Matta 26

Dlegumeku wa shi Sawari ku̱ Tlagha nda Yesu

(Mar 14:1-2; Luk 22:1-2; Ykh 11:45-53)

1Nu̱ Yesu woɗaki zu̱ ɗyikunang kap, tu̱ ze nu̱ mburindakwang za, 2“Tun wa zu̱n za tabar Peetar Ɗyinang wa njig qaandi rap, ka vu̱r Yi ɓu̱ Nduk tu̱ katl nda gha me qu̱fari.”

3Tu̱ kuruku rututundi ndu̱ dlegumeku ɓu̱ ndukyang taba nu̱ kaa ɓu̱ gorkir ɓu̱ kuruku nu̱ka qaki nda za Kayafa. 4Tu̱ shi sawari ku za ku̱ ku̱s nda Yesu mbu̱ tuka tu̱ wor tlagha nda nu̱ gha. 5Yang tu̱ zu̱ ku za, “Ɓu̱ shi sarchi tabarang ɓa, ku̱me ku̱ ndukyang ji ndu̱ dakhla ɓa.”

Wa Pu Mor nu̱ke Zhiran Mu̱nkandi ye Yesu

(Mar 14:3-9; Luk 7:37-38; Ykh 12:1-8)

6Yesu a mbu̱ ghai Betani mbu̱ rafti ɓu̱ Siman nu̱ke zhu wa shi khaati gwaanji. 7Tu̱ nokhzi nggur a ɓa she Yesu ndu̱ ye kulur mor nu̱ zhiiri mu̱nkandi nu̱ me mu̱zhindi maɗyi. A mbu̱ zu̱mndi ɗye zu̱mndi tu̱ mbata morang yenda nu̱ mbu̱ ɗyinan.

8Yang ni nu̱ mburi nda kwang naki, tu̱ shokhna ku, a zu̱ran ye yenku za, “Na ɗya su̱bu̱ri, 9mbu̱ masa kya mor nang ɓara tu̱ga ka gwa mu̱zhindi khang nu̱ke ka vu̱rki ye nu̱ nungndi ku.”

10Yang ku̱me Yesu wa zu̱n ɗyi nu̱ke a zu̱ran ku, tu̱ ze wor za, “Nu̱m saki tun ki damta nokhzi nanga? Ai, ɗyi nu̱ shiki yang mbari. 11Nu̱ nungndiku a nje su̱yen ndu̱ tunu aakochi, yang ngaa nje su̱yen ndu̱ tun aakochi ɓa. 12Mor nu̱ zu̱ki ya nang, a khar wa daasakya man vara ma par mu̱ti ɓanga. 13Zhire nga zu̱ran ye nu̱ ye maa nu̱ke a ma wopa labar mbarkandi nang kap mbu̱ larji, nduki ka ki zu̱ ɗyi nu̱ nokhzi nang shiki ma kwaari nda.”

Yakhuda wa, Masa Yesu ɓara

(Mar 14:10-11; Luk 22:3-6)

14Tu̱ da chele gwaanggu̱m rapndang, nu̱ka qaki nda za Yakhuda Iskariyoti, ɗu̱ she kuruku rututundang, 15tu̱ zu̱ za, “Tun ka vu̱rkya kim ya mbu̱ nga masa nda ɓar yenwa?” Tu̱ vu̱r mu̱zhindi ye vi ɗyin kunung yenda. 16Ji ɗyin sarchi nang tu̱ nggasi nggu̱t njiv nu̱ke chin ka vu̱rki Yesu ɓara.

Yesu wa Zu̱m ɗye Zu̱mndi Tabar Peetar ɗyin ndu̱ nu̱ Mburindakwang

(Mar 14:12-21; Luk 22:7-13, 21-23; Ykh 13:21-30)

17Ye fu̱ɗar nu̱ gumapaali nu̱ tabar ɓurti tolir nu̱ke yis su̱ ɓa ndang, tu̱ nu̱ mburindakwang a ɓa she Yesu tu̱ ze nda ku za, “Ta shim daasa mi ye maa nu̱ke to ka zu̱mki tabar Peetar ɗyinang nu̱ fu̱na?”

18Tu̱ zu̱ za, “Ɗu̱ma mbu̱ ghai she khuski ngguri, tun ze nda nun za, ‘Maalu̱m wa zu̱ za, sarchi ɓang wa shi bing, yang ngga zu̱m tabar peetar ɗyinang mbu̱ rafti ɓa su̱yen ndu̱ nu̱ mburi nda kwang.’ ” 19Tu̱ nu̱ mburi nda kwang shi ba wa nu̱ Yesu zu̱ki ye worang, tu̱ daasa ɗye zu̱mndi tabar peetar ɗyinang.

20Nu̱ mugdi shiki tu̱ kha gha ma zu̱m ɗye zu̱mndi su̱yen ndu̱ gwaanggu̱m rapndang. 21A mbu̱ zu̱m ɗye zu̱mnda ku tu̱ Yesu ze wor za, “Zhire nga zu̱ran ye nu, da chele ɓaanu ka vu̱rti nga ɓara.”

22Tu̱ damta ku maɗyi, tu̱ nggaasi zham nda ku nu̱ daa da a zu̱ran ku za, “Woɗye ɗya nga mu, Zhinerem gwaanji?”

23Tu̱ tlogha za, “Njif nu̱ saki kharan nu̱ mbu̱ du̱ɓ da ndu̱ nga nang kya ma vu̱rti nga ɓara. 24Yi ɓu̱ Nduk ka mu̱ɗ ba wa nu̱ bu̱laki ɗyine nda. Yang njif nu̱ke a ma vu̱r Yi ɓu̱ Nduk ɓarang ɗya ɗye zhiyaye! Ka duk yenda tu̱ga nu̱ kha nda ɓa.”

25Tu̱ chin Yakhuda nu̱ vu̱rti nda ɓara zu̱ za, “Maalu̱m, ɗya nga mu?”

Tu̱ Yesu tlogha yenda za, “Ta zi nu̱ meero.”

Zu̱mndi ɓu̱ Zhinerem gwaanji

(Mar 14:22-26; Luk 22:14-20; 1Kor 11:23-25)

26A mbu̱ zu̱mndi ɗye zu̱mndang ku, tu̱ Yesu da ɓurti tolirang, tu̱ kuna Magham, tu̱ ɓakhla nu̱ gha tu̱ vu̱r ye nu̱ mburi nda kwang za, “Dlu̱ ma tun nji, na ɗya man vara.”

27Tu̱ da ɗyekhti ɗyim anapang. Nu̱ kunaki Magham tu̱ vu̱r ye wora tu̱ zu̱ za, “Kap ɓaanu za ma. 28Ku̱me nang ɗya tom ɓanga, nu̱ nyedli alqawar nu̱ke a ma mbu̱ti ku̱me nduki khang ma ndu̱m sola. 29Nga zu̱ran ye nu, ngam ɓu̱ za ɗyim anap nang tu̱k ɓa, kope fu̱ɗar nu̱ke ngga zaki mewakandi nggur ndu̱ tunu mbu̱ kwaaɗar ɓu̱ Zhinkir ɓanga.”

30Nu̱ Yesu ndu̱ nu̱ mburi nda kwang qaki taazi, tu̱ vi ku tu̱ ɗu̱ ku mbu̱ Dleng qu̱far Zaitun.

Biturus wa zu̱ za Chin ɓu̱ Keela Zu̱ndi Yesu ɓa

(Mar 14:27-31; Luk 22:31-34; Ykh 13:36-38)

31Tu̱ Yesu ze wor za, “Kap ɓaanu tun ka ɗa vaanu tun njig tu̱ nga mbu̱ virkir nang ku̱me ɗyi nu̱ke a ma ɗaatli ndu̱ nga. Ku̱me a nje bu̱laran za,

‘Ngga ghwaɗ nu̱ khutlorang,

ndu̱ɓang ku nu̱ mbu̱ shapirang

ka lakhta ku.’#26:31 Nggu̱t tu̱k mbu̱: Zak 13:7.

32Yang gaanje wa ji ndu̱ nga mbe mu̱ti, ngga kaya nu ma yir Galili.”

33Tu̱ Biturus ze nda za, “Aa wa ɗa vaanda ku kap ku̱me ɗyi nu̱ke a ma ɗaatli ndu̱ to, aa da ngam ɓu̱ ɗa vara ɓa.”

34Tu̱ Yesu ze nda za, “Zhire nga zu̱ran yoro, ba mbu̱ virkir nang, me ku̱ koogurokh shi mbaari, to ka keela zu̱ndi nga sar kunung.”

35Tu̱ Biturus ze nda za, “Aa ka tlagha rem su̱yen, ngam ɓu̱ keela zu̱ndor ɓa!” Nu̱ mburi nda kwa kap wa zu̱ wanang ku tu̱k.

Yesu wa shi Barar Gesemani

(Mar 14:32-42; Luk 22:39-46)

36Kom tu̱ Yesu ndu̱ nu̱ mburi nda kwang ɗu̱ ye maa nggur nu̱ ka qaki za Gesemani, mban za, ye maa ɗyooti mor Zaitun. Tu̱ ze nu̱ mburi nda kwang za, “Kha ma gha fan, nga yir far ma barari.” 37Tu̱ ɗu̱ ndu̱ Biturus ndu̱ qusonggi ɓu̱ Zabadi wor rapndang, nang ke Yaqub ndu̱ Yokhana, tu̱ memu̱naran su̱bu̱ri tu̱ damta maɗyi. 38Tu̱ yang ze wor za, “Su̱bu̱rti mbi nu̱ke a mbu̱ nyifi ɓanga ka ɗu̱ma tlagha nga. Kha ma gha fan, tun shi buuri su̱yen ndu̱ nga.”

39Nu̱ ɗu̱ki guma koɗom tu̱ nggu̱ɗ nu̱ mbiyitan tu̱ shi barari a zu̱ran za, “Zhinkir ɓanga, mbu̱ ka shi, to da ɗyekhti bonye na ya ɓara. Kap ndu̱ wanang, shi na shimndi ɓang ba, kope shimndi ɓaaro.”

40Na gaɓki nu̱ she nu̱ mburi nda kwang tu̱ gwa a ɗyenir ku, tu̱ yang ze Biturus za, “Alapa tun ɓu̱ shi buuri ndu̱ nga aa me awe da ɓa? 41Shi ma buuri, tun shi barar tu̱k ku̱me nggu̱ɗ nun mbu̱ buuri ɓa. Jiimba wa tlogha ya, yang man vara khukhutan.”

42Tu̱ gaɓ nu̱ rapan tu̱k, ta shi barar a zu̱ran za, “Zhinkir ɓanga, mbu̱ bonye nang ɓu̱ peeta ɓa kope nga za nda, bu ku̱ shimndi ɓa shi.”

43Ta gaɓ tu̱k tu̱ gwa wor a ɗyeni, ku̱me yiti wor wa shi taɗa. 44Tu̱ njig wor tu̱k, tu̱ ɗu̱ tu̱ ɗa shi barar nu̱ kunungan a maata ɓalarku nu̱ zu̱ki gumapaalyang.

45Ta gaɓ tu̱k, nu̱ she nu̱ mburi nda kwang tu̱ ze wor za, “Ma ɓar leendang tun a shikya ba ɗyeni tun a maasi ɓaanu? Na ma, sarchi wa shi bing nu̱ke a ma vu̱r Yi ɓu̱ Nduk ɓar nu̱ mbu̱ khar nu̱ solarku. 46Ji ma chem ɗi, wonji nu̱ vu̱rti nga ɓara a khu̱dli.”

Wa Ku̱s Yesu ku

(Mar 14:43-50; Luk 22:47-53; Ykh 18:3-12)

47A mbu̱ ɓalarang, tu̱ Yakhuda nu̱ke ɗya da chele gwanggu̱m rapndang a ɓa su̱yen ndu̱ tabar nduki khang. Khubtan ku ndu̱ kaskarku ndu̱ saɓirku. Kuruku rututundi ndu̱ dlegumeku ɓu̱ ndukikwang a ru̱kki wora. 48Yang nu̱ vu̱rtinda ɓarang wa wuɗ ye wor za, “Kap njif nang khaapaki nda, ɗya chin, ku̱s ma nda,” 49Ɓar ɓaran tu̱ ɗu̱ she Yesu kwatu̱ra, tu̱ ze nda za. “Gappu̱ra, Maalu̱m!” Tu̱ Yakhuda khaapa nda.

50Tu̱ Yesu ze nda za, “Rapta, shi ɗyi nu̱ ɗa ɓa ki ndu̱ to.”

Tu̱ ndukyang a ɓa tu̱ ku̱s Yesu ku tu̱ khubti nda. 51Nar nang tu̱ da chele ɓu̱ nduki nu̱ke a su̱yen ndu̱ Yesu, fet kaskar ɓaran, tu̱ ku̱m maavi ɓu̱ gorkir kurukwang tu̱ ku̱rta dlu̱mndan nu̱gha.

52Tu̱ yang Yesu ze nda za, “Goɓ ndu̱ kaskar ɓaaro, ku̱me kap njif nu̱ daki kaskar, kaskar ka tlaghaki nda. 53Tamandi ɓaanu zalala khara ku̱ khuɗ nga shaata kha Zhinkir ɓanga fan ndu̱ fan ku̱ ɗa ru̱k ndu̱ nu̱ ru̱ktiku ɓaran ya, dukti sange sojeku gwanggu̱m rap ɓa goma? 54Yang ɗyi nu̱ bu̱lar lagarkati ɓu̱ Magham zu̱ki za ka shang ka nyel kikimndana?”

55Ye sarchi nang tu̱ Yesu ze wor za, “Tun a vi ndu̱ kaskarku ndu̱ saɓirku ma ku̱si nga, nga nu̱ yetar njiva mu? Yang aa nyi fu̱ɗa nga mbu̱ Rafti ɓu̱ Maghamang nga shogaran ɓara yang nun ku̱si nga ɓa. 56Yang ɗyinang shi kap ma ku̱ nyel ɗyi nu̱ke a nje mbu̱ lagarkati ɓu̱ annabikwang.” Tu̱kti wanang tu̱ nu̱ mburi nda kwa kap njigti nda tu̱ ɗa vaanda.

Wa Ɗu̱ ndu̱ Yesu Gume Ndukkudaandi

(Mar 14:53-65; Luk 22:54-55; Ykh 18:13-14, 19-24)

57Tu̱ nduki nu̱ ku̱ski Yeswang ɗu̱ ndu̱ chin ku she Kayafa, gorkir ɓu̱ kurukwang, nu̱ke Maalu̱m Taurete ku ndu̱ dlegumeku ɓu̱ ndukyang tabaran ku nje. 58Yang Biturus wa mbu gaanje wor ɓakh ndu̱ wor ma yir mu̱na rafti ɓu̱ gorkir kurukwang. Tu̱ ɗu̱ tu̱ ɗa kha gha ndu̱ nu̱ nggu̱ti Rafti ɓu̱ Magham kwang, ma na lauɗarsan.

59Tu̱ kuruku rututundi ndu̱ tabar ɓu̱ nduk kudaandang, laɓ kotame nu̱ke wor ka zu̱ki nu̱ ɗyine Yesu ma gwanda ku̱ tlagha nda. 60Yang nu̱ gwa ku ɓa, aa nu̱ke nduki khang wa zu̱ saidu kotameku.

Qu̱rsan tu̱ ndukiku nggur wor rap a vi. 61Tu̱ zu̱ ku za, “Khuskinang wa zu̱ za, ‘Ngga ɗu̱ma gu̱ɗa Rafti ɓu̱ Maghamang nu̱gha tang du̱n nggur mbu̱ qaandi kunung.’ ”

62Tu̱ gorkir ɓu̱ kurukwang ji nu̱ viɗi tu̱ zu̱ za, “Tom ɓu̱ tlogha de? Saiduku nu̱ vu̱rki nu̱ ɗyinorang ɗa?” 63Yang tu̱ Yesu kha varan gha yit.

Tu̱ gorkir ɓu̱ kurukwang ze nda za, “Ku̱me Magham nu̱ nyifiri, zu̱ yerem mbu̱ to ke Masiya, Yi ɓu̱ Magham.”

64Tu̱ Yesu ze nda za, “Ba wa no zu̱kyang. Yang nga zu̱ran ye nu, ji ɗyin leendang tun ka na Yi ɓu̱ Nduk kharan ɗyin bu̱n zu̱me ɓu̱ Nu̱ zalalyang, a ɓar tu̱k mbu̱ ku̱zapti nu̱ mu̱na viɗi.”

65Tu̱ gorkir ɓu̱ kurukwang ɓyakh luktiku ɓaran nu̱gha ku̱me su̱bu̱rti memu̱na, tu̱ zu̱ za, “Chem a laɓkya nyi pooni saidu tu̱ka? Tun wa tu̱k ndu̱mndi nu̱ shiki ye Magham ndu̱ dlu̱mndonu. 66Tun na ya kima?”

Tu̱ tlogha yenda ku za, “Wa khu̱l ku̱ tlagha nda!”

67Tu̱ koɗ nyakhti ku nu̱ ve nda nu̱ mbiyitan, tu̱ ghwatinda ku, tu̱ ɓeenan ɓu̱tli nda, 68a zu̱ran ku za, “Wuɗ me annabyang yerem mbu̱ to ke Masiya! Zu̱ njif nu̱ ɓu̱tlkirang!”

Biturus wa Keela Zu̱ndi Yesu

(Mar 14:66-72; Luk 22:56-62; Ykh 18:15-18, 25-27)

69Ye sarchi nang, Biturus a nje kharan mu̱na raftang, tu̱ ye wonkhar nggur nu̱ke a tlu̱nar mbu̱ raftang a ɓa she nda tu̱ ze nda za, “Ta su̱yen ndu̱ Yesu khuzi Galilyang tu̱k.”

70Tu̱ yang Biturus keela gume wor kap tu̱ zu̱ za, “Nang zu̱n ɗyi nu̱ke ta ɓalar ɗyinanang ɓa.”

71Na viki nu̱ me vi raftang, tu̱ wonkhar nggur tu̱k nu̱ke a tlu̱nar mbu̱ raftang na nda, tu̱ ze nduki nu̱ke chingndan ye maaranang za, “Khuskinang a su̱yen ndu̱ Yesu Ye Nazaret!”

72Tu̱ Biturus gaɓ tu̱ keela nu̱ ku̱mndari a zu̱ran za, “Nang zu̱n khuskinang ɓa!”

73Nu̱ shoɓki koɗom tu̱ nduki nu̱ke a nje chingndan ye maaranang a ɓa ku tu̱ ze Biturus za, “Shwat, to da chele ɓaanda. Me ghiindor wa qu̱n soro.”

74Tu̱ nggaasi mi barke ɓu̱ ɗyinan, a ku̱mndari, a zu̱ran za, “Nang zu̱n khuskyang ɓa!”

Fan ndu̱ fan tu̱ koogurokh shi mbaari. 75Tu̱ Biturus kor ndu̱ ɓalar nu̱ Yesu zu̱ki yenda za, “Me ku̱ koogurokh shi mbaari, to ka keela za no zu̱ndi nga ɓa sar kunung.” Tu̱ Biturus vi nu̱ dam tu̱ shi ghoori maɗyikandi.

Currently Selected:

Matta 26: ttrNT

Highlight

Copy