Mateo 22
22
Casarakupi jatun mikhunamanta rijch'anachina
(Lc 14.15-24)
1Jesús ujtawan rijch'anachinawan paykunata yachacherqa: 2Diospa janaj pacha kamachiynenqa rijch'akun uj kuraj kamachejman, pichus churin casarakushajtin, jatun mikhuyta wayk'uchisqa, chayman. 3Chantá kuraj kamachejqa kamachinkunata kachasqa jatun mikhuyman wajyarisqa kajkunata pusamunankupaj. Wajyasqakunarí mana jamuyta munasqankuchu.
4Chayrayku kuraj kamachejqa waj kamachinkunatañataj kachasqa, ajinata ninankupaj: Jatun mikhuna wakichisqaña. Wirayachisqa uywaykunata, wira toroykunata ima ñak'anankupaj kamachiniña. Chayrayku casaraku raymiman jamullaychejña, nispa. 5Chaywanpis wajyasqakunaqa mana kasusqankuchu, manachayqa ujnin chajranman ripusqa, ujnintaj qhatunman. 6Wakinkunataj kuraj kamachejpa kachankunata jap'ispa, wañuchinankukama maqaykusqanku.
7Jinapi kuraj kamachejqa chayta uyarispa, anchatapuni phiñakusqa. Chayrayku uj tropa soldadokunata kachasqa, chay runa wañuchejkunata tukuchinankupaj, llajtankutataj ruphaykuchinankupaj ima. 8Chaymantataj wakin kamachinkunata nisqa: Casamientopaj jatun mikhoyqa wakichisqaña chaypis, chay wajyasqakunaqa mana chayman jamunankupaj jinachu karqanku. 9Kunanqa qankuna ñankunaman rispa, tukuy tarisqaykichej runata casarakuy raymiman wajyamuychej, nispa. 10Kamachikunataj ñankunaman llojsispa, tarisqanku kaj chhikata wajyasqanku, allin kajkunata mana allin kajkunatapis. Ajinamanta raymi waseqa chay wajyasqakunawan junt'aykusqa.
11Chantá kuraj kamachejqa wajyasqankunata qhawarej yaykusqa, chaypitaj uj runata mana casamiento p'achayojta rikusqa. 12Nisqataj: Kawsaqéy, imajtintaj kayman yaykumorqanki mana casamiento p'achayojri? nispa. Chay runarí ch'inlla kakusqa. 13Jinapi kuraj kamachejqa kamachinkunata nisqa: Kay runataqa chakin, makin watasqata jawa laqhaman wijch'uychej, maypichus waqay, kiru k'arukuytaj kanqa, chayman, nispa. 14Noqataj niykichej: Ajina ari, wajyasqakunaqa ashkha kanku, ajllasqakunatajrí pisilla, nispa.
Impuestota paganamanta
(Mc 12.13-17; Lc 20.20-26)
15Chantá fariseokuna tantakuspa, yachachinakorqanku imaynatachus Jesusta ima nisqanpipis pantajtin, ch'ataykunankupaj. 16Paykunataj wakin fariseo masinkunata, herodianokunatawan ima kacharqanku Jesusta nimunankupaj: Yachachej Wiraqochi, qan cheqanta parlaj kasqaykita yachayku, Diosta kasunatataj cheqanta yachachisqaykita ima. Qan manallataj pejpa nisqantapis kasunkichu, nitaj runaj uyanta qhawarispallachu imatapis ruwanki. 17Niwayku ari: Allinchu kanman Romapi kuraj kamachej Cesarman impuestota pagana, manachu? nispa.
18Jesustajrí mana allin sonqowanchu tapusqankuta yachaspa, nerqa: Qankunaqa puraj uya kankichej. Imaraykutaj pantachiwayta munankichejri? 19Impuesto pagana uj phisuta rikuchiwaychej, nispa.
Paykunataj uj phisuta jaywarqanku. 20Chantá Jesús paykunata taporqa: Pejpa uyantaj, chantá pejpa sutintaj kay phisupi churasqa kashanri? nispa. 21Paykunataj kuticherqanku: Cesarpata ari, nispa.
Jesustaj kuticherqa: Jina kajtenqa, Cesarpata kajtaqa Cesarman qopuychej. Diospata kajtatajrí Diosman qopuychej,#Ro 13.7. nispa.
22Paykunataj chayta uyarispa, mayta t'ukorqanku, chantá riporqanku.
Wañusqakuna kawsarimunankumanta
(Mc 12.18-27; Lc 20.27-40)
23Chay p'unchayllataj saduceokunapis Jesusman jamorqanku, pikunachus ninku wañusqamanta kawsarimuy mana kasqanta, chaykuna. Paykunataj Jesusta taporqanku: 24Yachachej Wiraqochi, Moisés kamacherqa: Casarasqa qharichus warminwan manaraj wawayoj kashaspa wañun chayqa, wawqen chay warmisapawan casarakuchun, ajinamanta wañoj wawqenpa miraynin ama chinkananpaj,#Dt 25.5. nispa. 25Noqayku ukhupi qanchis wawqekuna karqanku. Kuraj kaj casarakorqa, chaymantataj mana unayninmanchu mana wawayoj wañuporqa. Chantá, iskay kaj wawqe chay warmisapawan casarakorqa. 26Jinapi iskay kaj wawqepis wañupullarqataj. Ajinamanta qanchisnintin chay warmiwan casarakuspa, mana wawayoj wañuporqanku. 27Tukuyninkoj qhepantataj chay warmipis wañupullarqataj. 28Kunan niwayku: Sichus qanchisnintin paywan casarakorqanku chayqa, wañusqamanta kawsarimuy p'unchaypi chay warmeqa mayqenpa warmintaj kanqari? nispa.
29Chantá Jesús paykunaman kuticherqa: Qankunaqa pantashankichej, mana Diospa Qhelqachisqanta, nitaj Diospa atiynintapis yachasqaykichejrayku. 30Wañojkuna kawsarimojtinkoqa, qharipis, warmipis manaña casarakonqankuchu, manachayqa janaj pachapi angelkuna jinallaña kanqanku. 31Wañusqakunaj kawsarimuyninmantaqa, manachu ñawirerqankichej Dios imatachus nisqanta? Pay kay jinata nerqa: 32Noqa Abrahampa Diosnin kani, Isaacpata, Jacobpata ima,#Ex 3.6; 3.15. nispa. Diosqa mana wañusqakunaj Diosninkuchu, manachayqa kawsajkunajta, nispa.
33Chay imakunata uyarispa, runakunaqa Jesuspa yachachisqanmanta t'ukorqanku.
Aswan kuraj kaj kamachisqa
(Mc 12.28-34)
34Maypachachus fariseokunaqa yachasqanku Jesús saduceokunata ch'inyachisqanta chaypacha, paykunañataj tantakuspa, Jesusta tapoj rerqanku. 35Chantá Diospa kamachisqanmanta ujnin yachachej Jesusta pantachiyta munaspa, taporqa: 36Yachachej Wiraqochi, Diospa tukuy kamachisqakunamanta mayqentaj aswan kurajri? nispa.
37Jesustaj kuticherqa: Tukuyta Kamachej Diosniykitaqa tukuy sonqoykiwan munakunki, tukuy almaykiwan, tukuy yuyayniykiwantaj.#Dt 6.5. 38Chaymin Diospa kamachisqankunamanta aswan kuraj, ñawpaj kajtaj. 39Qhepan kaj kamachisqapis ñawpaj kajman rijch'akullantaj: Runa masiykita munakunki qan kikiykita jina, nispa.#Lv 19.18. 40Kay iskay kamachisqakunapi tukuy kamachisqakuna junt'akun, Diosmanta sut'inchajkunaj nisqankupis, nispa.
Pejpa churintaj Cristori?
(Mc 12.35-37; Lc 20.41-44)
41Fariseokuna tantasqa kashajtinkuraj, Jesús paykunata taporqa: 42Ima ninkichejtaj Cristomanta? Pejpa Churintajri? nispa. Paykunataj kuticherqanku: Payqa Davidpa Churin, nispa.
43Jinapi Jesús nerqa: Chantá imaraykutaj Davidqa Santo Espiritunejta Cristota nerqa: Tukuyta Kamachejníy, nispa? David ajinata nerqa:
44Tata Diosqa Tukuyta Kamachejniyta nerqa:
Kay pañaynejpi tiyarikuy,
awqaykikunata chakiyki uraman churanaykama,#Sal 110.1; Mc 12.36; Lc 20.42-43; Hch 2.34-35; 1 Co 15.25; Ef 1.20-22; Col 3.1; Heb 1.13; 8.1; 10.12-13. nispa.
45Sichus kikin David Cristota Tukuyta Kamachejníy nin chayqa, imaynamantataj Cristoqa Davidpa Churin kanmanri? nispa.
46Mana pipis kutichiyta atispa, chaymantapacha manaña pipis astawan taporqachu.
Currently Selected:
Mateo 22: DQPC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
