Markus 12

Porapa topokarajaa ri talua

Matius 21:33-46; Lukas 20:9-19

1I Yesus notesa ka ira ante nompake porapa ivei: <<Naria saito langgai notuda anggur ri taluana. Talua haitu nivalana ntiku-ntiku bo nikaena lovu rapompea uve anggur bo nipoviana sou pojaga. Naupu haitu, nibolinamo taluana haitu nte bara sako-ndua topokarajaa mojampangina damo rabagi aselena, bo nalaimo ia hau ri ngata nakavao. 2Nakavapa tempona mompupu vuana, nitudunamo saito batua hau nte topojampangi talua mombatarima bagiana lako ri asele ntalua haitu. 3Nakavapa batua haitu, ledo nidekeikara asele ntalua aga nisakara bo nibobara. Naupu haitu nipopalaira boamo. 4Naliu haitu, nitudu ntupu ntalua vai saitopa batua ntanina hau nte topojampangi talua. Tapi tona haitu muni aga nibobara sampe nabere balenggana, bo nipakaeyara. 5Pade nitudu ntupu ntalua vai saito batua ntanina. Tapi batua haitu nipatesira. Bo ivesia muni nipoviara ante batua-batua ntanina. Naria aga nibobara, bo naria ntanina nipatesira.

6Kaupuna damo saito naboli nte tupu ntalua, haitumo anana nipotovena. Nituduna muni anana haitu hau nte topojampangi talua apa nipekirina, <Natantumo rabilara anaku.>

7Tapi nikitarapa ana ntupu ntalua nakava, nosiulikamo ira, <Tumaimo anana anu rakaboli mbara-mbara ntotuana. Anumo, rapatesita ia ala taluana hitu majadi bagiata.> 8Jadi ana ntupu ntalua haitu nisakara bo nipatesira, bo karobatana nitedeakara ri savaliku ntalua anggur haitu.>>

9Bo nekutanamo i Yesus ka pakeni ntoYahudi haitu, <<Jadi nuapa rapovia ntupu ntalua anggur haitu? Natantumo ia kana makava mompatesi topokarajaa talua haitu bo mombadekei taluana ka tona ntanina. 10Natantu nibacamiumo tesa riara Buku Gasa anu nanguli ivei:

<Vatu anu nitedeaka ntopovia banua

vatu haitumo nopokopa ka banua haitu. 11Haitu nipovia nTupu,

bo nabelo mpuu ri panggitata!> >>

Mazmur 118:22-23

12Naupu haitu, pakeni ntoYahudi nompasimbuku mombasaka i Yesus, sabana nisanira iramo nipambela ri porapaNa pangane. Tapi naeka ira ka todea. Jadi nalaimo ira.

ToFarisi nompasimbuku nombaopa tesa i Yesus ante nekutana pombabayari balasitee

Matius 22:15-22; Lukas 20:19-26

13Naupu haitu pakeni-pakeni ntoYahudi haitu nantudu bara sako-ndua toFarisi ante tona nosabingga ka Magau Herodes hau mombaopa tesa i Yesus. 14Nakava nte i Yesus, niuliramo, <<Guru, nisani kami Komiu tona nanoa. Komiu ledo naeka nte isema-sema sabana Komiu ledo nompelenje. Komiu mpuu-mpuu nanoa nompatuduki pakalanto dota nu Alatala ka manusia. Jadi berimbamo? Nangoseaka Atura-atura agamata, mamala kita mombabayari balasitee ka Magau Mbaso Kaisar atau ledo? 15Paraluu kita mombayari atau ledo?>>

Tapi nisani i Yesus patujura nombaopa tesaNa. Jadi nanguli Ia, <<Nakuya komiu nompasimbuku mombatoliani Yaku? Keni tumai sampeka doi salaka Kupeinta.>> 16Jadi nikenira mpuumo. Bo nekutanamo Ia, <<Lenje bo sanga isema ri doi hitu?>>

Nesanamo ira, <<Lenje bo sanga Magau Mbaso Kaisar.>>

17Pade nanguli i Yesus ka ira, <<Ane ivesia, dekei ka Magau Mbaso anu masipato radekei ka Magau Mbaso, bo dekeimo ka Alatala anu masipato radekei ka Alatala!>>

Nokumaa mpuumo ira nangepe pesanaNa.

ToSaduki nompekutana nte i Yesus berimba tomate matuvu mpanjili

Matius 22:23-33; Lukas 20:27-40

18Naliu haitu nakavamo bara sako-ndua toSaduki netingu nte i Yesus. Ira toYahudi anu nomparasaya tona namate ledo matuvu mpanjili bara maipia. Jadi nekutanamo ira nte i Yesus, 19<<Guru, Nabi Musa notulisi atura hitu ka kita: Ane maria langgai noberei bo dopame ira noana namatemo ia, sampesuvuna mboto kana mompoberei timbalana haitu ala momuli bo ana haitu rareke muli nu langgai anu namatemo pangane.#12:19 Ulangan 25:5 20Jadi papitu ira nosampesuvu aga langgai bayangi. Lumbuana nobereimo tapi dopame noana ira, namatemo ia. 21Bo tueina karanduana nompoberei timbalana haitu, tapi dopame noana, namate munimo ia. Bo ivesia muni najadi ante sampesuvuna katataluna 22sampe sampesuvuna kapapituna. Ledo ria saitoa ira nomuli. Kaupuna, mombine haitu namate munimo. 23Tempo tona namatemo matuvu mpanjili bara maipia, isema kakanana berei nu mombine haitu? Apa ia nipobereira papitu.>>

24Nesanamo i Yesus, <<Nasala mpuu komiu, sabana ledo nisanimiu isi nu Buku Gasa bo ledo muni nisanimiu kuasa nu Alatala. 25Tempo tona namate matuvu mpanjili bara maipia, katuvura masimbayu mpo malaeka-malaeka ri suruga. Ira domo moberei. 26Berimbamo? Tantu nibacamiu anu nitulisi riara Buku Nabi Musa, tona namatemo matuvu mpanjili. Tora ngena tesa kajadia santungu gumbu navaya tapi ledo napapu. Nau nasaemo kamate i Abraham, i Ishak bo i Yakub, tempo haitu Alatala nanguli ka i Musa, <Yakumo Alatala nisomba i Abraham, i Ishak, bo i Yakub.>#12:26 Pesuvu 3:6,15 27Batuana, ira da natuvu bo nombasomba Alatala. Apa nisanita ledo tomate nombasomba Alatala, tapi tona natuvu. Komiu mpuu-mpuu nasala!>>

Saito guru agama nekutana umbana parenta nu Alatala nopokopa

Matius 22:34-40; Lukas 10:25-28

28Tempo haitu nakavamo saito guru agama nantalingai i Yesus ante toSaduki haitu. Niepena pesana i Yesus nabelo, jadi nipekutananamo i Yesus, <<Parenta umbana nopoko ntoto lako ri pura-pura parenta naria?>>

29Nesana i Yesus, <<Parenta anu nopoko ntoto iamo ivei: <Epemo toIsrael! Alatala Tupu nisombata, bo Ia aga saito-itoNa. 30Potovemo Tupu ante mpuu-mpuu raramiu, bo ante pura-pura noto mpekirimiu, bo pura-pura pokainggumiu bo pura-pura pompakulemiu.>#12:29-30 Ulangan 6:4-5

31Bo Parenta karanduana, <Potovemo singgamanusiamiu nasimbayu mpo pompotovemiu karomiu mboto.>#12:31 Ulangan 19:18 Ledo naria parenta ntanina nopokopa pade parenta randua hitu.>>

32Nangulimo guru agama haitu, <<Nakana mpuu niuliMiu, Guru. Ledo ria Alatala ntanina, aga Ia saito-itoNa.#12:32 Ulangan 4:35; 6:4 33Kita manusia kana mompotove Alatala ante mpuu-mpuu rarata bo ante pura-pura pompahata bo ante pura-pura pompakuleta. Bo kita muni kana mompotove singgamanusiata nasimbayu mpo pompotoveta karota mboto. Haitu nelabipa nopoko pade nombadekei mpengaya-ngaya pesomba nipalabu atau pesomba-pesomba ntanina ka Alatala.>>

34I Yesus nompeinta guru agama haitu nabelo pesanana. Jadi nangulimo i Yesus, <<Iko naparamo majadi todea riara Poparenta nu Alatala.>> Naliu haitu, domo naria sanupa tona nabia nekutana nte i Yesus.

I Yesus nompekutana isema Topepakasalama

Matius 22:41-46; Lukas 20:41-44

35Tempo i Yesus nompaguru ri doyata Banua nu Alatala, nipekutanaNa nte todea, <<Berimba sampe guru-guru agama nanguli Magau Topepakasalama muli Magau Daud? 36Magau Daud mboto notesaki Magau Topepakasalama ante pekeniaka Nosa Gasa, ivei:

Tupu nanguli ka Pueku,

<Kamaimo, ponturomo ri sabingga ngganaKu

Sampe Kupopekou pura-pura baliMu nte Iko.>

Mazmur 110:1

37Magau Daud mboto nanguli Magau Topepakasalama haitu Puena, jadi berimba sampe rauli Ia muli Magau Daud?>>

Nadamba mpuu todea nangepe i Yesus nompaguru ira.

I Yesus nepopatora ala nee mangoseaka pokainggu nu guru agama

Matius 23:1-36; Lukas 11:37-54; 20:45-47

38Tempo i Yesus da nompaguru, niulikaNa todea, <<Komiu kana mainga ante guru-guru agama. Nipokonora nolipa-lipa ante baju nandoe bo nipokonora rabila ntona ri potomu. 39Nipokonora nonturo ri ponturo anu nibila riara banua-banua petupu bo ri ponturo nabelo ri posusa. 40Nibagiura timbala-timbala ala mangalasi banuara. Bo nitabuniakara pokainggura nadaa haitu ante nosambaya pakandoe. Mantamo mpuu pehuku ka ira ngena!>>

I Yesus nombatoiya timbala napakasi

Lukas 21:1-4

41I Yesus hau nonturo nantingayo peti pomboli doi pedekei ri doyata Banua nu Alatala. NipariaraNa tona nombasuaraka doira riara peti haitu. Nadea tokalumana nombasuaraka doi dea riara mpeti haitu. 42Bo nakava muni saito timbala napakasi mpuu bo ia nombasuaraka rompeka doi kodi.#12:42 Basa Yunani: rompeka doi tambaga. Doi tambaga haitumo doi ledo nadea alina. 43Pade nironde i Yesusmo anaguruNa, bo niulikaNa, <<Pariaramo! Nadeapa pedekei ntimbala napakasi haitu pade pedekei ntona ntanina. 44Ira nombadekei lako ri labi nu kakalumanara, tapi nau timbala haitu napakasi mpuu, nidekeina pura-pura doi naria nte ia, anu niparaluuna ka katuvuna mboto.>>

Currently Selected:

Markus 12: TLEDOV

Highlight

Copy