Génesis 23
23
Sara wañupun
1Saraqa 127 watata kawsarqa. 2Paytaj Quiriat Arbapi wañuporqa. Arbaqa Canaán jap'iypi, Hebrón llajta kashan. Abrahamqa warmin Sara wañupusqanrayku mayta llakikuspa, anchatataj waqarqa. 3Chantá warminpa ayanpa ladonmanta jatarispa, Abrahamqa Jetpa churinkunata parlapayaj rerqa, nerqataj: 4Noqaqa qankuna ukhupi karu llajtayoj kani. Ama jina kaspa, warmiypa ayanta p'ampakapunaypaj jallp'ata venderiwaychej ari, nispa.
5Jetpa churinkunataj Abrahamta nerqanku: 6Wiraqochi, uyariwayku ari. Noqayku qanta Diospa ajllasqan kasqaykita qhawayku. Chayrayku sumajnin kaj aya p'ampanaykupi warmiykej ayanta p'ampakapuy. Mana pipis nisqaykuchu: Mana, mana nispaqa. Ajinata nispa, Abrahamman kuticherqanku.
7Chantá Abraham sayariytawan, jititakunaman k'umuykuspa, nerqa: 8Cheqatapunichus munankichej kaypi warmiypa ayanta p'ampakapunayta chayqa, ama jina kaspa, Sojarpa churin Efronta kayta niripuwaychej: 9Macpelapi qaqa jusk'uta payman vendey, nispa. Chayqa jallp'an kantupi kashan. Noqataj mashkhachus valesqanta qopusaj, ajinamanta qankuna ukhupi aya p'ampana noqajtapuni kananpaj, nispa.
10Efronqa Jet llajtayojkunawan khuska kasharqa. Paytaj llajta masinkuna chantá chay llajtamanta tukuy kurajkunaj uyarinankuta,#23.10 Llajtamanta kurajkuna: Llajtaman yaykunapi kurajkuna tantakuspa, tukuy imata allinchaj kanku, jinataj justiciata ruwaj kanku. Rut 4.1; Sal 127.5. Abrahamta nerqa: 11Wiraqochíy, uyariway: Maypichus qaqa jusk'u kashan, chay jallp'ata qhasilla qosqayki, mana vendesqaykichu. Tukuy llajta masiykuna qhasilla qosusqayta yachachunku. Qanqa chayman warmiykej ayanta p'ampakapuyta atinki, nispa.#23.11 Jallp'ata qhasilla qoyta munaykachanaqa mana jinapunichu karqa. Manachayqa k'achallamanta vendepuyta munashasqankuta yachayta qosharqanku. Abrahamqa jallp'ayoj vendepuyta munashasqanta yachaspa, mashkhachus valesqanta pagapuyta munarqa.
12Abrahamtajrí ujtawan chay llajtayojkunaman k'umuykuspa, 13tukuy uyarishajtinku, Efronta nillarqataj: Ama jina kaspa, uyariway ari. Noqaqa jallp'aj valesqanta pagapusqayki. Qolqeta jap'ikapuy ari, noqataj chayman wañojniyta p'ampakapusaj, nispa.
14Efrontaj Abrahamman kuticherqa: 15Wiraqochíy, uyarillaway: Jallp'aqa 400 qolqe valen. Mayk'achus valesqanmanta amaña parlanachu. Qanqa chayman warmiykej ayanta p'ampakampullay, nispa.
16Chantá Abrahamqa Efronwan parlaspa, mañasqan preciota pagarqa. Jititakuna rikushajtinkutaj, sumaj qolqe metalmanta tawa kilota jina pesarqa. 17Ajinata Macpelapi Efronpa jallp'an, qaqapi jusk'u, chantá sach'akuna ima Abrahampa makinman chayarqa. Macpelaqa Mamrej inti llojsimuynejpi karqa. 18Chaytaqa Abraham rantikaporqa, rantikapusqanmantataj jititakuna chantá llajtamanta kurajkuna ima testigo karqanku.
19Chaymanta Abrahamqa Macpelapi aya p'ampanaman Saraj ayanta p'ampakaporqa. Chayqa Mamrej inti llojsimuyninnejpi kashan. Chay cheqaqa Canaán jap'iypi, Hebrón sutiwan rejsisqa karqa.#23.19 Macpelapi chhanka jusk'u: Chaypi Saraj ayan, chantá Abrahampa ayan p'ampasqa karqa. Jinallataj Isaacpa ayan Gn 35.29, Rebecajta, Leajta, chantá Jacobpa ayan ima chay jusk'upi p'ampasqa karqa. Gn 49.31; 50.13. 20Ajinata Abrahamqa chay jallp'amanta dueño karqa, chhankapi aya p'ampanamanta ima, mayqentachus jititakuna aya p'ampanapaj vendesqanku, chaymanta.
Currently Selected:
Génesis 23: DQDC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
