Lukas 18

Porapa timbala ante topotangara

1Naupu haitu i Yesus nompatuduki anaguruNa ante notesa sangu porapa ala ira masaro mosambaya bo nee masau rara. 2NiuliNa ivei: “Ri sangu ngata naria topotangara anu ledo naeka nte Alatala bo ledo muni nipeilina singgamanusiana. 3Ri ngata haitu mai naria muni saito mombine natimbala nasaro nakava nte topotangara bo nekisaliku ivei: ‘Tulungimo yaku mantingayo baliku!’ 4Pamulana topotangara haitu ledo nadota mantulungi timbala pangane. Tapi kaupuna nipekirina, ‘Nau yaku ledo naeka nte Alatala bo ledo muni nipeiliku singgamanusiaku, 5aginamo kutulungi mombine hitu ala domo rabatona yaku. Ane ledo kutulungi ia, ledo maupu-upu ia tumai mombalengesi yaku.’ ”

6Nanguli i Yesus ka anaguruNa, “Pariaramo anu niuli ntopotangara anu ledo nanoa haitu! 7Iyapa tona ledo nanoa, nadota nantulungi timbala nerapi nte ia, nemopa Alatala! Natantu ratulungiNa todea nipelisiNa anu nekakai nte Ia eo bongi. Nee rapekirimiu Ia aga nokalera-lera mantulungi ira. 8Parasayamo: masalisa ratulungiNa ira. Tapi tempo Yaku, Ana nu Manusia makava mpanjili ri dunia hitu, da mariapa tona mpuu-mpuu momparasaya Yaku?”

Porapa toFarisi ante topesingara balasitee

9I Yesus notesa porapa hitu ka tona nompekiri iramo tona nabelo bo nompandaente tona ntanina. 10Nanguli i Yesus, “Naria randua tona hau nosambaya ri Banua nu Alatala. Saito toFarisi, bo saito topesingara balasitee.

11ToFarisi haitu neangga bo nosambaya riara ntaina, ‘Pue, yaku nosukuru nte Komiu sabana yaku hii ledo nasimbayu ante tona ntanina, haitumo topebagiu, tona natenggo rarana, bo tona nobualo. Yaku nosukuru apa yaku ledo nasimbayu ante topesingara balasitee moitu. 12Ronggani saminggu yaku nopuasa, bo nidekeiku ka Komiu sabagia lako ri sapulu bagia asele panggaviaku pura-pura.’

13Tapi topesingara balasitee haitu neangga nakavao nosambaya. Ledo nabia ia nantingoa ri langi. Ia nanjoso rara bo nosapa-sapa bambarana bo nanguli, ‘Alatala, poasimo yaku, apa yaku tona nadosa.’ ”

14Nanguli i Yesus, “Kuuli ka komiu, tempo ira randua nanjili, topesingara balasitee nitarima nu Alatala, tapi toFarisi ledo. Apa, isema-sema nompakaoge karona mboto, kana rapakaede nu Alatala, tapi isema-sema nompakaede rarana, kana rapakaoge nu Alatala.”

I Yesus nerapi belo ka ngana-ngana

Matius 19:13-15; Markus 10:13-16

15Nadea tona nanggeni ngana kodi hau nte i Yesus ala radikaNa paleNa ri ngana haitu bo merapi Alatala mombadekei belo ka ira. Nanggita haitu, ana-anaguruNa nompokarau ira.

16Tapi i Yesus nompokio ngana-ngana haitu bo niulikaNa anaguruNa, “Dekeikamo ngana-ngana gahitu makava nte Yaku. Nee ratagi ira, sabana aga tona nasimbayu ingguna mpo ngana-ngana gahitu masipato majadi todea ri Poparenta nu Alatala. 17Pariaramo tesaKu hitu! Isema-sema ledo natundu nte Alatala nasimbayu mpo ngana kodi natundu nte totuana, ia ledo mamala majadi todea nu Alatala.”

I Yesus ante pakeni ntoYahudi nakalumana

Matius 19:16-30; Markus 10:17-31

18Naria saito pakeni ntoYahudi nekutana nte i Yesus, “Guru belo, nuapa kupovia ala kukava katuvua mabelo sampe ri kasae-saena?”

19Nesana i Yesus, “Nakuya niulimuka Yaku nabelo? Ledo ria saitoa tona nabelo, aga Alatala. 20Natantu nisanimu parenta-parenta nu Alatala anu nanguli, nee mobualo, nee mepatesi, nee mangangga, nee mosabi dava, bo bilamo tina tuamamu.”#18:20 Pesuvu 20:12-16; Ulangan 5:16-29

21Nesana tona haitu, “Pura-pura parenta haitu nioseakakumo lako ri kakodiku.”

22Nangepe haitu, nangulimo i Yesus ka ia, “Da naria sangayapa kana mupovia. Pobalu pura-pura kakalumanamu bo dekei alina haitu ka tona napakasi ala mukava kakalumana ri suruga. Maupu sia, oseakamo Yaku!”

23Nangepe tesa i Yesus haitu, nasusamo rarana, sabana ia tona nakalumana mpuu. 24Nisani i Yesus nasusa rara ntona haitu. Sia sampe niuliNa, “Nakaja mpuu tona nakalumana matundu nte Alatala bo majadi todeaNa. 25Namurapa sangu unta mesua ri puki nu jaru, pade tona nakalumana matundu nte Alatala bo majadi todeaNa.”

26Tona nangepe tesa i Yesus nanguli, “Ane ivesia, isema tano mamala rapakasalama?”

27Nanguli i Yesus, “Anu ledo rapakule nu manusia nipakule nu Alatala.”

28Jadi nanguli i Petrus ka i Yesus, “Peintamo, Pue! Kami nompalaisi pobanua kami bo nangoseaka Komiu.”

29Nanguli i Yesus ka ira, “Pariaramo tesaKu. Isema-sema nompalaisi banuana, bara bereina, bara sampesuvuna, bara tina tuamana, bara anana sabana ia nangoseaka Alatala, 30madea nggani kadeana rakavana ri dunia hitu. Bo ri tempo makava ratarimana katuvu nabelo sampe ri kasae-saena.”

Katalu-ngganina i Yesus notesa kamateNa

Matius 20:17-19; Markus 10:32-34

31I Yesus nompasiromu sapulu randua anaguruNa pade niulikaNa, “Epemo! Sii-sii kita mantende hau ri ngata Yerusalem. Hamai kana madupa pura-pura anu nitulisi nabi-nabi nggaulu, haitumo anu majadi ante Yaku, Ana nu Manusia. 32Yaku kana radekei ka tona ledo toYahudi. Yaku rabirisikara mata, rapongei-ngeikara, bo ratoveulusira. 33Yaku racambu pakandasa bo rapatesira. Tapi ri eo katataluna Yaku matuvu mpanjili.”

34Pura-pura anu nitesa i Yesus haitu ledo nipaha nu anaguruNa. Batua ntesaNa haitu nitabuniaka ka ira. Jadi ledo nisanira nuapa nitesa i Yesus.

I Yesus nompakabelo saito toburo

Matius 20:29-34; Markus 10:46-52

35Tempo i Yesus napara ngata Yerikho, naria saito toburo nonturo nerapi-rapi ri bivi dala. 36Niepena tona nadea noliu, nipekutanana tona, “Nuapa najadi?”

37Nesana tona, “I Yesus, toNazaret moliu ri sii.”

38Nangepe haitu, nongaremo toburo, “Yesus, Muli Magau Daud, poasimo yaku!”

39Tona ri kolu i Yesus narau ka toburo bo nombasalaraka ia, “Nee makanano! Kalino iko!”

Tapi toburo haitu aga nantambai kamanggana nongare, “Yesus, Muli Magau Daud, poasimo yaku!”

40Nangepe toburo nongare, netaamo i Yesus, bo nituduNa tona manggeni toburo ka Ia. Nakavapa toburo, nipekutana i Yesusmo, 41“Nuapa mupodota Kupovia ka iko?”

Nesanamo toburo, “Pue, yaku madota mekita!”

42Nanguli i Yesus ka ia, “Ane ivesia, pekitamo! Mabelomo matamu, sabana iko nomparasaya Yaku!”

43Kaliu-liu namala mpuumo nekita toburo haitu, bo haumo ia nantuntuni i Yesus bo nombatoiya Alatala. Pura-pura todea ri sia anu nanggita kajadia haitu, nantoiya Alatala.

Currently Selected:

Lukas 18: TLEDOV

Highlight

Copy