kolinto 2 9
9
to'usni 'ola toehungu yaahioa
1e'usna to hi'hioa ho isi to'usni 'o sinto to yutaya, o'ate'o 'ahʉyʉ tmopsʉ no tengami ho faeni muu. 2os'o cohivi mimu smoekaebʉ no tuyafa na tonʉ, i'mi tan'e mo'ula mi'usnu to yane makitong ho etanveni na hiamu mealʉ. o'u yainca: <'o sinto ne 'akaiya. micu ahoi ne nʉt'ʉcu ho ae'ayocʉ.> ina lamu hia ma'cucuveu ci 'tohʉngʉ isicu poot'ova 'o 'tohʉngʉ to botngonʉ ci cou. 3te'o skuna maitan'e 'emo piyo ci nat'ohaesa, tata'za hoci aʉlʉ mai to e'e'u ho imucu noana'va ae'ayoca na tosmʉya, o'te poa e'afeungu 'o nia e'e no'u etanveni muu ta hi'hioa tan'e. 4hoci panonte fiho a'mi ci yane makitong, cohivi ho cimu o'te a'ʉmtʉ ae'ayocʉ, matemza a'ʉmtʉ pa'hikokoe'i, maica ho ihe a'ʉmta taa'uzva muu. namaeno muu na o'ate ma'kokoe'i! 5ko'koeno, os'o yainca no koyu'u, nte ʉmnʉ hoci aueva skuna 'emo piyo ci nat'ohaesa ho uso muu, aueva poa noemʉhʉ na ohmu esvʉta ci tosmʉya, totea ho ta'ucu esmi hocu acʉha aepʉnga ayoca; hoci maica, te peelʉi humzi tan'e na tosmʉyamu mo i'mi no 'aveoveoyʉ ci 'tohʉngʉ. o'amo i'mi no meumzomzo.
6la atatalʉa: namo meongzotʉ la kakutia 'o isi tov'oha; namo meotmuzu la man'i 'o isi tov'oha. 7ko'koeno, 'emo macicihi nte ieni no iachi 'tohʉngʉ ho tosmʉyʉ, 'ote ma'pepecvai, o'ate meumzomzo, maica lasi ʉmnʉa to hamo nala smoekaebʉ sʉ'tʉ ci cou. 8tesi asuhca pafi no atngaso to hamo na muu, o'atesi anovac'o poa am'amso ho yaa ang'osʉa na muu, teen'a meelʉ butotaso tamo mav'ov'o ci peis'ʉ'ʉmnʉ ci hi'hioa. 9aʉlʉ mais'a 'o isi yainca to seiso:
la mealʉ to'usnu tola thi'cia ci cou;
na peislʉlʉsi te noc'ʉhʉ no 'auesiesi.
10i'ola mofi to hioyapo ho faeni tola miyapo, maezo mofi to 'oanʉ ho poa aneni ta cou ci hamo, 'atesi ahtao'te pafeni muu nate emʉ'a ci hioyapo, tesin'a poa yʉepʉngi, poa at'otngaso beahci na ohmula hi'hioa ci moulʉlʉ. 11tesi yaeza poa atngaso muu, conino poa yaa tonʉ no mealʉ to'usnu, 'emo botngonʉ ci cou te meelʉ i'mi homo tiou ta teonghiamu ho 'aveoveoyʉ to hamo. 12maica 'e imu tosmʉya o'aisi anova poa timso to ihe tititha to sinto, isi yaeza h'unasa honga tamo botngonʉ ci cou na hiahe 'aveoveoyʉ to hamo. 13'emo maica peis'ʉ'ʉmnʉ ci hi'hioa 'aeno conci huomza, poa cohivneni tamo botngonʉ ci cou ho mimu meo'uzo to kilisto, meot'ʉcʉ ta isi taa'uzva ci fukuin, maezo meelʉ mealʉ ho to'usnu no mocmo, na acʉcʉhʉ ci psoevohngʉ 'atehe ahtao'te ta'usna to hamo. 14tehe yaeza i'mi ho isi pafi no afnaso ci mengumi to hamo na muu ho h'unasa ʉmnʉa muu, as'asngʉcva 'inolineni muu.
15teto 'aveoveoyʉ to hamo! mo yaa o'ate peelʉi eepʉnga ci mengumisi!
Currently Selected:
kolinto 2 9: bsnfe
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan © 台灣聖經公會版權所有 2014
