Markus 10
10
Shogar ɗyine Nggar Ɓu̱rti
(Mat 19:1-12; Luk 16:18)
1Tu̱ Yesu njig ye maarang, tu̱ ɗu̱ mbu̱ dlar maa ɓu̱ Yakhudiya ndu̱ maa nu̱ke a dam far ndu̱ Gaawu Urdun. Tu̱ nduki khang tu̱k taba nu̱ she nda, tu̱ nggasi shogar ye wor ba wa nu̱ su̱nki si.
2Yang tu̱ ɓeena pariseku a ɓa ma tu̱k men tu̱ zham nda ku za, “Shwat wa shipa ku̱ nduk ngga nokhzan gha mu?”
3Tu̱ tlogha ye wor za, “Annabi Musa zu̱kya nu̱m ye nwa?”
4Tu̱ tlogha ku za Musa wa zu̱ za bu̱lami lagarkati nggar ɓu̱rti chem ngga wor gha.
5Tu̱ Yesu tlogha ye wor tu̱k za, “Musa bu̱la bibiti nang ye nu ku̱me kaku̱ɗakh ɗyin ɓaanu. 6Yang mbe nggarsi shir larji, ‘Magham du̱ngkya khusku ndu̱ nusu.’ 7Nang ke ɗyi nu̱ saki mbe ɓu̱ri khuskyang kaa njig man ndu̱ zhin tu̱ gontan ve nokhzan, 8wor ku̱lmbu̱r kaa kha ma tun da, gana fan wor rapku tu̱k ɓa, ku̱me wa kha wa nduk da. 9Ku̱me nang ɗyi nu̱ Magham gontaki, ku̱ aaki shakh nu̱gha ɓa.”
10Nu̱ viki nu̱ mbu̱ raftang ku, tu̱ nu̱ mburindakwang gaɓ tu̱ zham nda ɗyine ɓalar nang tu̱k. 11Tu̱ tlogha ye wor za, “Kap njif nu̱ nggaki nokhzan gha tu̱ ɓu̱r nokhzi nggur a shikya zawa ndu̱ zop ye nokhzan nu̱ gumapaalyang. 12Yang tu̱k mbu̱ nokhzang wa shakh ndu̱ zhimen, tu̱ ɗu̱ ta ɓu̱r khuski nggur a shikya zawa ndu̱ khuski nyin ɓu̱rkyang.”
Yesu wa Sa Barke ye Qusonggi Pichichindi
(Mat 19:13-15; Luk 18:15-17)
13Tu̱ nduki a ɓa ndu̱ qusonggi ɓaanda ye Yesu ma ku̱ su̱ɓa wor tu̱ sa barke ye wora, yang tu̱ nu̱ mburi nda kwa wu wora. 14Nu̱ Yesu naki wanang tu̱ shokhna maɗyi, tu̱ yang ze nu̱ mburindakwang za, “Njig ma qusonggi pichichindang ta ɓa sha, ku̱ nggu̱tl nu wor ɓa ku̱me kwaaɗar ɓu̱ Magham ɗya ɓu̱ pooni wora. 15Ngaa zu̱ zhire ye nu, kap njif nu̱ke nu̱ dlu̱ kwaaɗar ɓu̱ Magham wa qusonggi pichichindi ɓa ɓu̱ vi nu̱ mban ɓa.”
16Tu̱ yang da qusonggyang tu̱ khaapa wora a su̱ɓa wor a sa barke ye wora.
Nu̱ Kaalar Nyifi nu̱ke ɓu̱ Shi Woɗa ɓa
(Mat 19:16-30; Luk 18:18-30)
17Nu̱ Yesu ku̱ski njiv maa yir varan, tu̱ njif nggur a ɓa ɗyin ɗa tu̱ kurum gha gume nda, tu̱ zham nda za, “Maalu̱m mbarkandi, shwat ngga shikya nu̱m ma gwa nga nyifi nu̱ke ɓu̱ shi woɗa ɓa?”
18Tu̱ Yesu tlogha yenda za, “To qa nga nduk mbarkandang kha nu̱ma? Nduk mbarkandi nje ɓa kope nduk da, chin ke Magham. 19Ta zu̱n woparang, ‘Shi na tlaghar mu̱t ɓa, shi na zawa ɓa, shi na muuru ɓa, saida na mu̱dlo nu̱ ɗyin kotama ɓa, shi na batal ɓa, to vu̱r zhaaji ye zhinkir ɓaaro ndu̱ mankir ɓaaro.’ ”
20Tu̱ nyakhtlirang tlogha za, “Maalu̱m, ai nga khutlo ɗyikunang ma ji ɓang woi koɗomma ma ɓar meeni.”
21Tu̱ Yesu nggu̱ti nda mbe ndola tu̱ ze nda za, “To mbu̱ɗ kya ɗyi da ye kharki. Ɗu to ɗa masa ɗyi nu̱ke a kha ɓar kap to vu̱r ye nu̱ nungndiku, kom to ka gwa du̱ngndi gu̱nar mbu̱ viɗi, kom to ɗa ɓa to daasa ma mburi nga.”
22Tu̱ su̱bu̱r mbi yitan nu̱gha ku̱me ɓalar nang, tu̱ yang ɗu̱ varan memu̱naran su̱bu̱rtan ku̱me gu̱naran maɗyi.
23Tu̱ Yesu nggu̱t kaa tu̱ nggu̱t kaa, kom tu̱ ze nu̱ mburi nda kwang za, “Ka shi shar maɗyi ye nu̱ gu̱narku ku̱ vi nu̱ mbu̱ kwaaɗar ɓu̱ Magham.”
24Tu̱ nu̱ mburindakwang shi lazham maɗyi. Tu̱ yang gaɓ tu̱ ze wor tu̱k za, “Qusonggi ɓanga, ka shi gu̱rgu̱r ye nduki nu̱ maitaki gu̱nar ɓaanda ku̱ vi nu̱ mbu̱ kwaaɗar ɓu̱ Magham. 25Ka shi ndolndol ye dliimokh ku̱ vi nu̱ mbu̱ ghub lu̱bu̱ra ye ku̱ nu̱ gu̱na vi nu̱ mbu̱ kwaaɗar ɓu̱ Magham.”
26Tu̱ shi lazham ku wa nu̱m gom, tu̱ ku̱s zu̱ran ye yenku za, “Yang mbu̱ wanang ki ka ɗanaki ɗo?”
27Tu̱ Yesu nggu̱t wor kom tu̱ ze wor za, “Aa nu̱ke she nduku ɓu̱ shi ɓa, yang she Magham ka shi, ku̱me tun a nje ku̱nakandi she Magham ɓa.”
28Tu̱ Biturus tlogha za, “Wonji yang chem wa njig aa nu̱m chem a ma mburoro.”
29Tu̱ Yesu zu̱ za, “Zhire ngaa zu̱ran ye nu, kap njif nu̱ njigki aa rafti ɓaran, aa khachinkirku ɓaran. Aa zhinkir ɓaran, aa mankir ɓaran, aa nokhzan, aa qusonggi ɓaran, aa damku ɓaran ku̱me nga ndu̱ labar mbarkandang. 30Ka gwa raftiku, ndu̱ khachinkirku, ndu̱ mankir ku ndu̱ qusonggiku, ndu̱ damku, ndu̱ bonye khang. Yang fu̱ɗar wuri ka gwa nyifi nu̱ke ɓu̱ shi woɗa ɓa. 31Nduki nu̱ke a guma, ka kha ma nu̱ gana, yang nduki nu̱ke a gana ka kha ma nu̱ guma.”
Yesu wa Gaɓ tu̱ Shi Ɓalar ɗyine Mu̱ti ɓaran ndu̱ Jiiri ɓaran mbe Mu̱ti
(Mat 20:17-19; Luk 18:31-34)
32A ve njiv yir Urshalima ku, Yesu a guma, nu̱ mburindakwang a gaanje nda a lazhamku. Nduki nu̱ke a gaanje nda kwang tu̱ sawar ku̱s wora. Tu̱ yang Yesu gal nu̱ konggol nu̱ pudeku gwaanggu̱m rapndang tu̱ nggaasi zu̱ ɗyi nu̱ke a ma gwa nda ye wora. 33Tu̱ ze wor za, “Nggu̱t ma, chem a yir Urshalima. Kaɗa vu̱r Yi ɓu̱ nduk nu̱ mbu̱ khar kuruku rututundi ndu̱ Maalu̱m Taurete ku, yang ka kuma mu̱ti yenda ku. Tu̱ vu̱r nda nu̱ mbu̱ khar nduki nu̱ke ɗya Yakhudeku ɓa. 34Ka shi nggu̱ti nggu̱bu̱ng yenda, tu̱ koɗ nyakhti nu̱ ve nda tu̱ shi kurpi yenda, tu̱ tlagha nda ku yang qu̱rse qaandi kunung ka ji mbe mu̱tang.”
Khuti ɓu̱ Yaqub ndu̱ Yokhana
(Mat 20:20-28)
35A nje nu̱ si tu̱ Yaqub ndu̱ Yokhana qusonggi ɓu̱ Zabadi a ɓa she Yesu za, “Maalu̱m, chem a shim nyel na khuti ɓaarem yerem kap.”
36Tu̱ Yesu tlogha ye wor za, “Tun a shim shi nga kya nu̱m ye nwa?”
37Tu̱ khuti nda ku za, “Tlogho yerem ku̱ da chele ɓaarem khan ɗyin bu̱nor nu̱ zu̱ma, tu̱ da khan ɗyin bu̱nor nu̱ gu̱ɗau mbu̱ ta vi nu̱ mbu̱ zhaaji kwaaɗar ɓaaro.”
38Tu̱ yang Yesu tlogha ye wor za, “Nun zu̱n mbu̱ ɗyi nu̱ke tun a khutan ɓa. Woɗye tun ka ɗu̱ma za ɗyekhti bonye nu̱ke nga ma zaran mu? Tun ka ɗu̱ma shi baptisme nu̱ke a ma shiran ya mu?”
39Tu̱ tlogha yenda ku za, “Chem ka ɗu̱ma.” Tu̱ Yesu gaɓ tu̱ ze wor za, “Wanang ni, tun ka za ɗyekhti bonye nu̱ke nga ma zaran, tun shi baptisme ndu̱ baptisme nu̱ke nga ma shiran. 40Yang zalale khar nu̱ ɗyin bu̱na nu̱ zu̱ma ndu̱ gu̱ɗau a khara ɓa, yang ka vu̱rkya ye nduki nu̱ daasaki ku̱me wora.”
41Nu̱ pudeku gwangndang tu̱kki ɓalarang, tu̱ memu̱na wor su̱bu̱r ndu̱ Yaqub ndu̱ Yokhana. 42Tu̱ yang Yesu qa wor nu̱ she nda tu̱ ze wor za, “Tun wa zu̱n nu̱ ɗyine nu̱ kwaaɗar ku ɓu̱ kujiku wa ka wut me kwaaɗar ɓaanda ɗyine nduki ɓaanda, dlegumeku ɓaanda tu̱k wa ka wut zalale ɗyine nduki ɓaanda. 43Yang ku̱ nang ɗal chele ɓaanu ɓa, yang kap njif nu̱ke a shim khanji ma nduk gor chele ɓaanu, ku̱ kha ma pude ɓaanu. 44Yang tu̱k, njif nu̱ke a shim khanji maa dle gume ɓaanu, ku̱ kha ma maavi ɓu̱ aaki. 45Jiwa Yi Ɓu̱ Nduk na ɓa ku̱me ku̱ nduk shi tlu̱nar yenda ɓa. Yang a ɓa kya ma tlu̱na, ma vu̱r nyifi ɓaran ma ɗana nduki khang.”
Yesu wa Shaana Pugum nggur dlu̱man za Bartimawus
(Mat 20:29-34; Luk 18:35-43)
46Nu̱ Yesu khu̱lki ku Jeriko, a viri ɓar mbu̱ ghayang, su̱yen ndu̱ nu̱ mburi nda kwa ndu̱ nduki khang gaanje nda, yang pugum nggur a nje kharan tleebi njiva a khuti, dlu̱man za Bartimawus yi ɓu̱ Timawus. 47Ba nu̱ tu̱kki za ɗya Yesu nu̱ Nazaret kya peetari tu̱ da su̱quran nu̱ viɗ tu̱ ku̱s zu̱ran za, “Yesu! Yi ɓu̱ Dauda, no zhiyaye ɓanga.”
48Tu̱ nduki khang wu nda za ku̱ kha yit, yang tu̱ shaata kya daa su̱quran nu̱ viɗ maɗyi tu̱ ku̱s zu̱ran za, “To Yi ɓu̱ Dauda, no zhiyaye ɓanga!”
49Tu̱ Yesu ching gha tu̱ zu̱ za, “A qama nda ya.” Tu̱ qa pugumang ku tu̱ ze nda ku za, “Qon khankal ɓaa gha, to ji nu̱ viɗi ku̱me wa zu̱ za aa ɓa na.”
50Tu̱ pugumang mbuk ɗye lu̱par ɓaranang gha tu̱ ji burut tu̱ ɗu̱ she Yesu.
51Tu̱ Yesu zham nda za, “Ta shim shi nga nu̱m yora?”
Tu̱ pugumang tlogha za, “Zhinerem gwaanji, nga shim na nga maa.”
52Tu̱ Yesu ze nda za, “Ɗu laya, maito ɓa wa shaana ro.”
Fan ndu̱ fan tu̱ ku̱s na maari, tu̱ mbu gaanje Yesu tu̱ ɗu̱ ku su̱yen.
Currently Selected:
Markus 10: ttrNT
Highlight
Share
Copy
Want to have your highlights saved across all your devices? Sign up or sign in
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
