Mateo 12

Samarina p'unchaymanta churanaku

(Mc 2.23-28; Lc 6.1-5)

1Chaypacha uj samarina p'unchaypi Jesús trigo chajraj chawpinta risharqa, yachachisqankunataj yarqhachikuspa, trigo umakunata t'iperqanku chayta mikhunankupaj. 2Fariseokunatajrí chayta rikuspa, Jesusta nerqanku: Qhaway yachachisqaykikunata, samarina p'unchaypi mana ruwanata ruwashanku, nispa.

3Jesustajrí fariseokunata nerqa: Manachu jayk'ajpis ñawirerqankichej David, paywan kajkunawan ima, yarqhachikuspa imatachus ruwasqankumanta? 4Diospa wasinman yaykuspa, paykunaqa Diospaj t'aqasqa t'antata oqharerqanku, mikhorqankutaj. Chaytaqa mana David, nitaj paywan kajkunapis mikhunanchu karqa, manachayqa sacerdotekunallapaj karqa.

5Chayrí, manachu Moisespa kamachisqanpi ñawirerqankichej, Templopi sacerdotekuna samarina p'unchaypi ruwanankuta junt'ashaspapis mana juchayojchu kasqankuta? 6Noqatajrí niykichej: Pichus kaypi kajqa aswan kurajmin Templomanta nisqaqa. 7Qankunachus yachawajchej imatachus niyta munasqanta: Noqaqa ujkunata khuyanaykichejta munani, manataj uywa ñak'asqa q'olachinata jaywanawaykichejtachu nispa chayqa,#Os 6.6; Mt 9.13. qankunaqa mana juchayojkunata mana juchachawajchejchu karqa. 8Chayta niykichej, imaraykuchus Runaj Churenqa samarina p'unchaypi imatachus ruwana kasqanta ninanpaj atiyniyojmin, nispa.

Jesús makin ch'akisqa runata qhaliyachin

(Mc 3.1-6; Lc 6.6-11)

9Chaymanta llojsispa, Jesús tantakuna wasiman rerqa. 10Chaypitaj makin ch'akisqa uj runa kasharqa. Jinapi fariseokunaqa Jesusta ch'ataykuyta munaspa, taporqanku: Samarina p'unchaypi onqosqata qhaliyachiy atikunchu? nispa.

11Jesustaj paykunata nerqa: Qankunamanta mayqenpatapis uj ovejaykichej samarina p'unchaypi pujyuman urmaykojtin, manachu orqhokapuwajchej? 12Runarí manachu aswan valorniyoj kanman ovejamanta nisqaqa? Chayrayku samarina p'unchaypipis runa masipaj allin kajta ruwayta atinchej, nispa.

13Chaymantataj Jesús chay runata nerqa: Makiykita jaywariy, nispa. Paytaj makinta jaywarejtin, chay makenqa qhaliyaporqa, ujnin kaj makin jina. 14Chaywanpis fariseokunaqa llojsiytawan, yachachinakorqanku imaynamantachus Jesusta wañuchinankupaj.

Isaiaspa sut'inchasqan junt'akun

15Payta wañuchiyta munashasqankuta yachaspa, Jesús chay cheqamanta riporqa, jinataj ashkha runakuna qhepanta rillarqankutaj. Chantá Jesús tukuy onqosqakunata qhaliyacherqa. 16Chaywanpis paykunata mayta kamacherqa ama pimanpis willanankuta pichus pay kasqanta. 17Ajinata ruwaspa, Jesusqa Diosmanta ñawpa sut'inchaj Isaiaspa nisqanta junt'arqa:

18Dios nin: Kaymin noqaj kamachiy,

pitachus noqa ajllakuni, chay.

Paymin munakusqay, paywantaj may kusisqa kani.

Payman Espirituyta qoni,

chantá tukuy suyuman justiciamanta willanqa.#Is 42.1.

19Payqa mana piwanpis churanakonqachu, nitaj qhaparqachanqachu,

nillataj callepipis sinch'ita parlanqachu.

20Lajrasqa soqosollatapis mana p'akenqachu,

nitaj ñak'ayllata lawrashaj mecherotapis wañuchenqachu,

cheqan justiciata atipachinankama.

21Chantá tukuy kay pachapi kaj runakunaqa

paypi atinikuspa allin kajta suyakonqanku.

Ajinata Isaías Jesusmanta sut'incharqa.

Santo Espiritupaj rimajkuna

(Mc 3.20-30; Lc 11.14-23; 12.10)

22Uj kuti runakunaqa Jesusman pusarqanku supayniyoj ñawsa opa runata, Jesustaj payta qhaliyacherqa. Ajinamanta chay runaqa parlarerqa, qhawarerqataj.#Mt 9.32-33. 23Chayta rikojkunataj t'ukuspa, nerqanku: Manachu kayqa Davidpa Churin kanman? nispa.

24Fariseokunarí chayta uyarispa, nerqanku: Kuraj Supay Beelzebú kay runaman atiyta qon, chayraykumin pay supaykunata qharqon, nispa.

25Chantá Jesús imatachus yuyasqankuta yachaspa, nerqa: Sichus uj suyupi tiyakojkuna chejninakuspa t'aqanakunkuman chayqa, chay suyu mana sayanmanchu, tukukunman. Jinallatataj sichus uj llajtapi, chayrí wasi ayllupipis phiñanakuspa t'aqanakunkuman chayqa, manallataj khuska kayta atinkumanchu. 26Sichus Supay Satanás pay kikillantataj qharqokun chayqa, pay kikin t'aqanasqa kashan. Imaynatataj kamachiynin sayallanqapuniri? 27Chantá sichus noqa Beelzebujpa atiyninwan supaykunata qharqoni chayqa, pinejtataj yachachisqaykichejkunaqa supaykunata qharqonkuri? Chayrayku, chay nisqaykichejmanta paykuna juchachasonqachej. 28Sichus noqaqa Diospa Espiritunpa atiyninwan supaykunata qharqoni chayqa, sut'itapuni niykichej: Diosqa qankuna ukhupi kamachiyta qallarishanña, nispa.

29Chayrí imaynatataj pipis kallpasapa runaj wasinman yaykuyta atinman, kapuyninta qhechoj, manachus ñawpajta chay runata wataykunmanraj chayqa? Chay runata wataykusparajpuni, pipis paypa wasinpi kaj chhikata suwakapunman.

30Pichus mana noqaman sayasqa kajqa contraypi kashan, pitajchus noqawan ruwanayta mana ruwajqa contraypi ruwan.

31Chayrayku niykichej: Diosqa runakunaj ima juchankutapis, tukuy mana allin rimasqankutapis pampachayta atin. Pitajchus Santo Espíritoj contranta millayta riman chayrí, chay juchanqa mana pampachasqachu kanqa. 32Sichus pipis Runaj Churinpa contranta millayta riman chayqa, chay juchan pampachasqa kanqa. Sitajchus pipis Santo Espíritoj contranta riman chayrí, mana chay juchaqa pampachasqachu kanqa kay p'unchaypi, nitaj jamoj p'unchaypipis.

Sach'ataqa poqoyninnejta rejsinchej

(Lc 6.43-45)

33Allin sach'aqa allin poqoyta poqon. Mana allin sach'arí mana allin poqoytachu poqon. Chayrayku sach'ataqa poqoyninnejta rejsinchej.#Mt 7.20; Lc 6.44; Eclo 27.6. 34Qankuna venenoyoj katarikuna jina kankichej. Imaynatataj allin kajta parlawajchej, qankuna mana allin runakuna kashaspari? Imawanchus runaj sonqon junt'a kashan, chayman jina parlan.#Mt 15.18; Lc 6.45. 35Sumaj runaqa allinta parlan, imaraykuchus sonqonqa allin imakunawan junt'a kashan. Millay runarí mana allin kajta parlan, imaraykuchus sonqonqa mana allinkunawan junt'a kashan. 36Chayrayku niykichej: Juicio p'unchaypeqa tukuy runakuna cuentata qonqanku tukuy qhasi manakajta parlasqankumanta, 37imaraykuchus parlasqaykiman jina cheqan runapaj rejsisqa kanki, manachayrí juchachasqa kanki, nispa.

Wakinkuna t'ukuna ruwanata mañanku

(Mc 8.12; Lc 11.29-32)

38Uj kuti Diospa kamachisqanmanta wakin yachachejkuna, fariseokunawan ima Jesusta nerqanku: Yachachej Wiraqochi, runaj mana jayk'aj rikusqan t'ukunata ruwanaykita rikuyta munayku Diosmanta jamusqaykita yachanaykupaj, nispa.

39Jesustajrí paykunaman kuticherqa: Qankunaqa millayta ruwaj kankichej, qhenchachakojtaj. Chayrayku runaj mana jayk'aj rikusqan t'ukunata ruwanayta mañankichej. Chaywanpis, mana waj t'ukunata rikuchisqaykichejchu, manachayqa, Diosmanta sut'inchaj Jonaswan imachus karqa, chayllata. 40Imaynatachus Jonás jatun challwaj wijsanpi kinsa p'unchayta, kinsa tutatawan karqa, ajinallatataj Runaj Churinpis kinsa p'unchayta, kinsa tutatawan jallp'aj sonqonpi kanqa.

41Chantá Nínive llajtayojkunaqa juiciopi jatarimuspa, kunan p'unchaypi tiyakojkunata juchachanqanku, imaraykuchus Jonás willarajtinkama, paykuna Diosman kutirikusqanku. Kunantajrí Jonasmanta aswan kuraj kaj kaypi kashan. 42Chantá juicio p'unchaypi, uray suyumanta qoyapis sayarispa, kay runakunata juchachallanqataj, imaraykuchus qoyaqa karu jallp'amanta jamusqa Salomonpa yachayninta uyarej.#1 R 10.1-10; 2 Cr 9.1-12. Kunantajrí Salomonmanta aswan kuraj kaypi kashan, qankunataj mana uyariyta munankichejchu.

Runamanta llojsej supaymanta rijch'anachina

(Lc 11.24-26)

43Jayk'ajchus runamanta millay supay llojsin chaypacha, payqa ch'aki jallp'anejta purin samarikuyta mask'aspa. Mana tarispataj, nin: 44Kutipusaj, pimantachus llojsimorqani, chayman, nispa. Chayaspataj, pay reparan chay runa sumaj pichasqa, k'uchunchasqa, ch'usaj wasi jina kashasqanta. 45Chantá rispa, qanchis supaykunatawan pusaykun paymanta aswan millaykunata. Paykunataj chay runaman yaykuspa, chaypi tiyakapunku. Jinapi chay runaj kawsaynenqa aswan millayman tukupun, ñawpaj kasqanmanta nisqaqa. Ajinallataj kanqa kunan tiempo millayta ruwaj runakunawanpis, nispa.

Jesuspa maman, wawqenkunawan

(Mc 3.31-35; Lc 8.19-21)

46Jesús runakunaman parlashajtillanraj, maman, wawqenkuna ima jawapi suyasharqanku, paywan parlayta munaspa. 47Jinapi Jesusman willacherqanku: Mamayki, wawqeykikuna ima jawapi mask'ashasunku, qanwan parlariyta munaspa, nispa.

48Jesustajrí kuticherqa: Pikunatataj mamaypaj, wawqeykunapaj ima qhawaniri? nispa.

49Chantá makinwan yachachisqankunata rikuchispa, nerqa: Kaykunamari mamay, wawqeykunapis kanku. 50Pichus janaj pachapi kashaj Tataypa munayninta ruwajmari wawqey, panay, jinallataj mamaypis,#Ro 8.29. nispa.

Currently Selected:

Mateo 12: DQPC

Highlight

Copy