Nimlivolivon 8

1-3Yamyan so amraralay ni Yeso a nimonong do inawan na ni Setiven. So nizezezeng da amlavi jya. Am si Sawlo rana am nisaray na o kazakat da sya. Nimapo no kano nang o kakdekdeng da pa a mapakakasi so amraralay ni Yeso a tao do Yelosaleng. Tey makdeng si Sawlo a mapakakasi sira, kakakaday na so kavahayan da peycyarakrakpen so mavakes a kano mahakay a kalolo na sira a pasasaziden a yangay na do pamemtengan. Am ori o nipeyvwak da rana no amraralay ni Yeso a mangay do peycyeylilyan na do Yotay a kado Samadiya. Am o nipamnekan ni Yeso a omlivolivon no ciriciring na am todavezed do Yelosaleng.

No kapangnanao ni Veydipo do Samadiya

4O nimeyvwak a nimraralay ni Yeso am mangay sira do peycyeylilyan na a meylimwang no ciriciring na ni Ama ta do to a omagaz ji Yeso. 5O asa jira am si Veydipo am nimangay do asa ka ili do Samadiya a meylimwang no kanoyong na ni Yeso a Misayya a nitovoy ni Ama ta do to do teyrahem. 6So ikaro da no tao a omanoyong do nipanci na jira ni Veydipo, ta nimacita da o mapeyzokab a vazay na. 7Ta aro sira o tao a nipamozwawan na so kalamsoyan ni Satan. Mavozwaw sira am amlololos sira makowbot do kataotao no tao. So niyan da no aro a makasapa a tao a nimapya rana. 8So ikasasaray da no tao do dang.

9Amyan so asa ka tao a meyngaran si Simong a meyvahay do ili ang. Amyan so vazay na ikalak da no tao. Pahamahen na o kataotao na a manci no kaizay na tao. 10So ikamimin da no tao do dang, tana maizay a tao a tana todna ka tao am ikakza da amizngen, ta patolinen da oyatan na ni Ama ta do to. 11Ikongo do mownay rana ori a meyvazay no mapangyangyalak a vazay, am ori o ikaro da no tao a nimacilolo jya. 12Ipeylimwang na ni Veydipo o Mapasaray a Ciriciring na ni Ama ta do to a omagaz do italamozong na kano ngaran ni Yeso Kizisto am anoyngan da no nimyan dang a mahahakay a kano mavavakes kataktak da jira. 13Tana si Simong am mina to na nganoyngi rana a kataktak da jya. Meyratateng am macihza rana ji Veydipo. Macita na o mapeyzokab a vazay na ni Veydipo am nisavasavak na.

14O nipamnekan ni Yeso a omlivolivon no ciriciring na amyan do Yelosaleng am mamizing da o keyyan no tao do Samadiya a mahap rana so ciriciring na ni Ama ta do to. Am ori o nitovoyan da si Pite a kani Yowani a mangay jira. 15Makaranes sira dang am ipeynozi da sira o omanoyong rana ji Yeso a keyyan na jira no Seyzi. 16Ta no kano nang rana am ji pa nimeyhekas jira o Seyzi do mina kataktak jira no ngaran na ni Yeso a Panirsirngen ta. 17Am ori o nipaoptan da jira so lima da da Pite a kani Yowani a ipanlanlag da. Ori o niyan na rana jira no Seyzi.

18Citahen ni Simong o nipaoptan da so lima da Pite a kani Yowani a yanan na rana no Seyzi am ipanta na sira so nizpi. 19Maniring am, “Itoro nyo jyaken oyowyat ori a torwan ko inyo so nizpi, kapaopta ko so lima ko do tao a keyyan na rana jira no Seyzi.”

20Maniring si Pite am, “Paciralay do nizpi mo a matemtem, ta yamalas o aktokto mo do kanginangina mo so oyowyat na ni Ama ta do to no nizpi mo. 21Ikongo o mo kasngesngenan jyamen, ta na katenngan ni Ama ta do to onowned mo a yajyanoyong. 22So ipamlis mo na komaro do malas a nakenakem mo a kapeynozi mo ji Ama ta do to. Ta ala vonasen na o marahet a nakenakem mo. 23Ta na imo vaoden no mo panginanehtan do tao a kano meycyamadadayan a raraten mo.”

24Maniring jira si Simong am, “Ipeynozi nyo yaken an, kaji na meydednan jyaken no nyo ipanci ang.”

25Mateyka si Pite a kani Yowani a mangnanao no ciriciring ni Ama ta do to am meyoli rana sira a mangay do Yelosaleng a kapeylimwang da no Mapasaray a Ciriciring na ni Ama ta do to do peycyeylilyan na do Samadiya a nipeyliktawan da ili.

Si Veydipo a kano tao do Isopiya

26Amyan so asa ka tinsi ni Ama ta do to a nimangay ji Veydipo. Maniring am, “Mangonong ka do rarahan apo do Yelosaleng a mangay do Cyasa.” Jyasangibi no tao a panahanan. 27-28Karahan am mangay rana si Veydipo. Amyan do rarahan am macita na o asa ka maizay a tao do Isopiya a tomalamozong no nizpi no panirsirngen da mavakes a meyngaran si Kantaci. O yangay na do Yelosaleng am iraralay na si Ama ta do to. Meysinaoli rana mangay do ili da am vilangan na do aleleh na o vakong na no panoyonoywan na so ciring ni Ama ta do to a meyngaran si Isayya. 29Maniring o Seyzi ji Veydipo am, “Mangay ka macikasngen do aleleh ang.” 30Am ori o nipalayo na a mangay ni Veydipo. So nipakamizngan na so tao ang a omvilang do vakong ni Isayya. Maniring jya si Veydipo am, “Mo katenngan o mo vilangan ang?” 31Maniring am, “Si myan so amnanao jyaken am ori o ipakateneng ko jya.” Am ori o nipancyan na ni Veydipo a somakay do aleleh na. 32O vilangan na no tao do Isopiya a ciring ni Ama ta do to am,

“Iya rana am akmey kagling a alaken da zakaten a to norotoro no kataotao na. So icyakma ney likta kagling a tedtedan da so bobow a ji meyzezyak.

33No kapeymetdeh da sya am abo macingosongoso nya. Abo o tomapil jya sivosivovoong na, ta makeykai o allallag na mabo do karawan.”#8:33 Isayya 53:7-8.

34Maniring o tao do Isopiya do pacicyan na si Veydipo am, “Pancyan pala jyaken o na pakacirngan sya no panoyonoywan na so ciring ni Ama ta do to eya. Paingen na jya an? Ano paingen na do karwan no tao.” 35Karahan am ipanci na ni Veydipo o ka si Yeso na no agagazan no nivilangan na a kananao na sya no Mapasaray a Ciriciring ni Yeso. 36Meyratateng am manahan sira do masngen do ranom. Maniring o tao do Isopiya am, “Yamyan jya so ranom. Apya o kataktak mo jyaken do jya?” 37[Maniring si Veydipo am, “Si manoyong o onowned mo am ori o taktakan ko jimo.” Maniring am, “Ko anoyngan si Yeso a Kizisto a Anak ni Ama ta do to.”]

38Am ori o nipaseykedan na so aleleh a kapacihza na ji Veydipo a mangay do ranom a kataktak na jya. 39Karwan da rana o ranom am ahapen na no Seyzi si Veydipo. Am ori o ji na nimakacitai rana sya no tao do Isopiya. Mangay rana ori am masaray rana o onowned na. 40Nimacita da rana no tao si Veydipo do Atsoto a ili a kalivon na so peycyeylilyan na peylimwangan no Mapasaray a Ciriciring na ni Ama ta do to mangay no kapakaranes na rana do ili do Kaysadiya.

Currently Selected:

Nimlivolivon 8: snt

Highlight

Copy