Matta 27

Wa Ɗu̱ ndu̱ Yesu Gume Nggomna Bilatus

1Nu̱ dumaari ɗau, tu̱ kuruku rututundi ndu̱ dlegumeku ɓu̱ ndukyang kap shi sawari tlagha nda Yesu, 2tu̱ gu̱n kharan nu̱ gha ku, tu̱ ɗu̱ ndu̱ chin ku, tu̱ vu̱r nda nu̱ mbu̱ khar nggomna Bilatus.

Mu̱ti ɓu̱ Yakhuda

3Sarchi nu̱ Yakhuda nu̱ vu̱rki nda ɓara naki wa kuma za ku̱ tlagha Yesu, tu̱ memu̱naran su̱bu̱ri. Ta gaɓ nu̱ she kuruku rututundang ndu̱ dle gume ɓu̱ ndukikwang, tu̱ gaɓ ndu̱ mu̱zhindi ye vi ɗyin kunungndang ye wora. 4Tu̱ zu̱ za, “Ngaa shi sola ku̱me nga vu̱r njif nu̱ke zop ve nda ɓa ma ku̱ tlagha nda.”

Tu̱ yang ze nda ku za, “Nu̱m baki rema? Na ɗya damtar ɓaaro.”

5Tu̱ wos mu̱zhindi ye vyang gha mbu̱ Rafti ɓu̱ Maghamang, tu̱ vi nu̱ dam, tu̱ ɗu̱ tu̱ ɗa gu̱n zoori tu̱ lokh ɗyinan gha.

6Tu̱ kuruku rututundang ghar mu̱zhindang tu̱ zu̱ ku za, “Nu̱ shipa ku̱ sa mu̱zhindi nang nu̱ ye maa du̱ngndi mbu̱ Rafti ɓu̱ Maghamang ɓa, ku̱me ɗya mu̱zhindi tlaghar mu̱ɗi.” 7Tu̱ shi sawari ku, tu̱ masa dalang ɓu̱ nu̱ du̱ndi kayang ngguri, tu̱ ka pa runggiku nu̱ mu̱ɗki nu̱ nje. 8Ku̱me nang, ma ɓar meeni, nduki ka qa dlu̱m maarang za, Dalang Tom. 9Tu̱ ɗyi nu̱ annabi Yirmiya zu̱kya nyedli, nu̱ zu̱ki za, “Tu̱ da mu̱zhindi ye vi ɗyin kunung, mu̱zhindi nu̱ nduki nu̱ Israila tloghaki za ku̱ masa nda si. 10Tu̱ masa dalang mbu̱ nu̱ du̱ndi kayang si, ba wa nu̱ Magham zu̱ki ya.”#27:10 Nggu̱t tu̱k mbu̱: Zak 11:12-13; Yirm 19:1-13; 32:6-9.

Bilatus wa Shi Zhamndiku ye Yesu

(Mar 15:2-5; Luk 23:3-5; Ykh 18:33-38)

11Ye sarchi nang Yesu a nje chingndan gume nggomna, tu̱ nggomnyang zham nda za, “To ke kuji ɓu̱ Yakhudekwang mu?”

Tu̱ Yesu ze nda za, “Wanang ni, ba wa no zu̱kyang.”

12Yang nu̱ kuruku rututundi ndu̱ dlegumeku ɓu̱ ndukyang daki zhaano ɓaran, nu̱ tlogha ye wor nu̱ aa nu̱m ɓa. 13Tu̱ Bilatus zham nda za, “No tu̱k ɗyiku nu̱ke a zu̱ran ku nu̱ ɗyinorang de?” 14Yang Yesu nu̱ tlogha aa zhamndi da yenda ɓa. Tu̱ nggomna shi lazham maɗyi.

Wa Dla Kumar Mu̱ti ye Yesu

15Ye sarchi tabar Peetar Ɗyin, nggomna wa ka ngga nduk da nu̱ke ndukyang a shimndan gha zhaaru̱m. 16Yang ye sarchi nang nu̱ zop nggur a nje nu̱ aaki zu̱nki nda khiiran zhaaru̱m, nu̱ka qaki nda za Barabas. 17Ku̱me nang nu̱ Yakhudekwang tabaki, tu̱ Bilatus zham wor za, “Tun a shim ngga nga kya ki ye nu gha kwa? Barabas mu yang Yesu nun ka qaki nda za Masiya?” 18Ku̱me Bilatus wa zu̱n za a ɓa ku ndu̱ Yesu ku̱me zhiri.

19Nu̱ Bilatus khaki gha ye maa kumarang tu̱ nokhzan a ru̱k ku̱ ze nda za, “Vi ɓar mbu̱ njiv ɓu̱ nu̱ dambi nang ku̱me nga za bonye ndu̱ zhine ndu̱ chin virkir nang.”

20Tu̱ yang kuruku rututundang sokh ndukyang za ku̱ zu̱ ku za ku̱ ngga Barabas gha tu̱ tlagha Yesu.

21Tu̱ nggomna gaɓ tu̱ ze wor za, “Chele nduki rapndi nang, tun a shim ngga nga kya ki gha ye nwa?”

Tu̱ zu̱ ku za, “Barabas.”

22Tu̱ Bilatus zham wor za, “Yang shi nga kya nu̱m ndu̱ Yesu nu̱ka qaki nda za Masiya na?”

Tu̱ zu̱ ku kap za, “Ku̱ kaatli nda gha!”

23Tu̱ Bilatus zu̱ za, “Ku̱me nu̱ma? Tlu̱na kya nu̱m nu̱ke malkandang na?”

Tu̱ yang ndukyang shaata da su̱qura wor nu̱ viɗi a zu̱ran ku za, “Ku̱ kaatli nda gha!”

24Nu̱ Bilatus naki za chin ɗu̱ma shi aa nu̱m ɓa, wonji ndukyang a shim ji ndu̱ dakhlari, tu̱ shokhla ɗyim tu̱ shiɓ kharan nu̱gha gume ndukyang, tu̱ zu̱ za, “Nga si mbu̱ zop mbu̱ti tom ɓu̱ nu̱ dambi nang ɓa. Na a ɗyinonu.”

25Tu̱ ndukyang kap tlogha za, “Ku̱ taɗar tom ɓaran khan ɗyine rem ndu̱ qusonggi ɓaarem!”

26Kom tu̱ ngga Barabas gha ye wora. Gaanje nu̱ saki ku̱ shi kurpi ye Yesu, tu̱ vu̱r nda ma ku̱ kaatli nda gha.

Sojeku wa Shi Ɓalar me Ghu̱mndi ye Yesu

(Mar 15:16-20; Ykh 19:2-3)

27Tu̱ sojeku ɓu̱ nggomna ɗu̱ ndu̱ Yesu patle ɓu̱ nggomna#27:27 Patle ɓu̱ nggomna Ka qa nu̱ me Gu̱rik za Pu̱ritoriyam, tu̱ taba ɓeeni sojekwang nu̱ ɗyine nda, 28tu̱ fed ɗye sar ɓaranang nu̱gha, tu̱ lu̱pa lukti vyangndi pooni ɓu̱ kujiku yenda. 29Tu̱ shi ɗye zhar ndu̱ njekhti tu̱ sa yenda ye ɗyinan. Tu̱ vu̱r zaaɓir yenda ku̱ khuɓi ndu̱ kharan nu̱ zu̱ma. Kom tu̱ kurum gha ku gume nda tu̱ ku̱s zu̱ ɓalar ndu̱mndi yenda a zu̱ran ku za, “U̱ngkali, kuji ɓu̱ Yakhudeku!” 30Tu̱ koɗ nyakhti ku nu̱ ve nda, tu̱ dlu̱ zaaɓira ɓar kha nda tu̱ ki ghwaɗ ɗyinan ku si. 31Nu̱ woɗaki zu̱ ɓalar ndu̱mndi ku yenda tu̱ fed lukti vyang nda nu̱ gha, tu̱ sa lukti ɓaranang yenda, tu̱ ɗu̱ ndu̱ chin ma kaatli nda gha.

Wa Katl Yesu gha me Qu̱fari

32A mbu̱ yir ku, tu̱ gama ndu̱ khuski ngguri ye ghai Sariyan, dlu̱man za Siman, tu̱ ranna nda ku tu̱ da qu̱far kaatli ɓu̱ Yeswang. 33Tu̱ khu̱l ye ma nu̱ka qaki za Golgota, mban za, ye ma du̱ɓ ɗyin. 34Tu̱ vu̱r ɗyim anap yenda longgaran ndu̱ ɗyi ɗyotndi ma ku̱ za, yang nu̱ darki, tu̱ zhang zaran gha. 35Nu̱ katlki nda gha ku tu̱ ge tombol ghaari ku ma ku̱ shakh luktiku ɓaranang.#27:35 Nggu̱t tu̱k mbu̱: Zab 22:18. 36Qu̱rsan, tu̱ kha gha ku ma bu wudle nda. 37Tu̱ katl bu̱lar nggur gha viɗ ndu̱ ɗyinan ɗya bu̱lar ɗyi nu̱ daki zhaano ɓaran ɗyinanang. Bu̱laran za, “Nang ke Yesu, kuji ɓu̱ Yakhudeku.” 38Tu̱ katl nu̱ muuriku nggur wor rap su̱yen ndu̱ chin, da ve ɗyin bu̱nan nu̱ zu̱ma, da ve ɗyin bu̱nan nu̱ gu̱ɗau.

39Tu̱ nduki nu̱ke a peetari ki pu̱zi nda a yakhta ɗyin wora, 40a zu̱ran ku za, “To nu̱ke to ka ɗu̱ma gu̱ɗa Rafti ɓu̱ Magham nu̱gha to du̱n mbu̱ qaandi kunung, ɗono va ɗo! Mbu̱ to Yi ɓu̱ Magham, a zhur yaghai ɗyine qu̱far kaatlang ɗo!”

41Tu̱ kuruku rututundi ndu̱ Maalu̱m Taurete ku ndu̱ dle gume ɓu̱ ndukyang ki zu̱ ɓalar me ghu̱mndi a zu̱ran ku za, 42“Wa ɗana nduki nggur tu̱ ku̱na ɗana varan. Mbu̱ chin ke kuji ɓu̱ Israila, bu ku̱ ɗa zhur yaghai ɗyine qu̱far kaatlang ɗo, kom chem ka maita nda. 43Wa maita Magham. Bu ku̱ Magham ɗana nda leendang, mbu̱ a shimndan, ku̱me wa zu̱ za chin Yi ɓu̱ Magham ɗo.” 44Nu̱ muuri ku nu̱ katlki wor gha su̱yen ndu̱ chinang tu̱k wa shi maatli ɓalar yenda.

Mu̱ti ɓu̱ Yesu

(Mar 15:33-41; Luk 23:44-49; Ykh 19:28-30)

45Fu̱ɗar a tala, tu̱ zhum maari za ghayang nu̱gha ru̱m ma yi vi kunung nu̱ mugdi. 46Vi kunungndang tu̱ Yesu da su̱quran nu̱ viɗi tu̱ zu̱ za, “Eloi, Eloi, lama sabakhtani?” Mban za, “Maghamndi ɓanga, Maghamndi ɓanga, nu̱m saki to yaɓti nga gha?”

47Nu̱ nduki nggur nu̱ke chingndan gha ku ye maaranang tu̱kki wanang tu̱ zu̱ ku za, “Khuski nang a qakya Iliya.”

48Fan ndu̱ fan tu̱ njif nggur ɗa, tu̱ ɗa da ndoɗyiri, tu̱ yoɓ nu̱ mbu̱ ɗyim ɓeundi, tu̱ san me saɓiri, tu̱ zoɓa yenda ma ku̱ za. 49Tu̱ ɓeeni ndukyang zu̱ za, “Njig nda chem na, mbu̱ Iliya kaɗa ɓa tu̱ ɗana nda.”

50Tu̱ Yesu gaɓ tu̱ da su̱quran nu̱ viɗ ndu̱ du̱mbu̱r kom tu̱ vi nyifiri.

51Ye sarchi nang tu̱ kapar nu̱ke a mbu̱ Rafti ɓu̱ Maghamang ɓyakh rap mbu̱ yen, viɗ ma yi yaghai. Tu̱ maa vu̱ghai shi yakhtari, tu̱ ndogdiku wudli! 52Tu̱ ku̱jipku qu̱ni, tu̱ nduki shakhshakhndi nu̱ mu̱ɗki ku khang ji ndu̱ nyifiri. 53Tu̱ vi ɓar mbu̱ ku̱jipku ɓaanda. Gaanje Yesu wa ji mbe mu̱ti, tu̱ vi ku nu̱ mbu̱ ghai Shakhshakhndang, tu̱ nduki khang na wora.

54Sarchi nu̱ gorkir soje ɓu̱ Roma ndu̱ ɓeena nduki nu̱ke a bu wudle Yesu naki yakhtar maa vu̱ghayang nu̱ ɗyi nu̱ shikyang kap, tu̱ tu̱k sawar ku maɗyi, tu̱ zu̱ ku za, “Zhire njif nang ɗya Yi ɓu̱ Magham!”

55Nusuku nggur a nje wor khang tu̱k na mbuki gaanje Yesu ma ji Galili a tlu̱nar yenda ku. Tu̱ ching gha ku ɓakh a na ɗyiku nu̱ke a shirang. 56Maryam ye Magadaliya, ndu̱ Maryam man Yaqub ndu̱ Yusufu, ndu̱ man qusonggi ɓu̱ Zabadi a chele ɓaanda.

Par Mu̱ti Yesu

(Mar 15:42-47; Luk 23:50-56; Ykh 19:38-42)

57Nu̱ mugdi shiki, tu̱ nu̱ gu̱nar ngguri, khuzi Arimatiya, dlu̱man za Yusufu a ɓa. Yang ɗya nu̱ mbu Yesu tu̱k. 58Tu̱ ɗu̱ she Bilatus ma khuɗ ku̱ vu̱r man var Yesu yenda. Tu̱ Bilatus zu̱ za ku̱ vu̱r yenda. 59Tu̱ Yusufu da man var Yesu tu̱ ɗyikhlan mbu̱ kapar linen shakhshakhndi. 60Tu̱ sa nda nu̱ mbu̱ mewar ku̱jip ɓaran, nu̱ke ɗya ndogdi nggur nu̱ raki mbanang nu̱ gha. Tu̱ tu̱pa ndogdi gwaanji nu̱ me ku̱jipang, tu̱ ɗu̱ varan. 61Maryam ye Magadaliya ndu̱ Maryam dandang, ba nje kharan me ku̱jipang.

Nu̱ Nggu̱ti Ku̱jip kwang

62Vi dumaaran gaanje fu̱ɗar daasar Peetar Ɗyinang, tu̱ kuruku rututundi ndu̱ Parisekwang taba nu̱ gume Bilatus, 63tu̱ shi ghai yenda ku za, “Gundi! Chem wa kor ɗyi ni nu̱ lambar nduki nang zu̱ki sarchi nu̱ke a nje ndu̱ nyifiri, a za gaanje qaandi kunung chin ka ji mbe mu̱ti. 64Ku̱me nang, so ku̱ nduki bu ɗyin ku̱jip nang nu̱gha mbari ma yi ye qaandi kunung, ku̱me ku̱ pudeku ɓaran kwang a ɓa tu̱ muura man varanang ɓar ɓa, tu̱ zu̱ ku za wa ji mbe mu̱ti ɓa. Lambar nu̱ gana nang ka duk nu̱ gumapaalyang maatli.”

65Tu̱ Bilatus ze wor za, “Da ma sojeku tun ɗu̱ tun bu ɗyin maarang wa nu̱ke tun ɗu̱maki.” 66Tu̱ ɗu̱ ku tu̱ bu wudle maarang, tu̱ sa yitu̱m kwaaɗar ɓaran nu̱ ɗyin ku̱jipang, tu̱ sa sojeku ma nggu̱t maarang tu̱k.

Currently Selected:

Matta 27: ttrNT

Highlight

Copy