Génesis 31
31
Jacobqa Labanmanta ayqen
1Aswan qhepanejman Jacobqa Labanpa churinkuna paypaj rimashasqankumanta yachakorqa: Jacobqa tatanchejpa tukuy kapuyninta jap'ikapuspa, qhapajyaykushan, nispa. 2Chantá Jacob reparallarqataj Labanqa payta manaña ñawpajta jinachu parlapayasqanta. 3Jinallataj Tata Dios Jacobta nerqa: Kutipuy tataykej llajtanman, maypichus aylluyki kashan, chayman. Noqataj qanwan kasaj, nispa.
4Chantá Jacobqa Raquelta, Leatawan ima wajyacherqa, maypichus ovejakunata michisharqa, chayman rinankuta. 5Chayajtinkutaj, nerqa: Reparani tataykichejqa manaña ñawpajta jinachu qhawawasqanta. Chaywanpis tataypa Diosnenqa noqata yanapashawan. 6Qankuna yachankichej kallpayta mana mich'akuspa tataykichejpaj llank'asqayta. 7Payrí sapa kutilla q'otiyawaspa, chunka kutikama pagoyta cambiarqa. Chaywanpis Diosneyqa tataykichej sajra kajwan paganawanta mana munarqachu. 8Tataykichej niwarqa: Sani ovejakunawan pagasqayki, nispa. Ovejakunataj sanillatapuni uñacharqanku. Tukuy alqa kajkunata pagasqayki, niwajtintaj, ovejakunaqa alqallatapuni uñacharqanku. 9Ajinata Diosqa uywankunamanta qhechuspa, noqaman qowarqa.
10Uj kuti, uywakuna q'oñirinanku tiempopi mosqokuspa, rikorqani chinakunawan tinkoj muchukunaqa ch'ejchi, sani, chantá alqa kasqankuta. 11Mosqokushajtiy, Diospa angelnin sutiymanta wajyawarqa, noqataj kuticherqani: Imata ninki? nispa. 12Chantá niwarqa: Allinta qhaway, rikunki chinakunawan tinkoj muchukunaqa alqakuna, sanikuna, ch'ejchikuna kasqankuta, imaraykuchus Labán imatachus ruwasusqanta noqa yachani. 13Noqa kani, pichus Betelpi rikhurisorqa, chay Diosmin. Chaypi qanqa rumiman aceite jich'aspa chaynejta noqapaj t'aqarqanki, chantá noqapaj imatachus ruwanaykita niwarqanki. Kunanqa puririy, kay llajtamanta llojsispa, maypichus paqarerqanki, chay llajtaman kutipuy, nispa.
14Chantá Raquelwan, Leawan nerqanku: Noqaykoqa tataykumanta chayaqeta jap'inaykoqa manaña kanchu. 15Noqaykutapis wajpis kaykuman jinallaña qhawawayku. Chantá vendewaykutaj. Qan tataykuman noqaykuwan casaranaykipaj pagasqaykitapis pay mikhuykakapun.#31.15 Usu karqa, pichus warmita qhawakoj qhareqa warmej tatanman paganan. Gn 29.18. Warmej tatantaj paymanta pagasqankuta ususinman qopunan karqa. Labanrí Raquelwan, chantá Leawan warmichakunanpaj Jacob pagasqanmanta mana ni mashkhallatapis paykunaman qosqachu. 16Diosniykumanta tukuy kapuyninta qhechusqanqa noqanchejpata, wawanchejkunajtawan ima. Jina kajtenqa, Dios imatachus nisusqanta ruway ari, nispa.
17Chantá Jacob ripunanpaj oqharikuspa, wawankunata, warminkunata ima camellokunaman lloq'aykucherqa. 18Jinaspataj, Padán Arampi tukuy tarisqan uywakunata, chantá tukuy imata tarisqantawan apariykukuspa, Canaanman purirerqa, maypichus tatan Isaacqa tiyakusharqa, chayman. 19Chaywanpis Labán ovejankunaj millmanta ruthuchej rinankama, Raquelqa tatanpa lantinkunata suwarqa. 20Ajinata Jacobqa Aram llajtayoj Labanta q'otiyaspa, ch'inllamanta riporqa, mana imatapis nispalla. 21Tukuy imanta apariykukuspa, ayqerqa. Éufrates mayuta chimpaspataj, Galaad orqonejman rerqa.
Labán Jacobta qhatiykun
22Kinsa p'unchayninman jina, Labán yacharqa Jacob ayqesqanta. 23Jinaqa tukuy ayllunta pusariykukuspa, Jacobpa qhepanta kachaykukorqa. Labán qanchis p'unchay puriyta rispataj, Galaadpi orqorara cheqanejpi Jacobta tariparqa. 24Chaywanpis chay ch'isi Diosqa mosqoypi jina Aram llajtayoj Labanman nerqa: Uyariway, Jacobta ama imatapis ninkichu, nispa.
25Q'ayantenqa Labán Jacobta tariparqa, Galaad orqonejpi jarasqa kashajtin. Labanpis chaynejllapitaj pusakusqan ayllunwan jarakorqa. 26Chantá Labán Jacobta nerqa: Imatataj kayta ruwankiri? Imaraykutaj jinata q'otiyawankiri? Wawaykunata maqanakupipis jap'iwaj karqa jinata apakampunki. 27Imaraykutaj ch'inllamanta ayqemunkiri? Ripunaykita yachaspaqa kusisqa, takiykunawan, tamborawan, arpawan ima kacharpayaykiman karqa. 28Ususiykunata, allchhiykunatapis mana much'aykurichiwarqankichu. Kayta ruwaspaqa, wampu jina ruwanki. 29Noqaqa qankunata imatapis ruwayta atiyman. Chayqa makillaypi kashan. Chaywanpis tataykejpa Diosnin ch'isi niwan: Sumajta qhawakuy, Jacobta ama imatapis ninkichu, nispa. 30Qanqa tataykej wasinman kutipuyta may jinatapuni munasqaykita yachani. Chaywanpis, imaraykutaj lantiykunata suwawankiri? nispa.
31Chantá Jacob Labanpa nisqanman kuticherqa: Manchachikorqayki. Yuyarqani wapuchakuspa, ususiykikunata qhechunawaykita. 32Chaywanpis sichus noqaykumanta pipis diosniykikunata jap'ishan chayqa, wañuchisqa kachun. Ayllunchej qhawashajtin, qanpata kajta rejsikapuspa apakapuy, nispa. Jacob ajinata nerqa, imaraykuchus mana yacharqachu warmin Raquel tatanpa lantinkunata suwasqanta.
33Chantá Labanqa lantinkunata mask'aj Jacobpa toldonman yaykorqa, chaymantataj Leajmanñataj yaykorqa. Chantá warmi kamachikunaj toldonman yaykullarqataj, manataj tarikaporqachu. Chaymanta llojsispataj, Raquelpamanñataj yaykorqa. 34Raqueltajrí lantikunata camello montura uraman sat'iykorqa, jinaspataj, patanman tiyaykorqa. Labán toldopi tukuynejta mask'arqa, manataj tarerqachu. 35Chantá Raquel tatanta nerqa: Tatáy, ama phiñakuychu, mana sayariyta atiymanchu, imaraykuchus killa onqoyniywan kashani, nispa. Labanrí lantinkunata tarikapuyta munaspa, tukuynejta mask'arqa, manataj tarikaporqachu.
36Chantá Jacob phiñakuspa, Labanta k'amerqa: Imatataj mana allinta ruwanichuri? Imataj juchay, chay jinatapuni qhatiykachanawaykipajri? 37Tukuy imaytaña mask'anki. Imaykitataj tarikapunkiri? Tarikapusqaykita churay aylluykej ñawpaqenman, aylluy rikushajtin, paykuna nichunku pichus juchayoj kasqanchejta.
38Iskay chunka watata qanwan kashajtiy, ni jayk'aj ovejaykikuna, nitaj cabraykikunapis sullorqankuchu. Nitaj jayk'ajpis uj carnerollaykitapis mikhuykorqanichu. 39Ovejata atojpis, leonpis jap'ej chaypis, pagapoj kayki. Sichus ch'isin, chayrí p'unchaynin suwaj kanku chayqa, chaymantapis mañakapuwaj kanki.#31.39 Sichus uj oveja wañoj, chayrí atoj, leonpis jap'ej chayqa, michej uywayojman mana kutichinanchu karqa. Mana kutichinanpaj ovejawan imachus pasasqanta rikuchinan karqa. Am 3.12. Jacob chinkachisqanmanta, chayrí ima khuruwan jap'ichisqanmanta mana imatapis parlasqanrayku, Labanqa kutichichikapoj. 40Noqaqa p'unchaypi ruphaypa tuntisqan karqani, tutantaj chiriwan pasachikuspa, mana puñuspa ima. 41Iskay chunka watata qanwan kaspa, iskaynin ususiykirayku chunka tawayoj watata llank'aporqayki, uywaykiraykutaj sojta watata. Sapa kutitaj pagoyta cambiaj kanki. 42Jinaqa, sichus Abrahampata Diosnin, tatay Isaacpa yupaychasqan Diosnin mana noqawanchu kanman karqa chayqa, mana imayojta kachapuwankiman karqa. Chaywanpis Diosmin ñak'arisqayta, qanrayku tukuy ruwasqayta ima rikorqa. Chayraykumin ch'isi k'amerqasunki, nispa.
Jacobwan Labanwan tratota ruwanku
43Chaymanta Labanqa Jacobta nerqa: Kay warmikuna wawaykuna kanku, wawankukunataj allchhiykuna. Kay ovejakuna, tukuy imaykipis noqajtamin kanku. Chaywanpis wawaykunata, wawankukunatapis mana ni imatapis ruwaymanchu. 44Chayrayku qanwan noqawan uj tratota ruwanachej, iskayninchej junt'ananchejpaj, nispa.
45Jinata nejtintaj, Jacobqa uj rumita oqharispa, sayacherqa. 46Chantá ayllunkunata nerqa: Rumita tantaychej, nispa. Paykunataj rumita tantaspa, tawqarqanku. Jinaspataj, tawqasqa rumi patapi mikhorqanku. 47Labanqa chay mikhusqanku cheqata arameo rimaypi suticharqa: “Yegar Sadutá”, nispa. Jacobtaj hebreo rimaypi suticharqa “Galaad”, nispa.
48Chaymanta Labán nerqa: Kunan kay tawqasqa rumeqa tratota ruwasqanchejmanta yuyarichinawanchejpaj kanqa, nispa. Chayrayku chay cheqaqa “Galaad”, nispa sutichasqa karqa. 49Sutichallarqankutaj “Mispá” sutiwan, imaraykuchus Labán nerqa: Qantawan, noqatawan Tata Dios qhawachun, karupi kasqanchejrayku manaña rikunakojtinchej. 50Ichapis wawaykunata k'umuykachachiwaj, chayrí wawaykuna jawa waj warmikunata oqharikuwaj. Mana pi rikoj kajtinpis, yuyarikuy Diosllamin testigo kananta, nispa.
51Chaymanta Labanqa Jacobta nillarqapuni: Qhaway, kay tawqasqa rumi, chantá kay sayachisqa rumiwan noqanchej ukhupi uj señal kanqa, 52tratota ruwasqanchejmanta yuyarichinawanchejpaj. Ni qan, nitaj noqa pasanakusunchejchu mana allinta ruwanakunanchejpaj. 53Jatun tatayki Abrahampata Diosnin, jatun tatayki Najorpatawan Diosnin justiciata ruwawasunchej, nispa. Chaymanta Jacobqa, tatan Isaac pi Diostachus yupaycharqa, chay Diospa sutinpi tilorqa. 54Chaymanta Jacobqa orqopi uj uywata ñak'aspa, Diosman q'olacherqa. Jinaspataj, tukuy ayllunta mikhunankupaj wajyarqa. Ajinata tukuyninku mikhorqanku, chay orqopitaj sut'iyanankama karqanku.
55 55 (32.1) Labantaj q'ayantin tutamanta jatarispa, wawankunata, allchhinkunatawan much'aykuspa, saminchaykuspa ima, wasinman kutiporqa.
Currently Selected:
Génesis 31: DQDC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
