maluko 9

1isi ivaha mi'usni to iesu ho yainca: <te'o bumemeala eʉsvʉta muu, 'emo yac'ʉ tan'e ci cou, no auyusi no mcoi pantote baito to hpʉhpʉngʉ to hamo hote mahafo to tonʉ ho esmi.>

aezuhu 'o mi'ausna

(matai 17:1-13; luka 9:28-36)

2ataveisi no mʉnmʉhi, hafa to iesu 'o petelo, yakovu ho i'o yohane, ae'ʉe'ʉhʉ bohsifou to pepe ci hcuyu. yonto tuhcuhe ho aezuhu 'o mi'ausnasi. 3mo psoecingkoya no fʉecʉ'za 'o yʉsʉsi; ta hpʉhpʉngʉ uk'a cimo ahtu fʉecʉ'zahe ci yʉteʉ. 4'emo tuyu ci tesi ihe aemʉ'ava aiti 'o moose ho 'iliya mo yupeahngʉyʉ 'o iesu. 5mi'usnu to iesu 'o petelo ho yainca: <sensei, a'ʉmtʉ ʉmnʉ ho mito yontan'e! poa mooyai note tuyu ci hnou a'mi, faeni suu namo coni, faeni to moose namo coni, faeni to 'iliya na mo coni.> 6'e petelo ho i'o mocmo ci cou mo acʉhʉ na'no ma'sasmoyo, o'a ihe maka cohivi na tehe pat'ausna.

7panto cmʉcmʉ cimo tofeʉ'sʉ. akameosʉ. i'mi to cmʉcmʉ 'o fihngau isi yainca: <zou songohia ci oko'u eni, temula talʉi!> 8mo acʉhʉ miukukuyungu, at'inghi uk'a ci ihe aiti ci mocmo, i'oc'o iesu 'omo no'upu.

9ne micu toyovcu to hcuyu, isi eutotaveiya to iesu 'o tesi: <auyusi no o'amocu te i'mi to mcoi ho smoevovei 'o okocou, teav'as'a ake'a eʉsvʉta no mocmo ci cou 'e imu aiti.>

10mo tmalʉ to hia eutotavei to iesu, mo at'inghi yupa toʉsvʉsvʉtʉ ho mainca: <cumas'a na e'a'ausna ta i'mi no mcoi ho smoevovei?> 11ihe ivaha tuocosi 'o iesu: <mo mainenu ci ihe yainca to lema'cohio seiso te ahtuo'te auyu cmʉ'ho 'o 'iliya?>

12yut'inga to iesu: <'ate asansano auyu cmʉ'ho 'o 'iliya ho tasucza 'e acʉcʉhʉ; at'inghi, mainci isi yainca to seiso te ahtuo'te tiou no 'atutumzo 'o okocou ho noa ciha? 13te'o eʉsvʉta muu, 'amicu cmʉ'ho 'o 'iliya, at'ingha ihe yaino koyuhe na ti'a'ausna, aʉlʉ mais'a 'o isi engha to seiso ci a'a'ausna.>

aotothoma 'o isi cʉnghi to hicu ci oko

(matai 17:14-21; luka 9:37-43)

14ne micu yuovei to ihe yoni to mocmo ci tesi, aiti ho ihe paikuyungvi tomo botngonʉ ci cou, piyo ci lema'cohio seiso mo seolʉa no yupa eehcʉvho 'o tesi. 15ne ihe aiti to botngonʉ 'o iesu acʉhʉ na'no yamci; cu acʉhʉ smo'usnu ho yungeou to iesu. 16isi tuocosi to iesu 'o tesi: <cuma na imu yupa 'eehcʉvha?>

17ta taico tamo botngonʉ panto cihi ci cou isi yainca: <sensei, os'o hafa 'o oko'u ho baito suu; maica ho isi cʉnghi to hicu no tmusngʉsngʉ, o'a mo meelʉ ya'ei. 18cono ho lasi pohcingha to hicu, lasi ebakneni ta ceoa, poa psoefeosʉ 'o ngayosi, sikiki ho psoekʉhtosʉ. os'o 'ucia poa peobangneni ta tesisu 'e hicu eni, at'inghi uk'a ci tonʉ hin'i.>

19isi mi'usni to iesu ho yainca: <'e yatatiskova ta hpʉhpʉngʉ maitan'e mo mainenu na hia uk'a singkoo! mate'o noa'a'vi muu? mate mainenu na hia noana'o ho te'o uveica muu? hafa uhtan'e na oko!> 20ihecu hafa uso 'o oko.

ne isi teolʉi to hicu 'o iesu, osnia poa kuici psoekeukeucu 'o oko, oefʉ'ʉ ta ceoa ho tmaifeifei'i, ho feosʉ 'o ngayo. 21isi tuocosi to iesu 'o amosi: <micu mainenu na hia noana'o 'e tma'congosi?>

isi yut'inga: <mo ahoi ne moson'a oko hocu maica. 22isi siho 'ucia opcoza to hicu, to'seni to puzu. honghucveni to chumu, hoci panonteko peelʉi hioa. teko'so coveoza a'mi, to'usni a'mi!>

23yainca to iesu: <'aeno a'ʉmtʉ, hociko meelʉ! inamo yaa singkoo ci cou, te acʉha peelʉi.>

24mo osni tmunoi 'o amo to oko: <os'o taa'uzva. at'inghi o'amo amso co singkoo'u. teko'so to'usni a'o!>

25aiti to iesu homo yu'ekuyungu 'o botngonʉ ci cou, cu pashʉi 'o h'aokuv'o ho yainca: <hicu no tmusngʉsngʉ, te'o pashʉi suu, i'mi ta feango ta oko ho mongoi, 'otenas'a ivaho yʉmeʉmʉ!>

26mo i'nʉskʉ mukeici 'o hicu, poa kuici tmaskeukeucu 'o oko, cu yuyafo to feangosi. totiski no micu mcoi 'o oko, mo acʉhʉ mainca: <'amicu mcoi si oko!> 27at'inghi isi tiemuca e'tʉi to iesu. to'usni ho ec'ʉvi. micu yac'ʉ 'o oko.

28ne micu yʉmeʉmʉ to aemana 'o iesu, ihecu auc'oc'ova tuocosi to tesi: <mainci imza o'te peelʉi peobanga 'o hicu ic'o?>

29yainca to iesu: <mac'o noe'ocʉ no 'inoli niante peelʉi peobanga 'emo maica ci hicu, uk'a cite mocmo ci ti'a'ausna.>

i'vaha eyoca to iesu na tasi hia mcoi

(matai 17:22-23; luka 9:43-45)

30cu mongoi to hpʉhpʉngʉ to ic'o, mine ngalilaya. o'aisi 'ucia poa cohivneni no mocmo to iesu na tesi emo'a'ausnu, 31maica ho isin'a seolʉa no po'pa'cohivi 'o tesi. isi yainca: <tena toveineni ta emucu ta cou 'e okocou; tehe opcoza, miteuhi no ataveisi no mcoi, tena smoevovei.>

32at'inghi. o'a ihe ta'hongi na e'ausna ta e'e tan'e, o'a ihe h'unasa seecʉ'ha tuocosi to iesu.

siya namo someoisa

(matai 18:1-5; luka 9:46-48)

33mo esmi ne kapenong, ataveisi ne micu yʉmeʉmʉ to aemana isi tuocosi to iesu 'o tesi: <cuma na imu yupa eehcʉvha ne mo mine ceonʉ?>

34uk'a cimo ake'i ya'ei, maica nemo pcaceoni mo yupa eehcʉvho no siya namo sotaicinia. 35yusuhngu 'o iesu, cu e'usna to tuhcusi 'o maskʉ ueso ci sitoo, mi'usni ho yainca: <siya nate mici nomuyo, tena siya nate nof'uhu, te toehunga soskuskunu tamo botngonʉ.> 36micu eyoho'ʉ tomo cihi ci oko, poa yac'ʉ to taicohe, isin'a pahsaha, mi'usni 'o tesi ho yainca: 37<nomio a'o ho aʉt'ʉt'ʉca 'emo mais'a 'e oko eni, 'aisieno aʉt'ʉt'ʉca a'o. o'aisi anova tiova a'o, isi yaeza tiova 'omo popeosmuhnu a'o ci ic'o.>

tokvo'ʉ hocieno tohmʉskʉ

(luka 9:49-50)

38mi'usnu to iesu 'o yohane ho mainca: <sensei, imza aiti pantomo boemi to ongkosu ho meobango to hicu, imza potani, maica o'as'a 'oahngʉto.>

39yainca to iesu: <teav'a potani; maica uk'a ci te meelʉ titho ta ongko'u ho peispopo'e. ho osni miezuhu ekuzkuzo ho pohcinghi a'o. 40maica inamo o'te yu'hango a'to. 'amoeno tohmʉskʉ a'to. 41te'o a'ʉmta eʉsvʉta muu, 'upena na siya. hoci cohivi ho mimu tma'usnu to kilisto ho fii no cono sooetohva ci chumu, te ahtuo'te mayo no hnoo.>

e'usna no peiskuisi 'e cou

(matai 18:6-9; luka 17:1-2)

42yainca to iesu: <'upena na siya hoci poa mongoi a'o namo cihi cila hukoacumai ta sinto'u, te apuyu ʉmnʉ hoci seo'eisneni ta sʉnʉsi na fatu no huahua, ho poa sʉhcʉ'o ne mʉ'eona ne etʉpʉ. 43hocisi poa peiskuisi ta coni ta emucusu, te hitenva! hoci conci emucu ho meelʉ mayo no 'auesiesi nsou, te ʉmnʉhe nomo noemʉhʉ na emucu ho uhne vooecʉvcana. su'no 'auesiesi o'te afsi ci yafeu.#panto piyo ci tposʉ noana'o isi topuhngi ta 44 secu <to ic'o, o'amo mcoi na yoi, 'o yafeu 'auesiesi o'te afsi.> 45hocisi poa peiskuisi ta conci t'angosu, te hitenva! hoci kealeongʉ ho meelʉ mayo no 'auesiesi nsou, te ʉmnʉhe nomo noemʉhʉ na t'ango ho noa to'seni no vooecʉvcana.#panto piyo ci tposʉ noana'o isi topuhngi ta 46 secu <to ic'o, o'amo mcoi na yoi, 'o yafeu 'auesiesi o'te afsi.> 47hocisi poa peiskuisi tamo coni ta mcoosu, te yuyafi! hoci uk'a namo conci mcoo ho yʉmeʉmʉ no hpʉhpʉngʉ to hamo, te ʉmnʉhe nomo noemʉhʉ na mcoo ho noa to'ayumoneni ne vooecʉvcana. 48to ic'o, o'amo mcoi na yoi, 'auesiesi o'te afsi 'o yafeu.

49<'emo macicihi te acʉhʉ noa hʉsvʉta no yafeu, mais'a isi titheni no sieu ho sievi. 50mo ʉmnʉ ci macucuma 'e sieu, at'inghi hoci payo'a na maskisi, ten'a ti'vona niante i'vaho maski? temula mais'a a'a'ausna to sieu, yupa nananghinghia ho noteuyunu.>

Currently Selected:

maluko 9: bsnfe

Highlight

Copy