maluko 14

ta'koeva no opcoza 'o iesu

(matai 26:1-5; luka 22:1-2; yohane 11:45-53)

1mipsohi to auyusi no meem'esa'o ho meetoasmoof'o, 'o saisicoo ho i'o lema'cohio seiso mo auc'oc'ou toʉsvʉsvʉtʉ ho akoeva no tʉtpʉta 'o iesu ho opcoza. 2ihe yainca: <o'a teto tʉtpʉta ho te seolʉa no meesi, ci tes'a i'mizi ec'ʉ no 'afeo'fu'u 'emo botngonʉ.>

yone potaniya 'o iesu ho noa tohʉsi

(matai 26:6-13; yohane 12:1-8)

3mo yone potaniya to emoo tomo tma'congo no to'ho'ho ci saimong 'o iesu. nemo seolʉa no bonʉ. panto cihi ci mamespingi mo mahafo tomo coni ci pania, 'o 'ayumonasi isi songcʉngci to sopepea ci konamusngau, isi af'oya 'o pania, hoyuha to fnguu to iesu 'o konamusngau. 4piyo tomo yusuhngu ci cou mo na'no 'oha kaebʉ, yuec'oc'ou mainca: <maica ci hia a'hi'hisi ta konamusngau cuma na a'a'ausnasi? 5'e konamusngau eni te meelʉ suse'tueva hoci phieni, 'o'ʉmnʉasi hoci yaa na peisu ho titha to'usnu nomo thi'cia ci cou!> i'mi tan'e ihe na'na sʉ'nova 'o mamespingi.

6at'inghi isi yainca to iesu: <poa maino koyusi! maincis'a 'ahʉya poa ma'ngongoveo? maisi hioaneni a'o 'emo yonghu ci hi'hioa. 7maica la asngʉcʉ yaa no'upu muu cimo thi'cia ci cou, hocimu yaa 'tohʉngʉa, temu la asngʉcʉ yaa hiesi no to'usni, at'inghi o'ate'o meelʉ asngʉcʉ no'upu muu. 8itacu pnanfi na teta peelʉi hioa; ho ita hoyuha ta feango'u 'e konamusngau eni. ma ita aueva ayocneni ho tena efo'a no heuf'a a'o. 9te'o a'ʉmta eʉsvʉta muu, acʉcʉhʉ ta mauhpʉhpʉngʉ, 'upena hoci psoecʉ'ha nenu 'e fukuin, tahela 'oehamva 'e isi hi'hioa ho taaecingia.>

phieni to yuta 'o iesu

(matai 26:14-16; luka 22:3-6)

10to 'ayumona to maskʉ ueso ci tesi to iesu, panto cihi ci coukaleo ci yuta; mo uhto saisicoo, tesi phieni 'o iesu. 11ihe talʉi homo maica 'o e'e to yuta, mo afnaso kaebʉ, teomi ho fii to peisu. ahoi ne mio, mo mooteo note 'oc'ocic'o ci hie 'o yuta tasi phieni 'o iesu.

'o iesu ho i'o tesi mo toehungu oyofonʉ no meem'esa'o

(matai 26:17-25; luka 22:7-13, 21-23; yohane 13:21-30)

12meekayo no meetoasmoof'o, 'aeno hiesi hola chua 'o oko no moatʉ'nʉ to meem'esa'o, mo uhto iesu 'o tesi ho tuocosi: <teko poa uhnenu a'mi ho ayocʉ no oyofonʉ no meem'esa'o?>

13isi popeoskuna to iesu 'omo yoso ci tesi, eutotaveiya ho yainca: <temu yʉmeʉmʉ ta hosa, tamu lʉa 'o cihi ci cou mo mʉpʉtʉ tomo cono pania ci chumu, tamucu to'ofeihni. 14hote yʉmeʉmʉ no emoo nenu, tamucu tuocosi to tauke to emoo: <<yainca to sensei: te'o toehungneni oyofonʉ no meem'esa'o 'o tesi'u mo yonenu nate yoni?>> 15tasi hafa muu ho aiti 'o isicu ayoca tasucza ci mo cocoya ci aemana to skoskopnasi; 'atemueno yonto ic'o ho ae'ayocʉ.>

16cu yuyafo 'omo yoso ci tesi, yʉmeʉmʉ to hosa, 'o ihe aiti mo aʉlʉ maito isi eʉsvʉtʉ to iesu; micu yonto ic'o ho ae'ayocʉ to oyofonʉ no meem'esa'o.

17cu yofna, cmʉ'ho 'o iesu ho i'o mo maskʉ ueso ci sitoo. 18nemo seolʉa no yusuhngu ho eabobonʉ, yainca to iesu: <te'o eʉsvʉta muu, ta taicomu, ta mo o'upu a'o ho bonʉ, mo cihi ci cou tenasi phieni a'o.>

19mo acʉhʉ na'no ma'tipvongʉ 'o tesi, macicihi tuocosʉ to iesu: <zou a'o?>

20yut'inga to iesu: <zou cihi ta mimu maskʉ ueso; i'o temza yu'siepoepohʉ ta oothua ho mahsieyu to pang, 'aeno ic'o. 21aʉlʉ mais'a 'o isi engha to seiso, te tiou no akuzkuzoa 'o okocou; at'inghi i'ote himhohioa ho phieni 'o okocou tesi meamzi! 'e cou eni nte ʉmnʉhe hoci moso o'te 'ahʉyʉ yayo!>

oyofonʉ to nooe'oca

(matai 26:26-30; luka 22:14-20; kolinto 1 11:23-25)

22nemo seolʉa no bonʉ, mo mayo to pang 'o iesu, ataveisi no to'aveoveoyʉ to hamo, isicu tipcia 'o pang, aangaeza to tesi, yainca: <temu ana; zou feango'u eni.>

23isi i'vaha eepza 'o sooetohvʉ, ataveisi no mi'usnu to hamo ho to'aveoveoyʉ, yocnguhneni to tesi; micu acʉhʉ mimo 'o tesi. 24yainca to iesu: <zou hmuyu'u eni, zou hmuyu no to'hongi na tposno yupa esvʉtʉ 'e cou ho hamo, isi nomzi 'e yatatiskova ho mohtoesuyu. 25te'o eʉsvʉta muu, 'anate'o ahta soevaha 'e emi eni, ac'ʉhʉ no hiesi ho tena yonto hpʉhpʉngʉ to hamo ho mimo nomo faeva ci emi.>

26mo toehungu pasunaeno tomo conci pasunaenva, cu yuyafo ho uhto hcuyu'olivu.

eyoca to iesu ho tasi o'te ehohonga to petelo

(matai 26:31-35; luka 22:31-34; yohane 13:36-38)

27mi'usni to iesu 'o tesi ho yainca: <tamu acʉhʉ mongoi a'o. maica ho isi yainca to seiso: <<tasi 'a'usni to hamo 'o le'aʉt'ʉcʉ moatʉ'nʉ, cu apeaski 'o moatʉ'nʉ.>> 28at'inghi ataveisi ho ta'ucu smoevovei, tena'u muyohe muu ho uhne ngalilaya.>

29yainca to petelo: <'upena hoci mongoi suu 'e mocmo ci cou, te'oeno ahtu mongoi suu!>

30mi'usni to iesu 'o petelo ho yainca: <te'o a'ʉmta eʉsvʉta suu, auyusi no tmupusku 'o teo'ua ta feʉngna maitan'e, tako i'toteuha meoo'te honga a'o.>

31mo asuhcu emamahtʉicʉ 'o pat'ausna to petelo ho mainca: <'upena hoci'u tu'upu suu, o'ate'os'a ahta aha'va o'te honga suu!>

'o mocmo ci tesi mo maezo acʉhʉ maica 'o e'ehe.

yone kosimani ho 'inoli

(matai 26:36-46; luka 22:39-46)

32mo esmi tamo conci hpʉhpʉngʉ, la yainca kosimani 'o ongkosi; isi mi'usni to iesu 'o tesi ho yainca: <temu yusuhngu tan'e, totea te'on'a 'inoli.>

33isi engocha 'o petelo, yakovu, yohane ho nʉtheni. cu ahoi congo ho nac'o 'o 'tohʉngʉ to iesu, 34mi'usni 'omo tuyu ho yainca: <mo na'no nac'o co 'tohʉngʉ'u, mais'a te'ocu mcoi. temu yontan'e, aʉtʉs'ʉ'sio!>

35mon'a ake'i emosuhcu 'o iesu, m'ocnguyu to ceoa, eyoho'ʉ to hamo ho mainca, honci peelʉi, o'te 'ahʉya poa mitamo maica ci 'atutumzo. 36mo m'ene ho mainca: <amo, amo'u, lako aa'pucva peelʉi 'e afu'u hi'hioa, teko'so sose'va 'emo mayʉmʉ ci sooetohvʉ; at'inghi, teav'a poa maino koyu'u, 'ateeno maino 'tohʉngʉsu.>

37nemo yuovei, aiti 'omo tuyu ci tesi mo acʉhʉ oengʉtʉ; isi mi'usni 'o petelo ho yainca: <saimong. mikon'a oengʉtʉ? o'ateko ake'i meelʉ mako cono huomza hie ho aʉtʉs'ʉ?> 38isi i'vaha yainca: <la aʉtʉs'ʉ 'inoli, te o'te su'ayumonʉ no ma'pepecvai. la e'vono ma'kaebʉ na 'tohʉngʉmu, at'inghi la yoz'u si feangomu.>

39mio i'vaho emo'usnu maita'e 'o iesu, mioc'o boemi tomo totiski ci e'e ho 'inoli. 40ataveisi micu ivaho yuovei to ihe yoni to tesi, aiti ho mioc'o oengʉtʉ. 'anamo makon'a teov'ohʉ, makan'a cohivi teen'a pat'uvna.

41i'toteuhu yuovei 'o iesu, mi'usni ho yainca: <mimuc'on'a oengʉtʉ, temuc'on'a amzocni? 'atec'u, cu esmi 'e hiesi, tehecu phieni ta mo yaa kuisi ci cou 'e okocou. 42yʉc'ʉ, tetocu e'ohʉ! aiti, micu esmi simo himhohioa ho phieni a'o!>

noa tʉtpʉta 'o iesu

(matai 26:47-56; luka 22:47-53; yohane 18:3-12)

43ne mon'a seolʉa no aomotʉ'ʉ 'o iesu, mo esmi 'o yuta ci cihi to maskʉ ueso ci tesi. 'enepio ci cou mo mahafo to poyave tapuyungu ho to'ofeihni; ihe popeoskuna to saisicoo, lema'cohio seiso, ho ito coolo. 44'omo himhohioa ho phieni 'o iesu isi aueva teyaineni to tahe huomza, yainca: <siya na te'o kisuneni, 'aeno ic'o na temu tʉtpʉta. tamu tʉtpʉta, ho so'eʉyʉca pocenga, ho hafa emo'usnu maita'e.>

45cmʉ'ho 'o yuta, osni uhto tuhcu to iesu, tmunsohʉ: <sensei!> isin'a kisuneni. 46ihecueno'so tʉtpʉta 'o iesu. 47to 'ayumona tomo bi'upu ci cou, panto cihi cimo epusku to poyave, teoca 'o cihi to soskuskunu to saisi, hic'oha 'o coni to koyusi. 48isi mi'usni to iesu ho yainca: <mimu mahafo ta soanothʉ ho tʉtpʉta a'o, imun'asi ta'upa no yaksai a'o? 49la'u huhucmasi yonto seiten ho mo'ma'cohio to cou, asngʉcʉ no'upu muu, o'a lamu tʉtpʉta a'o. at'inghi, te ahtao'te mia 'e e'e ta seiso.>

50ne mio, 'o tesi micu acʉhʉ mongoi to iesu, cu toekameosʉ.

51panto cihi ci foinana, mo mʉfeʉ'sʉ to yʉsʉ no ngei ho tof'uhu to iesu. ihe tʉtpʉta, 52at'inghi isi eehocneni 'o yʉteʉ, yuamaesih'i hocu toekameosʉ.

yonto ngikai ho tiou to yʉsvʉta

(matai 26:57-68; luka 22:54-55, 63-71; yohane 18:13-14, 19-24)

53ihe hafa uhto emoo to taisaisi 'o iesu; mo acʉhʉ yu'eteuyunu to ic'o 'o masasaisi. coolo, ho i'o lema'cohio seiso. 54mo pemcovhi to'ofeihni to iesu 'o petelo, sʉc'ʉhʉ to coca to emoo to taisaisi, notvohʉ to kengsacu ho yusuhngu, mo ngicu ho tmaneano. 55'o saisi ho i'o mangingi'in ihe ta'totoothoma ho 'ahʉya eaneni no tehe e'omamzi te ehpʉngneni 'o iesu, po'usna no mcoi, at'inghi uk'a ci ihe ake'a elʉa cite e'omamzi. 56'enepio 'omo yuyafo ci cou ho e'ankʉ ehpʉngʉ, at'inghi 'o e'ehe uk'a cimo ahtu touseoseolʉ.

57atavei mo piyo 'omo yʉc'ʉ ci cou. e'ankʉ ho ehpʉnga 'o iesu ho yainca: 58<imza talʉi ne ohta yainca: <<te'o eon'ozi 'e ohola teyai ta emucu ta cou ci seiten, miteuhi te'ocu moteoh'unu no o'aisi p'eyac'a ta emucu ta cou ci seiten.>> > 59ac'ʉhʉ tamo maica ci ehpʉngʉ, mioc'o maezo yupa epeu 'e e'ehe.

60micu yac'ʉ ta tuhcuhe 'o taisaisi, tuocosi 'o iesu: <'e hiahe ehpʉngʉ, uk'a ci tekoeno ake'a yut'inga?>

61o'a mo ake'i ya'ei 'o iesu, isi ivaha tuocosi to taisaisi: <zou a'ʉmtʉ kilisto suu, zou oko tola toehunga tohmomoengʉneni ci hamo na suu?> 62yut'inga to iesu: <'azou a'o! temu acʉhʉ baito hote yusuhngu to vhona to sotonʉa ci hamo 'o okocou, poʉt'ʉcʉ to cmʉcmʉ ta pepe ho ohpueho!>

63isicu eekieki to taisaisi 'o yʉsʉsi, yainca: <'anateto 'ahʉyʉn'a 'aoko eya note 'akasi ci cou! 64imucu talʉi mita mo'engho tamo aokoe'i to hamo ci e'e. temu akoeva no ti'vo'vona?>

mo acʉhʉ yʉsvʉtʉ ho poa yaa kuisi 'o iesu, nte opcoza.

65panto mo mi'usnu to iesu ho tmueposʉ, seomʉta 'o mcoosi, tʉ'pʉ'pʉneni ho tutva, tuocosi: <eangacʉma. siya namo muutu suu?> i'o kengsacu ihe yaeza eyakaka 'o iesu, t'oplikvi.

meoo'te honga to petelo 'o iesu

(matai 26:69-75; luka 22:56-62; yohane 18:15-18, 25-27)

66ne mio, mon'a nongaco to coca to peohna 'o petelo. panto cihi ci soskuskunu no mamespingi to taisaisi mo emo'usnu, 67aiti 'o petelo mo ngicu, cu teochʉmi, isi yainca: <ma maezo 'oahngʉ to iesu ne nazalo suu!>

68mo peeco 'o petelo ho yainca: <o'aos'o cohivi, yaeza o'a os'o ta'hongi cuma co e'esu.> mo ya'ei ho smaotoefʉngʉ to coca. aʉlʉsi ne mio, cu muni 'o teo'ua.

69aomane, 'o okono mamespingi isi ivaha aiti 'o petelo, ivaho mi'usnu tomo bichipi ci cou ho yainca: <'e cou eni 'a mazou 'oahngʉhe!> 70mio ivaho peeco 'o petelo.

mio i'vaho aomane, i'omo bi'upu ci cou ihe i'vaha pas'osi 'o petelo ho yainca: <o'ana tekos'a peelʉi peecveni ho zou 'oahngʉhe na suu, maica 'aeno maezo coungalilaya na suu!>

71micu aʉlʉ matkuzkuzo 'o petelo ho mainca: <o'aos'o honga 'e imu engha ci cou! hoci'u ake'i emeknuyu, tesi patvovei to hamo na a'o!>

72aʉlʉ tuhcusi tan'e, cu tmupusku 'o teo'ua; isicueno talʉa to petelo 'o nia e'e to iesu: <auyusi no tmupusku 'o teo'ua, tako i'toteuha meoo'te honga a'o.> 'anamo psiv'ohʉ o'te mongsi 'o petelo.

Currently Selected:

maluko 14: bsnfe

Highlight

Copy