Génesis 38

Judawan Tamarwan

1Chaypacha Judá wawqenkunamanta karunchakuspa, Jirá sutiyojpa wasinman tiyakoj rerqa. Payqa Adulán llajtayoj karqa. 2Chaypi Judaqa Canaán llajtayoj Súa sutiyojpa ususinwan rejsinakorqa. Chantá chay sipaswan casarakuspa, paywan puñuykorqa. 3Chay warmitaj Judapaj onqoj rikhurispa, wawayoj karqa “Er” sutiwantaj suticharqa. 4Chaymanta Judáj warmin ujtawan wijsallikuspa, qhari wawallatataj paqarichikorqa, chay wawatataj “Onán” sutiwan suticharqa. 5Qhepanejman Judáj warmenqa ujtawan wawayojllataj karqa, chaytataj “Sela”, nispa suticharqa. Sela paqarisharqa chaypacha, Judaqa Quezib nisqa cheqapi tiyakusharqa.

6Aswan qhepanejman Judaqa kuraj kaj churin Erta Tamar sutiyoj warmiwan casaracherqa. 7Chaywanpis Judáj kuraj kaj churin Er mana Tata Diospa munasqanman jinachu purisqanrayku Tata Dios payta wañucherqa. 8Chaymantataj Judaqa Onanta nerqa: Wañoj wawqeykej warminwan qanñataj casaray, paywan cuñadon jina imachus ruwanaykita junt'anaykipaj. Ajinamanta wawqeykej sutin mana chinkanqachu, nispa.#38.8 Sichus uj runa warminpi mana wawata rejsispa wañupoj chayqa, wawqen, chayrí ayllunmanta mayqen warmisapawan casaranan karqa. Wawa kajtinrí, kuraj kaj qhari wawa wañojpa sutinta apanan karqa, paypa wawanpis kanman jina. Ajina usu karqa, ayllunpi wañojpa sutin ama chinkananpaj, jinataj wañojpa jallp'an ama wajpa makinman chayananpaj. Dt 25.5-10; Rt 4.5; Mc 12.19-22.

9Onán yacharqa wañoj wawqenpa warminpi wawata rejsisqan mana paypa sutintachu apananta. Chayrayku chay warmiwan sapa kuti puñuykuspa, mujunta pampallaman surucherqa, wawqenpa miraynin ama paynejta kananpaj. 10Chay jinata Onanpa ruwasqantarí#38.10 Onanpa ruwasqan: Onanpa juchan karqa, kurajninpa sutin ama chinkananpaj imachus ruwananta mana junt'ayta munasqan. Tata Dios mana allinpajchu qhawarqa. Chayrayku paytapis Tata Dios wañuchillarqataj.

11Chantá Judaqa ñojch'an Tamarta nerqa: Tataykej wasinman kutispa, warmisapa jina kakuy, sullk'a churiy Sela jatunyanankama, nispa. Chayta nerqa, imaraykuchus yuyarqa Sela Tamarwan casarajtin, Dios paytapis wañuchinanta. Jinamanta Tamarqa tatanpa wasinman tiyakoj riporqa.

12Chaymanta unayman jina Judajpa warmin Suáj wawan wañuporqa. Qhepamantaj Judaqa llakiy p'achanta lluch'ukaporqa. Chantá Timnat llajtaman rerqa, maypichus ovejankunaj millmanta ruthusharqanku, chayman. Adulán llajtayoj kawsaqen Jirapis paywan rillarqataj. 13Tamartaj suegron Timnatman ovejaj millmata ruthuchej rishasqanta yacharqa.

14Jinapi Tamarqa luto p'achanta lluch'ukuspa, umanta suk'umpaykukorqa, ama pipis payta rejsinanpaj. Chantá Enayin llajtaman yaykuna punkupi tiyaykukorqa. Chayqa Timnatman rej ñanpi karqa. Tamar yacharqa Selaqa waynaña kasqanta, yachallarqataj Judaqa nisqanman jina, mana sullk'a churinwan payta casarachisqanta.

15Judá chay warmita rikuspa, yuyarqa phisu warmi kasqanta, imaraykuchus uyan qhatasqa karqa. 16Ñanmanta ithirispataj, chay warmita nerqa: Qanwan puñuyta munayman, nispa. Ajinata nerqa mana yachaspa ñojch'an kasqanta. Chay warmitaj nerqa: Imatataj qowanki kunan qanwan puñuykojtiyri? nispa. 17Judataj nerqa: Tropaymanta uj maltun chivota apachimusqayki, nispa. Warmitaj nerqa: Nisqaykita apachimunaykikama, prendata jina imallatapis saqeway, nispa.

18Judataj taporqa: Imatataj prendata jina qoykimanri? nispa. Warmitaj nerqa: Kunkaykipi warkhukushanki, chay selloykita qoway.#38.18 Sello: Muyu karqa, q'aytuta chhitanapaj jina jusk'uyoj. Chay sellota kunkankuman warkhuykuspa purej kanku. Cnt 8.6. Chantá jap'ishanki, chay varatawan qoway, nispa. Judataj warmej nisqanta qorqa, chantá paywan puñuykorqa. Jinamanta Tamarqa Judapaj onqoj rikhurerqa. 19Chantá wasinman kutipuspa, Tamarqa suk'umpanta lluch'ukuytawan, lutokuna p'achanta churaykakaporqa.

20Qhepanejman Judá uj maltun chivota Adulanmanta kaj kawsaqenwan apacherqa, chay warmi prendata qochikusqanta qopunanpaj. Kawsaqenrí mana chay warmita tarerqachu. 21Jinataj chaypi tiyakojkunata taporqa: Manachu rikorqankichej Enayinmanta phisu warmi ñan patapi tiyaj, chayta? nispa. Paykunatajrí kuticherqanku: Mana kaypi ima phisu warmitapis rikuykuchu, nispa.

22Chaymanta pay kutipuspa, Judaman willamorqa: Mana chay warmita tarinichu. Llajtayojkunapis niwanku chaynejpi mana ima phisu warmipis kasqanta, nispa.

23Chantá Judá nerqa: Jina jap'ikuchun prenda qosqayta, ama pipis noqanchejmanta alqochakunawanchejpaj. Noqaqa nisqayman jina uj chivota apacherqayki, qantaj mana chay warmita tarimunkichu, nispa.

24Kinsa killaman jina Judaman willaj jamorqanku: Tamar ñojch'aykeqa purisqanpi piwanchá puñuykorqa. Chayrayku kunanqa wijsayoj kashan, nispa. Judataj nerqa: Jawaman orqhospa, ruphaykuchiychej, nispa.

25Jawaman orqhoshajtinkutajrí, Tamarqa suegronman willacherqa: Pichus kay prendata saqewajpaj onqoj kashani. Allinta qhawaspa, kay sello, kay sello apaykachana watu, kay vara ima pejpatachus kasqanta rejsikapuchun, nispa. 26Judataj chaykunata qhawaspa, paypata kasqanta rejsikaporqa, nerqataj: Payqa maychus kajta ruwan, noqatajrí mana, imaraykuchus noqaqa mana payta churiy Selawan casaracherqanichu, nispa. Jinamanta Judá manaña jayk'ajpis Tamarwan ujtawan puñuykorqachu.

27Tamar onqokunan chayamojtin, iskay wawakunata paqarichikorqa. 28Paqarishaspa, ujnin kaj ñawpajta makinta jaywarqamorqa. Parterataj uj puka q'aytuwan makinman wataykorqa: Kay kaj ñawpajta llojsimun, nispa. 29Ñawpajta makinta jaywamoj wawarí chaypacha makinta aysaykakaporqa. Jinamanta wawqenraj ñawpajta paqarerqa. Chayrayku parteraqa chay wawata suticharqa “Fares”, nispa. Nerqataj: Ñawpajta llojsimunaykipaj imatataj ruwarqankiri? nispa. 30Chaymanta ujñataj paqarerqa, makinpi puka q'aytuyoj kaj, paytataj suticharqa: “Zeraj”, nispa.

Currently Selected:

Génesis 38: DQDC

Highlight

Copy