Génesis 22
22
Abrahamqa Tata Diosta kasun
1Chaymanta qhepanejman Diosqa, Abraham kasukonqachus manachus chayta yachariyta munaspa, payta wajyarqa: Abraham, nispa. Paytaj kuticherqa: Kaypi kashani, nispa.
2Chantá Dios nerqa: Munasqa churiyki Isaacta pusariykukuspa, Moriah sutiyoj cheqanejman riy. Chayman chayaspataj, churiykita q'olachispa, noqaman jaywawanki, may orqopichus nisqayki, chaypi, nispa.
3Jinapi Abraham q'ayantin tutamanta jatarispa, q'olachinapaj llant'ata burronman chajnaykorqa. Chantá iskay kamachinkunawan, churin Isaacwan ima rerqanku, maymanchus Dios rinankuta nerqa, chayman. 4Kinsa p'unchayninman jinataj, Abraham maymanchus risharqa, chay cheqata karumanta rikorqa. 5Chantá Abraham kamachinkunata nerqa: Qankunaqa kayllapi burrowan qhepakuychej. Noqataj churiywan jaqayman rispa, Diosta yupaychasqayku. Chaymantataj kutimpusqayku, nispa.
6Ajinata niytawan, Abrahamqa, Diosman q'olachinankupaj apasharqanku, chay llant'ata Isaacman q'epiriykucherqa. Chantá cuchillota, ninata ima oqharikuspa, iskaynillanku chayman rerqanku. 7Rishajtinkutaj, Isaac tatan Abrahamta nerqa: Tatáy, nispa. Paytaj nerqa: Imatá ninki, wawáy? nispa. Isaactaj nerqa: Llant'awan, ninawan tiyapuwanchej. Diosman q'olachinapaj cordero maytajri? nispa. 8Abrahamtaj kuticherqa: Wawáy, Diosmin q'olachinanchejpaj corderota qowasunchej, nispa. Chantá iskayninku rillarqankupuni.
9Maymanchus rinankuta Dios nisqa, chayman chayaspa, Abraham uj altarta Diospaj ruwarqa, chay patamantaj llant'ata tawqarqa. Chaymantataj Isaacta wataykuspa, altarpi llant'a pataman winkuykucherqa. 10Abraham ñapis cuchillowan wawanpa kunkanta khuchunanpaj kashajtin, 11Tata Diospa angelnin janaj pachamanta nimorqa: Abraham, Abraham, nispa. Paytaj kuticherqa: Kaypi kashani, imata ninki? nispa. 12Angeltaj nerqa: Ama wawata ñak'aychu, nitaj imanaychu. Yachaniña qanqa noqata may jatun respetowan qhawawasqaykita, imaraykuchus munasqa churiykita qonawaykipaj mana mich'akorqankichu, nispa.
13Chantá Abraham qhawarispa, sach'a ukhupi uj carnerota rikorqa wajranmanta ch'ipaykusqata. Chantá pay carnerota aysamuytawan ñak'aspa, churinpa cuentamanta altarpi q'olachispa Diosman jaywarqa. 14Chaypacha Abraham chay cheqata suticharqa: “Tata Dios qonqa”, nispa. Chayrayku kunankama ninku: “Orqopi Tata Dios qonqa”, nispa.
15Ujtawan Tata Diospa angelnin janaj pachamanta Abrahamta wajyaspa, nerqa: 16Tata Dios nisunki: Munasqa churiykita qonawaykipaj mana mich'akuwasqaykimanta, noqa kikiyrayku tiluspa, niyki: 17Noqaqa may jinata saminchasqayki. Mirayniykitaqa janajpi ch'askakunata jina may chhikata mirachisaj. Paykuna mama qocha kantupi t'iyu jina, yupay mana atina kanqanku,#Gn 12.2; Heb 6.13-14; 11.12. jinataj mirayniykeqa tukuy awqankukunata atipanqanku. 18Nisusqayta kasuwasqaykiraykutaj noqa kay pachapi tukuy runata mirayniykinejta saminchasaj, nispa.
19Chaymanta Abraham, maypichus kamachinkuna kasharqanku, chayman kutimorqa. Chaymantataj tukuyninku Bersebaman kutiporqanku, maypichus tiyakusharqanku, chayman.
Najorpata churinkuna
20Unaymanta Abraham uyarerqa wawqen Najorpa warmin Milcapis ashkha wawayoj kasqanta. 21Kuraj kaj Uz karqa, qhepantaj Buz, chaypa qhepantaj Kemuel, paytaj Arampa tatan karqa. 22Chaymanta kallarqankutaj: Quesed, Jazó, Pildas, Yidlaf, Betuel ima. 23Aswan qhepanejman Betuelqa Rebecaj tatan kanan karqa. Abrahampata wawqen Najorpa warmin Milcajta churinkuna pusaj karqanku.
24Jinallataj Najorta ujnin warmin Reumapi churinkuna kallarqankutaj. Paykuna karqanku: Teba, Gaján, Tajás, Macá ima.
Currently Selected:
Génesis 22: DQDC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
