Génesis 13

Abramwan Lotwan karunchakapunku

1Abramqa Egiptomanta ripuspa, warminwan, chantá tukuy imanwan Néguev nisqa ch'innejman kutiporqa. Lot sobrinonpis paykunawan khuska rillarqataj. 2Abramqa manchay qhapaj karqa, ashkha uywayoj, qolqeyoj, qoriyoj ima. 3Chantá Neguevmanta alliymanta alliy thaskispa, Betel llajtaman kutiporqa. Chaymantataj maypichus ñawpajta toldonta sayachisqa Betelwan, Haiwan tinkuypi, chaynejman chayarqa. 4Chay karqa, maypichus pay ñawpajta altarta ruwasqa, chay. Chantá Abrahamqa ujtawan chaypi Tata Diospa sutinta oqharispa yupaycharqa.

5Lotpis tion Abram jina qhapajllataj karqa. Tiyaporqa ashkha ovejan, wakan, toldon ima. 6Paykuna maypichus kasharqanku, chaynejqa chay chhika uywankupaj ancha pisi karqa. Jinaqa khuskallapuni tiyakuyta mana aterqankuñachu. 7Chayrayku Abrampa uywanta michejkuna, chantá Lotpa uywanta michejkunawan ima mayta churanakuspa, maqanakorqanku. Chaypacha chay cheqanejpi cananeokuna, ferezeokuna ima tiyakushallarqankutaj.

8Jina kajtenqa, Abram Lotta nerqa: Qanwan noqawanqa ayllu masintin kanchej. Chayrayku noqanchejpura mana phiñanakuyta atisunmanchu, nitaj michejninchejkunapis phiñanakuyta atillankutajchu. 9Qhaway, jallp'aqa ajllakunaykipaj jina may chhikan kashan. Ama jina kaspa, noqamanta karunchakuy. Sichus qan lloq'eman rinki chayqa, noqa pañanejman ripusaj. Qantajchus pañanejman rinki chayqa, noqa lloq'enejman ripusaj, nispa.

10Chantá Lotqa tukuynejta qhawarqa, astawanqa Jordán mayu valleta Soar juch'uy llajtakama. Chay jallp'aqa yakuyoj karqa, Tata Diospa huertan jina sumaj, Egiptopi jallp'aman rijch'akojtaj. Chay karqa, manaraj Tata Dios Sodoma llajtata, Gomorra llajtatawan chinkachishajtin. 11Chantá Lotqa Jordán valleta ajllakorqa. Jinaspataj, maypichus kasharqanku, chaymanta inti llojsimuynejman riporqa. Ajinata Abramwan Lotwan karunchanakorqanku. 12Ajinaqa Abram Canaán cheqanejpi tiyakoj qhepakorqa. Lottaj vallepi kaj llajtakunaman tiyakoj riporqa, Sodoma llajta qayllapitaj toldonta sayacherqa. 13Sodoma llajtayojkunarí millay runakuna kasqankurayku, Tata Diospa contranpi millayta ruwaspa, anchata juchallerqanku.

14Lot ripusqanmanta qhepaman Tata Diosqa Abramta nerqa: Maypichus kashanki, chaymanta wichaynejta, uranejta, inti llojsimuynejta, chantá inti yaykuynejta ima allinta qhaway. 15Noqaqa tukuy rikusqayki jallp'ata qosqayki. Chay jallp'ataj qanpaj, jinataj mirayniykipajpis wiñaypaj kanqa. 16Mirayniykita t'iyuta jina mirachisaj. T'iyoqa mana yupay atina, ajinallataj mirayniykeqa mana yupay atina kanqa. 17Qan purispa, wichaynejta uranejta kay jallp'ata muyumuy, imaraykuchus noqa kay jallp'ata qanman qosqayki, nispa.#Gn 12.2; Hch 7.5; Gl 3.16.

18Chantá Abramqa toldonta phaskaspa, tiyakoj riporqa, Hebrón llajta qayllapi maypichus Mamré sutiyoj runajta encina sach'an karqa, chaynejman. Chaypipis uj altarta Tata Diospaj ruwallarqataj.

Currently Selected:

Génesis 13: DQPC

Highlight

Copy