Yohanes 8

Mombine nikava nobualo

1Tapi i Yesus hau ri Bulu Zaitun. 2Kamaile bobayana, hau vaimo Ia nesua ri doyata Banua nu Alatala, bo nakavamo todea nasiromu nte Ia. Nonturomo Ia bo nompatuduki ira.

3Tempo haitu, nakavamo guru-guru agama bo toFarisi nanggeni saito mombine nikavara nobualo. Mombine haitu nipopeanggara ri ngayo ntodea. 4Bo niulikara i Yesus, “Guru, mombine hitu nikava kami nobualo. 5Riara Atura-atura agama, naria parenta i Musa nanguli, ane mombine nokainggu ivesia kana rarempe ante vatu sampe mamate. Jadi berimba panggavaMiu pokainggu nu mombine hitu?” 6Patuju nu pompekutanara haitu mombatoliani tesa i Yesus ala mamala rapakasalara Ia.

Tapi i Yesus ledo notingo. Ia aga notungga notulisi tana ante koya-mpaleNa. 7Tapi ledo nenonto ira nompekutana-tana. Jadi kaupuna niumbaraka i Yesusmo balenggaNa bo nanguli, “Isema-sema komiu ledo nadosa, iamo mokolu mombarempe mombine hitu ante vatu.” 8Naupu i Yesus notesa ivesia, notungga vaimo Ia notulisi tana ante koya-mpaleNa.

9Nangepe tesa i Yesus haitu, nalai saito-saitomo ira lako ri sia, nompamula lako ri totua sampe tona namuda. Kaupuna nalai puramo, naboli damo i Yesus ante mombine pangane batena neangga ri belana. 10Niumbaraka i Yesus balenggaNa bo niulikana mombine haitu, “Ri umba puramo tona pangane? Domo ria topombahuku iko?”

11Nesana mombine haitu, “Domo ria, Pue.”

Nanguli i Yesus, “Yaku muni ledo mombahuku iko. Panjilimo bo tumo rapovia dosa.”

I Yesus reme nu dunia

12Naupu haitu nanguli vaimo i Yesus ka todea, “Yakumo hii reme dunia. Isema-sema mangoseaka Yaku ledo matuvu ri kalandana, tapi manggava reme anu mombadekei katuvua mabelo.”

13Nesana toFarisi, “Aga tesaMu mboto tu! Jadi ledo nakana.”

14Nesana i Yesus, “Nau karoKu mboto nitesaKu, nakana tesaKu sabana nisaniKu lako ri umba kakavaKu bo hau ri umba Kukalau. Tapi ledo nisanimiu lako ri umba kakavaKu bo hau ri umba Kukalau. 15Komiu nompakasala tona nangoseaka pompekirimiu mboto. Yaku ledo nompakasala tona. 16Tapi ane rapana Kupakasala tona, natantumo pobotusiKu manoa, sabana ledo aga pobotusiKu saitoKu tapi pobotusi nTuamaKu anu nantudu Yaku.

17Riara Atura-atura agama naria nitulisi ivei: ‘Ane maria randua sabi masimbayu tesara riara potangara, tesara namala raparasaya.’#8:17 Ulangan 17:6; 19:15 18Naria randua anu nombasabiki Yaku. Yaku mboto saito, bo karanduana TuamaKu anu nantudu Yaku.”

19Bo nekutana vaimo ira, “Ri umba TuamaMu?”

Nesana i Yesus, “Ledo nisanimiu mpuu Yaku. Bo ledo muni nisanimiu mpuu TuamaKu. Ane rapana nisanimiu mpuu Yaku, natantu rasanimiu mpuu TuamaKu.” 20Tesa i Yesus haitu nitesaNa ri doyata Banua nu Alatala tempo Ia nompatuduki tona napara peti pomboli doi pesomba. Ledo ria saitoa tona namala mombasaka Ia sabana dopa nakava tempoNa.

ToYahudi naingu sabana i Yesus nanguli, “Komiu ledo mamala hau ri ponturo Kukalau.”

21Bo nanguli vaimo i Yesus ka todea, “Yaku malai lako ri sii bo raelomiu Yaku, tapi komiu aga rapopogaa lako nte Alatala sabana dosamiu. Komiu ledo mamala hau ri ponturo Kukalau.”

22Nangepe haitu, nosiulikamo pakeni ntoYahudi, “Bara Ia mopatuju mompatesi karoNa mboto, sabana niuliNa kita ledo mamala hau ri ponturo rakalauNa.”#8:22 Nangoseaka pomparasaya ntoYahudi, ane tona mompatesi karona mboto, nyawana kana ranavusaka riara narakaa.

23Tapi nanguli i Yesus ka ira, “Komiu nopuna lako ri dunia hitu, tapi Yaku nopuna lako ri suruga. Komiu todea ri dunia hitu, tapi Yaku ledo. 24Haitu sampe niuliKu ka komiu, komiu mamate bo rapopogaa lako nte Alatala sabana dosamiu. NiuliKumo isema Yaku.#8:24 isema Yaku ATAU: “YAKU NARIA”. Riara agama Yahudi, sanga nu Alatala nagasapa iamo “Yahweh” atau “Yehovah”. Batuana “Yaku Naria”. Peinta Pesuvu 3:14. Ri buku hitu anu nitulisi i Yohanes, i Yesus nasaro nanguli “Yaku naria” rapopakita Iamo nasimbayu nte Alatala. Ane ledo raparasayamiu tesaKu haitu, komiu mpuu-mpuu mamate bo rapopogaa lako nte Alatala sabana dosamiu.”

25Bo nekutana vaimo toYahudi, “Kakanana, isema tano Iko?”

Nesana i Yesus, “Domo ria gunana Kutesa ka komiu!#8:25 Domo ria gunana Kutesa ka komiu: Tafsiran ntanina: Anu nitesaKu ka komiu lako ri pamulana! 26Da nadeapa mamala Kuuli mompakasala komiu, tapi ledo Kuuli. Aga anu niepeKu lako nte Ia anu nantudu Yaku, haitumo Kutesa ka manusia ri dunia. Bo Ia namala raparasaya.”

27Ledo nisanira i Yesus notesaki TuamaNa ri suruga. 28Haitu sampe niuliNa vai ka ira, “NiuliKu ka komiu isema Yaku. Bo maupu komiu manganggataka Yaku, Ana nu Manusia,#8:28 manganggataka Yaku, Anu nu Manusia: Patuju ntesa hitu, i Yesus kana raanggataka pakalanga ri kayu salib bo meore hau ri suruga. Peinta muni Yohanes 12:32-33. ri kayu salib, tempo haitu pade rasanimiu tesaKu hitu nakana bo rasanimiu muni ledo ria sangayaa nipoviaKu nangoseaka dotaKu mboto. Tapi Yaku bate-batena notesa nangoseaka anu nipatuduki nTuamaKu ka Yaku. 29Ia anu nantudu Yaku, Ia muni nomporoa Yaku. Ledo rapalambaNa Yaku saitoKu, sabana Yaku bate-batena novia anu nompakadamba raraNa.”

30Naliu i Yesus notesa ivesia, nadeamo tona nomparasaya Ia.

Ane rasanita pepatuduki nakana, kita domo rapobatua nuapa-nuapa

31Naupu haitu, i Yesus nanguli ka toYahudi anu nomparasaya Ia, “Ane komiu maroo mangoseaka tesaKu, komiu mpuu-mpuu topangoseaka Yaku. 32Bo ane ivesia, rasanimiumo pepatuduki nakana sampe komiu rakabasaka lako ri pobatuamiu.”

33Nesana pakeni ntoYahudi, “Kami hii muli i Abraham. Dopa sanggania kami nipobatua ntona. Berimba bo niuliMiu kami domo rapobatua?”

34Nesana i Yesus ka ira, “Pariaramo tesaKu hitu. Isema-sema novia dosa, iamo nipobatua nu dosa. 35Ane batua, ledo natantu makuasa riara banua nu madika. Tapi ane ana nu madika, natantumo ia makuasa riara banua ntuamana. 36Jadi, ane Ana nu Alatala mbotomo mombakabasaka komiu lako ri dosa, makabasaka mpuumo komiu! 37NisaniKu komiu pura-pura muli i Abraham. Tapi nau damo ivesia, komiu madota mompatesi Yaku, sabana ledo nipokonomiu mantarima pepatudukiKu. 38Anu nikitaKu nte TuamaKu, haitumo nitesaKu ka komiu. Tapi komiu aga novia anu nipatuduki ntuamamiu ka komiu.”

39Nesana ira ka i Yesus, “Tuama kami i Abraham.”

Nanguli i Yesus, “Ane komiu mpuu-mpuu muli i Abraham, natantumo pokainggumiu mabelo, nasimbayu mpo pokainggu i Abraham. 40Yaku nompasimbayu ka komiu pepatuduki nakana anu niepeKu lako nte Alatala, tapi komiu aga nompasimbuku mompatesi Yaku. Ledo ivesia pokainggu i Abraham! 41Pokainggumiu tu nanjava pokainggu ntuamamiu mboto!”

Nesana vaimo ira, “Kami ledo ana vone! Tuama kami aga saito, haitumo Alatala.”

42Nanguli i Yesus ka ira, “Ane Alatala tuamamiu, tantu rapotovemiu Yaku, sabana Yaku nopuna lako nte Ia. Yaku nakava ledo nangoseaka dotaKu mboto, tapi nangoseaka dota nu Alatala anu nantudu Yaku. 43Natantumo ledo nipahamiu tesaKu sabana ledo nipokonomiu mantarima pepatudukiKu. 44Komiu nasimbayu ante tuamamiu, Magau nu Seta! Komiu batena madota mangoseaka dotana. Lako ri pamulaname ia bate-batena topepatesi. Ia ledo nosabingga ka anu nakana, sabana ledo ria nuapa-nuapa nakana riara ntaina. Masipato ia modava, apa ia topodava mami bo puna nu dava. 45Yaku notesa anu nakana ka komiu, bo ledo niparasayamiu sabana komiu muni topodava. 46Coba popakita ka Yaku dosaKu! Nakana anu nitesaKu, jadi nakuya ledo niparasayamiu? 47Tona nopuna lako nte Alatala mompariara tesa nu Alatala. Tapi komiu ledo nompariara tesaNa sabana komiu ledo nopuna lako nte Alatala.”

I Yesus naogepa pade i Abraham

48Nangepe tesa haitu, nangulimo toYahudi ka i Yesus, “Hm! Nakana mpuu niuli kami! Iko nipesua nu seta! Iko nasimbayu mpo toSamaria naruto!”

49Nesana i Yesus, “Yaku ledo nipesua nu seta. Yaku nombabila TuamaKu, tapi aga nisalaimiu Yaku. 50Yaku ledo mbeki rabila ntona. Tapi TuamaKu madota Yaku rabila ntona bo Iamo topotangara nanoa. 51Pariaramo tesaKu hitu. Isema-sema mangoseaka tesaKu ledo mamate sampe ri kasae-saena.”

52Nangepe haitu nanguli toYahudi ka i Yesus, “Hitupa nisani kamimo nipesua nu seta mpuumo Iko! I Abraham bo nabi-nabi nggaulu namate puramo. Tapi panguliMu, isema-sema nangoseaka tesaMu ledo mamate sampe ri kasae-saena! 53Berimbamo? Naogepa Iko pade tuputa i Abraham? Ia bo nabi-nabi nggaulu namate puramo! Isema ntoto Iko sampe Iko nabia notesa ivesia?”

54Nesana i Yesus, “Ane Yaku mombabila karoKu mboto, ledo ntoto maria batuana. Tapi TuamaKu nombabila Yaku bo Iamo anu nipangakumiu Alatala nisombamiu, 55nau komiu ledo nosisani ante Ia. Tapi Yaku nosisani belo ante Ia. Ane rapana Kuuli Yaku ledo nosisani ante Ia, tantu Yaku majadi topodava nasimbayu mpo komiu. Tapi Yaku mpuu-mpuu nosisani ante Ia bo Yaku natutu nangoseaka tesaNa. 56Totuamiu nggaulu i Abraham, nadamba mpuu rarana sabana nisanina rakitana Yaku makava. Nikitanamo bo nadamba mpuumo rarana.”

57Nanguli vaimo toYahudi, “Ba! Iko tu dopa rakavana lima-pulu mpae umuruMu! Berimba sampe Iko nanguli nikitaMumo i Abraham, totua kami nggaulu?”

58Nesanamo i Yesus, “Pariaramo tesaKu. Dopame i Abraham nipoanaka, naria mamimo Yaku!”#8:58 Naria mamimo Yaku ATAU: “Yaku Naria”: Riara basa Ibrani “YAKU NARIA” sanga nu Alatala. Peinta Pesuvu 3:14. Ane nanguli ivesia, i Yesus nompakalanto Ia nasimbayu nte Alatala. Jadi toYahudi madota mombarempe Ia ante vatu sabana nipakasimbayuNa karoNa ante Alatala.

59Nangepe tesa i Yesus haitu, nangala vatumo toYahudi mombarempe Ia. Tapi Ia netinggalipo lako ri tatangara bo nalai lako ri Banua nu Alatala haitu.

Currently Selected:

Yohanes 8: TLEDOV

Highlight

Copy