Esai 26
26
Bơta đơs chò jòng ro pha lin cau Juda
1Tòm ngai hơ̆, bơta đơs chò do rơp geh đơs tòm ù tiah Juda dê:
“Bol he gơs ƀòn dờng pràn kơldang;
Kơnràñ bơtào bơta pha lin
be ală dơrñang mơ ală dơrñang ƀòn dờng dê.
2Pò tĕ ală mpồng ƀòn dờng
nàng làng bol song ring
la làng bol prap gàr bơta dòn rgơi mut tềng hơ̆.
3Ală cau kơ̆ nùs
Yàng rơp prap gàr tòm bơta lơngap lơngai,
tài bơh khai dòn kơnòm di Kơnràñ.
4Dòn kơnòm tĕ di Yàng Jehôwa jơl sùm sùm,
bơh tòm Yàng Jehôwa, să tòm Yàng Jehôwa
la Pơnai Lŭ Klềr gam sùm sùm dê.
5Bơh Kơnràñ neh tơmù ală cau ơm tòm tiah jơnhoa;
ƀòn dờng jơnhoa Kơnràñ tơmù liah.
Kơnràñ tơmù gơ liah tus tòm ù
mơ sang gơtòm thul ơmul.
6Ală jơng jă trơm gơ,
ală mpàng jơng ală cau rƀah lơòi dê,
ală cơnđòa cau siơ̆u siar dê.
7Gùng cau song ring la ring;
Ơ Bơtau song ring, Kơnràñ pơnring gùng cau song ring dê.
8Tòm gùng bơta cahrña Kơnràñ dê,
ơ Yàng Jehôwa, bol hi kơp gơn Kơnràñ;
Sơnđan Kơnràñ mơ bơta kirsơnre bơh Kơnràñ,
la bơta hwềng soàn bol hi hàm kòñ.
9Hwềng soàn añ kơp gơn Kơnràñ tòm trồ mang;
hwềng nùs tòm añ jơh nùs jòi jat Kơnràñ;
bơh tòm tŭ ală bơta cahrña Kơnràñ dê gam hơđang ù,
gen làng bol ơm tòm dunnia bơtê bơta song ring.
10Bulah bơta nđàc geh yal tơlik cau iơh bơsak in,
bol khai kung ò bơtê bơta song ring;
bulah tòm lơgar bơta song ring,
bol khai kư̆ dờng nùs,
mơ ò sền gŏ bơta ryŭ ryơm Yàng Jehôwa dê.
11 #
Heb 10:27. Ơ Yàng Jehôwa, tê Kơnràñ neh pò hơđang,
mơ bol khai ò sền gŏ gơ.
Lòi bol khai in gŏ nùs ngac ngar Kơnràñ dê bơh làng bol Kơnràñ dê mơ rơp ƀàssìl;
Lòi ồs chu pơrguc cau sò tơm bol khai.
12Ơ Yàng Jehôwa, Kơnràñ rơndap nền bơta ring lơngai bol hi in;
jơh ală broă bol hi lơh gơs, Kơnràñ neh lơh bol hi in.
13Khoai Yàng Jehôwa la Yàng Tom Trồ bol hi dê,
gơs ală yàng ndai rlau mơ Kơnràñ at bồ bol hi,
mơya bol hi mìng git wă sơnđan Kơnràñ lơm.
14Cau chơt ò rgơi kis tai,
ală hwềng neh chơt ò guh tai.
Tài bơh Kơnràñ neh lơh glài mơ tơnroh bol khai;
Kơnràñ neh jùt jơh bơta kirsơnre bol khai dê,
15Mơya Kơnràñ neh bơtơl lơgar, ơ Yàng Jehôwa,
Yàng neh bơtơl làng bol,
bơta gơklŏ gơrê hơ Kơnràñ,
Kơnràñ neh pò ơnàng jơh ală nhàr lơgar dê.
16Ơ Yàng Jehôwa, tòm bơta bòl glar,
bol khai jòi Kơnràñ.
Bol khai tuh tơlik dô bơta hòi dan,
tòm tŭ Kơnràñ lơh glài tơmàl bol khai.#26:16 ò git loh jơnau gơtha sèng do tòm jơnau tòm.
17Be dô nă cau ùr bun mòr deh,
jê sồt mơ nggà ñìm jê deh tòm tŭ di di tŭ khai dê.
18Bol hi neh bun, mơ jê deh;
mơya bol hi neh deh càl,
bol hi neh ò cèng bơta pha lin rlau plai ù in;
mơ ò deh làng bol ơm tòm dunnia.
19 #
Dan 12:2. Ală cau chơt Kơnràñ dê rơp kis,
ală ƀồc#26:19 Js: Ală ƀồc añ jê. bol khai dê rơp guh!
Bol mê la cau ơm tòm thul,
kah rngal mơ đơs chò bơta hòn chò in.
Bơh dà tŭ Kơnràñ dê la be dà tŭ rìng àng drim;
plai ù rơp deh ală cau chơt gơ dê.
20Ơ làng bol Añ jê, mut tĕ tòm ơdŭ bol mê dê
mơ til mpồng wơl;
Pồn tĕ să bol mê tòm dô ơthoa,
jơl tus di tŭ bơta gơjrañ dờng neh rlau.
21Bơh Yàng Jehôwa lik bơh di tiah Kơnràñ dê
nàng lơh glài làng bol hơđang plai ù bơh tồi glài bol khai dê.
Plai ù rơp ràng tơlik mhàm neh tuh hơđang gơ;
mơ rơp ò gam jơm ndơp tai ală cau neh kòl tơnchơt gơ dê.
Currently Selected:
Esai 26: KPM2018
Highlight
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.
