yohane 4

iesu ho i'o mamespingi no cousamalia

1ihe tac'ʉhi to coufalisai 'o iesu homo eteuyunu no tesi ho hioa na toonono. mo botngonʉhe to yohane. ( 2a'ʉmtʉsi o'amocu moso ahtu iachi toonono no cou 'o iesu, mai'o tesisi 'ola toonono.) 3ne isicu cohivi to iesu na eni micu mongoi ta yutaya, i'vaho yuovei ne ngalilaya; 4te ahtuo'te sucaefi ne samalia.

5nemo sʉc'ʉhʉ to hosa to sika ne samalia, o'amo covhi no ceoa ci ohsila faeni to oko to yakovu ci yosefu; 6mo yonto ic'o 'o yoe'ova yakovu. maica ho micu smaingoseo 'o iesu, cu suaskiti to yoe'ova; mo asonʉ a'usnu no cohzona ne mio.

7panto cihi ci mamespingi to samalia mo esmi ho yo'u; isi mi'usni to iesu ho yainca: <tekon'a ake'a fii no te'o ima ci chumu.> ( 8'o tesisi mohcu uhto hosa ho mhino note 'o'ana.)

9isi yut'inga to mamespingi: <zou couyutaya suu, na a'o ma mamespingi ta samalia, mainci miko mi'usnu a'o ho m'ene no teko ima ci chumu?> (ma mosola anana'o o'te yupa 'u'uso 'o couyutaya ho i'o cousamalia.)

10yainca to iesu: <honciko cohivi na mengumi to hamo ho cohivi zou siya 'emo mi'usnu ho m'eya chumu, 'ateko ahtuo'te m'enehe, a'vinano tesi fii nomo yaa nsou ci chumu na suu.>

11yainca to mamespingi: <sensei, uk'a ci teko titha yo'u, a'vinano mo mʉ'eona 'e yoe'ova, teko mayo nomo yaa nsou ci chumu nenu? 12'o nia maameoimza ci yakovu ohsila teongasneni a'mi 'e yoe'ova eni; na iachisi, 'o'okosi, ho i'o snoecavʉsi mosola acʉhʉ mimo ta chumu ta yoe'ova tan'e. mikon'asi ma'unano miko tosa'ohe?>

13yut'inga to iesu: <nate mimo ta chumu tan'e tenan'a i'vaho mecu; 14at'inghi, siya nate mimo to te'o faeni ci chumu, 'anate ahtun'a i'vaho mecu. i'o te'o faeni ci chumu te i'mi ta 'ayumonasi ho esbobuka, o'ate ahtu tosvo moheafo 'o yaansou ci chumu, poa meelʉ mayo no 'auesiesi nsou.>

15yainca to mamespingi: <sensei, teko'so faeni a'o 'e chumu eni, poa 'auesiesi o'te mecu a'o, maezo 'anate 'ahʉyʉ 'aoko i'vaho uhtan'e ho yo'u.>

16isi mi'usni to iesu ho yainca: <eyoho'a na vcongʉsu, takocu i'vaho uhtan'e.>

17yaica to mamespingi: <uk'a ci vcongʉ'u.>

yainca to iesu: <osko yainca uk'a ci vcongʉsu, mioeno o'te emzo. 18mosola eimo 'o nia vcongʉsu, 'o mimu noepohʉ maitan'e o'as'a mako vcongʉsu. 'amio emzo co e'esu.>

19yainca to mamespingi: <sensei, os'o honga zou cihi ci eyongensa suu. 20'o nia maameoimza ta cousamalia moso la yonta hcuyu tan'e ho m'ohkuyu to hamo, lamu yainca ta couyutaya i'o 'elusalemu nante a'ʉmta yoni m'ohkuyu to hamo.>

21isi mi'usni to iesu ho yainca: <mamespingi, la tmaa'uzo a'o! tec'u esmi 'e hiesi, 'anatela yonta hcuyu tan'e hocieno yone 'elusalemu 'e cou ho m'ohkuyu to amopepe.> 22o'aimu cohivi ta cousamalia zou siya na imu p'ohkui, imza cohivi ta couyutaya 'o imza p'ohkui, maica 'e mengumi no to'usnu mo i'mi ta couyutaya. 23at'inghi tec'u cmʉ'ho 'e hiesi, 'acueno maitan'e, namo a'ʉmtʉ m'ohkuyu to amopepe, mo i'mi no piepiya ho taico no 'tohʉngʉ ho m'ohkuyu. 'ai'emoeno maica ci hia m'ohkuyu 'e tesi p'enza to amopepe. 24zou piepiya 'o hamo, inate m'ohkuyu te asansano boemi no piepiya ho ino taico no 'tohʉngʉ ho m'ohkuyu.>

25isi mi'usni to mamespingi ho yainca: <os'o cohivi 'o isi yainca kilisto ci misaiya tena cmʉ'ho, ho tac'u cmʉ'ho. tenasi acʉcʉha eʉsvʉta a'mi na hi'hioa.>

26yut'inga to iesu: <na a'o, 'emo seolʉa no mi'usnu ho ya'ei, 'acueno ic'o!>

27seolʉa ne mio, cu yuovei 'o tesi to iesu. ihe aiti homo seolʉa no yupeahngʉyʉ 'o mamespingi, ihe na'na yamceni, at'inghi uk'acimo tuocosʉ to mamespingi ho mainca: <cuma na teko p'enza?> hocieno tuocosi 'o iesu: <mainci osko yupeahngʉneni si mamespingi?>

28isi teongasi to mamespingi 'o yoo'tohvasi, emo'usnu to hosa. mi'usnu tamo botngonʉ ho yainca: 29<temueno uhsa ho aiti! pantomo cihi ci cou isi acʉha epopayoa 'o o'ula afu'a hi'hioa ne noana'o; 'e cou eni nenusino zou kilisto?> 30mo acʉhʉ yuyafo to hosa ho aiti 'o iesu.

31ne mio, ihe cucufni ta tesi 'o iesu: <sensei, ake'i bonʉ ta macucuma.>

32yut'inga to iesu: <'a panto la'u ana, o'a imus'a cohivi.>

33mo yupa tuocosʉ 'o tesi: <pano mon'asi mofi no tesi ana?>

34isi mi'usni 'o tesi ho yainca: <'o 'oanʉ'u 'aeno peis'ofeihni 'o 'tohʉngʉ to mo popeosmuhnu a'o, a'vinano te aepʉnga 'o isi toveineni a'o ci hi'hioa. 35imu yainca: <<teen'a sʉptʉ no feohʉ niantec'u efeutu.>> te'o eʉsvʉta muu, aiti ta ezoezoyʉ, mamicu kayani ta heʉheʉm'ʉ, 'atec'u peelʉi efeuta! 36'omo efeutu te mayo no hnoo, a'pʉ'pʉyʉ no beahci no 'auesiesi nsou, poa toehungu kokaekaebʉ 'o moso emʉm'ʉ ho i'omo efeutu. 37<<emʉm'ʉ 'omo cihi, efeutu 'omo cihi>> mo a'ʉmtʉ emio 'e e'e eni. 38os'o popeoskuna muu ho efeutu ta o'a ohmu hioa ci ezoyʉ; mo ngoseo 'o mocmo, mimu tma'upu ta beahci to nia ngoseohe.>

39ta hosa mo botngonʉ 'omo tmaa'uzo to iesu ci cousamalia, maica ho isi yainca to mamespingi: <isi acʉha eyafa na ohsila hi'hioa.> 40mo biebimi to iesu 'emo maica ci cousamalia, tehe 'ucia poa no'upu ta lahe yoni, micueno a'ʉmtʉ mipsohi to lahe yoni 'o iesu.

41mo asuhcu botngonʉ 'omo i'mi to e'e to iesu hocu taa'uzva. 42ihecu yainca 'o mamespingi: <ho mimzacu tmaa'uzo maitan'e, o'anamo i'mito e'esu, mo i'mi ho imzacu iachia talʉi 'o e'esi, cohivi ho zou a'ʉmtʉ leto'usnu ta hpʉhpʉngʉ.>

aotothoma to iesu 'o oko to taicini

43mo mipsohi to ic'o 'o iesu, ataveisi cu uhne ngalilaya. 44ohsila iachia yainca: <'o eyongensa. o'ala einva ta iachi emooana.> 45ne micu sʉc'ʉhʉ ne ngalilaya 'o iesu, ihe toehunga yungeova to cou to ic'o; maica ohe aiti 'o nia hi'hioa to iesu ne moso uhne 'elusalemu ho i'upu to meem'esa'o.

46mo i'vaho yuovei to kaana ne ngalilaya 'o iesu, 'aito ohsieno yoni poa tmuemi 'o chumu. to ic'o panto cihi ci taicini, mo yone kapenong 'o okosi ho tma'congo. 47isi tac'ʉhi 'o iesu homo i'mi ne yutaya ho cmʉ'ho ta ngalilaya, cu biebimi to iesu. m'eya poa uhne kapenong ho aotothoma 'o isicu sokoeva 'o tma'congo ci okosi. 48mi'usni to iesu ho yainca: <hoci o'te baito no po'e, lamu conino o'te tmaa'uzo.>

49isi yaica to taicini: <sensei, teko'so ieni ho o'amocu mo mcoi 'o oko'u ho fiho a'o.>

50isi mi'usni to iesu ho yainca: <e'ohʉcu, 'atee yunsou 'o okosu!>

isicu taa'uzva to ic'o 'o e'e to iesu hocu maine'e. 51ne mon'a pcaceoni, ihe yungeova to soskuskunusi, mi'usni ho yainca: <'amicu yunsou 'o okosu!>

52isi tuocosi 'o soskuskunu, homo mainenu na hie ho micu yov'o. ihe yut'inga ho yainca: <micu a'usnu no ma'hinsohʉ to ataveisi no cohzona ne hucma, cu tosvo 'o cuveu.> 53isi talʉa to amosi, 'aeno ne mio 'o isi mi'usni to iesu ho yainca: <te yunsou 'o okosu>, i'mi tan'e cu acʉhʉ tmaa'uzo 'o cono emoohe.

54na eni ohsi i'vaha hioa to iesu ci po'e ne moso i'mi ne yutaya ho yuovei ne ngalilaya.

Currently Selected:

yohane 4: bsnfe

Highlight

Copy