Markus 11
11
Yesu wa Vi nu̱ Urshalima nu̱ Zhaaji
(Mat 21:1-11; Luk 19:28-40; Ykh 12:12-17)
1Nu̱ khu̱lki ku bing ndu̱ Urshalima ku̱nshe ghai Betapaji ndu̱ Betani bing ndu̱ dleng qu̱far Zaitun tu̱ Yesu ru̱k nu̱ mburi nda ku rap. 2Tu̱ ze wor za, “Ɗu̱ ma mbu̱ gure nandang, tun a viiri nu̱ mbu̱ ghayang tun ka gwa ye Kooro nggur gu̱ndan nu̱ke sar da nduk nu̱ lu̱ba ɓa. A kolma nda tun a ɓasi ya. 3Aaki zhamki nu za, ‘Tun shi wanang ku̱me nu̱ma?’ Tun tlogha yenda nun za, ‘Zhinkir gwaanji kya shim ndan, yang ka ɗa gaɓsi fan ndu̱ fan.’ ”
4Nu̱ ɗu̱ki ku ta gwa ye koorwang gu̱ndan me viri nggur dam. A kol ye koorwang ku, 5tu̱ nduki nggur nu̱ke a nje chingndan ye maaran zham wor za, “Tun a kol ye koorwang nu̱gha ma nu̱ma?” 6Tu̱ tlogha ku ye ndukyang ba wa nu̱ Yesu zu̱ki ye worang. Tu̱ ndukyang njig wor tu̱ ɗu̱ ndu̱ koorwang. 7Nu̱ ɗa ɓa ki ndu̱ koorwang ye Yesu, tu̱ lu̱pa luktiku ɓaanda nu̱ ɗyinan, tu̱ Yesu dlan ɗyin koorwang. 8Tu̱ ndukiku khang tu̱k lu̱pa luktiku ɓaanda nu̱ ɗyin njivang tu̱ ɓeenan bakh dlu̱mndi qu̱farku mbu̱ damku, tu̱ san ɗyin njivang tu̱k. 9Tu̱ nduki nu̱ke a gume nda ndu̱ gaanje nda ki kopepe ndu̱ zhanare ku a zu̱ran za,
“Khosana! Njif nu̱ke a ɓar
mbu̱ dlu̱m Magham nang
ɗya nu̱ barka.
10Barke ye kwaaɗar
nu̱ke a ɓar ɓu̱ Zhinerem Dauda,
Khosana mbu̱ viɗi.”
11Nu̱ Yesu viki nu̱ Urshalima tu̱ vi nu̱ mbu̱ rafti ɓu̱ Magham. Nu̱ nggu̱tki ɗyi nu̱ke a ɗaatli kap, tu̱ yang gaɓ nu̱ Betani su̱yen ndu̱ gwaanggu̱m rapndang ku̱me mugdi wa shi lu̱s.
Yesu wa Mi Barke ɓu̱ Qu̱far Sugar ngguri
(Mat 21:18-19)
12Na jiiki ku Betani ɗaatlu̱maaran, tu̱ Yesu tu̱k meeri, 13Nu̱ naki qu̱far Sugar nggur ɓakh na zhaki dlu̱mndi mbarkandi. Tu̱ ɗu̱ she qu̱farang za bai chin ka gwa wa kha woi, yang nu̱ khu̱lki ta gwa qu̱farang nu̱ kha woi ɓa ku̱me sarchi khar woi ɓu̱ suga nu̱ shi dong ɓa. 14Tu̱ Yesu ze qu̱far sugarang za, “Gana fan nduk ɓu̱ nji woi ɓa tu̱k ɓa!”
Yang nu̱ mburindakwang wa tu̱k ɓalar nu̱ shikyang.
Yesu wa Nggu̱tl nu̱ Gomarku mbu̱ Rafti ɓu̱ Magham
(Mat 21:12-17; Luk 19:45-48; Ykh 2:13-22)
15Nu̱ ɗa khu̱lki ku Urshalima, tu̱ Yesu vi nu̱ mbu̱ dalang Rafti ɓu̱ Magham, tu̱ nggaasi komba nduki nu̱ke a masar ndu̱ masaran ɓar mbu̱ Rafti ɓu̱ Maghamang. Tu̱ tumbula du̱ku̱l ɓu̱ nduki nu̱ke a paata mu̱zhindi ku ndu̱ ɗye khar ɓu̱ nduki nu̱ke a masa mboole masar ɓara. 16Tu̱ nggu̱tl aaki dar ɗyi nggur maa peetar si mbu̱ dalang Rafti ɓu̱ Maghamang. 17Tu̱ shi shogar ye wor a zu̱ran za, A nje bu̱laran za,
“Ndukiku kap kaa qa rafti ɓang
rafti barari.”
Yang tun wa gaɓsi maa gulang ɓu̱ nu̱ muuriku.
18Nu̱ kuruku rututundi kwa ndu̱ Maalu̱m Taurete ku tu̱kki tu̱ nggasi laɓ njiv nu̱ke wor ka tlaghaki nda. Kha a sawa nda ku ku̱me ndukiku kap a lazham pooni shogar ɓaran.
19Nu̱ mugdi shiki tu̱ Yesu ndu̱ nu̱ mburi nda kwa vi bar mbu̱ ghayang.
Sugar nu̱ Yesu Miiki Barke ɓaranang wa Ghwaari
(Mat 21:20-22)
20A peetar ku nu̱ dumaari, tu̱ na qu̱far Sugarang wa ghwari ji ɗyin dlu̱dlarsan ma yir viɗi. 21Nu̱ Biturus korki tu̱ ze Yesu za, “Maalu̱m, nggu̱t qu̱far Sugar no miiki barke ɓaranang wa ghwar ɓara.”
22Tu̱ Yesu tlogha ye wor za, “Maita ma Magham. 23Ku̱me zhire ngaa zu̱ran ye nu, aaki zu̱ki ye dleng na za, ‘Ɓu̱ɗu, to ɗa nggu̱ɗ nu̱ mbu̱ ɗyim chitndi.’ Yang song maito a nje mbu̱ memu̱naran ɓa, ku̱me wa maita za ɗyi nyin zu̱kyang ka ɗaatli, ka gwa ɗyi nu̱ zu̱kyang. 24Ku̱me nang, nga zu̱ran ye nu, kap ɗyi nu̱ke tun a shimndan, mbu̱ tun wa khuɗi mbe barari, tun maita za tun wa gwa ɗyen, ku̱me tun ka gwa. 25Mbu̱ tun wa ji ma barari tun yaapa njif nu̱ke tun a shokhnar ndu̱ chin ma ku̱ Zhinonu nu̱ viɗi ku̱ yaapa solar ɓaanu ye nu tu̱k.”
26“Yang mbu̱ nun yaapa mu̱dlonu ɓa, Zhinonu nu̱ viɗi ɓu̱ yaapa solar ɓaanu ye nu tu̱k ɓa.”
Dle gume ɓu̱ Yakhudeku nu̱ Maita Zalale ɓu̱ Yesu ɓa
(Mat 21:23-27; Luk 20:1-8)
27Ta gaɓ ku nu̱ Urshalima tu̱k. A mbu̱ baara mbu̱ dalang garki Rafti ɓu̱ Maghamang, tu̱ kuru rututundi ku ndu̱ Maalu̱m Taurete ku ndu̱ dle gume ɓu̱ ndukyang a ɓa ku she nda. 28Tu̱ zham nda za, “Woɗye ta shi ɗyikunang ndu̱ nyi pooni zalalya? Ki vu̱rki zalale shir ɗyikunang yora?”
29Tu̱ Yesu tlogha ye wor za, “Bu shi nga zhamndi nggur ye nu, yang tlogha ma ya, kom tang zu̱ pooni zalale nang shiki boote si ma shi ɗyikunang. 30Woɗye zalale baptisme ɓu̱ Yokhana a ɓa she Magham mu, yang ɓu̱ nduku? Tlogha ma ya.”
31Tu̱ yang shi sawari ku chele ɓaanda a zu̱ran ku za, “Mbu̱ chem wa zu̱ za a ɓa she Magham kaa zhamnderem za yang nu̱m saki nyem maita nda ɓa? 32Yang chem ka ɗu̱ma zu̱ran za ɗya ɓu̱ nduk shoɗa?” Zu̱ wanang ku ku̱me a sawa ndukiku. Wa zu̱n ku za nduki kap wa maita za Yokhana ɗya annabi.
33Tu̱ yang tlogha ye Yesu za, “Nyem zu̱n ɓa.”
Tu̱ Yesu tlogha ye wor za, “Ngam ɓu̱ zu̱ pooni zalale nu̱ke nga boote si ma shi ɗyikunang ye nu zum ɓa.”
Currently Selected:
Markus 11: ttrNT
Highlight
Share
Copy
Want to have your highlights saved across all your devices? Sign up or sign in
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
