kolinto 2 8
8
tosmʉya to sinto
1maanat'ohaesa, imza tata'za hocimu cohivi na lasi hia aʉlʉlʉa to makikiokai ne makitong to hamo. 2mo i'mi to ihe mia ci 'atutumzo ho tiou to ecvʉhʉ ci hʉsvʉta; at'inghi mo nongcʉngcʉ 'o kokaekaebʉhe. yontomo kuici thi'cia lean'a mealʉ tosmʉyʉ. 3te'o seecʉ'ha soomei, i'o lahe hia tosmʉyʉ la pnanfi na tehe peelʉi, ac'ʉhʉ no nosa'o no tonʉhe. iachi ma'kokoyu, 4ihe mi'usni a'mi ho m'eya poa tma'upu no ʉmnʉ ci hi'hioa hote to'usni 'o sinto ne yutaya. 5mo a'ʉmtʉ na'no nosa'o no imza totea na eni. ahoi. ihe aueva faeni to nooe'oca 'o iachihe feango, ataveisi micu maino 'tohʉngʉ to hamo ho to'usni a'mi. 6i'mi tan'e, imza poucufna 'o tito ho a'cʉ'cʉna to'usni muu, aepʉnga 'o ohsi peisfongfongi ci ʉmnʉ ci hi'hioa. 7'upena na singkoo, hia aomotʉ'ʉ, mau'to'tohʉngʉ, smoekaebʉ to'usnu no mocmo, ho ina hia mi'usnu a'mi#<a'mi> panto isi tposi ho yainca <muu>. ci himngonghi, mimu a'ʉmtʉ na'no atngaso, os'o tata'ia no temula yonta mo maica ci ʉmnʉ ci hi'hioa ho afnaso mealʉ.
8o'ate'o esvʉtʉ no 'ofiha no cuma, te'oc'o maka poa cohivneni muu, nalahe hia asno'zonʉ no mocmo hola to'usnu no cou. ieni tan'e ho hʉsvʉta na himngonghimu. 9imucu cohivi 'o mengumi to nooe'ocato ci iesu kilisto: mo anana'o atngaso, at'inghi mo nomio muu ho iachi thi'cia, na atuhcusi tesi ieni no thi'ciasi ho poa atngaso muu.
10e'usna tan'e, os'o yainca no koyu'u: te atva'esi ʉmnʉ hocimucu aepʉnga maitan'e 'o ohmu ahoza ne nʉt'ʉcu ho hioa ci tosmʉyʉ. o'a mimu anouc'o atva'esi auyu poot'ou tamo maica, mimu maezo atva'esi auyu yaa maica ci 'tohʉngʉ ho hioa. 11'atemueno ma'hʉhʉyʉ, ho aepʉnga 'e hioa eni! ntemu boemi no ohmu ahoza ta'koeva ho cuveu ci 'tohʉngʉ ho aepʉnga 'e hioa eni, a'vinano te maino acʉcʉhʉmu maitan'e ho posuhca. 12hocimu a'ʉmtʉ i'mi no 'tohʉngʉ ho tosmʉyʉ, 'atesi ahtao'te kaeba tiova to hamo; na afu'u pano te faeni, o'ate mofi namo uk'a.
13-14o'a os'os'a 'ucia topuhngi na cvʉhʉmu ho aovoha na cvʉhʉ no mocmo, ho mimucueno atngaso maitan'e, 'ante anana'o to'usnu to mo thi'cia. hocic'ula auski atngaso ho panontemula 'ucia poa to'usneni, 'atahe ahtao'te yaeza to'usni muu. maicac'o te aavai yaa hiesi no yupa to'usnu. 15aʉlʉ mais'a 'o isi engha to seiso:
i'omo man'i 'o isi tov'oha, o'amo yaa ang'osʉ;
i'omo kakutia 'o isi tov'oha, o'amo aviovio.
tito ho i'ola toetoehungu yaahioa
16'aveoveoyʉ to hamo, isi poa maezo a'mi 'o tito ho asno'zonʉ to'usnu muu. 17o'amo anouc'o i'mi no lamza hia poucufnu, mo maezo i'mi no iachisi 'tohʉngʉ, afnaso tongtongsoyʉ no uhta lamu yoni. 18mimza smuhnu tomon'a cihi ci nat'ohaesa ho poa fihoa; 'e nat'ohaesa eni. lahe toehunga einva to makikiokai homo psoyaski ta fukuin. 19o'amo anouc'o maica, ho temza hioa 'emo psoevohngʉ to nooe'oca cimo ʉmnʉ ci hi'hioa, ihe toehunga epeiya to makikiokai ho poa fiho a'mi, yaeza epa'teni ho mimza acʉhʉ 'aveoveoyʉ to'usnu.
20ho imza aʉt'ʉca 'emo i'mi no mealʉ ho tosmʉya ci yupasʉ, conino a'sʉftonʉ bumemealʉ, cites'a i'mizi no yu'tiee'ei no mocmo ci cou; 21maica ho mimza bikoyu no hioa 'emo maica ci ʉmnʉ ci hi'hioa, 'upena hoci yono tuhcu to nooe'oca, hocieno yonta tuhcu ta cou tec'o acʉhʉ totiski.
22mimza i'vaho smuhnu to mo cihi ci nat'ohaesa ho poa to'ofeihni. 'e nat'ohaesa eni omzacu siho hʉsvʉta, cohivi la yontamo man'i ci hi'hioa ho kaebʉ to'usnu to mocmo. maitan'e, isi a'sʉftona taa'uzva muu, micu asuhcu tongsoyʉ no usa ho to'usni muu. 23i'ocu tito, zou 'oahngʉ'u. la'u iepoepohneni yaahioa ho lamza to'usni muu, i'o mon'a fiho cimo yoso ci nat'ohaesa lahe tovei to makikiokai. zou taotofsi'i to kilisto. 24ko'koeno, temula yonto makikiokai ho soomei na himngonghi ci 'tohʉngʉhe, a'vinano poa cohivneni to makikiokai, holamza etanveni muu o'amos'a o'te emio.
Currently Selected:
kolinto 2 8: bsnfe
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan © 台灣聖經公會版權所有 2014
