Génesis 21

Isaacpa paqarisqan

1Tata Diosqa Saraman imatachus nisqanta junt'arqa. 2Chayrayku Sara onqoj rikhurispa, qosan Abrahampaj wawayoj karqa. Chaypacha Abrahamqa allin machuña karqa. Saratajrí wawayoj karqa, Dios mayk'ajchus wawayoj kananta nisqanman jina.#Heb 11.11. 3Chantá Abraham warmin Saraj paqarichikusqan wawata Isaac sutiwan suticharqa. 4Diospa kamachisqanman jinataj, Abrahamqa pusaj p'unchayninman wawata circuncidarqa.#Gn 17.12; Hch 7.8. 5Abraham pachaj watayoj karqa wawan Isaac paqarishajtin.

6Chantá Sara sonqonpi nerqa: Dios kusiymanta asichiwarqa. Wawayoj kasqayta tukuy yachajkunapis noqawan khuska kusikonqanku. 7Pitaj Abrahamta ninman karqa paypa wawanta chuchuchinaytari? Chaywanpis chay jina machuyayninpi payman wawata rejsichiniraj, nispa.

Abrahamqa Agarta Ismaeltawan wijch'un

8Isaac wiñarqa, januk'asqa kanan p'unchaytataj Abrahamqa jatun mikhuyta wayk'ucherqa.#21.8 Unay runakuna wawakunata iskay watanman jina chayrí kinsa watanman jina januk'ayta yachaj kasqanku. Wawata januk'ashaspaqa, sumaj raymita ruwayta yachaj kanku. 9Chaywanpis uj kuti Saraqa Agarpa churin Ismaelta rikorqa, wawan Isaacmanta asikushajta. Ismaelqa Abrahampata churin karqa Egipto llajtayoj Agarpi. 10Chantá Sara Abrahamta nerqa: Chay kamachi warmita, wawantinta wasinchejmanta wijch'uy, imaraykuchus kay kamachi warmej wawanqa mana wawaywan khuska chayaqeta jap'inmanchu, nispa.

11Abraham chayta uyarispa, mayta llakikorqa, imaraykuchus Ismaelpis wawallantaj karqa. 12Diosrí Abrahamta nerqa: Wawayki Ismaelmanta, kamachiyki Agarmanta ima ama llakikuychu. Manachayqa warmiyki Saraj nisusqanta uyariy, imaraykuchus qanpa mirayniykeqa wawayki Isaacnejta kanqa.#Ro 9.7; Heb 11.18. 13Noqataj kamachiykej churintapis may ashkha runayoj suyuman tukuchillasajtaj, qanpa churiyki kasqanrayku, nispa.

14Q'ayantin tutamanta Abraham qoqawita, uj qara botapi yakutawan Agarman qorqa. Chantá Agarman q'epiriykuchispa, wawan Ismaeltawan qopuspa, kacharpayaporqa. Chaymanta Agar riporqa, Berseba sutiyoj ch'innejtataj kaynejta, jaqaynejta purerqa, mana mayman chayakuyta atispa.

15Apakusqanku yaku tukukapojtintaj, Agar churinta uj juch'uy sach'a uraman siriykucherqa. 16Chantá karunejman rerqa, tiyaykukuspataj, sonqonpi nerqa: Waway wañojta ama rikusajchu, nispa. Wawataj waqayta qallarerqa.

17Diosrí wawaj waqasqanta uyarerqa. Chayrayku janaj pachamanta uj ángel Agarta wajyaspa, nerqa: Imataj tiyan, Agar? Ama phutikuychu. Diosqa wawaj waqasqanta uyarin. 18Sayarispa, wawaykita makinmanta pusay, imaraykuchus noqa paypa mirayninmanta ashkha runayoj suyuman tukuchisaj, nispa.

19Chantá Diosqa Agarman uj yaku pujyuta rikucherqa. Paytaj riytawan, qara botanman yakuta junt'achispa, Ismaelman ujyacherqa. 20Ajinata Diosqa Ismaelta yanaparqa. Wawataj runayarqa, ch'innejkunapitaj tiyakorqa. Ismaelqa sumajta arcowan flechata kachariyta yacharqa. 21Paytaj Parán nisqa ch'innejpi tiyakorqa, aswan qhepanejmantaj maman payta Egipto llajtayoj warmiwan casaracherqa.

Abrahamwan Abimelecwan tratota ruwanku

22Chaypachallataj Abimelec, soldadonkunata kamachej Ficol ima Abrahamwan parlaj rerqanku: Yachayku Diosqa qanta tukuy ima ruwanaykipi yanapasusqanta. 23Chayrayku qanqa Diospa sutinpi tiluway ni ima mana allin kajta ruwanaykita noqata, ni wawaykunata, ni wawaykunaj wawankunatapis. Tilullaytaj ari allinta ruwanawaykita, noqa qanta imaynatachus ruwarqayki, ajinata. Jinallataj suyuypi tukuy tiyakojkunata allinta ruwanaykita tilullaytaj, pikunaj llajtankupichus tiyakushanki, chaykunata, nispa.

24Abrahamtaj kuticherqa: Ajina kanqa, Diospa ñawpaqenpi tiluni, nispa. 25Chaywanpis Abrahamqa Abimelecta yuyaricherqa paypa kamachinkuna Abrahampa kamachinkunamanta uj yaku pujyuta qhechusqankuta.

26Abimelectajrí nerqa: Kunankama chayta mana yacharqanichu. Qanpis chaymantaqa mana imatapis niwarqankichu. Pichus chayta ruwasqanta mana yachanichu, nispa. 27Chantá Abrahamqa Abimelecman ovejakunata, wakakunata qorqa, iskayninkutaj uj tratota ruwarqanku. 28Jinallataj Abrahamqa qanchis ovejakunata wajnejman t'aqarqa. 29Abimelectaj Abrahamta taporqa: Imapajtaj chay qanchis ovejakunata t'aqankiri? nispa. 30Abrahamtaj kuticherqa: Kay qanchis ovejata qoshayki, chaytaj noqa kay pujyuta ruwasqay yachakunanpaj kanqa, nispa. 31Chayrayku chay cheqata “Berseba” sutiwan suticharqanku, imaraykuchus chaypi tiluspa, iskayninku tratota ruwarqanku.

32Chantá Bersebapi tratota ruwaytawan Abimelecwan, soldadonkunata kamachej Ficolwan ima Filistea suyuman kutiporqanku. 33Abrahamtaj uj tamarindo sach'ata chaypi churarqa. Chantá Bersebapi Abrahamqa Wiñay Kawsayniyoj Tata Diosta yupaycharqa. 34Chantá Abraham Filistea suyupi unayta tiyakorqa.

Currently Selected:

Génesis 21: DQDC

Highlight

Copy