luka 18
18
epo'usa to hookang ho tuvcongʉ ci mamespingi
1mo mi'usnu to tesi 'o iesu ho mo'engho tomo coni ci epo'usa, akoeva no la asngʉcva poa 'inoli 'o tesisi, ho o'te ma'sasmʉzʉ. 2isi yainca: <panto hookang to mo conci hosa, o'ala smoyo to hamo, o'ala einu ta cou. 3to hosa to ic'o mo cihi cimo tuvcongʉ ci mamespingi la siho uso, m'eya ahmʉska atʉkca 'o namif'uhasi. 4'e hookang eni lasi ezua peaezoni, at'inghi ohsicula yainca no koyusi: e'vono o'ala'u smoyo to hamo, o'ala'u einu ta cou, 5at'inghi 'e mamespingi eni la o'te a'hupsonʉ 'afeo'fu'u a'o, moeza to'usni, te o'te 'aoko uso ho koakuzo.>
6ecnguhu 'o nooe'oca ho yainca: <temueno talʉi 'e e'e ta kuici hookang! 7o'atesieno to'usni to hamo nala huhucmasi mi'usnu ho noa to'usnu ci 'o'okosi? tesis'aeno peaezoni ho poa poha'o na tesi hia to'usnu? 8te'o eʉsvʉta muu, 'atesi ahtao'te aupcieva to'usni. at'inghi. hotac'u cmʉ'ho 'o okocou, teenana elʉ nomo maica hia yaa singkooa ta hpʉhpʉngʉ?>
epo'usa to coufalisai ho letmuhno
9mio i'vaho mo'engho tomo h'unasi ci epo'uso 'o iesu, isi mituhci 'ola micinanaeno moulʉlʉ ho potfʉngʉ to mocmo ci cou. isi yainca: 10<panto mo yoso ci cou mo uhto seiten ho 'inoli: zou coufalisai 'omo cihi, letmuhno 'o mo cihi. 11'o coufalisai mo bʉsngʉcʉ, 'inoli ho mainca#<mo bʉsngʉcʉ, 'inoli ho mainca> panto piyo ci h'unasi ci tposʉ noana'o isi yainca <mo bʉsngʉcʉ, ec'ecachi 'inoli ho mainca>.: <<hamo, te'o 'aveoveoyʉ suu, maica o'a mi'o mas'a mocmo ho ma'konvosʉ, 'oha moulʉlʉ, smoc'ou, o'a mi'o h'unano mais'a ta letmuhno. 12la'u i'popsohʉ tanzi ho mo mainsohʉ, la'un'a yaeza faeni to hamo 'omo amaska coni to la'u afu'a tov'oha.>> 13at'inghi 'o letmuhno mo bimcovhi yac'ʉ, o'a mo mako smeecʉ'ho mi'usnu ne pepe, c'o t'oubobaki 'o t'oengasi ho mainca: <<hamo, coveoza'sio 'e mi'o yaa kuisi ci cou!>> 14te'o eʉsvʉta muu, ho tac'u maine'e 'emo yoso, ho tesi aiti no mcoo to hamo 'ai'eeno letmuhno ina moulʉlʉ ci cou. o'a i'os'a coufalisai, maica 'o hamo tesi epeohi 'ola biepe ci cou. hoepzeni 'ola iachi biaceaco ci cou.>
tooyokeoi to iesu 'o oko
(matai 19:13-15; maluko 10:13-16)
15panto mo mahafo to foinana ho baito to iesu, te noa hoe'oci to iesu. aiti to tesi, ihecu'so koica. 16at'inghi isi eoho'a to iesu 'o 'o'oko ho poa uhto tuhcusi, yainca: <poa uhtan'e si 'o'oko, teav'a potani, maica 'omo yonto hpʉhpʉngʉ ne pepe ci mao'o'oko 'amoeno aʉlʉ mais'a 'emo maica ci cou. 17temu atatalʉa: inamo afu'u o'te mais'a 'e oko ho tiou no hpʉhpʉngʉ to hamo ci cou, o'ate ahtu meelʉ tma'oko to hamo.>
ngoveoa tamo yuyupasʉ.
(matai 19:16-30; maluko 10:17-31)
18panto cihi ci papoevʉ to couyutaya mo uso ho noa po'pa'cohivi to iesu, yainca: <mou'ʉmnʉ ci sensei. cuma na nte'o hioa niante'o meelʉ mayo no 'auesiesi nsou?>
19isi tuocosi to iesu: <mainci osko aac'o yainca a'o mou'ʉmnʉ? tapeoha 'o cihi ci hamo, uk'ana cimo mou'ʉmnʉ. 20'aiko ahtao'te cohivi 'o hia esvʉtʉ to h'oesvʉta: <<'ote mseezo; 'ote opcoi; 'ote meo'eoi; 'ote emeknuyu; la meot'ʉt'ʉcʉ to maameoi.> >>
21isi yut'inga to ic'o: <acʉcʉhʉ 'e h'oesvʉta eni o'ucu ahoza ne mo'un'a oko ho pee'ofeihni.>
22isi talʉi to iesu 'e e'e eni, ivaha mi'usni ho yainca: <mon'a coni 'omo uk'a. acʉha phieni 'o ezoezoyʉsu, faeni tomo thi'cia ci cou na peisu, tekocueno yaa yupasʉ ci teko soangva ne pepe; atavei teko to'ofeihni a'o.> 23ne isi talʉi to ic'o 'e e'e eni, micu ma'nanac'o, maica homo na'no yuyupasʉ.
24isi aiti to iesu, cu yainca: <'emo yuyupasʉ ci cou hoci meelʉ tma'oko to hpʉhpʉngʉ to hamo a'ʉmtʉs'a songoveoa! 25'emo yuyupasʉ ci cou hoci meelʉ tma'oko to hpʉhpʉngʉ to hamo. mo ngoveohe to lakuta hoci yʉh'ʉtʉ to koyu to feezo!>
26'emo tmac'ʉhʉ ta e'e tan'e ci cou cu tuocosi: <hoci maica, siya na ten'a meelʉ noa to'usni?>
27yainca to iesu: <ina o'ala peelʉi ta cou, lasi acʉha peelʉi to hamo.>
28ne mio. yainca to petelo: <teko aiti, imzacu teongasi 'e emoomza hocu to'ofeihni suu.>
29yainca to iesu: <'aeno a'ʉmtʉ, te'o a'ʉmta eʉsvʉta muu, namo afu'u nomio to hpʉhpʉngʉ to hamo ho teongasi na iachi emoo, vcongʉ, nanat'ot'ohaesa, maameoi, ho ina 'o'oko, 30'ate ahtuo'te yonta hie maitan'e ho asuhcu man'i nate elʉa, a'vinano yono te cmʉ'ho ci hpʉhpʉngʉ ho meelʉ mayo no 'auesiesi nsou.>
i'toteuha eyoca to iesu na tesi hia mcoi
(matai 20:17-19; maluko 10:32-34)
31isi ese'va to iesu 'omo maskʉ ueso ci tesi, mi'usni ho yainca: <ho teto uhne 'elusalemu maitan'e; 'o ohela tposi to eyongensa cimo e'usnu to okocou cimo macoconi ci hi'hioa tec'u acʉhʉ esmi. 32te tomakneni to emucu to couyafana; tehe keematmohi, aokoe'iya, mi'usni ho teʉpsi, 33tehen'a ti'usna, tahecu opcoza; at'inghi ho tac'u miteuhi, tena smoevovei.>
34'emo maica ci hi'hioa uk'a ci ihe conci ta'hongi ta tesi, moc'o ma'nongonongo to isi engha to iesu ci e'e, maica ho isic'on'a eotoefʉnga na e'a'ausnasi.
aotothoma to iesu 'omo bʉkngʉ ci thi'cia
(matai 20:29-30; maluko 10:46-52)
35mo esmi to micu cum'u ne 'eliko 'o iesu, panto cihi cimo bʉkngʉ ci cou mo suaskiti to ceonʉ ho m'eya bonʉ. 36isi talʉi 'o botngonʉ mo tocaefi, cu tuocosi zou cuma co hi'hioa.
37panto mo eʉsvʉtʉ: <'ai'o iesu ne nazalo te seolʉa no tocaefi tan'e!>
38micu moozoyʉ: <oko to tavite ci iesu, coveoza a'o!>
39'omo papoevʉ ci cou ihe koica, poa o'te ptaʉngʉ. namamo asuhcu tmunoi moozoyʉ: <oko to tavite, coveoza a'o!>
40micueno tosvo 'o iesu, smuhnu ho e'usna to tuhcusi 'omo bʉkngʉ ci cou. nemo ohcum'u. isi tuocosi to iesu: 41<cuma na teko poa hioaneni a'o?>
isi yut'inga: <nooe'oca, mi'o mici bohngʉ!>
42mi'usni to iesu ho yainca: <nahocueno teolʉ! isicu poa yov'o ta singkoosu.>
43micu osni bohngʉ 'o bʉkngʉ, cu to'ofeihni to iesu, pcaceoni ho tohmomoengʉ to hamo. ihe aiti to botngonʉ eni, maezo acʉhʉ tohmomoengʉ to hamo.
Currently Selected:
luka 18: bsnfe
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan © 台灣聖經公會版權所有 2014
