Markus 12

Ku̱rti Ɓalar ɗyine nu̱ Ghutiku nu̱ Dlu̱ki Dam Anap

(Mat 21:33-46; Luk 20:9-19)

1Yang ɗo, tu̱ Yesu zu̱m guma ndu̱ ɓalarang tu̱ zu̱ ku̱rti ɓalar nggur ye wora. A za, “Khuski nggur a nje nu̱ kaɓki dam anap tu̱ karan gha ndu̱ garki. Tu̱ ra ge ɗyooti ɗyim anapang, tu̱ shi gaare kirkandi maa bu damang. Tu̱ vu̱r tlu̱nar nggu̱ti damang ye nu̱ ghutiku nggur tu̱ ɗu̱ varan mbu̱ ghai nggur ɓakh ta kha gha nje. 2Nu̱ sarchi khar ɓu̱ anapang shiki, tu̱ nu̱ damang ru̱k maavi ɓaran ku̱ ɗa dlu̱ ye qu̱far anapang yenda. 3Tu̱ nu̱ ghutikwang ku̱si nda tu̱ shi dlabti yenda ku, tu̱ komba nda kharan rap.”

4“Tu̱ nu̱ damang ru̱k maavi nggur tu̱k nu̱ she nu̱ ghutikwang. Tu̱ ruɓa nda ve ɗyinan, nu̱ vu̱rki palase yenda ku tu̱ komba nda ku tu̱ wut katar yenda. 5Tu̱ ru̱k maavi nggur tu̱k, tu̱ nu̱ ghutikwang tlagha nda nu̱ gha. Gaanje nang tu̱ ru̱k maaviku khang, yang tu̱ dlab ɓeenan, tu̱ tlagha ɓeenan nu̱gha.”

6Tu̱ yang njig kya woi ɓaran da ketenggu̱leng, yang a ndola woi na maɗyi. Tu̱ nu̱ damang ru̱k woi nang gaandan, a zu̱ran za, Ai, ka na zhaaji ɓu̱ woi ɓang ku.

7“Yang nu̱ na zhaaji ɓu̱ woyang ku ɓa tu̱ nu̱ ghutiku nang shi ɓalar chele ɓaanda za, ‘Nang ke njif nu̱ke damang ka ɓa khaki ma ɓaran, nu̱ke wanang, tlagha mi nda nu̱ gha ma ku̱ damang kha ma ɓaarem.’ 8Tu̱ ku̱s woyang ku tu̱ tlagha nda nu̱ gha, tu̱ mbuk nda nu̱ gaanje karar damang.”

9Yang ɗa, nu̱ dam nang kaa shi kya nu̱m ye nu̱ ghutiku nang na? Kaɗa ɓa tu̱ tlagha nu̱ ghutiku nang nu̱gha kom tu̱ vu̱r damang ye nduki ngguri. 10Alapa, nun nggu̱t ye chiti ɓalar ɓu̱ Maghamang ɓa goma? A nje bu̱laran za,

“Ndogdi ni nu̱ du̱ndikwang

zhangki gha,

chin gaɓki ma ndogdi nu̱ dukki

aa nyi ndooga boote mbu̱ du̱ndang.”

11Nang ɗya shir ɓu̱ Magham,

yang ɗya ɗye lazham yerem.

12Tu̱ dle gume ɓu̱ Yakhudekwang laɓ njiv nu̱ke wor ka ku̱s ki nda, ku̱me wa zu̱n ku za a ku̱r ɓalarang nu̱ ve wora, tu̱ yang tu̱k sawar ɓu̱ ndukikwang tu̱ njig nda ku tu̱ ɗu̱ vaanda.

Zhamndi ɗyine Vu̱rti Zhaanggal ye Kuji Kaisar

(Mat 22:15-22; Luk 20:20-26)

13A nje a nje, ta ru̱k Pariseku nggur ndu̱ nduki ɓu̱ Kuji Khiridus ma ku̱ ku̱s nda ku ndu̱ ɓalar galkandi. 14Na khu̱lki ku, tu̱ qa nda ku za, “Maalu̱m, chem wa zu̱n za to nu̱ zu̱r zhire, ta da aaki wayen, ku̱me no damta ndu̱ nar yiti ɓa, ta ka shoga zhire ɓu̱ njiv ɓu̱ Magham ye nduki. Yang ɗa, wa shipa vu̱rmi zhaanggal ye Kuji Kaisar#12:14 Kuji Kaisar ke kuji Gwaanji nu̱ Roma. mu, yang auwo mu? 15Vu̱rmi yenda mu, yang vu̱rmi yenda ɓa mu?”

Yang ku̱me Yesu wa zu̱n mu̱nar ɓaanda, tu̱ ze wor za, “Nu̱m saki tun a shim lamba nga? A ɓa ma ndu̱ mu̱zhindi ye vi ya na nga.”

16Nu̱ ɗa ɓa ki si ku, tu̱ zham wor za, “Shipar ɓu̱ ki ndu̱ dlu̱m ki kya ɗyine mu̱zhindang na?”

Tu̱ tlogha ku za, “Ɗya ɓu̱ Kuji Kaisar.”

17Tu̱ Yesu ze wor za, “Vu̱r ma ɗyi ɓu̱ Kaisar ye Kuji Kaisar, ɗyi ɓu̱ Magham tun vu̱r ye Magham.”

Tu̱ shi lazham ku maɗyi.

Zhamndi ɗyine Jiiri mbe Mu̱ti

(Mat 22:23-33; Luk 20:27-40)

18Tu̱ Sadukeku nu̱ke nu̱ maita za mu̱tiku kaa ji fu̱ɗar wur ɓa, ta ba she Yesu. Tu̱ zham nda ku za, 19“Maalu̱m, Annabi Musa wa bu̱la yerem a za mbu̱ khachin nduk wa mu̱ɗi tu̱ njig nokhzan. Yang nu̱ kha woi ku ɓa, za ku̱ khachin mu̱tang ɓu̱r nokhzang ma ku̱ gwa woi ye mu̱tang. 20Yang khachinkirku nggur a nje wor mut yang da chele ɓaanda nu̱ke chin ke gori wa mu̱ɗi tu̱ njig nokhzan nu̱ kha woi ku ɓa. 21Tu̱ khachinkir nu̱ rapang, ɓu̱r tu̱k tu̱ mu̱ɗ nu̱ gwa woi ku ɓa, nu̱ kunungang tu̱k tu̱ ɓu̱r nu̱ gwa woi ɓa tu̱ mu̱ɗi. 22Nu̱ wanang nu̱ wanang, tu̱ khachinkirku mutndi nang ɓu̱r nokhzang ku kap yang aa da nu̱ kha woi ye wor ɓa. Ye lauɗar san tu̱ nokhzang tu̱k mu̱ɗi. 23Yang ɗa, fu̱ɗar jiiri mbe mu̱tang, ka kha kya ma nokhzi ki chele ɓaanda? Ku̱me wor mu̱t ndang kap wa ɓu̱r nokhzang.”

24Tu̱ Yesu tlogha ye wor za, “Tun a sagharang ku̱me song zu̱ndi lagarkatiku ndu̱ zalale ɓu̱ Magham de? 25Ai nduki nu̱ jiiki mbe mu̱ti nu̱ka shi ɓu̱rti ku ɓa, yang nu̱ka ɓu̱r wor ɓar zu̱m ɓa, ka gaɓ ku baa wa nu̱ ru̱ktiku ɓu̱ Magham nu̱ke a viɗi. 26Yang ɗyine ɓalar ɓu̱ jiiri mbe mu̱ti, alapa nun na mbu̱ lagarkati ɓu̱ Annabi Musa ye maa nu̱ Magham shiki ɓalar yenda mbu̱ gaarang de? Sarchi nu̱ke ɓaiyang ku̱ski loghzang, a za, ‘Nga ke Maghamndi ɓu̱ Yibram, ndu̱ Maghamndi ɓu̱ Yishaku, ndu̱ Maghamndi ɓu̱ Nyagham ɓa goma?’ 27Ai Magham ɗya Maghamndi ɓu̱ mu̱ti ku ɓa, ɗya Maghamndi ɓu̱ nu̱ nyifi ku, ku̱me nang, tun wa shi saghar malkandi!”

Wopar nu̱ Dukki Gwaari mbu̱ Tauretyang

(Mat 22:34-40; Luk 10:25-28)

28Tu̱ yang Maalu̱m Taurete nggur a ɓa, nu̱ tu̱kki za Yesu wa tlogha zham nda ye wor torop, tu̱ zham nda za, “Nyi wopa dukki gwaari mbu̱ Tauretyang na?”

29Tu̱ Yesu tlogha yenda za, Mbu̱ wopar Tauretyang kap, nu̱ gumapaali chin ke, “Qusa Israila tu̱k ma, Magham, Zhinerem gwaanji ke Magham ɗyenda. 30Yang ndolama Magham Zhinkir gwaanji ndu̱ memu̱na nu kap, ndu̱ nyifi ɓaanu kap, ndu̱ kwaari ɓaanu kap, kom ndu̱ du̱mbu̱r ɓaanu kap.”

Nang ke wopar nu̱ gumapaali. 31Nu̱ rapan ke, “Ndolama nu̱ bing ɓaanu wa vaanu.” Wopar Taurete nggur a nje nu̱ dukki nang ɓa.

32Tu̱ Maalu̱m Tauretyang tlogha za, “Maalu̱m ta tlogha torop, ku̱me Magham kaada, yang Maghamndang nje ɓa kope chin. 33Yang ndolami nda ndu̱ memu̱narem kap, ndu̱ kwaari ɓaarem kap, kom ndu̱ du̱mbu̱r ɓaarem kap. Yang tu̱k, ndolami nu̱ bing ɓaarem wa vaarem. Nang wa duk var dlu sadke ndu̱ dlar dlu laye ma sadkeku nang kap.”

34Nu̱ Yesu tu̱kki wa tlogha ɓalarang ndu̱ kaɗari, tu̱ ze nda za, “No ɗu̱ ɓakh ndu̱ kwaaɗar ɓu̱ Magham ɓa.” Gaanje nang, nduk a nje nu̱ gwaki du̱mbu̱r zhamndi yenda tu̱k ɓa.

Masiya ɗya Zhikankir ɓu̱ kiya?

(Mat 22:41-46; Luk 20:41-44)

35Tu̱ Yesu shi zhamndi sarchi nu̱ke a shogar mbu̱ Rafti ɓu̱ Maghamang za, nu̱m saki tu̱ Maalu̱m Taurete kwang ki qa Masiya za ɗya zhikan Annabi Dauda? 36Yang Dauda wa zu̱ ndu̱ men nu̱ ku̱nshe Jiimbi Shakhshakhndi za,

Magham wa ze Zhinkir ɓang gwaanji za,

“khon ve bu̱na nu̱ zu̱ma,

kope nga sa nu̱ zhangndi ɓaa ku,

tu̱ kha ma ɗye du̱ngndi saroro.”#12:36 Zhinkir gwaanji a ve Magham, Zhinerem gwaanji a ve Masiya.

37Nu̱ ke Annabi Dauda nu̱ ɗyinan wa qa nda za Zhinkir ɓaran Gwaanji, Masiya kaa kha ma Zhikan Dauda kikimnda?

Tu̱ tabar ndukyang tu̱k Yesu ndu̱ ɓong memu̱na ndu̱ ɗyine wor tu̱k kyang.

Yesu wa pota su̱ maalu̱m Taurete ku

(Mat 23:1-36; Luk 11:37-54; Luk 20:45-47)

38Tu̱ Yesu zu̱ mbu̱ shogar ɓaranang za, “Shakh ma ɗyinonu ndu̱ Maalu̱m Taurete ku. Wor nu̱ka shimki sa lukti gwaanji ku ma bara maari si. A shim ku̱ nduki shi wuse ye wor mbu̱ gomar ku. 39Wa ka shim maa khar nu̱ke zhaajya si mbu̱ kib tabar ɓu̱ Yakhudeku ndu̱ ye maa tabar zu̱mndi. 40Wor ke nu̱ dlu̱r ɗye var ɓu̱ nusuki nu̱ke zhime wor mu̱ɗki ɓara mbu̱ rafti ɓaanda. Wa ka shi barar kirkandiku ku̱me ku̱ nduki na wora. Ai kaa gwa kumar nu̱ dukki gu̱rgu̱ri.”

Vu̱rti nu̱ Ku̱du̱w Nokhzi nggur Shiki

(Luk 21:1-4)

41Tu̱ Yesu khan bing ndu̱ ye maa nu̱ke nduki ka saki vu̱rti ɓaanda mbu̱ kib ɓu̱ Maghamang. Tu̱ na ndukiku nu̱ kya sa mu̱zhindi ɓaanda nu̱ mbu̱ du̱ɓ zakyang. Tu̱ na nu̱ gu̱narku nu̱ saki mu̱zhindi khang nu mbu̱ maa tabar vu̱rtang tu̱k. 42Tu̱ yang na ku̱du̱w nokhzi ngguri nu̱ke nungndan, wa sa mu̱zhindi ye vi rap, nu̱ke nu̱ khu̱l kobo da ɓa.

43Tu̱ Yesu qa nu̱ mburi nda kwang, tu̱ ze wor za, “Zhire, nga zu̱ran ye nu, ku̱du̱w nokhzi nu̱ nungndi nang wa sa ɗyi nu̱ dukki ɓu̱ aa nyi nduk nu̱ saki mu̱zhindi ɓaran nu̱ mbu̱ du̱ɓ zakyang. 44Ku̱me kap ɓaanda shi vu̱rtang mbu̱ yele ɓaanda, yang nokhzi nang mbe nungndi ɓaran wa vu̱r kya ɗyi nu̱ke a kha nda ɓar kap aa nu̱ke nang ke ɗye khar viti ɓaran.”

Currently Selected:

Markus 12: ttrNT

Highlight

Copy