Markus 13
13
Yesu wa Zu̱ Pooni Gu̱ɗar nu̱ke a ma gwa Rafti ɓu̱ Maghamang
(Mat 24:1-2; Luk 21:5-6)
1Yesu a viri ɓar mbu̱ Rafti ɓu̱ Maghamang, tu̱ da chele ɓu̱ nu̱ mburindakwang ze nda za, “Maalu̱m, no poona ndogdi ku ndu̱ mbari du̱ndi nu̱ke a fan ka!”
2Tu̱ Yesu tlogha yenda za, “Ta na du̱ndi gwaanji gwaanji ku na de? Aa da ndooga nje ɗyin mu̱dlen, nu̱ke ɓu̱ ɓa tu̱pa nu̱ yaghai ɓa.”
Nggarsi Bonye
(Mat 24:3-14; 21:7-19)
3Nu̱ Yesu khaki gha ɗyine Dleng qu̱far Zaitun nu̱ke a nggu̱t Rafti ɓu̱ Maghamang, tu̱ Biturus ndu̱ Yaqub ndu̱ Yokhana ndu̱ Andu̱rawus zham nda mbu̱ tuka za, 4“Zu̱ sarchi nu̱ke ɗyiku nang ka ɓa shiki yerem! Mbu̱ ɗyikunang a ma ɗaatli, chem ka nan ve nu̱ ma?”
5Tu̱ Yesu tlogha ye wor za, ku̱r ma vaanu, ku̱me ku̱ njif nggur lamba nu̱ ɓa. 6Ku̱me nduki khang kaɗa ɓa ku mbu̱ dlu̱ma, a zu̱ran ku za, “Nga ke Masiya yang ka lamba nduki ku khang.”
7Mbu̱ tun wa tu̱k labar dakhlar ku bing ndu̱ nu̱ ɓakh ndu̱ tunu, damta nu ɓa, ku̱me wa ku̱s ku̱ ɗyikunang shi, yang nang ke lauɗar san dong ɓa. 8Ghai kaa nggu̱ɗ nu̱ ve ghai ndu̱ dakhlari tu̱ kwaaɗa, nggu̱ɗ nu̱ ve kwaaɗa, kaa shi yakhtar ma vu̱ ghai ye maa ku zum zum, ka shi meeri ndu̱ damtarku zum zum, yang nang ke nggarsi bonyang.
9Tun ku̱r vaanu, ku̱me kaa ɗu̱ ndu̱ tun gume kumari, ndu̱ gume maa tabar ɓaanda tu̱ shi dlabti ye nu. Kaa ɗu̱ ndu̱ tun gume gorkirku ɓaanda ndu̱ kujiku ɓaanda, ku̱me Nga, yang tun kaa gwa zalale tun zu̱ labar mbarkandang ye wora. 10Yang tu̱k, wa ku̱s ku̱ aa nyi ghai tu̱k labar mbarkandang kom tu̱ lauɗarsi aa nu̱ma ɓa. 11Mbu̱ wa ɗu̱ ndu̱ tunu gume kumari, damta nu ndu̱ koori ɗyi nu̱ke tun ka zu̱ki ye wor ɓa, zu̱ma kya ba ɗyina ɓa ki ye nu sarchi kumarang, ku̱me tun kya ɓalarang ɓa, ɗya Jiimbi Shakhshakhndi.
12Ku̱me khachinki kaa vu̱r khachin ɓara, maa ku̱ tlagha nda nu̱ gha, Zhinki yang kaa vu̱r woi ɓaran ɓara, qusonggi kaa vu̱r zhin wor ndu̱ man wor ɓar maa ku̱ tlagha wora. 13Aaki kaa zhangndonu ku̱me dlu̱ma. Yang kap njif nu̱ shiki kaɗanyi ma yir ve lauɗaran, kaa ɗanaki.
Bonye Malkandi Maɗyi
(Mat 24:15-28; Luk 21:20-24)
14Yang mbu̱ tun wa na tlu̱nar malkandi nu̱ke ɗya ɗye zhaane nu̱ka ɓa ki ndu̱ gu̱ɗari, chingndan ye maa nu̱ke nu̱ shipa ɓa, (nu̱ nggu̱ti ye chiti nang ku̱ da mban). Njif nu̱ke a Yakhudiya ku̱ ɗan mbu̱ dlengkwang. 15Yang njif nu̱ke a ɗyin kiba ku̱ ɗa zhur nu̱ yaghai, ma da ɗyi nggur mbu̱ rafti ɓaran ɓa. 16Ku̱ njif nu̱ke a mbu̱ dam ɓaran a gaɓ nu̱ kaari maa da lukti ɓaran ɓa. 17Yang nusuku nu̱ ghu̱rɓandi ndu̱ nusuku nu̱ke a vu̱r ɓiɓi ye qusonggi ɓaanda, ɗya ɗye zhiyaye maɗyi ye fu̱ɗar nang ndang. 18Tun shi barar tu̱k ma ku̱ ɗyikunang ɗal me mbiti ɓa.
19Ku̱me nduki ka za bonye nu̱ke ma nu̱ Magham shiki larji, ma ɓar meeni, nu̱ nduk za pooni bonye nang sar da ɓa. Yang tu̱k poonan ɓu̱ ɗal ɓa. 20Mbu̱ Magham kataki qaandi virkir bonyang nu̱ gha ɓa, tu̱ga nduka nje nu̱ke ka ɗanaki ɓa. Yang wa kata nu̱ gha ku̱me daatiku ɓaran. 21“Ye sarchi ni mbu̱ aaki wa zu̱ za, ‘Nggu̱ɗu, wonji Masiya fan,’ aa zu̱ yor za, ‘A nje fara,’ maita nu nda ɓa. 22Ku̱me Masiye nu̱ kotame ku ndu̱ annabi kotame ku ka ɗa viiku, kaa wut ɗye saidu ku, ndu̱ ɗye lazham ku, ma lamba nduki, mbu̱ ka ɗu̱ma ku tu̱ga ka lamba aa nduki datkandikwang. 23Yang kha ma daasaran ɗo, ku̱me nga zu̱ aa nu̱m ye nun gha, kaabu ku̱ sarchi nang shi.”
Gaɓti ɓu̱ Yi ɓu̱ Nduku
(Mat 24:29-31; Luk 21:25-28)
24Yang ba mbu̱ qaandiku nang ndang gaanje bonye nu̱ke a ɓarang,
ka sa fu̱ɗarang tu̱ shi zhum,
tu̱ chere zhang wuɗ yarang ɓaran gha.
25Anjinje ku̱ nu̱ viɗi kaɗa nggu̱ɗi,
ka yakhta ɗyi gwaanji gwaanji ku
mbu̱ viɗi.
26Kom nduki ka na Yi ɓu̱ Nduk a ɓar mbu̱ ku̱zapti ndu̱ zalale gwaanji ndu̱ zhaaji. 27Yang ka ru̱k nu̱ ru̱ktiku ɓaran ta kanggu̱la daatiku ɓaran nu̱ ye maa da. Ji ɗyin daatiku nu̱ke a ɗokhatla, ma yir mugu, kom ndu̱ nu̱ke a kona maa yir zan. Ji ɗyin tleebi larji nang ma yir tleebi larji nang ndang.
Shogar ɗyine Qu̱far Sugari.
(Mat 24:32-35; Luk 21:29-33)
28Shoga ma ɗyi nggur ve qu̱far sugar ɓa, ba mbu̱ bu̱n qu̱fara wa nggasi nggooti a zha dlu̱mndi, mewakandi tun wa zu̱n za nomandi wa shi bing. 29Wanang tu̱k mbu̱ tun wa na ɗyikunang a shiri tun zu̱n za sarchi gaɓti wa shi bing, a me viri. 30Zhire nga zu̱ran ye nu, nduki nu̱ qaandi virkir nu̱ naki ɗyikunang, ɓu̱ mu̱ɗ ku ɓa kope ɗyikunang wa nyel kap. 31Maa viɗi ndu̱ maa yaghai ka woɗa, yang ɓalar ɓang ɓu̱ woɗa aa koɗom ɓa.
Nduka nje nu̱ Zu̱nki Fu̱ɗar ɓar ɓu̱ Masiya ɓa
(Mat 24:36-44; Luk 17:26-30, 34-36)
32Yang ɓu̱ fu̱ɗar ndu̱ sarchi nu̱ke ɗyikunang ka shiki nduka nje nu̱ zu̱nki ɓa. Aa nu̱ ru̱ktiku ɓu̱ Magham nu̱ke a viɗi nu̱ zu̱n ku ɓa, aa Yi ɓu̱ Nduk nu̱ zu̱n ɓa, kope Zhinkirang ɗyenda. 33Shi ma nggu̱ti, tun shi buuri su̱yen ndu̱ barari ku̱me nun zu̱n sarchi nang ɓa. 34Ɗyen wa shipa khuski nu̱ njigki rafti ɓaran tu̱ ɗu̱ mbu̱ ghai nggur ɓakh, tu̱ yang njig zalale aa nu̱m kap nu̱ mbu̱ khar maaviku ɓaran. Tu̱ vu̱r tlu̱nar ɓu̱ aaki yenda, tu̱ ze nu̱ bu me raftang za ku̱ nggu̱t raftang yenda nu̱ gha mbari.
35Daasa ma vaanu nu̱ gha ɗo. Ku̱me nun zu̱n sarchi nu̱ke nu̱ raftang kaɗa gaɓki ɓa, bai kaɗa ɓa ku̱ mugdi, bai chele virkiri, bai sarchi nu̱ke koogurokh a mbaari, yang bai nu̱ dumaari gom. 36Ku̱ ɗa ɓa ku̱ ruuma nu tu̱ gwa nu tun a ɗyenir ɓa. 37Ɗyi nu̱ke ngaa zu̱ran ye nu nang, nga zu̱kya ye aaki, daasa ma vaanu nu̱ gha!
Currently Selected:
Markus 13: ttrNT
Highlight
Share
Copy
Want to have your highlights saved across all your devices? Sign up or sign in
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
