Lukas 16

Porapa tona natenggo rarana

1I Yesus notesa porapa hitu ka anaguruNa: “Naria saito tona nakalumana bo naria muni saito topompasiayu kakalumanana. Tokalumana nangepe perai ntona ka topompasiayu haitu, nompakarugi kakalumana nggoo. 2Jadi nipokiona topompasiayu haitu bo niulikana, ‘Natantu mpuu pokainggumu niepeku! Dekei kakumo buku nu doi pokarajaamu nompasiayu kakalumanaku. Domo iko mompasiayu kakalumanaku!’

3Nangepe haitu, nompekirimo topompasiayu kakalumana, ‘Hee, berimbamo yaku hii? Tuaku madota mombakabasaka yaku. Nuapa kupovia ngena? Ane motonggo, domo kupakule. Ane merapi-rapi ri dala, maeya mataku. 4Ha, ivei kupovia! Kupakaluu rara ntona noinda nte tuaku, jadi ane rakabasaka i tua yaku ngena, ratarimara yaku ri banuara.’ 5Jadi naupu sia, hau ia nompokio pura-pura tona noinda doi nte tuana. Nanguli ia ka tona paratama, ‘Sakuya indamu nte tuaku?’

6Nesana tona haitu, ‘Saatu gumba nu lana.’

Nanguli topompasiayu haitu, ‘Sii sura indamu. Ponturo ri sii, tulisimo limapulu gumba nu lana.’ 7Naupu sia, niulikana tona karanduana, ‘Sakuya indamu?’

Nesana tona haitu, ‘Sanjobu karu pae.’

Pade nangulimo topompasiayu haitu, ‘Siimo sura indamu. Tulisimo valu-atu karu.’

8Tempo tona nakalumana haitu nangepe anu nipovia ntopompasiayu ledo nanoa haitu, nitoiyanamo topompasiayu haitu sabana natau noakala mangelo katuvu mabelo. Apa tona ledo nosisani nte Alatala natau nompasiayu katuvura nte roara. Nataupa ira pade tona natuvu ri reme nTupu nompasiayu katuvura ka tempo makava. 9Kuuli ka komiu, pakemo kakalumana ri dunia hitu mombatulungi tona ntanina, ala tempona kakalumana dunia domo maria gunana, komiu ratarima nu Alatala ri ponturo anu batena sampe ri kasae-saena ri suruga. 10Tona namala niparasaya ante mbara-mbara sakide, namala muni niparasaya ante mbara-mbara nadea. Tapi ane ia ledo nokainggu nanoa ante mbara-mbara sakide, ia ledo mokainggu manoa ante mbara-mbara nadea. 11Jadi ane komiu ledo namala niparasaya ante kakalumana ri dunia nadaa hitu, isema momparasaya komiu ante kakalumana nabelo ri suruga? 12Ane komiu ledo namala niparasaya ante mbara-mbara ntona ntanina ri dunia hitu, isema mombadekei ka komiu kakalumana majadi bagiamiu mboto ri suruga? 13Ledo rapakule nu batua saito matundu nte madika randua. Sabana, saito rapotovena bo saitopa ledo rapeilina. Saito raoseakana parentana bo saitopa rapoarana. Ivesia muni komiu. Ane komiu mompotove mbara-mbara ri dunia hitu, ledo rapakulemiu mpuu-mpuu mangoseaka dota nu Alatala.”

I Yesus notesa ka toFarisi

Matius 11:12-13; 5:31-32; Markus 10:11-12

14ToFarisi nangepe pura-pura anu nitesa i Yesus pangane, aga nipongirikara i Yesus sabana ira topompotove doi. 15Tapi i Yesus nanguli ka ira, “Ri ngayo ntona ntanina, komiu nikita nabelo, tapi nisani nu Alatalamo pura-pura isi rara ntaimiu. Anu nabelo ntoto ri panggita manusia, haitumo nipovuu mata nu Alatala.

16Atura-atura agama nidekei Nabi Musa ka kita, bo pepatuduki nu nabi-nabi ntanina rapake sampe peonga i Yohanes Topediu. Nompamula lako ri tempo i Yohanes haitu, Kareba Belo anu notesa Poparenta nu Alatala, nipatolele njuu. Bo tona nompasimbuku mpuu majadi todea nu Alatala. 17Atura-atura agama nidekei Nabi Musa ledo molese. Namurapa langi bo tana maopo, pade sangu hurupu lako ri Atura-atura haitu molese. Haitu bate-batena maria.”

18Pade nanguli munimo i Yesus, “Isema-sema langgai nompogaaka bereina pade noberei nte mombine ntanina, ia nobualo. Bo tona nompoberei mombine nipogaaka, ia muni nobualo.”

Tona nakalumana ante i Lazarus

19I Yesus nompapola tesaNa ante porapa hitu: “Naria saito tona nakalumana, pakeana mpo pakea nu magau nasuli mpuu alina. Katuvuna eo-eo mpo toposusa. 20Naria saito tona napakasi nidika ntona ri vamba ntona nakalumana. Topakasi haitu nosanga i Lazarus. Ia nabaka njumanggaro. 21Ia madota mangande rombo nggandea nanavu lako ri meja ntokalumana haitu. Napakasi ntoto ia sampe asu-asu muni nakava nombadila bakana.

22Nakavamo tempona tona napakasi haitu namate bo ia nikeni nu malaeka hau ri ponturo nabelo ri sinjori Nabi Abraham. Tona nakalumana namate munimo bo nitana. Ia nikeni hau ri ponturo ntomate. 23Nandasa mpuu ia ri sia. Nitingoana ri kalangana, nikitana Nabi Abraham ri ponturona nakavao, bo i Lazarus nonturo ri sinjorina. 24Nongaremo tokalumana haitu, ‘Tuamaku, Abraham, poasimo yaku! Tudumo i Lazarus mombalome koya mpalena ri uve pade tumai mombabanggasi dilaku, nandasa mpuu yaku ri mata nu apu hitu.’

25Tapi nesana i Abraham, ‘Toramo anaku, tempo iko ri dunia, nikavamu puramo belona, tapi i Lazarus aga nanggava anu nadaa. Sii-sii ia nipakadamba, bo iko nipandasa. 26Bo ri olota naria salu nandala ntoto. Tona ri sii ledo namala tou, bo tona ri situ ledo namala tumai.’

27Nangepe haitu, tona nasugi nanguli, ‘Ane ivetu tano, kuperapi mpuu-mpuu nte komiu, tudumo i Lazarus hau ri banua ntuamaku. 28Da nariapa alima sampesuvuku hamai. Tudumo i Lazarus hau mompainga ira ala ira ledo mesua ri ponturo pepandasa hitu.’

29Nesana i Abraham, ‘Nariamo Buku Atura Agama nitulisi Nabi Musa bo Buku nu Nabi-nabi nte ira. Dekeikamo ira mangoseaka anu nitulisi riara buku-buku haitu!’

30Tapi nesana tokalumana, ‘Ledopa magana. Tapi ane maria tona namate matuvu mpanjili hau nte ira, tantu ira majea movia dosa.’

31Tapi nesana i Abraham, ‘Ane ledo rapariarara parenta Nabi Musa bo nabi-nabi ntanina, tantu ledo muni raparasayara nau maria tomate matuvu mpanjili!’ ”

Currently Selected:

Lukas 16: TLEDOV

Highlight

Copy