Mateo 23

Judiokunaj kurajninkukunata ch'ataykun

(Mc 12.38-40; Lc 11.37-54; 20.45-47)

1Chaymantaqa Jesús runakunaman, yachachisqankunaman ima kay jinata nerqa: 2Fariseokunawan, Diospa kamachisqanmanta yachachejkunawan imaqa Moisespa cuentanmanta Diospa kamachisqanta yachachinku. 3Chayrayku imatachá yachachisunkichej, chayta kasuspa, ruwaychej. Chaywanpis ama paykuna jina kaychejchu, imaraykuchus imatachus yachachisqankuta mana ruwankuchu. 4Paykunaqa runakunaman kamachisqakunata junt'anankutapuni nispa, mana oqhariy atina llasa q'epita jina q'epiriykuchinku. Chaywanpis paykuna ni ruk'anankutapis kuyurichinkuchu oqhariyta yanaparinankupaj.

5Chantá chay kurajkuna imatapis ruwanku, runawan rikuchikunallankupaj. Diospa Qhelqachisqanmanta wakin qhelqasqata mat'inkuman, makinkuman ima watakunku. Jinallataj jatuchaj waych'ayoj p'achakunata churakunku. 6Jatun mikhuykunapipis ñawpajpipuni tiyayta munanku, jinallatataj tantakuna wasikunapipis. 7Chantá plazakunapi runakunawan napaykuchikuyta munanku: Yachachej Wiraqochi, nichikuspa.

8Qankunarí, ama Yachachej Wiraqochi nichikunkichejchu, imaraykuchus Yachachej Wiraqochiykichejqa ujlla. Qankunaqa tukuyniykichej wawqepuralla kankichej. 9Kay pachapi ama pitapis ninkichejchu: Tatáy, nispa, imaraykuchus Tata Dioslla Tataykichejqa, paytaj janaj pachapi kashan. 10Amallataj nichikuychejchu: Yachachejníy, nispa, imaraykuchus Yachachejniykichejqa ujlla, chaytaj Cristo. 11Manachayqa qankunamanta kurajpaj qhawasqa kajqa kamachiykichej kachun. 12Jatunchakojrí k'umuykuchisqa kanqa, k'umuykukojtaj jatunchasqa kanqa.#Job 22.29; Pr 29.23; Eclo 1.27; Lc 14.11; 18.14.

13Ay qankunamanta, puraj uya fariseokuna, Diospa kamachisqanmanta yachachejkuna ima. Qankunaqa Diospa janaj pacha kamachiyninman yaykunata wisq'ankichej. Qankuna chayman mana yaykunkichejchu, nitaj yaykuyta munajkunatapis yaykojta saqenkichejchu.

14Ay qankunamanta, puraj uya fariseokuna, Diospa kamachisqanmanta yachachejkuna ima. Qankunaqa warmisapaj tiyapuyninkuta oqokapunkichej. Chantá mana jina kasqaykichejta reparachikunaykichejpaj unay unayta Dioswan parlarikoj tukunkichej. Chayrayku qankuna aswan sinch'i ñak'ariywan jasut'isqa kankichej.

15Ay qankunamanta, puraj uya fariseokuna, Diospa kamachisqanmanta yachachejkuna ima. Qankunaqa mama qochanta rinkichej, tukuynejtataj purimunkichej uj runallatapis t'aqaykichejman pusamunaykichejpaj. Chay runa qankunaman k'askakapojtintajrí, paytaqa qankunamanta astawanraj lawrashaj nina qochaman wijch'usqa kananpaj jinaman tukuchinkichej.

16Ay qankunamanta, ñawsa kashaspa wajkunata pusaykachajkuna. Qankuna yachachinkichej: Pichus Templorayku tilojqa mana tilusqanta junt'ananpunichu tiyan. Chaywanpis Temploj qorinrayku tilojrí nisqanta junt'ananpuni tiyan, nispa. 17Wampu, ñawsa runakuna. Mayqentaj aswan kurajri: Temploj qorinchu, chayrí chay qorita Diospaj t'aqaj Templochu?

18Chaymanta yachachillankichejtaj: Pichus altarrayku tilojqa mana chay tilusqanta junt'ananpunichu tiyan. Chantá, pichá altar patapi kashaj jaywasqarayku tilojrí nisqanta junt'ananpuni tiyan, nispa. 19Ñawsa runakuna. Mayqentaj aswan kurajri: Jaywasqa kajchu, chayrí chay jaywasqata Diospaj t'aqaj altarchu? 20Pichus altarrayku tilojqa altar patapi kaj imakunaraykupis tilullantaj. 21Jinallataj pichus Templorayku tilojpis mana Temploraykullachu tilun. Aswanpis, chaypi tiyakoj Diosraykupis tilullantaj. 22Sitajchus pipis janaj pacharayku tilun chayqa, Diosraykupis tilullantaj, imaraykuchus Diospa kamachinan tiyanapis janaj pachapi kashan.

23Ay qankunamanta, puraj uya fariseokuna, Diospa kamachisqanmanta yachachejkuna ima. Qankunaqa sapa chunkamanta ujta Diosman qonkichej mentamanta, anismanta, cominomanta ima. Chaywanpis kamachisqakunamanta aswan kuraj kajtarí mana kasunkichejchu. Chaykuna kanku: Cheqan kay, khuyapayakoj kay, jinallataj Diosta mana wasanchay ima. Chay kuraj kamachisqakunataqa ruwanaykichejpuni tiyan, mana chay ujkunata qonqaspa. 24Qankunaqa ñawsata pusaykachaj ñawsa runakuna kankichej, ama ch'ichipaj qhawasqa kanaykichejpajtaj ch'uspita ch'umankichej. Chaywanpis camellota oqoykullankichej.

25Ay qankunamanta, puraj uya fariseokuna, Diospa kamachisqanmanta yachachejkuna ima. Qankunaqa vasota, chuwatapis jawallanta mayllankichej. Ukhunkurí ch'ichi kashan. Qankunaj sonqoykichejqa suwanawan, millay kawsaywan ima junt'a kashan. 26Ñawsa fariseo, ñawpajta vasoj ukhunta mayllay, chuwaj ukhuntawan, ajinamanta jawanpis llimphu kananpaj.

27Ay qankunamanta, puraj uya fariseokuna, Diospa kamachisqanmanta yachachejkuna ima. Qankunaqa yurajchasqa covachaman rijch'akunkichej. Covachaqa jawamanta k'achitu rikukun. Ukhunrí aya tulluwan, tukuy millay asnawan junt'a kashan. 28Qankunapis ajinallataj kankichej: Runaj ñawpaqenpi cheqan runaman rijch'akunkichej. Sonqoykichejrí puraj uya kaywan, millay ruwanawan ima junt'a kashan.

29Ay qankunamanta, puraj uya fariseokuna, Diospa kamachisqanmanta yachachejkuna ima. Qankunaqa Diosmanta ñawpa sut'inchajkunaj covachankunata sayarichinkichej. Jinallataj, cheqan kaj ñawpa runakunaj covachankunatapis k'achanchankichej. 30Chantá ninkichej: Sichus ñawpa tatanchejkuna kawsasharqanku, chaypacha kawsashasunman karqa chayqa, noqanchej Diosmanta sut'inchajkunata wañuchiyta mana yanapasunmanchu karqa, nispa. 31Ajinata nisqaykichejwanqa qankunallataj contraykichejta parlankichej, Diosmanta sut'inchajkunata wañuchejkunaj wawankuna kasqaykichejta. 32Chayrayku kunanqa qankunapis imatachus tataykichejkuna ruwayta qallarisqankuta tukuychallaychejña. 33Qankuna venenoyoj katari jina kankichej. Imaynatataj lawrashaj nina qochaman wijch'usqa kanaykichejmanta llusp'iyta yuyankichejri?#Mt 3.7; 12.34; Lc 3.7.

34Chayrayku noqaqa Diosmanta sut'inchajkunata kachamusqaykichej, yachayniyojkunata, yachachejkunata ima. Qankunatajrí wakinta wañuchinkichej, wakinta cruzman chakatankichej, wakintataj tantakuna wasikunapi jasut'inkichej, wajkunatataj llajtamanta llajta qhatiykachankichej. 35Ajinata qankuna juchachasqa kankichej tukuy mana juchayojkuna wañuchisqa kasqankumanta, Abel wañuchisqa kasqanmantapacha, Berequiaspa churin Zacariaskama, pitachus Temploj pationpi altar qayllapi wañucherqankichej, chaykama. 36Kayta sut'ita niykichej: Kay tukuy imamanta jasut'eyqa kunan p'unchay kawsajkunaj patankuman urmamonqa, nispa.

Jesús Jerusalenpi tiyakojkunamanta waqan

(Lc 13.34-35)

37Jesús nillarqataj: Ay Jerusalén, qanqa Diosmanta sut'inchajkunata wañuchej llajta kanki. Qanman Diospa kachamusqankunatapis rumiwan ch'anqaykuspa, wañuchillankitaj. Noqa mashkha kutitachus wawaykikunata tantayta munarqani, imaynatachus wallpa chillwinkunata lijran uraman tantaykun, ajinata. Qantajrí mana munarqankichu. 38Kunanrí qhawariychej, wasiykichejqa ch'inpacha qhepakonqa. 39Chayrayku niykichej: Manaña ujtawan rikuwankichejchu, ninaykichejkama: Tukuyta Kamachej Diospa sutinpi jamojta jatunchaychej,#Sal 118.26; Mt 21.9. nispa.

Currently Selected:

Mateo 23: DQPC

Highlight

Copy