Mateo 15

Imachus runaj sonqonta ch'ichichan

(Mc 7.1-23)

1Wakin fariseokuna, Diospa kamachisqanmanta yachachejkuna ima Jerusalenmanta jamorqanku. Chantá Jesusman qayllaykuspa, taporqanku: 2Imaraykutaj yachachisqaykikuna ñawpa tatakunaj usunkuta mana ruwankuchuri? Paykunaqa makinkuta mana mayllakuspalla mikhunata mikhunku, nispa.

3Jesustajrí tapurerqa: Imaraykutaj qankuna Diospa kamachisqanta p'akinkichej, usuykichejta ruwanaykichejraykuri? 4Dios kamacherqa: Tataykita, mamaykitawan jatunpaj qhawanki, nispa. Nillarqataj: Pichus tatanta, chayrí mamanta maldicejqa wañuchisqa kachun,#Ex 20.12; 21.17; Lv 20.9; Dt 5.16. nispa. 5Qankunarí ninkichej: Pillapis tatanta, chayrí mamanta niyta atin: Imawanchus qankunata yanapanay karqa, chayqa Diospaj t'aqasqaña, nispa. 6Jinaqa manaña tatanta, nitaj mamantapis jatunpaj qhawaspa yanapanqachu. Ajinamanta qankunaqa Diospa kamachisqanta manakajman tukuchinkichej ñawpa usuykichejrayku. 7Qankuna puraj uya kankichej. Qankunamanta Diosmanta sut'inchaj Isaías maychus kajta sut'inchaspa, kay jinata nerqa:

8Dios nin: Kay runakunaqa simillankuwan jatunchawanku,

sonqonkupitajrí ni noqamanta yuyarikullankupischu.#Is 29.13.

9Qhasillata yupaychawanku.

Paykunaqa runaj wakichisqallanta yachachinku

noqaj kamachisqaypis kanman jina, nispa.

10Chantá Jesús runakunata wajyaspa, nerqa: Tukuyniykichej uyariwaychej, sumajtataj entiendeychej: 11Mana imapis runaj siminman yaykojqa payta Diospa ñawpaqenpi ch'ichichanchu. Manachayqa imachus runaj siminmanta llojsimun, chaymá runataqa Diospa ñawpaqenpi ch'ichichan, nispa.

12Jinapi yachachisqankunaqa qayllaykuspa, Jesusta tapurerqanku: Yachankichu chay nisqaykita uyarispa, fariseokuna phiñarikusqankuta? nispa.

13Jesustaj kuticherqa: Ima yurallapis janaj pacha Tataypa mana mallkisqanqa saphinmantapacha t'irasqa kanqa. 14Paykunata saqeychej, imaraykuchus ñawsakuna kanku, waj ñawsakunata pusaykachajtaj. Sichus ñawsa runa waj ñawsata pusaykachanman chayqa, iskayninku t'oqoman urmaykonqanku, nispa.

15Chaymanta Pedroqa Jesusta nerqa: Ama jina kaspa, chay rijch'anachinawan imatachus niyta munashasqaykita sut'inchawayku ari, nispa.

16Jesustajrí kuticherqa: Manarajchu qankunapis entiendenkichej? 17Manachu reparankichej tukuy imapis siminejta yaykojqa wijsallaman risqanta, chaymantataj llojsisqanta? 18Simimanta imachus llojsejrí runaj sonqonmanta rikhurin. Chaymá runataqa Diospa ñawpaqenpi ch'ichichan. 19Runaj sonqon ukhumanta kay imakuna llojsimunku: Millay yuyaykuna, runa wañuchiykuna, khuchichakuspa qhenchachakuykuna, khuchichakuykuna, suwakuykuna, llullakuykuna, Diospa contranta rimaykuna ima. 20Chay tukuy millay ruwaykunamá runaj sonqonmanta llojsimuspa, Diospa ñawpaqenpi chay runata ch'ichichan. Mana mayllasqa makiwan mikhuyrí mana runata ch'ichichanchu, nispa.

Cananea warmeqa Jesuspi atinikun

(Mc 7.24-30)

21Chantá Jesús Genesaretmanta puririspa, Tiro llajta, Sidón llajta chaynejman rerqa. 22Chaymantataj mana judío warmeqa Jesusman qayllaykuytawan, jatunmanta parlaspa mañakorqa: Wiraqochíy, Davidpa Churin, khuyarikuway ari. Ususiyta uj supay anchataña ñak'arichin, nispa.

23Jesustajrí chay warmiman mana imata kuticherqachu. Chantá Jesuspa yachachisqankuna payman qayllaykuspa, mañarikorqanku: Chay warmita kachapuy, imaraykuchus qhaparispallapuni qhepanchejta jamushan, nispa.

24Jinapi Jesusqa warmita nerqa: Tata Diosneyqa Israel ayllullata yanapanaypaj kachamuwan, imaraykuchus paykuna chinkasqa oveja jina kashanku, nispa.

25Chaywanpis chay warmi qayllaykuspa, Jesuspa ñawpaqenpi pampakama k'umuykorqa, chantataj nerqa: Wiraqochíy, ama jina kaspa, yanaparillaway ari, nispa.

26Jesustajrí kuticherqa: Mana allinchu wawakunamanta t'antankuta qhechuspa, alqokunaman qaranaqa, nispa.

27Chay warmitajrí nerqa: Arí, Wiraqochíy, chaywanpis alqokunaqa mesa urapi uywajninkoj t'anta t'akasqankuta mikhullankutaj, nispa.

28Jinapi, Jesús payta nerqa: Warmisita, sinch'itapuni noqapi atinikunki. Chayrayku munasqaykiman jina ruwasqa kachun, nispa. Chaymantapachataj chay warmej ususenqa qhaliyaporqa.

Jesús ashkha onqosqakunata qhaliyachin

29Jesús chaymanta llojsispa, Galilea qocha kantuman rerqa. Chantá, orqoman wicharispataj, chaypi tiyarikorqa. 30Ashkha runataj, maypichus Jesús kasharqa, chayman qayllaykorqanku. Paykuna suchukunata pusamorqanku, jinallataj ñawsakunata, opakunata, ñuk'ukunata, waj ashkha onqosqakunatawan ima. Jesuspa ñawpaqenman onqosqakunata qayllachejtinkutaj, Jesús paykunata qhaliyacherqa. 31Jinapi runakunaqa mayta t'ukorqanku opakunata parlajta rikuspa, ñuk'ukunata jaywarejta, suchukunata purirejta, ñawsakunatataj rikojta ima. Chantá paykuna Israelpa Diosninta yupaycharqanku.

Jesús 4.000 runakunaman mikhuchin

(Mc 8.1-10)

32Chantá Jesús yachachisqankunata wajyaspa, nerqa: Kay runakunamanta khuyarikuni, imaraykuchus kinsa p'unchaytaña noqawan kashanku, manataj imapis mikhunankupaj kanchu. Mana munaymanchu paykunata mana mikhusqata kachapuyta, imaraykuchus ñanpi llawch'iyankuman, nispa.

33Yachachisqankunatajrí nerqanku: Kay ch'inpi maypitaj t'antata tarisunman, kay chhika runakunaman mikhuchinanchejpajri? nispa.

34Jesustaj paykunata taporqa: Mashkha t'antataj kapusunkichejri? nispa. Paykunataj kuticherqanku: Qanchis t'antalla, pisi challwitakunawan ima, nispa.

35Chantá Jesús runakunata pampapi tiyarakunankuta kamacherqa. 36Chaymantataj chay qanchis t'antata, challwakunata ima jap'ispa, Diosman pachis nerqa. T'antakunata partiraspataj, yachachisqankunaman jaywarqa runakunaman rak'iranankupaj. Paykunataj ajinata ruwarqanku.

37Ajinamanta chay tukuy runakuna sajsakunankukama mikhorqanku, yachachisqakunataj puchojta qanchis canasta junt'ata oqharerqanku. 38Chaypacha mikhojkunaqa 4.000 jina qharikuna karqanku, mana warmikunata, nitaj wawakunata ima yupaspa. 39Chantá Jesús chay runakunata kacharparipuytawan, boteman wicharispa, Magdala llajta chaynejman rerqa.

Currently Selected:

Mateo 15: DQPC

Highlight

Copy