamizing da ori no omraralay ni Yeso a kano karwan no tao am tey maonib sira.

Mapeyzokab a vazay da no nipamnekan na ni Yeso a omlivolivon no ciriciring na

12Aro mapeyzokab a vazay da no nipamnekan na ni Yeso a omlivolivon no ciriciring na a nimacita da no taotao. Mangday sira so araraw o omraralay ni Yeso a malwalovot do macinapnap do rako a panaralayan a ngaranan da so Vahay na ni Solomen. 13Ikanig da sira no tao do Yelosaleng. Am ji dadkeci no tao o kapacivaoy da jira. 14Am nimeyparo sira omanoyong ji Yeso a mavakes a kano mahakay a macirapa jira. 15Macita da o mapeyzokab a vazay da no nipamnekan ni Yeso a omlivolivon no ciriciring na am ori o nyangayan da no meykeyngeyngen a tao do ireyrayan da kapangay da sira do siri no rarahan. Ta tana avwavong na pa ni Pite a mangay jira am anoyngan da o kapya da. 16Amyan so aro a tao a meyvahay do peycyeylilyan na masngen do Yelosaleng a nimai no meykeyngeyngen a tao a kano nikovotan no kalamsoyan ni Satan a tao a kamimin da nimapya rana.

No kapakakasi da so nipamnekan ni Yeso a omlivolivon no ciriciring na

17O rako a panirsirngen da no mapatanatanang so nakem da si Ama ta do to a kano kararay na macyagom do Satokay am ikeynanahet da sira o nipamnekan ni Yeso a omlivolivon no ciriciring na. 18Am ori o nirakpan da sira kaneb da jira do pamemtengan. 19Mahep rana am amyan so tinsi ni Ama ta do to a nimiwang do pamemtengan a kapalolo na sira makowbot. Maniring jira am, 20“Mangay kamo do rako a panaralayan a meylimwang nya do taotao so omagaz do to meyyonong a ikavyay no pahad.” 21Madagdag rana am somdep sira do rako a panaralayan a mangnanao.

Meyratateng am o rako a panirsirngen da no mapatanatanang so nakem da si Ama ta do to a kano kararay na am lovoten da sira o kamanrarakehan da no tao do Yotay a kapanovoy da so tao a mai no amyan do pamemtengan a nipamnekan ni Yeso a omlivolivon no ciriciring na. 22Am makaranes sira dang am abo rana sira. Am ori o nipeyoli da rana a mangay manci nya do aro a tao do rako a peykeykaygyan. 23Maniring sira am, “Namen makaranes do pamemtengan am namen macita o pangengneban na yamakagi. O mamzamzat am yamyan do pantaw na. Namen iwangan am sira abo rana o tao do sahad na.” 24Mamizing da no panirsirngen da no mamzamzat do rako a panaralayan a kano panipanirsirngen da no mapatanatanang so nakem da si Ama ta do to am ikarahet da, ta ji da tenngi o nyangayan da no nipamnekan ni Yeso a omlivolivon no ciriciring na. 25Am keyyan no asa ka tao a nimai a manci nya jira. Maniring am, “O nyo nyaneban a tao am sira mangnanao so tao do rako a panaralayan.” 26Am ori o nyangay da no mamzamzat a kano panirsirngen da amrakep sira. Am ji da bakbaki sira, ta ikamogaw da o tao. Ta ihawa da sira gomsagseh jira.

27Pasdepen da sira do rako a peykeykaygyan a kapatanek da sira do tangain da kapacici na sira no rako a panirsirngen no mapatanatanang so nakem da si Ama ta do to. 28Maniring jira am, “Namen nipaziman jinyo o kaji nyo mangnanawan no omagaz ji Yeso am ikongo nyo pangnanawan pa nya do Yelosaleng. Ikongo nyo pancyan nyamen a nimwakwak sya.”

29Maniring si Pite a kano kararay na nipamnekan ni Yeso a omlivolivon no ciriciring na am, “Jyabo kaji namen ngamizngan si Ama ta do to a. Ta amizngan namen so tao. 30Si Yeso rana nipadket nyo do jyojika niwakwak nyo am yana rana nivyay no Tao do to da no ineynapo ta. 31So na rana iyan do wanan na ni Ama ta do to a Panirsirngen ta a yamapatazadang jyaten do teyngato. Na kakzeben yaten a Isedi a tao a mamlis so nakenakem, ta ori o ivonas na so raraten ta. 32Am ori o namen peylimwangan no akman sya vazay. Ta yamen a kano Seyzi o yongkad na. Ta o Seyzi rana am na itoro ni Ama ta do to a macikaop do mahap so ciriciring na tao.”

33Mamizing da no panipanirsirngen am somozi sira. Am ori o ninaknakman da so kazakat da sira. 34Am amyan so kararay da meyngaran si Cyamadi. Iya rana am tao a macyagom do Vadisay a mangnanao no iwawalam ni Ama ta do to. Iya rana am ikanig da no tao. To rana meytatanek si Cyamadi a manci no tao a mapowbot so nipamnekan na ni Yeso. 35Maniring jira am, “Inyo rana Isedi a tao am pakapyahen ta o ahahapan ta sira ya. 36Ta no keypisa am amyan so tao a nimai a meyngaran si Teota a mapakarakarang so kataotao na kapacilolo da no kakapatan a poo (400) a tao. Am wakwaken da si Teota am to sira na meyvwak o nimacilocilolo jya tao, kabo na rana no angangayan na. 37Meyratateng am amyan so asa ka tao do Cyadidi a meyngaran so Yota. No kano nang am ahapen no seyvo o vilavilang no tao do peycyeylilyan na. Aro nilittan na tao a macihza jya. Am wakwaken da am to sira na meyvwak o macilocilolo jya tao. 38O ko ipanci jinyo sicyaikwaya am to tamo macipanadngi sira. To ta na pasawaya sira. No si apo do tao o vazay da am to meycyabobo rana. 39Am no apo ji Ama ta do to am jyabo kapakaharag ta sira a. Ta o vazay ta rana am ta akmey to maciliman ji Ama ta do to.” So nyamizngan da so ciring na ni Cyamadi.

40Karahan am pasdepen da sira bakbakan, kapanci da nira ji rana meylimwang no ngaran ni Yeso a kapasaway da rana sira. 41Karwan da o rako a peykeykaygyan am masaray sira. Ta nakenakem na ni Ama ta do to o karahet da sira a meyhanhan ni Yeso. 42Mangday so araraw kangay da do rako a panaralayan a kado kavahayan a mangnanao so tao a meylimwang no Mapasaray a Ciriciring ni Yeso, do kanoyong na Misayya a nitovoy ni Ama ta do to do teyrahem.

Currently Selected:

Nimlivolivon 5: snt

Highlight

Copy