Matta 23

Yesu wa Pota si Maalu̱m Taureteku ndu̱ Pariseku

(Mar 12:38-39; Luk 11:43, 46; 20:45-47)

1Nu̱ nduki tabaki ku khang su̱yen ndu̱ nu̱ mburi nda kwang, tu̱ Yesu ze wor za, 2“Maalu̱m Taurete ku ndu̱ Pariseku ke nu̱ zalale shoga wopar ɓu̱ Musa ɓara. 3Ku̱me nang, shi ma kap ɗyi nu̱ zu̱ki ye nu, tun khutlo tu̱k, yang shi nu ɗyi nu̱ke a shiran ku ɓa, ku̱me nu̱ka tlu̱na ɗyi nu̱ke a shogaran ku ɓar ɓa. 4Wa ka gu̱n shipiti taɗakandi nu̱ke ka shi shar ku̱ nduk da, tu̱ sa ye nduki nu̱ daran yang ɓu̱ shaata nduki nu̱ daran a nu̱ ye khar da ɓa.

5“Ka shi tlu̱nar ɓaanda ma ku̱ nduki na. Wa ka gu̱n galɓang lagarkatiku ndu̱ bu̱lar ɓalar ɓu̱ Magham nu̱ ve me guma wora, ndu̱ tu̱ ka shi me lukti ɓaanda kiri ma yir vu̱ghai. 6Wa ka shim maa khar ɓu̱ nduk kudaandi ku ye ma nggar zu̱mndi, ndu̱ maa khar nu̱ke zhaaji si mbu̱ kib tabarku, 7ndu̱ ku̱ nduki ki wuse ye wor chele gomari, a qa wor Maalu̱m.

8“Yang tunu, ku̱ nduk qa nu̱ Maalu̱m ɓa, ku̱me Maalu̱m ɓaanu ba kaada, kap ɓaanu tun nyeezi yen ku. 9Qa nu nduk Zhinki mbu̱ larji na ɓa, ku̱me Zhinonu ba kaada chin ke nu̱ke a mbu̱ viɗi. 10Ku̱ qa nu̱ Dle guma ɓa, ku̱me Masiya ɗyenda ke dle gume ɓaanu. 11Njif nu̱ke gor chele ɓaanu, ku̱ kha ma maavi ɓaanu. 12Kap nu̱ gwaari ɗyin, ka gaɓ ndu̱ chin ma aa nu̱m ɓa. Yang kap njif nu̱ gaɓki ndu̱ ɗyinan ma aa nu̱m ɓa, ka vu̱r gorkir yenda.

13“Yang tun ɗye zhiyaye, tun Maalu̱m Taurete ku ndu̱ Pariseku, nu̱ lambarku! Tun wa za me vi viri nu̱ mbu̱ kwaaɗar viɗi. 14Tun nu̱ ɗyinonu nun vi ɓa, yang tun a nggu̱tl zalale viri ye nu̱ viri ku ku̱ vi. Tun ɗye zhiyaye, Maalu̱m Taurete ku ndu̱ Pariseku, nu̱ mu̱narku! Tun wa ka zu̱m gu̱nar ɓu̱ nusuku nu̱ zhime wor mu̱tki, tun shi barar kirkandi ma ku̱ nduki na nu. Tun ka gwa kumar maɗyikandi ku̱me nang.

15“Tun ɗye zhiyaye Maalu̱m Taurete ku ndu̱ Pariseku, nu̱ mu̱narku! Ku̱me tun wa ka dla ɗyim chitndi, tun ɗu̱ mbu dlar ghaiku ɓakhndi ma gwa nu nduk da nu̱ nggodki. Yang mbu̱ tun wa gwa, tun wa ka gaɓ ndu̱ chin ma ye ɓai tu̱ duktonu maatli maɗyi.

16“Tun ɗye zhiyaye, pugum dlegumeku! Tun wa ka zu̱ za, ‘Kap njif nu̱ ku̱mndaki ndu̱ Rafti ɓu̱ Magham, damta su̱ ɓa, yang aaki ku̱mndaki ndu̱ ginarwe mbu̱ Rafti ɓu̱ Maghamang, wa ku̱s ku̱ shi ɗyi nyin ku̱mndaki nu̱ ɗyinanang.’ 17Tun nggu̱bu̱ng pugumku! Nyi dukki gwaara, ginarwyang mu yang Rafti ɓu̱ Maghamang nu̱ saki ginarwyang tu̱ kha shakhshakh? 18Tun wa ka zu̱ tu̱k nun za, ‘Njif nu̱ ku̱mndaki ndu̱ du̱ku̱lang, damta su̱ ɓa, yang kap njif nu̱ ku̱mndaki ndu̱ vu̱rti nu̱ke a ɗyin du̱ku̱lang, wa ku̱s ku̱ shi ɗyi nyin ku̱mndaki ɗyinanang.’ 19Tun pugumku! Nyi dukki gwaara, vu̱rtang mu yang du̱ku̱l nu̱ saki vu̱rtang tu̱ kha shakhshakh? 20Ku̱me nang aaki ku̱mndaki ndu̱ du̱ku̱lang, wa ku̱mnda ndu̱ kap ɗyi nu̱ke a ɗyin du̱ku̱lang. 21Kap njif nu̱ ku̱mndaki ndu̱ Rafti ɓu̱ Magham tu̱k, wa ku̱mnda ndu̱ njif nu̱ke kharan mban. 22Aaki ku̱mndaki ndu̱ maa viɗi, wa ku̱mnda ndu̱ zhakhɗye ɓu̱ Magham ndu̱ njif nu̱ke kharan ɗyinan.

23“Tun ɗye zhiyaye, Maalu̱m Taurete ku ndu̱ Pariseku, nu̱ mu̱narku! Tun wa ka vu̱r zake ɗu̱khti kimbili nu̱ dlu̱mndi ginu, yang tun wa njig ɗyiku nu̱ dukki ndu̱ boote mbu̱ woparkwang, wor ke, zhire, ndu̱ mu̱nkiri, ndu̱ maito. Nang ke ɗyi nu̱ shipaki shi nu yang njig nu ɓeenan kwang ɓa. 24Tun pugum dlegumeku, tun wa shul ye nggolar koɗomma ɓar mbu̱ ɗyim ɓaanu, tun ɗu̱ka kya dliimokh!

25“Tun ɗye zhiyaye, Maalu̱m Taurete ku ndu̱ Pariseku, nu̱ mu̱narku! Tun wa ka shiɓ qu̱rsi ɗyekhtiku ndu̱ du̱ɓaku ɓaanu, yang mbanang nyeedlan ndu̱ tlu̱nar malkandiku nu̱ batal ndu̱ ndolar ɗyin. 26To pugum Parise! Nggo san dong ndu̱ shiɓti mbu̱ ɗyekhtang ndu̱ du̱bang ku̱me ku̱ qu̱rsanang kha shakhshakh tu̱k.

27“Tun ɗye zhiyaye, Maalu̱m Taurete ku ndu̱ Pariseku, nu̱ mu̱narku! Tun wa shipa ku̱jipku nu̱ pashaki khorvir ɓongndi nu̱ ve wora, maa nu̱ damang mbar maɗyi, yang mbanang nyeedlan ndu̱ qu̱tli ku ɓu̱ nduki nu̱ mu̱ɗki ndu̱ ru̱gnarku san zum zum. 28Tun ba wanang, dam, ndukya na nu̱ wa tun nu̱ dambi, yang mbu fara, tun nyeedlan ndu̱ mu̱narku ndu̱ ɗye shir malkandi.

29“Tun ɗye zhiyaye, Maalu̱m Taurete ndu̱ Pariseku, nu̱ mu̱narku! Ku̱me tun wa ka du̱n ku̱jipku mbarkandi ye annabiku, tun koɗma ku̱jipku ɓu̱ nu̱ dambi ku nu̱ gha. 30Tun wa ka zu̱ za, ‘Mbu̱ chem a nje sarchi ɓu̱ zhikanerem ku, tu̱ga nyem shaata wor tlaghar annabikwang ɓa.’ 31Na tun wa wuɗ nu̱ ɗyine tun ke qusonggi ɓu̱ nduki nu̱ tlaghaki annabikwang. 32Ku̱me nang kwatama tlu̱nar nu̱ nduki malkandi ndu̱ zhikannu nggaki san!

33“Tun su̱tiku, tun nggolar su̱ti ghu̱ɓtiku! Tun ka lawa me kumar giɗim ɓai kikimnda? 34Ku̱me nang ngaa ru̱kti ndu̱ annabiku, ndu̱ nu̱ kaɗariku ndu̱ Maalu̱mku. Tun ka tlagha ɓeenan, tun katl ɓeenan gha me qu̱fari, tun shi dlabti ye ɓeenan mbu̱ kib tabarku ɓaanu, tun a mbu wor ghai ghai tun a vu̱r bonye ye wora. 35Ngga ɗa ru̱k ndukiku nang ku̱me shipiti tom ɓu̱ nu̱ dambi ku nu̱ tlaghaki mbu̱ larji kap ku̱ gaɓ nu̱ ɗyinonu. Ma ji ɗyine tom ɓu̱ Khabila nu̱ dambi, ma yir ɗyine Zakariya yi ɓu̱ Berikiya, nun tlaghaki nda nu̱ gha chele ɓu̱ maa shakhshakhndang ndu̱ du̱ku̱l sadkyang. 36Zhire nga zu̱ran ye nu, kap ɗyiku nang ka gwa nduki nu̱ qaandi virkir meeni.

Yesu wa Damta maɗyi ndu̱ Urshalima

(Luk 13:34-35)

37“Awai, Urshalima, Urshalima! Nu̱ tlaghar annabiku, nu̱ mbukti nduki na ru̱kki ye nu! Sar kim nga shimki kanggu̱la nga nu ba wa nu̱ke kuzha ka tabaki qusonggi ɓaran nu̱ mbu̱ khobkan, yang tun wa zhang gha. 38Wonji leendang, wa njig rafti ɓaanu ye nu nggaran! 39Ku̱me nga zu̱ran ye nu̱, tun ɓu̱ na nga tu̱k ɓa kope fu̱ɗar nun zu̱ki za, ‘Njif nu̱ke a ɓar mbu̱ dlu̱m Zhinkir gwaanji ɗya nu̱ barka.’ ”

Currently Selected:

Matta 23: ttrNT

Highlight

Copy