Mateo 13

Tarpoj runamanta rijch'anachina

(Mc 4.1-9; Lc 8.4-8)

1Chay p'unchayllataj Jesús wasimanta llojsispa, qocha kantupi tiyarikorqa. 2Chaymantaj ashkha runakuna payman tantakamojtinku, Jesusqa boteman wicharispa, chaypi tiyarikorqa, runakunataj qocha kantullapi qhepakorqanku. 3Chantá Jesús tukuy imamanta parlaspa, rijch'anachinawan yachacherqa. Nerqataj:

Uj runa tarpoj llojsisqa. 4Grano mujuta qhallishajtintaj, wakin muju ñanman urmasqa, p'isqokunataj jamuytawan, mikhukapusqanku. 5Wakin mujoqa rumirara pisi jallp'ayojman urmaspa, p'utumusqa. Chaywanpis mana ukhu jallp'ayoj kasqanrayku, 6inti llojsimojtinkama, qawirasqa, ch'akipusqataj, mana allin saphiyoj kasqanrayku. 7Wakin mujoqa khishkarara qhora chawpiman urmasqa, khishkataj chajrawan khuska wiñaykuspa, p'ampaykusqa. 8Wakin mujutajrí sumaj jallp'aman urmaspa, poqosqa. Wakin muju pachajta, wakin sojta chunkata, wakintaj kinsa chunkata uj mujullamanta poqosqa. 9Pichus nisqayta jap'ikuyta munajqa allinta uyarichun, nispa.

Imapajtaj rijch'anachinakunari?

(Mc 4.10-12; Lc 8.9-10)

10Chantá yachachisqankuna Jesusman qayllaykuspa, taporqanku: Imajtintaj runakunaman rijch'anachinawan parlankiri? nispa. 11Jesustaj kuticherqa: Imachus kanqa Dios kamachishajtin, chay pakasqa yachayta pay qankunaman rejsichisunkichej, manataj paykunamanqa. 12Pichus yachachisqayta jap'ikojmanqa Dios astawan yuyayta qonqa, aswan yachayniyoj kananpaj. Mana uyariwayta munajkunamantarí Dios pisi yachasqankutapis qhechonqa. 13Chayrayku noqaqa rijch'anachinawan wajkunaman parlani, imaraykuchus qhawashaspa, mana rikunkuchu. Ninriyoj kashaspapis, mana uyarinkuchu, nitaj entiendenkuchu. 14Ajinata Diosmanta ñawpa sut'inchaj Isaiaspa nisqan paykunapi junt'akun:

Uyarinkichej, manataj entiendenkichejchu.

Qhawashaspapis, mana rikunkichejchu.#Is 6.9.

15Kay runakunaj sonqonqa rumiyasqa,

ninrinkupis lojt'uyachisqa.

Ñawinkutapis wisq'allankutaj ama rikunankupaj.

Paykunachus ñawinkuwan qhawankuman,

ninrinkuwan uyarinkuman,

tukuy sonqotaj kutirikamuwankuman chayqa,

chaypacha noqaqa paykunata qhaliyachiyman, nispa.

16Qankuna yachachisqaykunarí kusikuyniyojmin kankichej, imaraykuchus ñawiykichejqa rikun, ninriykichejpis uyarin. 17Kayta sut'ita niykichej: Diosmanta ashkha ñawpa sut'inchajkuna, cheqan runakunapis imatachus kay rikusqaykichejta rikuyta munarqanku, manataj rikorqankuchu. Jinallataj imatachus uyarishankichej, chayta uyariyta munallarqankutaj, nillataj uyarerqankuchu.

Jesús tarpoj runamanta sut'inchan

(Mc 4.13-20; Lc 8.11-15)

18Kunan uyariychej ari, imatachus tarpojmanta rijch'anachina niyta munasqanta. 19Wakin runakunaqa ñan patapi urmasqa muju jina kanku. Pipis janaj pacha kamachiyninmanta willayta uyarishaspa mana entiendejtin, Kuraj Supay jamuspa, sonqonpi imachus tarpusqa kajta qhechun. 20Wakinkuna kanku rumirara jallp'api t'akasqa muju jina. Paykuna Diospa Simi nisqanta uyarispa, kusisqa jap'ikunku. 21Chaywanpis mana allin saphichasqa kaspa, mana unaytachu sayanku. Manachayqa Diospa simi nisqanta jap'ikusqankurayku llakiy jamojtin, chayrí qhatiykachasqa kaspa, paykuna qhepaman kutirikapunku.

22Khishkarara jallp'api t'akasqa, chay mujupis Diospa simi nisqanta uyarejwan ninakullantaj. Chaywanpis kay kawsaymanta phutikuykuna, qhapajyayta munapayaywan ima payta q'otiyan, jinataj chaykunaqa Diospa simi nisqanta p'ampaykuspa, mana wiñajta saqenkuchu. 23Sumaj jallp'aman t'akakoj mujurí ninakun, pichus Diospa simi nisqanta uyarispa sumajta entienden, chaywan. Payqa sumaj poqoyniyoj planta jina, chay jina kajkunamantataj wakin kanku sapa mujumanta pachajta poqoj jina, wakintaj sojta chunkata, wakintaj kinsa chunkata poqoj jina, nispa.

Cizaña qhoramanta rijch'anachina

24Waj rijch'anachinatawan Jesús yachachillarqataj: Diospa janaj pacha kamachiynenqa jallp'anpi sumaj mujuta tarpoj runaman rijch'akun. 25Chaywanpis tarpojkuna puñuranankukama, chajrayojpa awqan jamuspa, cizaña qhora mujuta trigo tarpusqaman qhalliytawan, ripusqa. 26Trigo umashajtinña, chaypacha tarpojkuna reparasqanku cizaña qhorapis kallasqantataj.

27Jinapi chajrayojpa kamachinkuna rispa, nisqanku: Patrón, jallp'aykipeqa manachu sumaj mujuta tarporqanki? Imaynamantataj cizaña qhora rikhurinri? nispa. 28Paytaj nisqa: Pi awqaychá kaytaqa ruwan, nispa. Kamachinkunataj tapusqanku: Cizañata qhoramunaykuta munawajchu? nispa. 29Paytaj kutichisqa: Ama jinaychejchu. Cizañata qhorashaspa, trigotawan t'iraykuwajchej. 30Aswanpis wiñajta saqellaychej poqoy oqharinakama. Trigo ruthunaña kajtintaj, noqa ruthojkunaman nisaj: Cizañataraj ñawpajta pallaychej, marq'a marq'ata wataraspa ruphachinapaj. Chaymantataj trigota ruthuspa, pirwayman waqaychamuychej, nispa.

Mostaza mujumanta rijch'anachina

(Mc 4.30-32; Lc 13.18-19)

31Jesusqa waj rijch'anachinata paykunaman willarqa: Diospa janaj pacha kamachiynenqa mostaza mujuman rijch'akun, mayqentachus uj runa jallp'anpi tarpusqa, chayman. 32Mostaza mujoqa tukuy mujumanta aswan juch'uy. Jinapis wiñaspa, tukuy qhoramanta aswan jatunta wiñan sach'ayanankama. Chantá p'isqokunapis jamuspa, thansankunapi thapacharikunku, nispa.#Sal 104.12; Ez 17.23; 31.6; Dn 4.12.

Levaduramanta rijch'anachina

(Lc 13.20-21)

33Jinallataj, Jesús waj rijch'anachinata paykunaman willarqa: Diospa janaj pacha kamachiynenqa levaduraman rijch'akun. Uj warmi kinsa arroba jak'uman pisi levadurata jich'aykusqa chaypis, tukuynin masata poqochisqa, nispa.

Jesús rijch'anachinawan yachachin

(Mc 4.33-34)

34Jesusqa tukuy imamanta rijch'anachinawan runakunaman parlarqa. Mana rijch'anachinawanqa mana imatapis paykunaman yachacherqachu. 35Ajinamanta Jesusqa Diosmanta sut'inchajpa nisqanta junt'arqa:

Rijch'anachinakunawan parlarisaj,

sut'inchasajtaj imakunachus pakasqa karqanku

Dios kay pachata ruwasqanmantapacha, chaykunata, nispa.#Sal 78.2.

Jesús cizañamanta rijch'anachinata sut'inchan

36Chantá runakunata kacharpayaspa, Jesusqa wasiman yaykorqa. Yachachisqankunataj payman qayllaykuspa, nerqanku: Ama jina kaspa, cizaña qhora rijch'anachinamanta sut'inchawayku, nispa. 37Chantá pay kuticherqa: Sumaj mujuta tarpojqa Runaj Churin. 38Jallp'aqa kay pachawan ninakun. Sumaj mujutaj Diospa janaj pacha kamachiyninpi kajkuna kanku, cizañataj Kuraj Supayta kasojkuna. 39Jinataj cizañata t'akaj awqaqa Kuraj Supaywan ninakun. Poqoyta oqharinataj kay pachaj tukukuyninwan ninakun, ruthojkunataj angelkuna kanku.

40Imaynatachus runakuna cizañata tantaspa, ninawan ruphaykuchinku, ajinallataj kay pachaj tukukuyninpi kanqa. 41Runaj Churin kamachiyta qallarishaspa, angelninkunata kachamonqa, kamachiyninmanta orqhonankupaj runata juchallichejkunata, millayta ruwajkunatawan ima. 42Angelkunataj lawrashaj hornoman paykunata wijch'uykonqanku, chaypitaj manchay waqay, kiru k'arukuytaj kanqa. 43Cheqan runakunatajrí Tata Diosninkoj kamachiyninpi inti jina lliphipirenqanku.#Dn 12.3. Pichus nisqayta jap'ikuyta munajqa allinta uyarichun.

Tapadomanta rijch'anachina

44Chay jawa Diospa janaj pacha kamachiynenqa tapadoman rijch'akullantaj. Uj runaqa wajpa jallp'anpi tapadota tariytawan, pachallanmantaj watejmanta p'ampaykusqa. Kusisqa rispataj, tukuy kapuyninta vendemusqa chay jallp'ata rantikapunanpaj.

Jatun perlamanta rijch'anachina

45Jinallataj Diospa janaj pacha kamachiynenqa sumachaj perla walqakunata mask'aj ranqheroman rijch'akun. 46May valorniyoj uj perlata tarispataj, tukuy kapusqanta vendeytawan, chay sumaj perlata rantikapusqa.

Challwa jap'ina ch'ipamanta rijch'anachina

47Jinallataj Diospa janaj pacha kamachiynenqa challwa jap'ina ch'ipaman rijch'akun. Challwirikunaqa ch'ipata qochaman wijch'uykuspa, tukuy imaymana challwakunata jap'isqanku. 48Ashkha challwa ch'ipaman junt'aykojtinkukamataj, challwirikuna qocha kantuman aysasqanku. Chaypi tiyaykuspataj, paykuna allin kaj challwakunata canastakunaman churasqanku, mana allin kajtataj wijch'upusqanku. 49Ajinallataj kanqa kay pachaj tukukuyninpi. Angelkunaqa jamuspa, juchasapakunata t'aqanqanku cheqan runakunamanta. 50Chantá juchasapakunata lawrashaj hornoman wijch'uykonqanku, chaypitaj manchay waqay, kiru k'arukuytaj kanqa, nispa. Ajinata Jesús rijch'anachinawan yachacherqa.

Mosojtaj mawk'ataj

51Chaymanta Jesús yachachisqankunata taporqa: Kay tukuy imata entiendenkichejchu? nispa. Paykunataj kuticherqanku: Arí, Yachachej Wiraqochi, nispa.

52Chantá Jesús paykunata nillarqataj: Chayrayku, Diospa kamachisqanmanta pi yachachejpis Diospa janaj pacha kamachiyninmanta yachaqakuspa, uj wasiyojman rijch'akun. Chay wasiyojqa waqaychananmanta orqhomusqa mosoj imakunata, mawk'a imakunatawan ima, nispa.

Nazaretpi Jesusta qhesachanku

(Mc 6.1-6; Lc 4.16-30)

53Jesús rijch'anachinawan yachachiyta tukuspa, chaymanta riporqa. 54Nazaret llajtanman chayaspataj, tantakuna wasipi yachachiyta qallarerqa. Runakunataj t'ukuspa, ajinata nerqanku: Kay runaqa maypitaj kay tukuy imata yachamorqari? Imaynamantataj kay t'ukuna imakunatapis ruwanri? 55Manachu payqa carpinterojpa churin? Manachu mamanpis María, wawqenkunapis Santiago, José, Simón, Judas ima kanku? 56Manachu panankunapis noqanchejwan kashanku? Chantá maymantataj kay tukuy imata pay yachanri? nispa.

57Chayrayku chay llajtayojkunaqa Jesusta pisipaj qhawarqanku. Jesustajrí paykunata nerqa: Mayllapipis Diosmanta sut'inchajtaqa allinpaj qhawanku. Chaywanpis llajtanpi, wasinpi imalla payta qhesachanku, nispa.

58Chay llajtayojkuna Jesuspi mana atinikusqankurayku, payqa mana ashkha t'ukuna imakunata ruwarqachu.

Currently Selected:

Mateo 13: DQPC

Highlight

Copy