1 Juan 4

ESPIRITU SANTUZ̈TAN CRISTUZ̈ QUINTRA ESPIRITUZ̈TAN

1Jilanaca, cullaquinaca, nonz̈na. Jakziltat “Tii takuqui Yooz takuc̈ha”, cjic̈haj niiqui, nii z̈oñiz̈ chiita taku zumpacha tantiyaquic̈ha, Yooz taku chiiñi, ana Yooz taku chiiñi, jalla nii. Anac̈ha c̈hjul takumi pjazila criizqui. Tii muntuquiz muzpa toscara chiiñi z̈oñinaca z̈ejlc̈ha; Yooz taku chiitaz̈okaz̈ cjic̈ha. 2¿Jaknuz̈t z̈oñiz̈ chiita taku paji atas uc̈humjo? ¿Yooz Espíritu Santuz̈ chiikatkaya? ¿Uz ana Yooz Espíritu Santuz̈ chiikatja? Jalla tuz̈ paji atasac̈ha uc̈humqui. Tii muntuquiz Jesucristuqui z̈oñz̈ curpuchiz kamchic̈ha. Jakziltat niz̈tapan chiic̈haja, jalla niic̈ha Yooz taku chiiñiqui. 3Niz̈aza jakziltat Jesucristuqui anac̈ha z̈oñz̈ curpuchiz kamchiqui, cjican chiic̈haja, jalla niic̈ha ana Yooz takucama chiiñiqui. Cristuz̈ quintra espirituqui nii chiikatc̈ha. Nii Cristuz̈ quintra espirituqui tjonaquic̈ha; tuquitan anc̈hucqui jalla nii nonzinc̈hucc̈ha. Anziqui tii muntuquiz niz̈ta Cristuz̈ quintra chiiñinaca z̈ejlc̈ha.

4Pecta jilanaca, cullaquinaca, anc̈hucqui Yooz maatinacc̈hucc̈ha. Nii toscar taku joojooñinacaqui diabluz̈ mantitaz̈ ojklayc̈ha. Anc̈huczti Yooz Espíritu Santuz̈ mantitaz̈ ojklayc̈ha. Yooz Espíritu Santuqui juc'anti azzizza nii diabluz̈quiztan cjenaqui. Nekztan anc̈hucqui nii toscar taku joojooñinaca atipasac̈ha. 5Ninacaqui diabluz̈ maatinacac̈ha. Nii z̈oñinacaqui ana Yooz takucama chiiñic̈ha, diabluz̈ taku chiiñic̈ha ninacaqui. Nii diabluqui tii muntuquiz anchaz̈ mantic̈ha. Jaziqui Yoozquin ana criichi z̈oñinacaqui diabluz̈ taku criic̈ha. 6Uc̈humzti Yooz maatinacc̈humc̈ha. Jaziqui werar Yooz takuz̈ chiyan Yoozquin criichi z̈oñinacaqui nii werar takuz̈ catokc̈ha. Ana Yoozquin criichi z̈oñinacaqui nii werar taku anaz̈ catokc̈ha. Nuz̈quiz werar taku chiiñi z̈oñinacami, niz̈aza toscar taku chiiñi z̈oñinacami pizcpacha pajasac̈ha uc̈humqui.

YOOZQUI ANCHA MUNAZIÑI KUZZIZZA

7Pecta jilanaca, cullaquinaca, Yoozpankazza uc̈hum porapat zuma munazkatñiqui. Jaziqui uc̈humqui tjappacha porapat zuma munazizpanc̈ha. Jakziltat zuma munazic̈haja jalla niiqui Yooz maatic̈ha. Niz̈aza Yooz pajc̈ha. 8Yoozqui ancha munaziñi kuzzizza. Jaziqui jakziltat ana munaziñi kuzzizlaja, jalla niiqui ana Yooz pajc̈ha. 9Yooz Ejpqui tii muntuquiz niiz̈ zinta Majch cuchanz̈quichic̈ha uc̈hum Yooztan wiñaya kamzjapa, wali cuntintu. Jalla nuz̈ cuchanz̈quitiquiztan Yoozqui uc̈humquiz niiz̈ munaziñi kuz tjeezic̈ha. 10Yoozqui ultimu zuma munaziñi kuzzizpanc̈ha. Yooz Ejpc̈ha uc̈hum k'ayachichiqui. Nekztan niiz̈ Majch cuchanz̈quichic̈ha. Yooz Majchqui uc̈hum uj laycu ticzic̈ha, uc̈hum ana casticta cjisjapa. Nekztan zuma munaziñi kuzqui jaknuz̈t cjec̈haja, nii zizza uc̈humqui.

11Pecta jilanaca, cullaquinaca, uc̈humtan ancha munazic̈ha Yooz Ejpqui. Jaziqui uc̈hum niz̈tazakaz porapat zuma munazizpanc̈ha. 12Anaz̈ jakzilta z̈oñimi Yooz cherc̈ha. Ana Yooz cherz̈cumi zuma munazic̈haja, jalla nii z̈oñiqui Yooztan tsjii kuzzizza. Niz̈aza Yooz munaziñi kuz, jalla niz̈ta kuzzizza nii z̈oñiqui. 13Yooz Ejpqui niiz̈ Espíritu Santo uc̈humquiz tjaachic̈ha. Jalla nekztan Yooztan uc̈humtan tsjii kuzzizza, nii zizza uc̈humqui. 14Yooz Ejpqui niiz̈ Majch cuchanz̈quichic̈ha z̈oñinaca liwriizjapa. Nii Yooz Majch cherchinc̈ha wejrnacqui. Nekztan anc̈hucaquiz nii puntu tjaajinchinc̈ha. 15Jakziltat “Yooz Majchc̈ha Jesucristuqui”, cjic̈haja, jalla niic̈ha Yooztan tsjii kuzzizqui. Niz̈aza Yoozqui niiz̈tan tsjii kuzzizza.

16Yoozqui uc̈humtan ancha munazic̈ha, jalla nii zizza uc̈humqui. Niz̈aza nii criic̈ha uc̈humqui. Yoozqui munaziñi kuzzizza. Jaziqui jakziltat munaziñi kuzzizpanz̈laja, jalla niic̈ha Yooztan tsjii kuzzizqui. Niz̈aza Yoozqui ninacz̈tan tsjii kuzzizza. 17Nuz̈ kamcan juc'ant juc'ant munaziñi kuzziz cjissa uc̈humqui, Jesucristuz̈ irat kuzziz cjiscama. Jalla nekztan juyzuquiz ana eksnaquic̈ha uc̈humqui. 18Munaziñi kuzziz z̈oñinacaqui ana Yoozquin eksñic̈ha. Zuma munaziñi kuzziz z̈oñinacaqui anaz̈ c̈hjulumi eksnasac̈ha. Jalziltat eksñi kuzzizlaja, jalla niiqui Yooz casticz eksa. Jalla niz̈tiquiztan anaz̈ zuma munaziñi kuzzizza nii eksñi z̈oñinacaqui.

19Yoozqui uc̈humtan zuma munazic̈ha. Jalla nekztanaqui uc̈humqui Yooztan munazic̈ha. 20Jakziltat “Wejrqui Yooztan zuma munaziñi kuzziztc̈ha”, chiic̈haja, jalla niiqui niiz̈ jilanacz̈tan ana chjaawjkatñipanc̈ha. Niiz̈ jilanacz̈tan chjaawjkatc̈haja, jalla niiqui anaz̈ Yooztan zuma munaziñi kuzzizza. Inapankaz “Wejrqui Yooztan zuma munaziñi kuzziztc̈ha” cjic̈ha. Toscara chiic̈ha. Nii z̈oñinacaqui cherta jilanacz̈tan anazuma munazic̈haja, jalla niiqui ¿jaknuz̈t ana Yooz cherz̈cu Yooztan munaziñi kuzziz cjesajo? Anapanz̈ cjesac̈ha. 21Yoozqui uc̈hum mantichic̈ha tuz̈ cjican:

—Jakziltat Yooztan munaziñi kuzzizlaja, jalla niiqui niiz̈ jilanacz̈tanami zuma munaziñi kuzzizzakaz cjis waquizic̈ha.

Currently Selected:

1 Juan 4: cap

Highlight

Copy