matai 26

ta'koeva no opcoza 'o iesu

(maluko 14:1-2; luka 22:1-2; yohane 11:45-53)

1isicu eepʉnga to iesu 'e e'e eni, cu mi'usni 'o tesi ho yainca: 2<imu cohivi, ten'a mipsohi tac'u meem'esa'o, tehe phieni ta cou 'e okocou, noa spica to zuuzika.>

3ne mio, 'o saisicoo ho i'o macocoolo mo yu'eteuyunu to emoo to taisaisi ci kaiyafa, 4toehungu toʉsvʉsvʉtʉ te auc'oc'ova tʉtpʉta 'o iesu ho opcoza. 5at'inghi ihe yainca: <o'ateto hioa ho ten'a seolʉa no meemeesi na eni. ci tes'a ec'ʉ no yutasufku tamo botngonʉ ci cou.>

yone potaniya ho noa tohʉsi

(maluko 14:3-9; yohane 12:1-8)

6'o iesu mo yone potaniya to emoo tomo tma'congo no to'ho'ho ci saimong; 7panto cihi ci mamespingi mo mahafo tomo conci pania, isi songcʉngci to sopepea ci konamusngau. nemo seolʉa no bonʉ 'o iesu, isi hoyuha to fnguu to iesu 'o konamusngau. 8ihe aiti to tesi 'e hi'hioa eni, mo na'no 'oha kaebʉ, yainca: <mainci yaica ci hia a'hi'hisa? 9'e konamusngau eni hoci phieni o'ates'a kakutia na tesi huphina ho titha to'usnu nomo thi'cia ci cou!>

10isicu cohivi to iesu, cu mi'usni 'o tesi ho yainca: <mainci 'ahʉya poa ma'ngongoveo 'e mamespingi eni? maisi teyaineni tamo yonghu ci hioa na a'o. 11maica la asngʉcʉ yaa no'upu muu ci mo thi'cia ci cou, at'inghi o'a te'o meelʉ asngʉcʉ no'upu muu. 12ho isi hoyuha ta feango'u 'e konamusngau ma isi ae'ayocneni ho tena soʉlʉlʉa to heuf'a a'o. 13te'o a'ʉmta eʉsvʉta muu, acʉcʉhʉ ta mauhpʉhpʉngʉ, 'upena hoci psoecʉ'ha nenu 'e fukuin eni, tehela 'oehamva 'e isi hi'hioa ho taaecingia.>

phieni to yuta 'o iesu

(maluko 14:10-11; luka 22:3-6)

14to 'ayumona to maskʉ ueso ci tesi to iesu, panto cihi ci coukaleo ci yuta; mo uhto saisicoo, 15yainca: <hoci'u faeni muu 'o iesu, cuma natemu faeni a'o?> ihe fii tomo mtuehu ci peisu no nging 'o yuta. 16ahoi ne mio, mo mooteo note 'oc'ocic'o ci hie 'o yuta tasi phieni 'o iesu.

toehungneni oyofonʉ no meem'esa'o 'o tesi

(maluko 14:12-21; luka 22:7-14, 21-23; yohane 13:21-30)

17meekayo no meetoasmoof'o, uhto iesu 'o tesi ho tuocosi: <teko poa yonenu a'mi ho ae'ayocʉ note oyofona no meem'esa'o?>

18yut'inga to iesu: <temu yʉmeʉmʉ ta hosa ho uhto ic'o, mi'usni ho yainca: <<yainca to sensei. tec'u mon'i esmi 'e hiesi; te'o noteuyuneni 'e tesi'u ho yonta emoosu ho noyʉci 'e meem'esa'o.>> >

19micu maito hia eutotavei to iesu 'o tesi ho ae'ayocʉ tote oyofona no meem'esa'o.

20cu yofna, isi suteuyuneni to iesu 'o maskʉ ueso ci sitoo. 21nemo seolʉa no bonʉ, yainca to iesu: <te'o eʉsvʉta muu, ta taicomu mo cihi ci cou tenasi phieni a'o.>

22mo acʉhʉ na'no ma'kuv'o 'o tesi, macicihi tuocosʉ to iesu: <nooe'oca, zou a'o?>

23yut'inga to iesu: <i'o temza yu'siepoepohʉ ta oothua ho mahsieyu to pang 'aeno ic'o tenasi phieni a'o. 24aʉlʉ mais'a 'o isi engha to seiso, te tiou no akuzkuzoa 'o okocou, at'inghi i'ote himhohioa ho phieni 'o okocou tesi meamzi! 'e cou eni nte ʉmnʉhe hoci moso o'te 'ahʉyʉ yayo!>

25i'ote himhohioa ho phieni 'o iesu ci yuta mo maezo tuocosʉ: <sensei, zou a'o?> isi yainca to iesu: <ikocu iachia eh'ʉta.>

oyofonʉ to nooe'oca

(maluko 14:22-26; luka 22:15-20; kolinto 1 11:23-25)

26nemo seolʉa no bonʉ, isi eepza to iesu 'o pang, auyu to'aveoveoyʉ 'inoli, isicu tipcia, aangaeza to tesi, yainca: <temu mayo ho ana; zou feango'u eni.>

27acnguhu, isi eepza 'o sooetohvʉ, ataveisi no mi'usnu to hamo ho to'aveoveoyʉ, cu faeni to tesi, yainca: <temu acʉhʉ mimo; 28zou hmuyu'u eni, zou hmuyu no to'honga hote yupa esvʉtʉ 'e cou ho hamo, mo nomio no peteongasa na kuisi ta botngonʉ ci cou ho mohtoesuyu. 29te'o eʉsvʉta muu, 'anate'o ahta i'vaha ima 'e emi eni, ac'ʉhʉ no hiesi ho tato noteuyunu to hpʉhpʉngʉ to amo'u ho mimo nomo faeva ci emi.>

30mo toehungu pasunaeno tomo conci pasunaenva, cu yuyafo ho uhto hcuyu'olivu.

eyoca to iesu 'o petelo tasi meoo'te honga

(maluko 14:27-31; luka 22:31-34; yohane 13:36-38)

31ataveisi, isi mi'usni to iesu 'o tesi ho yainca: <ta yofna maitan'e, temu acʉhʉ nomio a'o ho mongoi; maica ho isi yainca to seiso: <<tasi 'a'usni to hamo 'o le'aʉt'ʉcʉ moatʉ'nʉ, cu apeaski 'o moatʉ'nʉ.>> 32at'inghi ataveisi ho ta'ucu smoevovei, tena'u muyohe muu ho uhne ngalilaya.>

33mi'usni to petelo 'o iesu ho yaica: <'upena hoci mongoi suu 'e mocmo ci cou, o'ate'os'a ahtu mongoi suu!>

34mi'usni to iesu 'o petelo ho yainca: <te'o eʉsvʉta suu, ta feʉngna maitan'e, auyusi no muni 'o teo'ua, tako i'toteuha meoo'te honga a'o.>

35yut'ingi 'o petelo: <'upena hoci'u tu'upu suu, o'ate'os'a ahta aha'va o'te honga suu!>

'o mocmo ci tesi mo maezo acʉhʉ maica 'o e'ehe.

yone kosimani ho 'inoli

(maluko 14:32-42; luka 22:39-46)

36'o iesu ho i'o tesi mo uhto mo conci hpʉhpʉngʉ, zou kosimani 'o ongkosi; isi mi'usni to iesu 'o tesi ho yainca: <temu yusuhngu tan'e, te'o uhta'e ho 'inoli.> 37isicu engocha 'o petelo ho i'o mo yoso ci oko to sipitai ho nʉtheni. micu ahoi ma'tipvongʉ ho nac'o 'o iesu, 38isi mi'usni ho yainca: <mo na'no nac'o co 'tohʉngʉ'u, mais'a te'ocu mcoi. temu yontan'e, maezo a'o ho aʉtʉs'ʉ!>

39mo ake'i emosuhcu 'o iesu, m'ocnguyu ta ceoa, 'inoli ho mainca: <amo'u. honci peelʉi, teko'so o'te 'ahʉya poa imneni a'o 'emo mayʉmʉ ci sooetohvʉ! at'inghi, teav'a poa maino koyu'u, 'ateeno maino 'tohʉngʉsu.>

40mo yuovei to ihe yoni tomo tuyu ci tesi, aiti homo m'oosu'u, cu mi'usni 'o petelo ho yainca: <o'antemu meelʉ i'upu a'o ho mako cono huomza hie ho aʉtʉs'ʉ? 41la aʉtʉs'ʉ 'inoli, te o'te su'ayumonʉ no ma'pepecvai. la e'vono ma'kaebʉ na 'tohʉngʉmu, at'inghi la yoz'u si feangomu.>

42mo i'vaho emose'u 'o iesu ho 'inoli mainca: <amo, hoci o'ateno mongoi a'o 'e mo mayʉmʉ, 'ahʉya poa imneni a'o, 'atekoeno aepʉnga na 'tohʉngʉsu!> 43mio i'vaho yuovei to ihe yoni to tesi, aiti ho mioc'o i'vaho m'oosu'u; 'o mcoohe o'anamo mako teov'ohʉ.

44mio i'vaho mongoi to tesi 'o iesu, cu i'toteuhu 'inoli, 'o isi e'e mioc'o totiski to isi aueva engha. 45ataveisi mo i'vaho yuovei to ihe yoni to tesi, yainca: <mimuc'on'a oengʉtʉ, mimuc'on'a amiocni? aiti, micu esmi 'e hiesi no phieni ta mo yaa kuisi ci cou 'e okocou. 46yʉc'ʉ, tetocu e'ohʉ! aiti, micu esmi simo himhohioa ho phieni a'o!>

noa tʉtpʉta 'o iesu

(maluko 14:43-50; luka 22:47-53; yohane 18:3-12)

47ne mon'a seolʉa no aomotʉ'ʉ 'o iesu, mo esmi 'o yuta ci cihi to maskʉ ueso ci tesi. botngonʉ ci cou mo mahafo to poyave tapuyungu ho to'ofeihni; 'emo maica ci cou ihec'o acʉha popeoskuna to saisicoo ho coolo. 48i'omo himhohioa ho phieni 'o iesu. isi aueva teyaineni no tehe humzi, yainca: <siya na te'o kisuneni, 'aeno ic'o na temu tʉtpʉta.>

49mo osni emo'usnu to iesu 'o yuta, yainca: <sensei, yokeoasu!> isicu kisuneni 'o iesu.

50yainca to iesu: <nanghia, 'e teko 'ucia hioa, aupcieva hioa#<'e teko 'ucia hioa, aupcieva hioa> hocieno yainca <cuma na teko hioa ho miko uhtan'e>.!>

i'omo fiho ci cou mo osni ohsuhcu, tʉtpʉta 'o iesu ho seo'eisi. 51to 'ayumona tomo to'upu to iesu ci cou, panto cihi cimo epusku to poyave, teoca 'o cihi to soskuskunu to saisi, hic'oha 'o coni to koyusi. 52isi mi'usni to iesu ho yainca: <siya si poyave! maica nala afu'u tiot'ou no poyave, te ahtuo'te mcoi no poyave. 53o'a ikoeno cohivi te'o meelʉ mi'usnu to amo'u ho noa to'usni, a'vinano tesi peelʉi osnia teomi note maskʉueso no taucunu ci tensi? 54hoci maica na nte'o hioa, 'o isi engha to seiso cite anana'o maica na a'a'ausna teeno ahtu esmi?>

55acnguhu, isi mi'usni to iesu 'o botngonʉ ci cou ho yainca: <mimu smu'iei ho sotho ho temu tʉtpʉta a'o, imun'asi ta'upa no yaksai a'o? la'u huhucmasi yusuhngu to seiten ho mo'ma'cohio to cou, mainci o'a lamu tʉtpʉta. 56at'inghi, 'emo maica acʉcʉhʉ ci hi'hioa ho mo esmi te mia 'o ohela engha to eyongensa ci e'e to seiso.>

ne mio, mo acʉhʉ mongoi to iesu 'o tesi, hocu toekameosʉ.

yonto ngikai ho tiou no yʉsvʉta

(maluko 14:53-65; luka 22:54-55, 63-71; yohane 18:13-14, 19-24)

57i'omo tʉtpʉtʉ to iesu ihe hafa 'o iesu ho uhto emoo to taisaisi kaiyafa. to ic'o, mo seolʉa no yu'eteuyunu 'o lema'cohio seiso ho i'o macocoolo. 58mo pemcovhi 'o petelo ho to'ofeihni to iesu, ne micu sʉc'ʉhʉ to coca to taisaisi. mo yʉmeʉmʉ to coca 'o petelo. notvohʉ to kengsacu, tesi aiti tena mainenu na tasi ataveia a'a'ausna ta hi'hioa tan'e. 59'o saisicoo ho acʉcʉhʉ 'o ngikai ihe ta'totoothoma ho i'imneni no meknuyu ci e'omamzi tehe ehpʉngneni 'o iesu, te poa meolʉ no tesi koa mcoi, 60e'vono botngonʉ 'omo emeknuyu ho ehpʉnga 'o iesu, at'inghi o'amo ahtu elʉ note a'ʉmta e'omamzi. atavei uso 'omo yoso ci cou ho yainca: 61<'e cou eni ohtala yainca: <<'ate'o peelʉi eon'ozi 'o seiten to hamo, tec'o miteuhi te'ocu p'eyoveiya.>> >

62mo yʉc'ʉ 'o taisaisi, tuocosi 'o iesu: <'e ihe ehpʉngneni ta cou, uk'a ci tekoeno ehcʉvha?> 63o'amo ake'i ya'ei 'o iesu. isi i'vaha yainca to taisaisi 'o iesu: <te'o boemi to ongko to no'auesiesi ci hamo ho pashʉi suu ho eʉsvʉta a'mi, zou a'ʉmtʉ kilisto, oko to hamo na suu?>

64yut'inga to iesu: <zou e'esu na eni. at'inghi te'o eʉsvʉta muu, ataveisi tan'e, tenamu aiti 'o okocou te yusuhngu to vhona to sotonʉa ci hamo, poʉt'ʉcʉ to cmʉcmʉ ta pepe ho ohpueho!>

65ne isicu talʉi to taisaisi 'e e'e eni, cu eekieki 'o iachisi yʉsʉ, mainca: <ita aokoe'iya 'o hamo. 'anateto 'ahʉyʉ 'aoko biebimi note 'akasi ci cou. mimucu acʉhʉ tmalʉ ho mita aokoe'i to hamo; 66tee mainenu na 'tohʉngʉmu?>

ihe yut'inga: <nteta mcoi!>

67ihe teʉpsi 'o sapci to iesu, tʉ'pʉ'pʉneni ho tutva. i'o mo tmo'papliki to pinosi ci cou 68yainca: <kilisto, zou eyongensa na suu! aothoma eʉsvʉta, zou siya 'emo muutu suu?>

me'o'o'te honga to petelo 'o iesu

(maluko 14:66-72; luka 22:56-62; yohane 18:15-18, 25-27)

69mo yonto coca to yafana ho yusuhngu 'o petelo; panto cihi ci soskuskunu no mamespingi to taisaisi mo emo'usnu, yainca: <ma maezo 'oahngʉ to coungalilaya ci iesu na suu.> 70mo yonto tuhcu tomo botngonʉ 'o petelo ho peeco. isi yainca: <o'a os'o cohivi cuma co osko engha>, 71atavei mo emoyafo, sʉc'ʉhʉ to phingi to coca. mio i'vaho cihi ci soskuskunu no mamespingi isi aiti, mi'usnu tomo yac'ʉ to ic'o ci cou ho yainca: <na taini 'a 'oahngʉ to iesu ne nazalo.>

72mio i'vaho peeco 'o petelo, mo esvʉtʉ ho mainca: <o'a os'os'a maka ake'a honga 'o cou ic'o!>

73o'amo aomane, 'omo bichipi yac'ʉ ci cou, isi mi'usni 'o petelo ho yainca: <ma asansano 'oahngʉhe na suu; 'aisieno tamzi ta tmu'a'ausnasu.>

74micu i'vaho aʉlʉ matkuzkuzo 'o petelo ho mainca: <o'a os'os'a honga 'o cou ic'o. hoci'u ake'i emeknuyu, tesi patvovei to hamo na a'o!>

tuhcusi ne mio. cu muni 'o teo'ua. 75isicueno talʉa to petelo 'o nia e'e to iesu: <auyusi no muni 'o teo'ua, tako i'toteuha peecveni a'o.> micu emoyafo 'o petelo ho mongsi.

Currently Selected:

matai 26: bsnfe

Highlight

Copy