Génesis 34
34
Dinaj honran t'akasqa
1Uj kuti Jacobpa Lea warminpi rejsisqan warmi wawan Dinaqa chay llajtayoj sipaskunata waturikoj rerqa. 2Chantá Sichem Dinata rikuspa, mana munashajtin paywan puñuykorqa. Sichemqa heveo llajtayoj Jamorpa churin karqa. Paytaj chay llajtapi kamachej karqa. 3Chaywanpis Sichempa sonqonman Dina yaykusqanrayku, payta anchatataj munakorqa. Chayrayku Dinaj sonqonta suwayta munaspa, atisqanta ruwarqa. 4Jinapi Sichemqa tatan Jamorta nerqa: Mañaqampuway chay sipasta, imaraykuchus paywan casarayta munani, nispa.
5Jacobqa ususin Dinata Sichem alqochasqanta yacharqa. Churinkuna uywata michishasqankuraykutaj, chayamunankukama mana imatapis nerqachu. 6Chaykamataj Sichempa tatan Jamorqa Jacobwan parlananpaj rerqa.
7Chantá Jacobpa churinkuna uywata michimusqankumanta chayamuspa, Dinawan imachus pasasqanta yacharqanku. Chaymantataj manchayta phiñakorqanku, imaraykuchus Sichem Jacobpa ususinta alqochasqanqa Israel ayllupaj manchay p'enqay karqa. Sichem chayta mana ruwananchu karqa.
8Chaywanpis Jamor paykunata nerqa: Churiy Sichem may jinatapuni panaykichejta munakun. Chayrayku ari, churiy paywan casarananta ama jark'akuychejchu. 9Ajinata qankuna noqaykuwan aylluchakunkichej. Noqayku ususiykichejwan casarasqayku, qankunataj ususiykuwan casarankichej. 10Noqaykuwan tiyakuychej, imajtinchus llajtaykupi jallp'aqa ashkha tiyan. Chayrayku maypichá munasqaykichejpi wasichakuychej. Qhatuychej, jallp'atapis rantikuychej, nispa.
11Sichempis Dinaj tatan Jacobta, chantá turankunatawan ima nerqa: Ama jina kaspa, uyarillawaychej ari. Noqaqa imatachá niwasqaykichejta qosqaykichej. 12Mashkhatachus niwasqaykichejtapis qollasqaykichejtaj. Panaykichejwan casarachillawaychej ari, nispa.
13Chaywanpis pananku Dinaj honranta Sichem t'akasqanrayku, Jacobpa churinkunaqa payman, jinataj tatan Jamorman llullakorqanku. 14Paykuna nerqanku: Noqaykoqa panaykuta mana circuncidasqa runawan mana casarachiykumanchu. Chayqa noqaykupaj ancha p'enqay kanman. 15Kayta ruwajtillaykichej, panaykuwan casarachiyta atiykuman: Qankuna noqayku jina kanaykichej tiyan. Chay niyta munan qankuna ukhupi tukuy qhari circuncidasqa kanankuta. 16Chaymantaraj ususiykuwan casarayta atinkichej, jinallataj noqaykupis ususiykichejwan casarayta atisqayku. Jinaspataj, qankunawan khuska tiyakusqayku, ujllamantaj tukupusunchej. 17Sichus mana circuncidakuyta munankichejchu chayrí, noqayku kaymanta ripuspa, panaykutapis pusakapusqayku, nispa.
18Chaypacha Jamorman, chantá churin Sichemman, Jacobpa churinkuna imatachus nisqanku allin rijch'arqa. Chayrayku paykuna nerqanku Jacobpa churinkuna imatachus nisqankuta ruwanankuta. 19Chantá Sichemqa usqhayllata circuncidachikorqa, imaraykuchus Jacobpa ususinta anchatapuni munakorqa. Chantapis Sichemqa llajtanpi manchay respetowan qhawasqa runa karqa. 20Chaymanta paywan, tatan Jamorwan ima llajtaman yaykuna punkuman rerqanku, maypichus runakuna tukuy ima rantinamanta, vendenamantawan parlaj kanku, chayman. Chaypitaj llajtayojkunaman nerqanku:
21Kay runakunaqa noqanchejwan manchay k'acha kanku. Paykuna noqanchejwan tiyakonqanku. Jinallataj rantiyta, qhatuytapis atenqanku, imajtinchus llajtanchejpi jallp'aqa jinantin kakushan. Chantapis noqanchej ususinkukunawan casarakuyta atisunchej, jinallataj paykunapis ususinchejkunawan casarakonqanku. 22Uj llajtayojlla kananchejpajrí, ninku noqanchejpis paykuna jina kananchejta. Noqanchej ukhupi tukuy qhari circuncidakunanchej tiyan, paykunaj usunkuman jina. 23Ajinata ruwajtinchej, tukuy kapuyninku, chantá uywanku ima noqanchejpata kanqa. Noqanchejqa nisqankuta kasunalla, chantá paykuna noqanchejwan tiyakonqanku, nispa.
24Jinapi llajta punkupi tukuy tantakojkuna Jamorta, churin Sichemtawan kasuspa, tukuyninku circuncidachikorqanku. 25Chaywanpis kinsa p'unchayninman jina, Dinaj turankuna Jacobpa churinkuna Simeón, chantá Leví ima llajtaman rispa, tukuy qharita wañuracherqanku. Chay qharikuna circuncidachikusqankumanta nanasqa kasqankurayku, mana pipis paykunaman sayaykoj karqachu. 26Jamorta, jinataj churin Sichemtapis espadawan wañuchillarqankutaj. Jinaspataj, Dinata Sichempa wasinmanta orqhomuspa, riporqanku.
27Chantá Jacobpa wakin churinkuna riytawan, wañusqakunaj patanta pasaspa, llajtaman yaykorqanku. Jinaspataj, tukuy imankuta apakaporqanku. Chayta ruwarqanku panankoj honranta Sichem t'akasqanmanta. 28Ovejakunata, wakakunata, burrokunata ima llajtamanta, campomantawan apakaporqanku. 29Wasikunaman yaykuspataj, tukuy imankuta suwarqanku. Jinallataj warmikunata, wawakunatapis jap'ispa, wata runanku kanankupaj aparqanku.
30Jacobtajrí Simeonta, chantá Levitawan nerqa: Qankuna kayta ruwaspa, jatun uma nanayta qowankichej. Kaynejpi tukuy tiyakojkuna, cananeokuna, chantá ferezeokuna ima chejnikuwanqanku. Tantaykukuspataj, noqaj contrayta jamuykonqanku, pisi runayojta rikuwaspataj, noqata, aylluytawan wañuchiwanqanku, nispa.
31Paykunatajrí kuticherqanku: Chantá panaykuta sajra purikoj warmita jina imatapis ruwallananchu karqa? nispa.
Currently Selected:
Génesis 34: DQDC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
