matai 27
27
e'usna to pilato 'o iesu
(maluko 15:1; luka 23:1-2; yohane 18:28-32)
1nemo taseona, 'o afu'u saisicoo ho i'o coolo to couyutaya mo toʉsvʉsvʉtʉ, te opcoza 'o iesu. 2ihe seo'eisi 'o iesu, hafa ho e'usna to pilato ci sootoku to looma
hia mcoi to yuta
(sitoo 1:18-19)
3isi aiti to moso himhohioa ho phieni 'o iesu ci yuta ho ihe topci to kuisi 'o iesu, cu ma'susuae, isi hafa 'omo mtuehu ci peisu no nging ho yooveineni to saisi ho coolo, 4yainca: <mi'o peiskuisi, phieni si nsou ta mo uk'a kuisi ci cou!> ihe yut'inga: <ma iachisu hi'hioa eni, cuma na tesi natʉ'ca a'mi.>
5isi to'ayumoneni to seiten to yuta 'o peisu, yuyafo ho invonvo tmiehi.
6isi patmʉta to saisicoo 'o peisu, yainca: <zou huphina no hmuyu eni, te yuszozʉ no hoolicu hoci siya ta tvopeisua.> 7ataveisi to hia toʉsvʉsvʉtʉ. ihe titha 'e peisu eni ho mhino to ceoa. teyaineni heuf'a tamo i'eafo ci cou. 8ko'koeno, ac'ʉhʉ maitan'e lahe yainca 'o ceoa ic'o <ezoyʉ hmuyu>.
9'e hi'hioa eni isi mia 'o nia e'e to eyongensa 'elimia: <ihe titha 'omo mtuehu ci peisu, 'ai'olaheeno anana'va esvʉta to cou'isolaelu ci huphina, mhino to ceoa to lephomeo ceoa; 10na eni mo fiho to mashʉyʉ to nooe'oca.>
yonto tuhcu to pilato ho tiou to yʉsvʉtʉ
(maluko 15:2-5; luka 23:3-5; yohane 18:33-38)
11mo yac'ʉ to tuhcu to sootoku 'o iesu, tuocosi to sootoku: <zou honte ta couyutaya suu?>
yut'inga to iesu: <zou e'esu eni.> 12'o ihe ehpʉngneni to saisicoo ho ito coolo, isi acʉha o'te yut'inga.
13isicu mi'usni to pilato 'o iesu ho yainca: <o'a ikoeno talʉi 'emo man'i ci ihe ehpʉngneni?>
14o'a moc'o h'unano matnʉskʉ yut'ingi 'o iesu; isi na'na yamceni to pilato.
yʉsvʉta no mcoi
(maluko 15:6-15; luka 23:13-25; yohane 18:39-19:16)
15cono hola meem'esa'o, maito la at'oca hioa 'o sootoku ho poesih'i to lahe p'enia cimo cihi ci isi poekotva. 16ne mio, 'oc'ocic'o cihi cila epopayoa 'o ongkosi ci isi poekotva la yainca [iesu] palapa 'o ongkosi. 17ko'koeno, nemo yu'eteuyunu 'o botngonʉ, isi tuocosi to pilato: <nenusi na temu poa poesih'eni a'o? 'e [iesu] palapa hoci o'te 'o isi yainca kilisto ci iesu?> 18isi cohivi to pilato homo i'mi no smo'eubut'u ho ko'ko tʉtpʉta ho faeni 'o iesu.
19ne mo seolʉa no yʉsvʉtʉ 'o pilato, mo popeosmuhnu to cou 'o vcongʉsi ho yainca: <'e hioa tamo uk'a kuisi ci cou, teav'as'a cumasa, maica mi'o yacei ne feʉngna, pʉhtʉ'ca ho meoino no 'atutumzo.>
20ihe teouskuni to saisicoo ho ito coolo 'o botngonʉ, poa poesih'eni to pilato 'o palapa, ho opcoza 'o iesu. 21at'inghi isi tuocosi to sootoku ho yainca: <tamo yoso ci cou, temu poa poesih'eni na siyasi?>
ihe yut'inga: <palapa!>
22isi tuocosi to pilato 'o botngonʉ: <ma te'oeno ti'vo'vona 'o isi yainca kilisto ci iesu?>
mo acʉhʉ moozoyʉ: <te spica to zuuzika si iesu!>
23tuocosi to pilato: <cuma na isi hioa cimo kuzo ci hi'hioa?>
namamo asuhcu tmunoi moozoyʉ 'o botngonʉ: <te spica to zuuzika si iesu!>
24isi aiti to pilato 'e a'a'ausna, cohivi 'anate ʉmnʉ hocin'a 'aoko ya'ei, te asonʉ apuyu mooyai 'afeo'fu'u, cu mayo to chumu ho yonto ihe mi'usni to botngonʉ ho yoemucu, yainca: <hote yuhmuyu 'e cou eni, o'ate'o tma'upu no kuisi, temu iachia ngoevi!>
25mo tmunsohʉ 'o botngonʉ ho mainca: <na kuisi no poa yuhmuyu. temiaeno ngoevi a'upu no mʉntʉ'camia!>
26isicu poesih'a to pilato 'o palapa, mashʉyʉ ho ti'usna 'o iesu, ataveiya faeni to cou ho spica to zuuzika.
keematmohi to heetai 'o iesu
(maluko 15:16-20; yohane 19:2-3)
27'o heetai to pilato ihe hafa uhto sootokufu 'o iesu; acʉhʉ yu'eteuyunu to aukukuyungusi. 28ihe yunga 'o yʉsʉ to iesu, poa mateoʉe to mo na'no fʉhngoya ci yʉsʉ no tacvoh'i, 29teyaineni tomo cʉcʉmʉ ci ceopngu ho poa iceopnguneni, mayo to mehacni ci 'ue ho siya to vhona to emucusi, atavei pop'up'ungu to tuhcusi ho keematmohi, yainca: <yokeoasu 'e honte ta couyutaya!> 30ihen'a mi'usni ho teʉpsi 'o iesu, yaa 'o 'ue ho etokʉa 'o fnguusi. 31ihecu aepʉnga keematmohi, yunga 'o yʉsʉ no tacvoh'i, i'vaha pateovoveineni 'o iachisi yʉsʉ, ataveiya hafa emoyafo te spica to zuuzika.
spica to zuuzika 'o iesu
(maluko 15:21-32; luka 23:26-43; yohane 19:17-27)
32ne micu emoyafo, lʉa 'o cihi ci coukulinai, zou saimong 'o ongkosi, ihe 'ahʉya poa ngoeveni 'o zuuzika to iesu. 33cu esmi to conci hpʉhpʉngʉ, la yainca ngolungo, 'o e'ausnasi zou <cʉehʉana.> 34ihe yaeni to isi atvohi to mayʉmʉ ci emi ho pemneni to iesu; cu peothoma to iesu, 'anamo mimho mimo.
35ihecu spica to zuuzika 'o iesu, mion'a yupa yu'siseiti ho aangaeza 'o yʉsʉsi, 36ataveisi micu yusuhngu to ic'o ho noʉt'ʉci 'o iesu. 37to skoskopnasi ihe topci to tposʉ no kuisisi, yainca: <zou iesu eni. honte ta couyutaya.> 38ihe a'upa spica to ic'o 'omo yoso ci yaksai, yonto vhonasi 'omo cihi, yonto veinasi 'omo cihi.
39i'omo sucaefi to ic'o ci cou ihe aokoe'iya 'o iesu, eutivta 'o fnguuhe, 40yainca: <na suu osko 'ucia eon'ozi 'o seiten, tec'o miteuhi tekocu p'eyoveiya! honci zou oko to hamo suu, ma to'usni si iachisu, i'mi ta zuuzika ho ohpueho!>
41'o saisicoo, lema'cohio seiso, ho i'o coolo mo maezo cocvo to iesu, yainca: 42<mita to'usnu to mocmo ci cou, at'inghi o'ateta maka peelʉi to'usni si iachi! o'as'aeno honte ta 'isolaelu. hocita i'mita zuuzika ho ohpueho homo maica, tetocu taa'uzva! 43mita noe'ocʉ to hamo, invonvo mainca zou oko to hamo; teemaica, teton'a aiti 'o hamo tesi nana usa ho to'usni!>
44ac'ʉhʉ to isi a'upa spica cimo pak'i 'omo maezo aokoe'i to iesu.
mcoi 'o iesu
(maluko 15:33-41; luka 23:44-49; yohane 19:28-30)
45nemo cohzona, mo mʉfeʉ'sʉ ta ceoa 'o voecʉvcʉ, mo asonʉ tuyu no huomza hie 'o hiasi noana'o. 46ac'ʉhʉ ne micu ma'hituyu no ataveisi no cohzona, mo tmunoi moozoyʉ 'o iesu: <'ili! 'ili! lamasapakotani?> 'o e'ausnasi zou: <hamo'u, hamo'u, mainci osko ciha a'o?>
47'omo bichipi ci cou, pantomo tmalʉ, yainca: <isi eyoho'a 'o 'iliya!> 48to taicohe panto cihi ci cou isi osnia smo'usna, mayo to kʉyʉpa ho tfʉi tomo masʉecʉ ci emi, isicu seopica to 'ue, tesi poa imneni to iesu.
49ihe yainca to mocmo: <toteana'a, aiti 'o 'iliya tesinana usa ho to'usni!>
50mo i'vaho i'nʉskʉ tmunoi moozoyʉ 'o iesu, cu entʉhʉ to nsou.
51tuhcusi tan'e, 'o isi ngov'eni to seiten ci toohesa, mo ahoi to pepesi ho meiatiski meipaevai. mo meoino motoevi 'e ceoa, psoefo'eʉ 'o yakivayʉ, 52yaeza tapopayoa 'o heuf'a, botngonʉ ci mohcu mcoi ci sinto mo acʉhʉ smoevovei. 53cu mongoi to heuf'a, ataveisi ne mohcu smoevovei 'o iesu mo yʉmeʉmʉ to cofkoyahosa; to ic'o mo botngonʉ ci cou 'o moso baito.
54'omo noʉt'ʉcʉ to iesu ci ngungkang ho i'o heetai, aiti homo motoevi ho i'omo afu'u esmi ci hi'hioa, mo acʉhʉ na'no ngoheʉngeʉ, mainca: <ma zou'so a'ʉmtʉ oko to hamo na taini!>
55to ic'o panto mon'a 'enepio ci maamespingi mo i'mocvihi ho aiti, 'e maamespingi eni mo i'mi ne ngalilaya cila to'ofeihni to iesu ho aʉt'ʉt'ʉcʉ. 56to 'ayumonahe mo no'upu 'o maliya no motala. maliya ci inohe to yakovu, ho yosefu, ho i'o ino to yoso ci oko to sipitai.
soʉlʉlʉa to heuf'a 'o iesu
(maluko 15:42-47; luka 23:50-56; yohane 19:38-42)
57ne micu yofna, panto cihi cimo yuyupasʉ ci yane 'alimatai; zou yosefu 'o ongkosi, zou maezo tesi to iesu. 58mo baito to pilato, p'enia 'o feango to iesu; isicu cucufni to pilato ho poa yaeni 'o feangosi. 59isicu tiova to yosefu 'o feango to iesu, boemi tomo cofkoya ci yʉteʉ ho cfua, 60soʉlʉlʉa to iachisi heuf'a; 'e heuf'a eni. isic'on'a mihna aepʉnga t'ofeongvi ci yakivayʉ, isin'a pehtu'usni to meoino fatu, tomʉti 'o phingi to heuf'a. ataveisi micu mongoi. 61'o maliya to motala ho i'o mon'a cihi ci maliya mo mi'usnu to heuf'a ho yusuhngu, noʉt'ʉcʉ to ic'o.
lepocengi heuf'a
62micu hucma, zou sotaveisi no ae'ayocʉ, mo nʉthʉ 'o saisicoo ho i'o coufalisai ho uhto pilato, yainca: 63<taicini, imza talʉa 'o lolekoknuyu ic'o ne moson'a yaansoua ohsila yainca: <<ta'u smoevovei no miteuhi.>> 64ko'koeno, teko'so eutotaveiya ho noʉyʉci 'o heuf'a, ac'ʉhʉ ho tac'u miteuhi, tahe o'te peelʉi peo'eoza to tesisi, ataveiya eʉsvʉta no mocmo ho yainca <<micu i'mi to mcoi ho smoevovei.>> 'emo maica ci meknuyu, te kuzohe ne auyusi!>
65isi mi'usni to pilato ho yainca: <'atemueno mahafo note pocengi, pnanfi na temu peelʉi ho bumemeala noʉt'ʉci 'o heuf'a!>
66micu e'ohʉ, to skoskopna to fatu ihe topci to tposʉ no thomʉta, tomʉti 'o phingi to heuf'a, smuhnu to lepocengi ho noʉt'ʉci.
Currently Selected:
matai 27: bsnfe
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan © 台灣聖經公會版權所有 2014
