Mateo 16

Fariseokuna t'ukunata ruwananta ninku

(Mc 8.11-13; Lc 12.54-56)

1Uj kuti fariseokuna, saduceokunawan ima imaynallapipis Jesusta pantachiyta munaspa, payman qayllaykorqanku. Chantá runaj mana jayk'aj rikusqan t'ukunata ruwananta mañallarqankutaj, jinapi Diosmanta jamusqanta yachanankupaj.

2Jesustajrí kuticherqa: Ch'isiyaykushajtin, qankuna ninkichej: Q'aya sumaj p'unchay kanqa, imaraykuchus janajpi phuyu pukata antawaramushan, nispa. 3Tutamantataj ninkichej: Kunanqa sinch'ita paranqa, imaraykuchus janajpi puka yanata phuyuykamushan, nispa. Puraj uya, qankunaqa phuyuta qhawarispa, yachankichej imayna p'unchaychus kananta. Chantá imaraykutaj kunan tiempopi imachus kananmanta señalkunata mana rejsinkichejchuri? 4Qankunaqa millayta ruwajkuna, qhenchachakoj runaj miraynintaj kaspa, runaj mana jayk'aj rikusqan t'ukunata ruwanayta niwankichej. Chaywanpis mana ima t'ukuna señaltapis rikuchisqaykichejchu, manachayqa Jonaswan imachus karqa, chayllata, nispa.#Mt 12.39; Lc 11.29; Jon 3.3-5. Chantá paykunata k'akillata saqespa, Jesús riporqa.

Fariseokunaj levadurankumanta rijch'anachina

(Mc 8.14-21)

5Jesuspa yachachisqankunaqa qocha chimpaman chayaspa, t'antata mana apamusqankuta repararqanku. 6Chaypachallataj Jesús nerqa: Allinta qhawakuspa, karunchakuychej fariseokunaj levadurankumanta, saduceokunajmantawan, nispa.

7Yachachisqankunataj paykunapura ninakorqanku: Kaytaqa t'antata mana apamusqanchejraykuchá nishawanchej, nispa.

8Jesustajrí imatachus ninakusqankuta yachaspa, paykunata ujtawan k'amerqa: Imaraykutaj mana t'anta kasqanrayku siminakushankichejri? Qankunaqa pisillataraj noqapi atinikunkichej. 9Manarajchu entiendenkichej, nitajchu yuyarikunkichej imaynatachus phishqa t'antallawan 5.000 runakunata mikhuchisqayta, puchoj t'antatataj qankuna mashkha canastatachus oqharisqaykichejta?#Mt 14.17-21. 10Jinallataj qanchis t'antamanta, 4.000 runakunaman mikhuchejtiy, manachu yuyarikunkichej mashkha canasta junt'atachus puchoj t'antata oqharisqaykichejta? 11Imajtintaj mana entiendenkichejchu mana t'antamantachu qankunaman parlashasqayta? Noqa ujtawan niykichej: Allinta qhawakuychej fariseokunaj levadurankumanta, saduceokunajmantawan, nispa.

12Chaymantaña yachachisqankunaqa yuyayninkuman churakorqanku Jesusqa mana t'anta ruwana levaduramantachu parlashasqanta, manachayqa fariseokunaj, chantá saduceokunaj yachachisqankumanta.

Pedroqa Jesús Diospa kachamusqan Cristo kasqanta nin

(Mc 8.27-30; Lc 9.18-21)

13Maypachachus Jesús Filipoj kamachisqan Cesarea llajta qayllaman chayarqa chaypacha, yachachisqankunata taporqa: Runakunaqa Runaj Churin pi kasqantataj ninkuri? nispa.

14Paykunataj kuticherqanku: Wakinkunaqa Bautizaj Juan kasqaykita ninku, wajkunataj Elías kasqaykita, wakinkunataj Jeremías, chayrí Diospa ñawpa sut'inchajkunamanta ujnin kaj,#Mt 14.1-2; Mc 6.14-15; Lc 9.7-8. nispa.

15Jesús tapullarqataj: Qankunarí, pi kasqaytataj ninkichejri? nispa.

16Chantá Simón Pedro kuticherqa: Qanqa Diospa kachamusqan Cristo kanki, kawsaj Diospa Churin, nispa.

17Chaymanta Jesús nerqa: Kusikuyniyojmin kanki Simón, Jonaspa churin. Chaytaqa mana runachu sut'inchasunki, manachayrí, janaj pachapi kashaj Tata Diosniy chayta sut'inchasunki. 18Noqataj niyki: Qanqa Pedro kanki, kay chhanka patapitaj iglesiayta sayarichisaj. Ukhu pachaj atiyninpis mana iglesiaytaqa atipayta atenqachu. 19Noqataj qanman qosqayki Diospa janaj pacha kamachiyninman yaykunapaj llavekunata. Imatachus kay pachapi mana ruwanachu nispa ninki chayqa, janaj pachapipis chay nisqayki jinallataj kanqa. Imatachus kay pachapi ruwana walejlla nispa ninki chayqa, janaj pachapipis nisqaykiman jinallataj kanqa, nispa.

20Chaymantataj Jesusqa yachachisqankunata mayta kamacherqa amapuni pimanpis willanankuta pay Diospa kachamusqan Cristo kasqanta.

Jesús wañunanmanta willan

(Mc 8.31—9.1; Lc 9.22-27)

21Chaymantapacha Jesusqa yachachisqankunaman willayta qallarerqa Jerusalenman rinanpuni kasqanta, chaypitaj kurajkuna, Diospa kamachisqanmanta yachachejkuna, kuraj sacerdotekuna ima anchatapuni payta ñak'arichinankuta, wañuchinankuta ima. Chantá nillarqataj kinsa p'unchaymanta wañusqamanta kawsarimpunanta. 22Jinapi Pedroqa Jesusta sapallanta waj cheqanejman pusaspa, k'amiyta qallarerqa: Tukuyta Kamachej Jesús, amapuni Dios chayta munachunchu. Ama chayta parlallaypischu, nispa.

23Jesustajrí kutirikuspa, Pedrota nerqa: Riy kaymanta, Supay Satanás. Qanqa mana Diospa munasqanman jinachu yuyashanki, manachayqa runa jinalla, nispa.

24Chaymanta Jesús yachachisqankunata nerqa: Pillapis yachachisqay kayta munajqa munasqanman jinalla purinanta saqechun, cruzninta oqharispataj, qhepayta jamuchun. 25Pichus noqata kasunawanmanta nisqa kawsaynin aswan kasqanta qhawajqa mana wiñay kawsayman yaykonqachu. Chaywanpis pichus noqarayku kawsayninta mana may kasqanta qhawanchu, chay runaqa wiñay kawsayman yaykonqa. 26Ima allintaj runapaj kanman, sichus kay pachaj tukuy kapuyninta jap'ispapis mana wiñay kawsayman yaykunmanchu chayqa? Manachayqa, imatataj pipis paganman wiñay kawsayniyoj kananpajri? 27Aswan qhepaman Runaj Churenqa Tatanpa jatun kayninpa lliphipiyninpi jamonqa, angelninkunawan khuska. Chaypachataj pay sapa ujman ruwasqanman jina qoponqa.#Sal 62.11-12; Pr 24.12; Jer 17.10; Ez 18.30; Eclo 16.12,14; Ro 2.6. 28Kayta sut'ita niykichej: Kaypi kajkunamanta wakin mana wañonqankuchu, Runaj Churinta kamachinanpaj jamushajta rikunankukama, nispa.

Currently Selected:

Mateo 16: DQPC

Highlight

Copy