maluko 11

taotofsi'i ho yʉmeʉmʉ ne 'elusalemu

(matai 21:1-11; luka 19:28-40; yohane 12:12-19)

1smaicmu'u ne 'elusalemu 'o iesu ho i'o tesi, sʉc'ʉhʉ to pofaki ho potaniya ci hcuyu'olivu. mo popeomuyo tomo yoso ci tesi 'o iesu, 2eutotaveiya yainca: <temu uhta ito emotuhci ci you. ho tamucu yʉmeʉmʉ, tamu teolʉi 'o isi seo'tʉneni ci o'amocu ohola ahta aueva sopaevi ci oko no lova, tamu yunga ho e'usna tan'e. 3hocihe tuocosi muu ho yainca: <<mainci maica 'e hi'hioamu?>> tamu eʉsvʉta: <<tesi titha to nooe'oca#<to nooe'oca> hocieno yainca <to taukesi>. ho tasicu aepʉnga titha tena osnia pa'ivoveiya.>> >

4micu e'ohʉ, teolʉi to ciengona to ceonʉ 'o isi seo'tʉneni to yafana to phingi ci oko no lova. ne ihen'a seolʉa no yunga, 5piyo cimo yac'ʉ to ic'o ci cou ihe tuocosi: <mainci aha'va yunga si oko no lova?>

6ihe yaito hia eutotavei to iesu ho yut'inga, ihecu poa yaakakneni 'o oko no lova. 7ihe e'usna to iesu 'o oko no lova, eoskopneni 'o yʉsʉhe, cu smopayo 'o iesu. 8mo botngonʉ ci cou ihe esponeni to ceonʉ 'o yʉsʉhe, panto mo mayo to ihe teoca to cpucpuhu ci ma'e'ehti no evi ho spoeni to ceonʉ. 9mo yaa muyo yaa uafeihi evasʉzʉ to'ofeihni ho moozoyʉ mainca: <tohmomoegnʉ to hamo! tooyokeoi'sio to hamo 'emo boemi no ongkosi ho cmʉ'ho! 10pafi'sio no ʉm'ʉmnʉ to hamo 'ete cmʉ'ho to maameoimza tavite ci hpʉhpʉngʉ! ta'usna to sopepea ci hamo na tohmomoengʉ!>

11sʉc'ʉhʉ ne 'elusalemu 'o iesu, yʉmeʉmʉ to seiten, smaingongabo ho bobaito. maica ho micu mi'eopsi, cu nʉthʉ 'omo maskʉ ueso ci tesi ho emoyafo ta hosa ho uhne potaniya.

patkuzoi 'o evi no moezunge

(matai 21:18-19)

12micu hucma, mo i'mine potaniya ho yuovei ta hosa; nemo mito ceonʉ, cu sieo 'o iesu. 13isi teolʉi to o'amo covhi to tuhcuhe 'omo mehacni ci moezunge, mo na'no ehʉehʉngʉ, cu emo'usna, 'ucia aiti hoci yaa beahcia. cu'so ohcum'a, aiti mo at'inghi ehʉehʉngʉc'o, maica ne mio o'a hobeahcia ta moezunge. 14isi mi'usni to iesu 'e evi ho yainca: <ahoi maitan'e, uk'ana ci te ahtun'a bonʉ no beahcisu!>

mo acʉhʉ tmalʉ ta e'e tan'e 'o tesi to iesu.

poa cofkoya to iesu 'o seiten

(matai 21:12-17; luka 19:45-48; yohane 2:13-22)

15ne micu sʉc'ʉhʉ ne 'elusalemu, yʉmeʉmʉ to seiten cu acʉha popeoyafa 'omo yonto seiten ho 'amamhimhino ci cou. popuya 'o pangka tomo yupa meʉe to peisu ho i'o ca'hʉ tomo mhino to hofoyu, 16isi yaeza vomti 'omo ngoe to macucuma ho yupopaezumo to coca to seiten. 17isi po'pa'cohivi ho yainca: <isi tposi to seiso 'o e'e to hamo ho yainca: <<'e seiten'u. la 'oyona 'inoli ta yatatiskova>>, at'inghi imu tiezuha ho teyai sku'u no yaksai!>

18ihe talʉi to saisicoo ho ito lema'cohio seiso 'e e'esi, cu ta'koeva no 'ucia opcoza 'o iesu. at'inghi ihe smoyoa 'o iesu, maica ho ihe toehunga taunona'vʉ tomo botngonʉ 'o hiasi mo'ma'cohio.

19ne micu 'eopsi, mo emoyafo ta hosa 'o iesu ho i'o tesi.

i'mi ta moezunge ho noa pahsʉsʉfti

(matai 21:20-22)

20taseona ne micu hucma, mio ivaho mito ceonʉ to ic'o 'o iesu ho i'o tesi, aiti 'o moezunge cu ac'ʉhʉ to emisisi ho oemi'mi. 21isi talʉa to petelo na nia i'hahozʉsi tan'e, cu mi'usni 'o iesu ho yainca: <sensei, aiti, 'e osko patkuzoi ci moezunge micu oemi'mi.>

22isi yut'inga to iesu: <la yaa singkooa homo mi'usnu to hamo! 23te'o bumemeala eʉsvʉta muu, honcimu mi'usnu ta hcuyu tan'e ho yainca: <<yʉc'ʉ. noezuhu ne etʉpʉ!>> hoci o'te ma'pepecvai na 'tohʉngʉ, ta'sansana 'e e'esu 'ate ahtao'te peelʉi, 'e hi'hioa eni 'ate ahtuo'te nomzo muu ho esmi. 24ko'koeno, te'o eʉsvʉta muu, hocimu 'inoli, 'upena hoci m'eya cuma, taa'uzva tee p'elʉa, 'ate ahtao'te elʉa na imu p'enza. 25holamu yac'ʉ ho 'inoli, la aueva peteongasa nala mi'usnu muu ho peis'epo ci cou; maicac'o, 'o amomu pepe tesi yaeza peteongasa na peis'epomu.#panto piyo ci tposʉ noana'o isi topuhngi ta 26 secu <hocimu o'te peteongasa na mocmo, 'o amomu pepe yaeza o'a tesi peteongasa muu.>>

tuocosi na tonʉ to iesu

(matai 21:23-27; luka 20:1-8)

27mio ivaho uhne 'elusalemu. nemo biavovei to seiten 'o iesu, 'o saisicoo, lema'cohio seiso, ho i'o coolo mo biebimi to iesu, 28tuocosi 'o iesu ho yainca: <cuma na osko iftongi ci tonʉ ho osko hioa 'emo maica ci hi'hioa? siya namo mofi no tonʉsu ho osko hioa 'e hi'hioa eni?>

29isi yut'inga to iesu: <coni 'e te'o aueva tuocosi muu, hocimu yut'inga, niante'o eʉsvʉta na os'o iftongi ci tonʉ ho os'o hioa 'emo maica ci hi'hioa. 30eʉsvʉta a'o, mo i'minenu na tonʉ to letoonono yohane? nenusi no mo i'mi to hamo hocieno o'te i'mi ta cou?>>

31micu ahoi yupa eehcʉvho, yainca: <mateto av'a nate hia yut'ingi. hocito yainca: <<mo i'mi to hamo>>, tasi yainca: <<mainci imueno o'te taa'uzva 'o yohane?>> 32hocito yainca <<mo i'mi ta cou>>, mate sokoeva no tehe miteuyuni ta cou na a'to, maica ihe toehunga taa'uzva 'o yohane zou eyongensa.> 33ihecu yut'inga 'o iesu: <o'a imza cohivi.>

isi mi'usni to iesu ho yainca: <yaeza o'ate'o eʉsvʉta muu cuma na os'o iftongi ci tonʉ ho os'o hioa 'e hi'hioa eni.>

Currently Selected:

maluko 11: bsnfe

Highlight

Copy