Lukas 15

Bimba nalipo

Matius 18:12-14

1Naria sanggani nadea topesingara balasitee ante tona ntanina, anu niuli ntodea nadaa pokainggura, nakava nangepe tesa i Yesus. 2Nanggita haitu, toFarisi bo guru agama nongau. “Hm! Ledo nabelo tona hitu! Ia nosimporoa ante tona nadaa bo nangande singgani nte ira!”#15:1-2 Nantuntuni ada ntoYahudi, ane ira mangande mosanggani-nggani ante tona nadosa, ira muni majadi maruto bo ledo masipato metupu singgani-nggani nte toYahudi ntanina.

3Nangepe tesara haitu, nesana vai i Yesus ante porapa hitu ka ira: 4“Rapana, ane roamiu mompatuvu bimba saatu anguna bo malipo sangu, nuapa rapoviana? Tantu rapalaisina bimbana siopulu bo sasio ranggarava bo hau raelona sangu bimbana nalipo haitu sampe rakavana. 5Ane rakavana bimbana haitu, rasimbuakana manjili ante damba rarana. 6Makava ri banua, rapasiromuna roana bo tona nosadoyata nte ia bo raulikana, ‘Kamaimo kita madamba-damba, sabana nikavakumo bimbaku nalipo!’ 7Ivesia muni ri suruga. Ane saito tona nadaa majea, kadamba nu isi suruga naogepa pade kadamba ka siopulu bo sasio tona nanoa anu ledo paraluu majea.”

Doi nalipo

8I Yesus nompapola tesaNa ante porapa ntanina ivei: “Rapana maria mombine ante doi salaka sapulu-mpekana. Ane malipo sampeka, nuapa rapoviana? Natantu ratunjuna poindo bo rasaevena banuana mangelo pakabelo sampe rakavana doi nalipo haitu. 9Ane rakavana doina haitu, rapasiromuna roana bo tona nosadoyata nte ia ivei: ‘Kamaimo kita madamba-damba, sabana doiku nalipo nikavaku mpanjili.’ 10Ivesia muni malaeka-malaeka nu Alatala. Madamba mpuu rarara ane saito tona najea nokainggu nadaa.”

Ngana nalipo

11Notesa vaimo i Yesus ante porapa hitu, “Naria saito totua langgai, randua anana, langgai pura. 12Ana kaupuna nanguli ka tuamana, ‘Tata, dekei ka yakumo bagiaku lako ri kakalumanamiu.’ Jadi, nibagi ntuamanamo kakalumanana ka anana randua. 13Bara sako-eo kaliuna, ngana kaupu haitu nompobalu bagiana pura-pura, bo hau ri ngata nakavao. Hamai ia nompakaupu doina nggoo-nggoo, natuvu nompesana. 14Naupu purapa doina, najadimo kaara mpai ri ngata haitu sampe ia muni napepa. 15Pade hau ia nokarajaa ka tona ri ngata haitu. Tona haitu nombatudu ia hau mojaga bavu ri talua. 16Naara mpuu taina sampe nau tibo bavu mbeki rakandena. Tapi ledo ria saitoa tona nombadekei kandea ka ia. 17Kaupuna, nanotomo rarana, bo nipekirina, ‘Tona nokarajaa ka tuamaku nelabi-labi kandeara, tapi yaku ri sii mamate ara. 18Yaku kana manjili hau nte tuamaku bo kuuli ka ia ivei: Tata, nadosamo yaku ri ngayo nu Alatala bo ri ngayomiu muni. 19Tata, domo masipato yaku rareke anamiu, aginamo rarekemiu batua.’ 20Naupu nompekiri ivesia, nanjilimo ia hau nte tuamana.

Da nakavao ia, nikita ntuamanamo. Naasi mpuu mata ntuamana nanggita anana. Nangova ia nantomunaka anana. Nakava nte anana nikapuina anana bo niekina. 21Pade nanguli ngana haitu ka tuamana, ‘Tata, nadosamo yaku ri ngayo nu Alatala bo ri ngayomiu muni. Domo masipato yaku rareke anamiu.’

22Tapi tuamana nombaronde batua-batuana bo nituduna, ‘Koi ala masalisa baju nabelo bo popasuaka ia. Pasuaka muni sinji ri koya mpalena bo sapatu ri kadana.#15:22 Popasuaka sinji bo sapatu. Batuana, ana haitu nitarima ntuamana. Mompake sinji tandana nalanga panggana, bo mompake sapatu tandana ia ana bo ledo batua. Apa nabiasa batua ledo nosapatu. 23Maupu haitu, koi ala ana japi toboyana bo sambalemo. Kita mangande madamba-damba, 24sabana anaku hitu, mamala raulita namatemo, tapi siipa natuvu mpanjilimo. Ia nalipomo, tapi siipa nikava mpanjilimo.’ Jadi nipoviara posusa, bo nadamba-damba.

25Tempo ira nadamba-damba ri banua, anana lumbua da ri talua. Nanjilipa ia, bo naparamo nte banuara, niepena musi bo suara ntopomore. 26Nirondena saito batua bo nipekutanana, ‘Nokuya tona nadea ri banua?’

27Nesana batua haitu, ‘Nanjilimo tueimiu. Jadi tuamamiu nombatudu kami mosambale japi toboyana sabana anana nalipo nakava ante nabelo.’

28Nangepe haitu, naraumo rara ana lumbua sampe ledo nadota ia mesua riara banua. Jadi nesuvu tuamana mantingengesi ia mesua. 29Tapi nanguli ngana haitu ka tuamana, ‘Nompae-mpaemo yaku nokarajaa mpo batuamiu. Ledo ria sanggani niliunakaku anu niparentamiu kaku. Tapi nau sangu ana ntovau ledo ria nidekeimiu kaku ala yaku madamba-damba ante roaku. 30Damo nakava anamiu nompakaupu kakalumanamiu nikenina hau nongei ka bajinga, bo nisambalekamiu japi ka ia.’

31Nesana tuamana haitu, ‘Anaku, iko batena naria ri sii nte yaku. Pura-pura anuku, iko mami tupuna. 32Tapi kita masipato mosusa madamba sabana tueimu namate, natuvu mpanjili. Ia nalipomo tapi sii-sii nikavata mpanjili.’ ”

Currently Selected:

Lukas 15: TLEDOV

Highlight

Copy