luka 19

iesu ho saakai

1yʉmeʉmʉ to hosa ne 'eliko 'o iesu, nete seolʉa no sucaefi to hosa. 2to ic'o panto mo cihi ci taayaezoi to letmuhno, zou saakai 'o ongkosi, mo na'no yuyupasʉ ci cou. 3isi na'na 'ucia aiti to saakai 'o iesu mio nana mainenu ci cou, at'inghi mo angu cʉecʉ, homo notaico tomo botngonʉ o'amo smo'eʉc'ʉhʉ to iesu. 4micu muyohe tomo botngonʉ 'o saakai, capo to mehacni ci tahiucu, akoevano 'ucia hʉʉlʉlʉi 'o iesu, maica tena'so emomio ta ceonʉ tan'e 'o iesu. 5ne micu esmi to ic'o 'o iesu, mʉengʉcʉ ho aiti 'o saakai, isi mi'usni ho yainca: <saakai, aupcio yu'sipeohʉ! te'o asansano no'upu to emoosu maitan'e.>

6micu 'aumeumeusu yu'sipeohʉ 'o saakai, na'no kokaekaebʉ ho aʉt'ʉt'ʉca 'o iesu. 7mo acʉhʉ eubut'u 'omo baito ho yainca: <'e cou eni maincis'a uhta emoo tamo yaa kuisi ci cou!>

8mo yac'ʉ 'o saakai mi'usnu to nooe'oca ho yainca: <nooe'oca, te'o aatiska 'o yupasʉ'u ho faeni tomo thi'cia ci cou; hoci pano o'ula peknui ci siya, te'o topuhngi no te sʉptʉ ho yooveineni.>

9isi mi'usni to iesu ho yainca: <maitan'e mo cmʉ'ho ta emoo tan'e na mengumi to hamo, maica 'e cou eni 'aeno maezo mʉntʉ'ca to 'avulahamu. 10homo cmʉ'ho 'e okocou tesi i'ima ho to'usni namo eapayo'ʉ ci cou.>

epo'usa to soskuskunu ho peisu no king

(matai 25:14-30)

11ne ihe seolʉa no talʉi 'e e'e eni, isi i'vaha eʉsvʉta to iesu 'omo coni ci epo'usa. ne mio, tec'u mon'i sʉc'ʉhʉ ne 'elusalemu 'o iesu, ihe ta'unano tec'u cmʉ'ho na hpʉhpʉngʉ to hamo. 12yainca to iesu: <panto cihi tola einva ci suezopʉ mo uhne covhi, te p'eyac'a ho poa honte, ataveisi tenac'u yuovei. 13auyusi no e'ohʉ, isi eteuyuna 'omo maskʉ ci soskuskunu, poa macoconi to peisu no king, yainca: <<ho o'ate'o yontan'e. temu titha 'e peisu eni ho 'amamhimhino. aiti tee nana piyo nantemu peelʉi taspuhnga.>> 14'o cou to iachisi hpʉhpʉngʉ lahe anana'va sosʉ'novac'o, mo epei ta tehe skuna ho uafeihi ho yainca: <<o'atemza tiova 'e cou eni hoci honte.>>

15<ne ohecu p'eyac'a no honte hocu yuovei 'e einva ci cou, osni mashʉyʉ ho eteuyuna 'o moso tiou to peisu no king ci soskuskunu, tesi cohivi na hiahe 'amamhimhino mionana piyo na ihe taspuhnga. 16i'emo ahoi uso isi yaica: <<tauke, os'o titha 'o ohsu faeni ci peisu ho tmaspuhngu to mo maskʉ ci peisu no king.>> 17yainca to tauke: <<na'no ʉmnʉ! zou ʉmnʉ ci soskuskunu na suu; ho isieno peelʉi noe'oci ta moc'o okono hi'hioa na suu, te'o toveineni suu ho aʉt'ʉca 'omo maskʉ ci hosa.>> 18mio i'vaho uso 'omo cihi to soskuskunu ho yainca: <<tauke, os'o titha 'o osko faeni ci peisu ho tmaspuhngu tamo eimo ci peisu no king.>> 19isi mi'usni to tauke ho yainca: <<teko maezo aʉt'ʉcʉ tomo eimo ci hosa.>> 20mio i'vaho uso 'omo cihi ci soskuskunu ho mainca: <<tauke, a'emon'a yontan'e 'e peisusu; os'o to'silʉlʉa ta yʉteʉ. 21la'u anana'va smoyoa suu, maica miko'so mouyʉcʉ ci cou. uk'a ci oho si'siya, tenakon'a p'enza; uk'a ci oho emʉ'a, tekon'a a'pʉ'pʉyʉ.>> 22mi'usni to tauke ho yainca: <<'e miko kuici soskuskunu, te'o ieni ta e'esu ho topci no kuisi suu! ho ikoeno cohivi ho mi'o mouyʉcʉ ci cou, tuyafa na o'aoho siya, a'pʉ'pʉyʉ no o'a oho emʉ'a. 23mainci o'aosko maka siya ne ngingkoo 'e peisu, totea ho ta'ucu yuovei, maka a'upa na lisisi ho yooveineni a'o?>> 24isicu mi'usni 'omo biavai ci cou ho yainca: <<tasvoveiya si peisu, faeni tamo yaa maskʉ ci soskuskunu.>> 25ihe mi'usni ho yainca: <<tauke, 'amitacueno yaa maskʉ ci peisu.>> 26yainca to tauke: <<te'o eʉsvʉta muu, na micu pano, te fii nomo asuhcu man'i; namo uk'a, te moeza a'upa na acʉcʉhʉsi ho yaeza ti'einga. 27i'o micu motano hoci'u honte ci hangʉ, hafa uhtan'e, yonta tuhcu'u ho opcoza!>> >

taotofsi'i ho yʉmeʉmʉ ne 'elusalemu

(matai 21:1-11; maluko 11:1-11; yohane 12:12-19)

28eepʉnga 'e e'e eni, mo papoevʉ 'o iesu, te emo'usnu ne 'elusalemu. 29ne tec'u mon'i sʉc'ʉhʉ to pofaki ho potaniya, ne micu mitomo mi'usnu to hcuyu'olivu, mo smuhnu to mo yoso ci tesi 'o iesu ho poa muyoa, 30eutotaveiya yainca: <temu uhta ito emotuhci ci you, ho tamucu yʉmeʉmʉ, tamu teolʉi 'o isi seo'tʉneni ci o'amocu ohola ahta aueva sopaevi ci oko no lova. tamu yunga, ho e'usna tan'e. 31hoci panonte tuocosʉ muu ho yainca mainci yunga si oko no lova, temu yainca: <<tesi titha to nooe'oca.#<to nooe'oca> hocieno yainca <to taukesi>.>> >

32micu e'ohʉ, i'o ihe aiti aʉlʉ mai to isi eʉsvʉta to iesu. 33ne ihe seolʉa no yunga 'o oko no lova, isi tuocosi to himnonu to lova: <mainci aha'va yunga si oko no lova?>

34ihe yut'inga: <tesi titha to nooe'oca.> 35ataveisi ihecu yaakaka 'o lova ho e'usna to iesu, ihe spoeni to f'uhu to lova 'o iachihe yʉsʉ, e'oca 'o iesu ho poa smopayo. 36nemo emosuhcu 'o iesu, ihe acʉha spoeni to ceonʉ 'o iachihe yʉsʉ.

37ne tec'u emocmu'u ne 'elusalemu, sʉc'ʉhʉ to toyovca to mia'usnu ne hcuyu'olivu, mo i'mi ta ihe aiti ci taunona'vʉ ci hi'hioa 'o tesi hocu tohmomoengʉ to hamo, tmunoi moozoyʉ: 38<tooyokeoi'sio to hamo 'emo boemi no ongkosi ho cmʉ'ho ci honte! mo yaa suseomʉ 'e pepe, no'usnu no sopepea ci hamo na psoevohngʉ!>

39ta 'ayumona tamo botngonʉ ci cou mo piyo ci coufalisai mo mi'usnu to iesu ho yainca: <sensei, pashʉi si tesisu ho poa amiocni!> 40yut'inga to iesu: <te'o eʉsvʉta muu, hoci hin'i o'te muni, mate moozoyʉ 'e mafafatu tan'e.>

tngisi 'o 'elusalemu

41ne tec'u mon'i sʉc'ʉhʉ ne 'elusalemu 'o iesu, aiti 'o hosa ic'o, isicu tngisi, 42yainca: <tata'za ho ciko cohivi maitan'e 'emo natʉ'ca no koa teko suseomʉ ci hi'hioa, at'inghi miko mainenu na hia bʉkngʉ maitan'e. 43tenac'u esmi na hiesi, ho mio tena tmaceo'ʉ 'o hangʉsu ho paikuyungvi suu, i'mi ta aukukuyungu ho aekotva suu. 44tehe a'sʉftona aapayo'a suu ho i'e yatatiskova ta 'ayumona ta hosa, o'ate mako yaan'a yupa totoe'ocʉ ci fatu, maica o'a osko maka honga na hiesi no to'usni to hamo.>

poa cofkoya 'o seiten

(matai 21:12-17; maluko 11:15-19; yohane 2:13-22)

45ne micu yʉmeʉmʉ to seiten 'o iesu, isicu peteoyafa 'omo 'amamhimhino ci cou. 46mi'usni ho yainca: <isi tposi to seiso yainca to hamo: <<'e seiten'u tela 'oyona 'inoli>>, at'inghi imu tiezuha ho teyai sku'u no yaksai!>

47la huhucmasi yonta seiten 'o iesu ho mo'ma'cohio to cou. 'o saisicoo, lema'cohio seiso, ho i'o masoso'ehti ta yata hosa lahe 'ucia opcoza 'o iesu. 48at'inghi o'a ihe cohivi natehe ti'a'ausnu; maica lahe'so toehunga ʉmnʉa talʉi ta mo botngonʉ ci cou, taayaezoi 'o macoconi ci lasi e'e.

Currently Selected:

luka 19: bsnfe

Highlight

Copy