Matta 28

Jiiri ɓu̱ Yesu mbe mu̱ti

(Mar 16:1-8; Luk 24:1-12; Ykh 20:1-10)

1Gaanje Fu̱ɗar Maasi ɓu̱ Yakhudekwang, ye fu̱ɗa Laaji ndu̱ zhuzhumi, tu̱ Maryam ye Magadaliya ndu̱ Maryam dandang ɗu̱ ma nggu̱t ku̱jipang.

2Fan ndu̱ fan tu̱ shi yakhtar ma vu̱ghai maɗyikandi, ku̱me nu̱ ru̱kti ɓu̱ Magham nggur a shur viɗi, tu̱ tu̱pa ndogdi nu̱ zaki me ku̱jipang ɓara tu̱ khan ɗyinan. 3A wuti wa wuti maari, luktiku ɓaran ɓong khat khat wa lefu̱ndi. 4Ni nu̱ nggu̱ti ku̱jip kwang naki nda, tu̱ tu̱k sawar ku maɗyi, var wora dlu̱rti, tu̱ nggu̱ɗ ku nu̱ yaghai wa nduki nu̱ mu̱ɗki.

5Tu̱ nu̱ ru̱kti ɓu̱ Maghamang ze nusukwang za, “Tu̱k nu̱ sawa ɓa, nga zu̱n tun a laɓkya Yesu nu̱ katlki nda ghang. 6A nje fan ɓa. Wa ji ba wa nu̱ zu̱kyang. A ɓa ma tun na ye maa nu̱ khataki nda nu̱ sang. 7Ɗu̱ ma ɗauɗau tun a ze nu̱ mburi nda kwa nun za, ‘Wa ji mbe mu̱ti, a nje gume nu ma yir Galili. Tun ka ɗa na nda fara.’ Nang ke ɗyi nanga ɓa ki ma zu̱ran ye nu.”

8Tu̱ njig ye maa nu̱ke ku̱jipang a si ɗauɗau nyeedlan ndu̱ sawari yang memu̱na wor ɓong maɗyi tu̱k. Tu̱ ɓu̱tl ɗa ku ma zu̱ran ye nu̱ mburi Yesu ku nu̱ke a nje. 9Fan ndu̱ fan tu̱ Yesu ndu̱ ɗyinan gama ndu̱ wora. Tu̱ ze wor za, “Wusammaku!” Tu̱ ɗa song ku bing tu̱ kurum gha ku me saran, tu̱ yang ghar ghai yenda. 10Tu̱ Yesu ze wor za, “Tu̱k nu sawa ɓa, ɗu̱ ma tun a ze nyeezaku za ku̱ ɗu̱ ku Galili, ka ɗa na nga ku fara.”

Nu̱ nggu̱ti ku̱jipkwang

11Nusukwang a mbu̱ yir vaanda, tu̱ ɓeena nduki chele sojeku nu̱ nggu̱ti ku̱jipang ku vi nu̱ mbu̱ ghayi, tu̱ ɗa vu̱r labar ɗyi nu̱ ɗatlki ye kuruku rututundang. 12Tu̱ kuruku ndu̱ dlegumeku ɓu̱ ndukyang shi sawari ku, tu̱ vu̱r mu̱zhindi khangndi ye sojekwang. 13Tu̱ zu̱ ku za, “Zu̱ ma ye ndukyang nun za, ‘Nu̱ mburindakwang ɗu̱ki mbu̱ virkiri tu̱ muura man varanang ɓara sarchi nu̱ke chem a ɗyeniri.’ 14Mbu̱ ɓalarang wa vi nu̱ mbu̱ dlu̱mndi Nggomna, chem ka shi ɓalar yenda, tun ɓu̱ za bonye ɓa.” 15Yang tu̱ sojekwang dlu̱ mu̱zhindang tu̱ shi ku ba wa nu̱ zu̱ki ye worang. Labar nang wa ka zu̱r nda mbe Yakhudeku ma ɓar meeni.

Tlu̱nar nu̱ Yesu Vu̱rki ye nu̱ Mburi nda ku

(Mar 16:14-18; Luk 24:36-49; Ykh 20:19-23; Tlp 1:6-8)

16Kom tu̱ nu̱ mburi nda ku gwaanggu̱m dandang ɗu̱ ku Galili, tu̱ ɗu̱ ku dleng nu̱ Yesu zu̱ki za ku̱ ɗu̱ ku. 17Nu̱ naki nda ku tu̱ ghar ghai yenda, yang ɓeenan nu̱ memu̱na wor da ye wor za ɗya chin ɓa. 18Tu̱ Yesu a song bing tu̱ zu̱ za, “Wa vu̱r zalale maa viɗi ndu̱ maa vu̱ghai ya kap. 19Ku̱me nang mbu̱ tun wa ɗi tun a ze nduki nu̱ larji kap ku̱ mburi nga, tun a shi baptisme ye wora mbu̱ dlu̱m Zhinkiri, ndu̱ ɓu̱ Woyang ndu̱ ɓu̱ Jiimbi Shakhshakhndi. 20Tun a shoga ye wor ku̱ khutlo kap ɗyi nang zu̱ki ye nu. Zu̱n ma nga nje su̱yen ndu̱ tunu ma yir lauɗarsi qaandi virkiri.”

Currently Selected:

Matta 28: ttrNT

Highlight

Copy