maluko 10
10
po'pa'cohivi 'ola mochi to vcongʉ
(matai 19:1-12; luka 16:18)
1mongoi to ic'o 'o iesu ho esmi to mia'usnu ne yutaya, ohpihi to c'oeha ne yolutan. mo ivaho yu'eteuyunu to isi yoni 'omo botngonʉ ci cou, isi yaica ho po'pa'cohivi to iesu.
2piyo ci coufalisai mo esmi ho baito to iesu, akoeva no akuzkuzoa 'o iesu, tuocosi 'o iesu: <tekon'a eʉsvʉta a'mi, 'o hoolicuto. isi teomneni hoci ciha to hahocngʉ na vcongʉsi?> 3isi apuya tuocosi to iesu: <isi av'a to isi pashʉya to moose?>
4ihe yut'inga: <isi teomneni to moose 'e hahocngʉ hoci tmopsʉ no tposʉ no yupeevai, tec'u peelʉi ciha 'e mamespingi.>
5isi mi'usni to iesu ho yainca: <ho isi tposi to moose 'emo maica ci h'oesvʉta mo i'mi ho mimu angu kʉhtosʉ ci 'tohʉngʉmu. 6at'inghi no nia ahoisi, ho ohon'a teyai 'e hpʉhpʉngʉ, ohsi teyai to hamo 'e cou, mo yaa hahocngʉ yaa mamespingi; 7i'mi tan'e, 'e cou te mongoi to maameoi, tmuepohʉ 'o vcongʉ#panto piyo ci tposʉ noana'o uk'a ci <tmuepohʉ 'o vcongʉ>., 8micu cono feango 'emo yoso. homoeno maica, o'ana mo i'vaho yoso 'e navconga, mamicu coni ci feango. 9ko'koeno, na isi yupa paepo'usna to hamo, o'ate eevaza ta cou.>
10ne micu yʉmeʉmʉ to aemana, ihe ivaha tuocosi to tesi na eni. 11isi esansani to iesu: <acʉhʉ 'e haahocngʉ, hocisi teongasi na vcongʉ ho ivaho mevcongʉ no mocmo ci mamespingi, zoucu kuisi no mseezo, cu akuzkuzoa 'o vcongʉ; 12hoci mongoi ta hahocngʉ 'e mamespingi, ho ivaho mevcongʉ no mocmo, zouc'o maezo kuisi no mseezo.>
tooyokeoi to iesu 'o oko
(matai 19:13-15; luka 18:15-17)
13piyo ci cou 'omo mahafo to oko ho baito to iesu, m'eya peuasa to iesu; ihe at'ingha koica to tesi 'emo maica ci cou. 14ne isi aiti to iesu mo na'no sʉ'no, mi'usni 'o tesi ho yainca: <poa uhtan'e si 'o'oko, teav'a potani, maica 'omo yonto hpʉhpʉngʉ ne pepe ci mao'o'oko 'amoeno aʉlʉ mais'a 'emo maica ci cou. 15temula atatalʉa, inamo afu'u o'te mais'a 'e oko ho tiou no hpʉhpʉngʉ to hamo ci cou, o'ate ahtu meelʉ tma'oko to hamo.> 16isicu pahsaha 'o oko, macicihi peuasa ho tooyokeoi.
ngoveoa tamo yuyupasʉ
(matai 19:16-30; luka 18:18-30)
17moc'on'a aʉlʉ e'ohʉ 'o iesu, panto cihi ci cou mo smo'usnu, top'ungu to tuhcu to iesu, tuocosi: <mou'ʉmnʉ ci sensei, cuma na nte'o hioa niante'o meelʉ mayo no 'auesiesi nsou?>
18isi tuocosi to iesu: <mainci osko aac'o yainca a'o mou'ʉmnʉ? tapeoha 'o cihi ci hamo, uk'ana cimo mou'ʉmnʉ. 19osko ahtao'te cohivi 'o h'oesvʉta: <<'ote opcoi; 'ote mseezo; 'ote meo'eoi; 'ote emeknuyu; 'ote totpiei; la meot'ʉt'ʉcʉ to maameoi.>> >
20isi yut'inga to ic'o: <sensei, acʉcʉhʉ 'e h'oesvʉta eni. os'o ahoza ne mo'un'a oko ho acʉha noyʉyʉci.>
21isi teochʉmi to iesu, na'na ʉm'ʉmnʉa ta 'tohʉngʉsi, cu yainca: <mon'a coni 'omo uk'a. acʉha phieni 'o ezoezoyʉsu, faeni tomo thi'cia ci cou na peisu, tekocueno yaa yupasʉ ci teko soangva ne pepe; atavei teko to'ofeihni a'o.> 22ne isicu talʉi to ic'o 'e e'e eni, cu teoezuhu 'o sapcisi, teonanac'o hocu mongoi, maica homo na'no yuyupasʉ.
23isi mikuyungvi to iesu 'o tesi, mi'usni ho yainca: <'emo yuyupasʉ ci cou a'ʉmtʉs'a songoveoa hoci meelʉ 'o'oko to hpʉhpʉngʉ to hamo!>
24mo tmayamci ta e'e to iesu 'o tesi; at'inghi isi ivaha yainca to iesu: <mao'o'oko, hoci meelʉ tma'oko to hpʉhpʉngʉ to hamo a'ʉmtʉs'a songoveoa! 25'emo yuyupasʉ ci cou hoci meelʉ tma'oko to hpʉhpʉngʉ to hamo, mo ngoveohe to lakuta hoci yʉh'ʉtʉ to koyu to feezo!>
26ne mio, mo asuhcu yamci 'o tesi, yupa tuocosʉ: <hoci maica, siya na ten'a meelʉ noa to'usni?>
27isi teochʉmi to iesu 'o tesi, yainca: <o'ate peelʉi ta cou; o'a mo maica 'o hamo, 'o hamo lasi aa'pucva peelʉi.>
28mo ecnguhu 'o petelo: <teko aiti, imzacu teongasi 'e acʉcʉhʉmza ho to'ofeihni suu.>
29mi'usni to iesu 'o tesi ho yainca: <'aeno a'ʉmtʉ, te'o a'ʉmta eʉsvʉta muu, namo afu'u nomzo a'o nomzo ta fukuin. teonʉ'vi na emoo, maanat'ohaesa, maameoi, 'o'oko, ho ina ezoezoyʉ, 30ahtuo'te yonta maitan'e ho tov'ohʉ note asuhcu man'i. tena elʉ note se'conza cite apuhngu ci emoo, nanat'ot'ohaesa, ino. 'o'oko, ho ezoezoyʉ, a'vinano te esmi no akuzkuzoa; at'inghi yono tena cmʉ'ho ci hpʉhpʉngʉ, te mayo no 'auesiesi nsou. 31at'inghi, mo botngonʉ 'o moso muyo. tenala uafeihi, 'o moso uafeihi tenala muyo.>
i'toteuha eyoca to iesu na iachi si mcoi
(matai 20:17-19; luka 18:31-34)
32to ceono emo'usnu ne 'elusalemu, mo muyo 'o iesu. mo ma'ngoheʉngeʉ 'o 'tohʉngʉ to tesi; 'omo to'ofeihni ci cou mio maica ho ma'sasmoyo. isi ivaha ese'vi to iesu 'o mo maskʉ ueso ci tesi, eʉsvʉta 'o tenasi esmiza ta feangosi ci hi'hioa. 33isi yainca: <aitis'a, ho teto emo'usnu ne 'elusalemu maitan'e. te noa phieni 'e okocou ho faeni to saisicoo ho lema'cohio seiso; tehe yʉsvʉta ho opcoza, ataveiya faeni to couyafana. 34tehe keematmohi, mi'usni ho teʉpsi, ti'usna, a'vinano opcoza; ataveisi no miteuhi, tena smoevovei.>
p'enza to yakovu ho yohane
(matai 20:20-28)
35'o oko to sipitai ci yakovu ho yohane mo uhto iesu, yainca: <sensei, panto mo coni ci temza p'enza, tata'za hociko peelʉi teomneni.>
36tuocosi to iesu: <cuma na temu 'ucia poa hioaneni a'o?>
37ihe yut'inga: <hotakocu yusuhngu no psoevohngʉ ci suoca'ha, tako'so poa su'upu a'mi, yono vhonasu namo cihi, yono veinasu nomo cihi.>
38isi mi'usni to iesu ho yainca: <o'a imu cohivi cuma 'e imu p'enza. 'o te'o ima cimo mayʉmʉ, temueno soevo'ha? 'o te'o tiova ci toonono, temueno peelʉi tiova?>
39ihe yut'inga: <'a temia peelʉi!>
yainca to iesu: <i'o te'o ima, temueno o'te anana'va ima, 'o te'o tiova ci toonono, temu yaeza tiova, 40at'inghi siya nate meelʉ suavai a'o, o'ana a'o nate meelʉ esvʉtʉ. 'e suoca'ha eni, isi ayocneni no siya to hamo, 'atasieno pafeni no siya.>
41talʉi to maskʉ ci tesi na eni, na'na ta'bubut'ua 'e yakovu ho yohane. 42i'mi tan'e, isicu eteuyuna to tuhcusi to iesu 'o tesi, mi'usni ho yainca: <imu cohivi, i'o lahe ta'unano la atʉkcʉ ta yatatiskova ta hpʉhpʉngʉ, mo yaa tonʉ no aʉt'ʉca 'e yatatiskova, 'ola papoevʉ la yaa tonʉ no esvʉtʉ ta yatatiskova. 43at'inghi, o'atemus'a maica. ta taicomu siya na te mici taicini, 'aeno siya na te toehunga soskuskunu; 44siya nate mici papoevʉ, 'aeno siya natemu soskuskunu tamo botngonʉ. 45maica 'e okocou o'amos'a cmʉ'ho ho noa aʉt'ʉt'ʉca ta cou, mate cmʉ'ho ho aʉt'ʉt'ʉcʉ ta cou, a'vinano nomio no to'usni 'e yatatiskova ho ciha 'o iachisi nsou.>
poa bohngʉ 'o bʉkngʉ ci patimai
(matai 20:29-34; luka 18:35-43)
46mo esmi to 'eliko. nete seolʉa no mongoi ta 'eliko 'o iesu ho tesisi ho i'o mo botngonʉ ci cou, panto cihi ci bʉkngʉ - zou patimai ci oko to timai, mo suaskiti to ceonʉ ho m'eya bonʉ. 47ne isi tac'ʉhi ho zou iesu ne nazalo, micu moozoyʉ mainca: <oko to tavite ci iesu, coveoza a'o!>
48ihe koicʉ tomo botngonʉ ci cou, potani homo ptaʉngʉ. at'inghi namamo asuhcu tmunoi moozoyʉ: <oko to tavite, coveoza a'o!>
49mo tosvo 'o iesu, yainca: <poa uhtan'ea.>
ihe mi'usni 'o bʉkngʉ ho yainca: <teko ma'cocoyʉ, yʉc'ʉ, 'aisi eyoho'a suu!>
50isi osnia eehocneni to bʉkngʉ 'o isi aoskopa, bifti'i, ho uhto tuhcu to iesu.
51isi tuocosi to iesu: <cuma na teko poa hioaneni a'o?>
yut'ingi 'o bʉkngʉ: <sensei, mi'o mici bohngʉ!>
52yainca to iesu: <nahocu e'ohʉ, isicu poa yov'o ta singkoosu.>
micu osni bohngʉ 'o bʉkngʉ, cu to'ofeihni to iesu ho e'ohʉ.
Currently Selected:
maluko 10: bsnfe
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan © 台灣聖經公會版權所有 2014
