maluko 13

eyoca ho tena aapapayo'ʉ 'o seiten

(matai 24:1-2; luka 21:5-6)

1ne micu i'mi to seiten ho yuyafo 'o iesu, 'omo cihi to tesisi mo mi'usnu to iesu ho yainca: <sensei, aiti, 'e 'omeoisa ta fatu, taunona'vʉ ci hia m'eac'ʉ!>

2yainca to iesu: <imun'asi huunona'vʉ 'e hia meoisi ta isi p'eyac'a? 'emo macoconi ci fatu tan'e tena acʉha eon'ozi, uk'ana ci tenala makon'a yupa tooskopʉ ci fatu.>

meakvo'ʉ ho pohtutumza

(matai 24:3-14; luka 21:7-19)

3yonto hcuyu'olivu 'o iesu, yusuhngu ho mi'usnu to seiten. 'o petelo, yakovu, yohane ho i'o 'antole, ihe auc'oc'ova tuocosi 'o iesu: 4<tekon'a eʉsvʉta a'mi, ho homna nate esmi 'emo maica ci hi'hioa? hoci esmi eni pano te ake'a humzi?>

5isi eʉsvʉta to iesu ho yainca: <temula bumemealʉ, 'otes'a noa pasloʉngvi ta cou. 6mo botngonʉ ci cou 'o tena boemi ta ongko'u, mainca: <<'aeno a'o 'o kilisto>>, hocu pasloʉngvi namo 'enepio ci cou. 7'otela nomio no ehtothomʉ tamo cum'u ho ino isi tac'ʉhi ci yu'susuyumo ne covhi ho yamci. 'emo maica ci hi'hioa tena ahtuo'te yuyafo; at'inghi o'aisi yainca micu sʉc'ʉhʉ na puesona ta lekisi. 8'emo cono suezopʉ tena ehtothomʉ tomo h'unano suezopʉ; 'emo conci hpʉhpʉngʉ tena suyumo tamo h'unano hpʉhpʉngʉ; te nongabo na motoevi ho seova. hote esmi 'emo maica ci hi'hioa aʉlʉ mais'a 'o mamespingi hola ahoi congo hote yayo 'o oko.

9<temula iachi bumemealʉ, maica tahela tʉtpʉta muu, e'usna to hooin. temu yonto kaitoo ho noa ti'usna; temu nomio a'o, yac'ʉ to tuhcu tola atʉkcʉ ho ito honte, 'akasi 'e fukuin. 10at'inghi 'e fukuin tena ahtao'te auevan'a psoecʉ'ha ta yatatiskova. 11ho tahe tʉtpʉta muu, ho e'usna to hooin, 'ote auyu ma'titvongʉ no cuma na te e'e; homio, cumana tasi pa'cohivneni to hamo, 'aeno cuma na tamu e'e; maica ina tamu pateafa o'as'a iachimu e'e, maisi ieni muu to seilei ho pateafa. 12homio, 'e cou tena phieni 'o aʉlʉ nat'ohaesa, po'usna no mcoi, 'o amohe ta 'o'oko tec'o maica; 'e 'o'oko te maezo yu'hango ta maameoi, ho po'usna no mcoi. 13nomzo a'o, tehe toehunga sʉ'nova muu. at'inghi nate apaezumo bimahtʉicʉ buveici ci cou ahtuo'te elʉ no to'usni.>

meoino meakvo'ʉ

(matai 24:15-28; luka 21:20-24)

14<tamula teolʉi 'ote <<meaapayo'ʉ ci isi so'eʉsʉ'nova ci macucuma>> mo yac'ʉ to o'antesi yac'i (te ta'hongi tote mo'engho na e'ausnasi tan'e). homio, namo yone yutaya, nte p'usnu to hcuyu ho totoefʉngʉ; 15namo yono sofʉ, 'otena ohpueho ho yʉmeʉmʉ ta emoo ho mayo no macucuma. 16namo yono ezoezoyʉ, 'otena maine'e ho mayo note aoskopa. 17to hiesi ho mio, i'omo ngangho'ʉ ci mamespingi ho inamo paun'u ci ino tena 'atutumzo! 18temu 'inoli to hamo ho o'te poa esmi no hosoyʉma 'emo maica ci hi'hioa. 19maica na hiesi ta meakvo'ʉ. ahoi ho ohsin'a teyai to hamo 'e hpʉhpʉngʉ o'amocu mosola ahtu auyu esmi, maezo o'anate ahtu i'vaho esmi no ataveisi. 20hocisi o'te enanʉhta to hamo na hiesi no meakvo'ʉ, uk'a cite meelʉ yaansoua. at'inghi, nomio ta ohsila epeiya ci mao'o'okosi, isicu enanʉhta 'o hiesi ho mio.

21<hoci panonte mi'usnu muu ho mainca: <<aiti, mo yontan'e 'e kilisto! aiti mo yonta'e ta kilisto!>> teav'a taa'uzva. 22maica tena yuyafo 'o mekikilisto ho i'o meyoyongensa; tena peispopo'e, pnanfi na tehe peelʉi ho peknui 'e ohsila epeiya to hamo ci mao'o'okosi. 23temula bumemealʉ! os'ocu acʉha aueva eʉsvʉta muu 'emo maica ci hi'hioa.>

cmʉ'ho 'o okocou

(matai 24:29-31; luka 21:25-28)

24<ataveisi ho tac'u sucaefi 'o hiesi no meakvo'ʉ, tena smoekua'onga 'o hie, o'anate i'vaho psoetiskou 'o feohʉ, 25te i'mi ta engʉca 'o congeoha ho supeopeohʉ, 'e ceoceona ta mouhpʉhpʉngʉ te maezo acʉhʉ tmaot'ou. 26ho mio, te espa'to 'o okocou, a'sʉftonʉ yaa tonʉ ho psoevohngʉ poʉt'ʉcʉ to cmʉcmʉ ho ohpueho. 27tesi popeoskuna 'o tensi ho sʉc'ʉhʉ to maacaciku ta hpʉhpʉngʉ, i'mi ta hpʉhpʉngʉ tan'e ho sʉc'ʉhʉ to hpʉhpʉngʉ ne'e, euteuyuna 'o ohsila epeiya ci mao'o'okosi.>

pahsʉsʉfteni to moezunge

(matai 24:32-35; luka 21:29-33)

28<temu i'mi to moezunge ho noa pahsʉsʉfti. homo yuenghova 'e ehti, cmʉfeʉ 'o fungahosi, tamucu cohivi tec'u esmi na homu'eina. 29totiski, ho temu aiti 'e acʉcʉhʉ ci a'a'ausna tec'u cohivi micu cum'u na hiesi#<cum'u na hiesi> hocieno yainca <tesicu cmʉ'hi>., micu yonta phingi. 30temu atatalʉa, 'e yatatiskova ta maitan'e auyusi ho o'amocu te acʉhʉ mongoi ta hpʉhpʉngʉ, acʉcʉhʉ 'emo maica ci hi'hioa tenac'u esmi. 31te aapayo'ʉ 'e engʉca ho ceoa, at'inghi 'e e'e'u 'auesiesi o'ate aapayo'ʉ.>

uk'a ci te bochio ci cou no hiesi ho mio

(matai 24:36-44)

32<inacu hiesi no cmʉ'ho nate esmi, uk'a cimo bochio ci cou; o'a ihe cohivi to tensi ta pepe, yaeza o'a isi cohivi to oko, i'oc'o amo namo bochio. 33temula bumemealʉ, la aʉtʉs'ʉ, maica o'atemus'a cohivi ho homna nate cmʉ'ho na hiesi. 34mais'a 'emo cihi ci cou mo yuyafo ho covnʉ, toveineni ta soskuskunusi ho aʉt'ʉca 'e emoo, aangaeza ta macicihi nate hi'hioa, eutotaveiya 'o le'aʉt'ʉcʉ emoo ho apopocenga 'o maphiphingi. 35ko'koeno, temula aʉtʉs'ʉ, maica o'a imu cohivi ho homna nate esvovei 'o tauke, nenusi no yofna, nenusi no taicofeʉngna, nenusino auyusi no tiskova, nenusi no ataveisi no esmomho 'o hie. 36honci aemo'au esvovei, teav'as'a poa aitneni ho cimu seolʉa no oengʉtʉ. 37'e os'o mi'usneni muu ho engha isi yaeza mi'usneni ta acʉhʉ ho engha: temu la aʉtʉs'ʉ!>

Currently Selected:

maluko 13: bsnfe

Highlight

Copy