maluko 16

smoevovei 'o iesu

(matai 28:1-8; luka 24:1-12; yohane 20:1-10)

1sucaefi 'o 'ansokunici, 'o maliya to motala, maliya ci ino to yakovu ho i'o salomi, mo mhino to konamusngau, tehe usa ho sieseni to feango to iesu. 2taseonasi no maikayo, moc'on'a aʉlʉ esmomho 'o hie, cu nʉthʉ emo'usnu to heuf'a. 3-4nemo pcaceoni, ihe tohtasvʉta no koyuhe: <siya na te'so to'usnu a'to ho pehtuezuha 'o fatu to phingi to heuf'a?> (maica 'o fatu ic'o mo na'no meoisi). at'inghi ne ihecu aiti, ci micu tmaiezuhu 'o fatu. 5mo yʉmeʉmʉ to feongo to heuf'a, teolʉi 'omo cihi ci foinana mo yusuhngu to vhona, sʉ'eʉsʉ tomo fʉecʉ'za ci yʉsʉno tacvoh'i; mo acʉhʉ na'no yamci.

6isi yainca to foinana: <'ote yamci; os'o cohivi imu i'ima 'o oho spica to zuuzika ci counazalo iesu. o'a na mos'a yontan'e, 'amicu smoevovei! aiti, 'aeno tan'e 'o ohe soʉlʉlʉi. 7temu aupcieva eʉsvʉta to tesisi, aavaho 'o petelo, yainca: <<te muyohe muu ho uhne ngalilaya, temu aiti ne'e 'o iesu, aʉlʉ maito ohsila eʉsvʉta muu.>> >

8mo acʉhʉ yamci ho ma'sasmoyo, osni toemongoi to heuf'a, emosonʉ e'ohʉ. o'ana ihe maka eʉsvʉta no mocmo na eni, maica homo ngoheʉngeʉ.

panto tposno noana'o isi tapicneni 'e oi'isi

aopa'to to maliya to motala 'o iesu

(matai 28:9-10; yohane 20:11-18)

[ 9taseonasi no maikayo, ataveisi no smoevovei 'o iesu, mo ahoi mi'usnu to maliya to motala 'o iesu ho aopa'to (ohsila peteoyafa to iesu 'omo pitu ci hicu to feangosi.) 10isi usa 'ola to'ofeihni to iesu ci cou ho eʉsvʉti; mon'a acʉhʉ seolʉa no nac'o ho mongsi. 11ihe tac'ʉhi homo smoevovei 'o iesu ho eʉsvʉsvʉta ho isicu aiti to maliya, o'aihec'o h'unasa taa'uzva.

aopa'to tomo yoso ci tesi

(luka 24:13-35)

12ataveisi ta hi'hioa tan'e, mo boemi to h'unasi ci mi'a'ausna 'o iesu ho aopa'to tomo yoso cite emo'usnu to you ci tesi. 13'emo yoso ci tesi mo yuovei ho eʉsvʉta to mocmo ci tesi, o'a ihec'o h'unasa taa'uzva.

aopa'to to maskʉ ucni ci tesi

(matai 28:16-20; luka 24:36-49; yohane 20:19-23; sitoo 1:6-8)

14sotavei, mo mi'usnu tomo seolʉa no bonʉ cimo maskʉ ucni ci tesi 'o iesu ho aopa'to. isi koica 'o tesi; maica homo okosi na singkoo ho yameomʉ, o'te taa'uzva ho ihe eʉsvʉsvʉta to mohcu baito homo smoevovei. 15isi mi'usni 'o tesi ho yainca: <temu uhta maacaciku ta mauhpʉhpʉngʉ, mi'usnu ta yatatiskova ho psoyaska 'e fukuin. 16nate tmaa'uzo ho tiou no toonono, te asansana to'usni; nate bʉʉpsʉpsʉ, te topci no kuisi. 17namo tmaa'uzo te yaa tonʉ no peispopo'e: te boemi ta ongko'u ho meobango no hicu, mo'engho tomo faeva ci e'e no piepiya, 18boemi ta emucuhe ho tʉtpʉtʉ no fkoi, hoci mimo tomo mahiz'o ci macucuma maezo o'ate alolongʉ, hoe'oci 'o feango tomo tma'congo, tec'u yov'o 'o tma'congo.>

ohpepe 'o iesu

(luka 24:50-53; sitoo 1:9-11)

19ataveisi ne isicu eepʉnga to nooe'oca iesu 'emo maica ci e'e, cu noa tiyova ho uhne pepe, yusuhngu to vhona to hamo. 20yuyafo 'o tesi, nongongabo ho psoyaska 'o fukuin; isi toehungneni yaahioa to nooe'oca, ieni to ihe hioa ci peispopo'e, soomei 'o ihe psoyaska ci e'e zou mou'ʉmtʉ.]

panto h'unasi cimo noana'o ci tposʉ mo maica 'o hiasi etavei.

[ 9i'omo piyo ci maamespingi mo uhto petelo ho ito nanghiasi, acʉha eʉsvʉta 'o ohe afu'a talʉi. 10ataveisi tan'e. isi iachia popeoskuna to iesu 'o tesisi, ahoi to esmomhana ac'ʉhʉ to meoveana, epeaska 'omo socofkoya, o'ate kuzo. poa mayo no 'auesiesi to'usnu ci e'e 'e yatatiskova.]

Currently Selected:

maluko 16: bsnfe

Highlight

Copy