Sơnròp Gơlik Gơs 46

Yàng Tom Trồ tơlik mat mơ Jakôp

1Israel lik lòt, cèng bal ală phan mơna khai dê. Khai tus hơ Beerseba mơ ơn phan duh khoai Yàng Tom Trồ Isak bèp khai dê. 2Tòm bơta gơtơnggŏ tòm trồ mang, Yàng Tom Trồ đơs mơ Israel lah: “Ơ Jakôp! Jakôp!” Israel ho lah: “Do añ.” 3Yàng Tom Trồ đơs lah: “Añ la Yàng Tom Trồ bèp mê dê. Mù tĕ hơ Ejiptơ, bañ rngòt bơh tềng hơ̆ Añ rơp lơh mê in gơlik gơs dô nơm làng bol dờng. 4Să tòm Añ rơp mù hơ Ejiptơ bal mơ mê, mơ kung să tòm Añ rơp lam mê rê wơl mơ Jôsep rơp tơñềm mat mê.”

Jakôp mù hơ lơgar Ejiptơ

5Jakôp ñă lòt bơh Beerseba, ală kòn klau Israel tơnhào Jakôp bèp bol khai bal mơ ală kòn bau bol khai dê, hào tòm rơndeh Pharaôn neh pơyoa nàng rò khai. 6#Broă 7:15.Bol khai kung cèng bal ală phan poan jơng mơ phan mơna bol khai neh tơnggơs tòm lơgar Kanaan. 7Behơ̆, Jakôp mơ jơh hìu nhă, ală kòn klau, ală sau klau, ală kòn ùr, ală sau ùr mù jơh hơ lơgar Ejiptơ.

Hìu nhă Jakôp dê

8Do la sơnđan ală kòn klau Israel dê, mù hơ lơgar Ejiptơ:

Jakôp mơ ală kòn klau khai dê, kòn tơnhoa Jakôp dê la Ruben. 9Ală kòn klau Ruben dê la Henok, Phalu, Hesrôn, mơ Karmi

10Ală kòn klau Simeôn dê la Jemuel, Jamin, Ohat Jakin, mơ Sôhar, mơ Sol, hơ̆ la kòn bau ùr cau Kanaan dê.

11Ală kòn klau Lebi dê la:

Gersôn, Kôhat, mơ Merari.

12Ală kòn klau Juda dê la Er, Ônan, Sela, Pheres mơ Serah. Mơya Er mơ Ônan neh chơt tòm lơgar Kanaan.

Kòn Pheres dê la:

Hesrôn mơ Hamul.

13Ală kòn klau Issaka dê la:

Thôla, Phuba, Jop, mơ Simrôn.

14Ală kòn klau Jebulun dê la:

Seret, Elôn, mơ Jahleel.

15Hơ̆ la ală kòn klau mơ dô nă kòn ùr sơnđan la Dina mơ Lea neh deh Jakôp in tòm tŭ ơm tòm Padan Aram. Jơh ală kòn klau kòn ùr Jakôp dê la pe jơt pe nă.

16Ală kòn klau Gat dê la:

Jiphiôn, Hagi, Suni, Esbôn, Eri, Arôdi, mơ Areli.

17Ală kòn klau Aser dê la:

Imna, Isba, Isbi mơ Beriah bal mơ Serah,

Oh ùr bol hơ̆.

Ală kòn klau Beria dê la:

Heber mơ Malkiel.

18Hơ̆ la ală kòn klau Silpa neh deh Jakôp in, dĭ Laban neh ai Lea kòn ùr khai in. Jơh ală cau hơ̆ la jơt prau nă.

19Ală kòn klau Racel bau Jakôp dê la:

Jôsep mơ Benjamin. 20#Sơnròp 41:50-52.Jôsep neh gơs kòn klau tòm Ejiptơ la Manase mơ Epraim, mơ Asenat, kòn ùr Pôtiphera, cau gơnoar ơn phan duh khoai ƀòn Ôn dê, neh deh khai in.

21Ală kòn klau Benjamin dê la:

Bela, Beker, Asbel, Gera, Naaman, Ehi, Rôs, Muppim, Huppim, mơ Ardơ.

22Hơ̆ la ală kòn klau Racel neh deh Jakôp in. Jơh ală cau hơ̆ la jơt poan nă.

23Kòn klau Dan dê la:

Husim.

24Ală kòn klau Neptali dê la:

Jajeel, Guni, Jejer mơ Sillem.

25Hơ̆ la ală kòn klau Bilha neh deh Jakôp in, dĭ Laban neh ai Racel kòn ùr khai in. Jơh ală cau hơ̆ la poh nă.

26Ală cau lòt tus hơ lơgar Ejiptơ bal mơ Jakôp, hơ̆ la ală cau tơnggơs bơh Jakôp, ò kòp ală ƀan khai dê gen jơh ală cau hơ̆ la prau jơt prau nă. 27#Broă 7:14.Kòn Jôsep neh tơnggơs tòm Ejiptơ la bàr nă. Behơ̆ jơh ală cau bal mơ hìu nhă Jakôp lòt tus hơ Ejiptơ la poh jơt nă.

Jôsep wă rò bèp khai dê

28Jakôp sồr Juda lòt tus lài nàng dan Jôsep sơnio gùng lòt hơ Gôsen. Behơ̆ bol khai mut tòm tiah Gôsen. 29Jôsep rcang kơt rơndeh ơseh hào lòt hơ Gôsen nàng tìp Israel bèp khai dê. Khai tòmtìp mơ bèp khai, koar mơ ñìm dô êt jŏ. 30Israel đơs mơ Jôsep lah: “Tŭ do añ chơt di sơl tài bơh añ neh gŏ mat mê rau, mơ git mê gam kis.”

31Gen, Jôsep đơs mơ oh mi mơ hìu nhă bèp khai dê lah: “Añ rơp yal Pharaôn in git lah oh mi mơ jơh hìu nhă bèp añ jê bơh lơgar Kanaan neh tus mơ añ rau. 32Bol khai la cau ê belàt, ròng phan poan jơng, mơ bol khai neh lam jơh mpồl belàt kơnrồ mơ jơh ală phan bol khai dê. 33Mơ tŭ lơi Pharaôn hòi bol mê mơ lùp lah: ‘Ñchi broă ală bol mê lơh taih?’ 34gen yal tĕ: ‘Ală cau dĭ kơnràñ dê bal mơ mò pàng bol hi dê neh ròng phan poan jơng bơh kơnòm jơl tus di ngai do.’ Nàng oh mi in geh ơm wơl tòm tiah Gôsen, tài bơh jơh ală cau ê belàt la ngkòr ngkàc di đap làng bol Ejiptơ.”

Currently Selected:

Sơnròp Gơlik Gơs 46: KPM2018

Highlight

Copy