maluko 15

yonto tuhcu to pilato 'o iesu ho noa yʉsvʉta

(matai 27:1-2, 11-14; luka 23:1-5; yohane 18:28-38)

1taseonasi no mivahi, mo 'aumeumeusu toʉsvʉsvʉtʉ 'o saisicoo, coolo, lema'cohio seiso, ho acʉcʉhʉ 'o ngikai, esvʉta 'o ihe ta'koeva. ihe seo'eisi 'o iesu, e'usna yaita'e, toveineni to pilato. 2isi tuocosi to pilato 'o iesu: <zou honte ta couyutaya na suu?>

yut'inga to iesu: <zou e'esu eni.>

3mo man'i ci hi'hioa to iesu 'o isi ehpʉngneni to saisicoo, 4isi ivaha tuucocosi to pilato 'o iesu ho yainca: <teko aiti, mo man'i ci kuisisu 'e ihe ehpʉngneni a'o, o'a tekoeno maka ehcʉvha?>

5mioc'o maica 'o iesu ho o'te ake'i ya'ei; isi na'na yamceni to pilato.

noa yʉsvʉta no mcoi

(matai 27:15-26; luka 23:13-25; yohane 18:39-19:16)

6cono hola meem'esa'o, 'o pilato la aacni maito lahe 'tohʉngʉ tamo botngonʉ ci cou ho poesih'i tomo cihi ci isi poekotva. 7'oc'ocic'o cihi 'o isi yainca palapa 'o ongkosi, isi po'upa to mosola 'afeo'fu'u ho opcoi to cou. 8nemo yu'eteuyunu 'omo botngonʉ, mo mi'usnu to pilato ho m'eya maito la at'oca ci hi'hioa ho hioa eni, 9isi tuocosi to pilato: <temu 'ucia poa poesih'eni a'o 'e honte ta couyutaya?> 10a'ʉmtʉsi isi eno'so cohivi to pilato, 'o saisicoo mo i'mi no smo'eubut'u ho ko'ko toveineni 'o iesu.

11at'inghi 'o saisicoo isi poot'ova 'omo botngonʉ, poa poesih'eni to pilato 'o palapa. 12isi ivaha tuocosi to pilato 'o botngonʉ: <'e imu yainca honte ta couyutaya ci cou nte'oeno ti'vo'vona?>

13ihe ivaha zozoya: <te spica to zuuzika!>

14tuocosi to pilato: <cuma na isi hioa cimo kuzo?>

namamo asuhcu tmunoi moozoyʉ 'o botngonʉ: <te spica to zuuzika!>

15mo akoyu no noa ʉ'ʉmnʉa tomo botngonʉ 'o pilato, cu poesih'a 'o palapa ho faeni ta botngonʉ, mashʉyʉ ho ti'usna 'o iesu, ataveiya faeni to cou ho spica to zuuzika.

keematmohi to heetai 'o iesu

(matai 27:27-31; yohane 19:2-3)

16ihe hafa to heetai 'o iesu ho yʉmeʉmʉ to coca to sootokufu, e'pʉ'pʉya 'o cono taucunu. 17ihe paceofi tomo tatposa ci yʉsʉ 'o iesu, boemi to cʉcʉmʉ ho teyaineni ceopngu ho poa iceopnguneni, 18ataveisi ihecu mi'usni ho p'ohkui, yainca: <yokeoasu 'e honte ta couyutaya!> 19ihen'a yomza to 'ue ho etokʉa 'o fnguusi, mi'usni ho teʉpsi, top'ungu ho p'ohkui. 20aepʉnga keematmohi, ihe toveuca 'o yʉsʉ no tatposa, pateovoveineni 'o iachisi yʉsʉ, ihecu hafa yuyafo ho spica to zuuzika.

noa spica to zuuzika 'o iesu

(matai 27:32-44; luka 23:26-43; yohane 19:17-27)

21to ceonʉ, ihe lʉa 'omo cihi ci cou, zou saimong 'o ongkosi, mon'a aʉlʉ i'mi ne yafana te yʉmeʉmʉ ta hosa, ihe e'hʉhʉi ho poa hafneni 'o zuuzika to iesu ('e saimong zou coukulinai, zou amo to 'alisanta ho luufu). 22ihe hafa uhtomo conci hpʉhpʉngʉ 'o iesu, la yainca ngolungo, 'o e'ausnasi zou <cʉehʉana>. 23yonto ic'o, ihe yaeni to isi atvoha to s'os'o ci emi ho pemneni to iesu, at'inghi o'aisi ima to iesu. 24ihecu spica to zuuzika, mion'a yupa yu'siseiti, cu aangaeza 'o yʉsʉsi. 25a'usnu no ma'hi sio no taseona 'o hie, ihe spica to zuuzika 'o iesu. 26i'o isi topceni ci tposnosi kuisi isi tposi ho yainca: <honte ta couyutaya.> 27conosi ne mio ihe a'upa to iesu ho spica to zuuzika 'omo yoso ci yaksai, yonto vhonasi 'omo cihi, yonto veinasi 'omo cihi.#panto piyo ci tposʉ noana'o isi topuhngi ta 28 secu <maicac'o. 'o isi engha to seiso <<isi ta'upa to 'ayumona tomo yaa kuisia>> ci e'e isicu mia.>

29i'omo sucaefi to ic'o ci cou ihe aokoe'iya 'o iesu, eutivteni 'o fnguuhe ho yainca: <si mosola mainca te'o eon'ozi 'o seiten, p'eyoveiya no miteuhi! 30macu ohpueho ta zuuzika, to'usni si iachisu!>

31'o saisicoo ho lema'cohio seiso mo maezo cocvo to iesu, yupa mainca: <lata to'usnu to mocmo, at'inghi o'ateta maka peelʉi to'usni si iachi taini! 32kilisto, honte ta 'isolaelu, nahocu i'mi ta zuuzika ho ohpueho, poa aitneni a'mi, temzacueno taa'uzva!>

'o isi s'upa to zuuzika ci cou mo maezo aokoe'i to iesu.

mcoi 'o iesu

(matai 27:45-56; luka 23:44-49; yohane 19:28-30)

33nemo cohzona, mo mʉfeʉ'sʉ ta ceoa 'o voecʉvcʉ, mo asonʉ tuyu no huomza hie 'o hiasi noana'o. 34ac'ʉhʉ ne micu ma'hituyu no ataveisi no cohzona, mo tmunoi moozoyʉ 'o iesu: <iloi, iloi, lamasapakotani?> 'o e'ausnasi zou <hamo'u, hamo'u, mainci osko ciha a'o?>

35'omo yac'ʉ to ciengonasi mo piyo 'omo tmalʉ, yainca: <nahoeno talʉi, isi eoho'a 'o 'iliya!> 36panto cihi ci cou mo smo'usnu, isi seopica to 'ue 'o isi tfʉi tomo masʉecʉ ci emi ci kʉyʉpa, ho'usneni to ngayo to iesu, yainca: <toteana'a, temia aiti 'o 'iliya teenana cmʉ'ho ho e'peohi!>

37mo i'nʉskʉ tmunoi moozoyʉ 'o iesu, cu entʉhʉ to nsou.

38'o isi ngov'eni to seiten ci toohesa, mo ahoi to pepesi ho meiatiski meipaevai. 39i'omo yac'ʉ to tuhcu to zuuzika ci ngungkang, aiti 'o hiasi moozoyʉ ho#panto piyo ci tposʉ noana'o uk'a ci <moozoyʉ ho>. i'o hiasi mcoi to iesu, cu yainca: <zou'so a'ʉmtʉ oko to hamo 'e cou eni!>

40panton'a piyo ci maamespingi mo i'mocvihi ho aiti; to 'ayumonahe mo no'upu 'o maliya to motala, ho i'o maliya ci ino tomo foinana ci yakovu ho i'o maliya ci ino to yosefu, ho i'o salomi. 41ne moson'a yone ngalilaya 'o iesu mosola fiifiho ho aʉt'ʉt'ʉca, mon'a 'enepio ci maamespingi moso nʉthʉ fiho to iesu ho uhta 'elusalemu.

soʉlʉlʉa 'o iesu

(matai 27:57-61; luka 23:50-56; yohane 19:38-42)

42-43ne micu yofna, mo cmʉ'ho 'o yosefu to 'alimatai; zou cihi ci la toehunga einva ci ngi'in, conino mingeou no cmʉ'ho na hpʉhpʉngʉ to hamo. zou hiesi no ae'ayocʉ ne mio ('aeno auyusi no 'ansokunici). mo aʉ'ʉteʉ 'o yosefu ho baito to pilato, mi'usni ho p'enza 'o feango to iesu. 44isi tac'ʉhi to pilato ho micu mcoi 'o iesu, mo huaeca yamci. isi eyoho'a 'o ngungkang, tuocosi na hiasicu noana'o#panto piyo ci tposʉ noana'o uk'a ci <hiasicu noana'o>. homo mcoi 'o iesu. 45ho isicueno i'mi to ngungkang ho talʉi 'o hia eʉsvʉtʉ, isicu faeni to yosefu 'o feango to iesu. 46mo mhia yʉteʉ 'o yosefu, e'peohi 'o feango to iesu, yomza to yʉteʉ ho to'silʉlʉa, soʉlʉlʉa to isi yufeongvi to yakivayʉ ci heuf'a, isin'a pehtu'usni to conci fatu, tomʉti 'o phingi to heuf'a. 47'o maliya to motala ho i'o maliya ci ino to yosefu ihe noʉt'ʉci ho pocenga 'o isi soʉlʉlʉi to iesu.

Currently Selected:

maluko 15: bsnfe

Highlight

Copy