Sơnròp Gơlik Gơs 47

Jakôp mơ ală kòn klau khai dê lòt tòm mat mơ Pharaôn. Bol khai ơm tòm lơgar Gôsen

1Jôsep yal jơh ală bơta hơ̆ Pharaôn in git mơ đơs lah: “Bèp mơ oh mi añ jê neh tus bơh lơgar Kanaan. Bol khai neh cèng ală mpồl belàt, kơnrồ bal mơ ală phan mơna bol khai dê. Tŭ do bol khai ơm tòm lơgar Gôsen.” 2Gen khai lam pram nă tòm ală oh mi khai nàng tòm mat mơ Pharaôn. 3Pharaôn lùp bol khai lah: “Ñchi broă bol mê lơh taih?” Bol khai ho lah: “Ală cau dĭ gơna kơnràñ dê la cau ê belàt kung be mò pàng bol hi dê.” 4Mơ bol khai đơs tai lah: “Ală cau dĭ gơna kơnràñ neh tus nàng ơm tòp tòm lơgar bơh bơta jơgloh rung dờng ngan tòm lơgar Kanaan tian gơs ò gơs ñhơt tòm ƀlàng nàng ală mpồl phan poan jơng in sa. Behơ̆ dan ai ală cau dĭ gơna kơnràñ in ơm tòm lơgar Gôsen.”

5Pharaôn đơs mơ Jôsep be do: “Bèp mơ oh mi mê dê neh tus mơ mê; 6lơgar Ejiptơ la di đap mê. Ai bèp mơ oh mi mê dê ơm tĕ tòm tiah lơi niam rlau jơh tòm lơgar, ai bol khai ơm tĕ tòm lơgar Gôsen. Mơ dilah tòm ală bol hơ̆ mê git cau lơi rgơi, gen sồr tĕ bol khai ê ală mpồl phan poan jơng añ jê.”

7Gen Jôsep lam Jakôp bèp khai dê tus tòm mat mơ Pharaôn. Jakôp ai lơngai Pharaôn in. 8Pharaôn lùp Jakôp lah: “Mê neh kis nđò nam rau taih?” 9Jakôp ho lah: “Ală nam añ kis ing tòm dunnia do la dô rhiang pe jơt nam. Ală nam rài kis añ jê la liah mơ bòl glar lơm, ò di be ală nam mò pàng añ jê tòm tŭ bol khai kis tòm dunnia do.” 10Jakôp ai lơngai Pharaôn in dô dơ̆ tai, lồc behơ̆ lik lòt bơh di đap khai.

11Behơ̆ Jôsep lơh jat jơnau sồr Pharaôn, ai bèp mơ oh mi khai dê ơm tòm lơgar Ejiptơ, mơ ai bol khai in dô bă ù niam rlau jơh, tòm kơnhwàl lơgar Rameses, nàng lơh gơs sre brê bol khai dê. 12Jôsep ai phan sa bèp khai in, oh mi mơ hìu nhă bèp khai in jat be khà cau bol khai dê.

Bơta at bồ Jôsep dê

13Mơ bơta jơgloh rung la dờng ngan tian gơs jơh tòm lơgar ò gơs kòi phe tai, lơgar Ejiptơ mơ lơgar Kanaan tồc lồi bơh bơta jơgloh rung hơ̆. 14Jôsep khòm jơh jền priă tòm lơgar Ejiptơ mơ lơgar Kanaan, hơ̆ la ală jền priă làng bol pơl kòi. Lồc behơ̆ prap priă hơ̆ tòm đam Pharaôn dê. 15Tòm tŭ jền priă tòm lơgar Ejiptơ mơ lơgar Kanaan neh jơh, gen jơh làng bol Ejiptơ tus hơ Jôsep mơ đơs lah: “Dan ai bol hi in kòi phe, ñchi bơh tài bol hi pal chơt di đap kơnràñ, tài bơh jền priă bol hi dê neh jơh ơ?” 16Jôsep đơs lah: “Dilah jơh jền priă rau, ai tĕ phan poan jơng bol mê dê, gen añ rơp tòmgơl mơ kòi phe.” 17Chòp làng bol lam ală phan poan jơng ai Jôsep in; Jôsep ai kòi phe tòmgơl mơ ơseh, mpồl belàt, mpồl kơnrồ mơ alàng. Nam hơ̆ khai khòm jơh ală phan poan jơng bol hơ̆ dê, tòmgơl mơ kòi phe.

18Lồi nam hơ̆, mut nam tơnơ̆ làng bol tus đơs mơ khai lah: “Bol hi ò pồn bơta lơi mơ kơnràñ: jền priă jơh hir, ală mpồl phan poan jơng neh hi ai kơnràñ in rau, tŭ do gam mìng să jan bol hi mơ sre brê bol hi dê lơm. 19Mbe lơh bol hi mơ sre brê hi dê lòi srau gòi di đap kơnràñ taih? Ai tĕ kòi phe nàng tòmgơl mơ să bol hi bal mơ sre brê bol hi dê. Behơ̆ bol hi mơ sre brê hi dê rơp gơs dĭ gơna Pharaôn in. Ai tĕ bol hi in gar sơntìl nàng sih tồ bol hi in kis mơ ò chơt, mơ ù tiah ò sang lềng.” 20Gen Jôsep blơi jơh ală sre brê tòm lơgar Ejiptơ Pharaôn in, tài bơh bơta jơgloh rung rềt gen kòp nă cau tòm lơgar Ejiptơ tac sre khai dê. Behơ̆, jơh sre brê gơrê mơ Pharaôn. 21Ai làng bol bơh bồ lơgar tus hơ jơng lơgar Ejiptơ, khai kup lơh gơs dĭ gơna.#47:21 Js: Khai cèng bol khai rê ơm tòm ală ƀòn. 22Mìng sre brê ală cau gơnoar ơn phan duh khoai dê gen Jôsep ò blơi, bơh ală cau gơnoar ơn phan duh khoai neh dòp geh dô pơnah Pharaôn neh lơh nền, mơ bol hơ̆ sa pơnah Pharaôn neh ai bol khai in, gen tàng bol hơ̆ ò tac sre brê bol khai dê.

23Jôsep đơs mơ làng bol lah: “Do, añ neh blơi bol mê bal mơ sre brê bol mê dê Pharaôn in; do la gar sơntìl ală bol mê in nàng sih tòm sre. 24Tus di kơnhai toès, bol mê pal boh dia wơl Pharaôn in dô pơnah pram, ai poan pơnah ne lòi mê in nàng lơh gar sơntìl tồ bol mê in ngui sa mơ hìu nhă bal mơ ală kòn dềt bol mê dê.” 25Làng bol đơs lah: “Kơnràñ neh dong bol hi in kis, dan bol hi in geh niam nùs kơnràñ, gen bol hi rơp lơh dĭ Pharaôn in.” 26Jôsep lơh dô bơta boh lam gam jơl tus di ngai do, hơ̆ la pal boh dia wơl Pharaôn in dô pơnah pram bơh phan gơlik bơh ù tòm Ejiptơ. Mìng sre brê ală cau gơnoar ơn phan duh khoai dê ò gơrê mơ Pharaôn.

Jakôp sồr Jôsep ho pơgon rơp tơp khai di tiah bơtô ƀồc ồng pàng

27Behơ̆, Israel ơm tòm lơgar Ejiptơ, tòm kơnhwàl Gôsen, lơh gơs sre brê tòm tềng hơ̆, gơlik cồng nha rơ̆sơmpài ràipơjềng.

28Jakôp ơm tòm lơgar Ejiptơ jơt poh nam. Behơ̆ khai kis dô rhiang poan jơt poh nam. 29#Sơnròp 49:29-32; 50:6.Mòr tus dê tŭ Israel chơt, khai hòi Jôsep kòn klau khai dê mơ đơs lah: “Dilah añ geh bơta nđàc di đap mê dan ơn tĕ tê dê bơnô añ,#47:29 Sền jơnau yal tơlik tòm 24:2. dan dòn song mơ lơh niam tòm toh be jơnau añ, dan bañ tơp añ tòm ù Ejiptơ. 30Tŭ añ bic bal mơ mò pàng añ rau, cèng tĕ añ bơh Ejiptơ mơ tơp añ tòm tiah bơtô ƀồc mò pàng añ jê.” Jôsep ho lah: “Añ rơp lơh jat be jơnau bèp sồr.” 31Jakôp đơs lah: “Mê srat să tĕ,” gen Jôsep ho pơgon. Chòp Israel tơmbic să di bồ cơnòng bic khai dê.

Currently Selected:

Sơnròp Gơlik Gơs 47: KPM2018

Highlight

Copy