Matta 22

Ku̱rti Ɓalar ndu̱ Tabar Gu̱ndi Ɓu̱rti

1Tu̱ Yesu gaɓ tu̱ shi ku̱rti ɓalar nggur ye wor a zu̱ran za, 2“Kwaaɗar viɗi wa shipa kuji nggur nu̱ nggaki zu̱mndi ye woi ɓaran nu̱ke a ɓu̱rti. 3Tu̱ ru̱k maaviku ɓaran ku̱ ɗa qa nduki nyin qaki wor ma nggar zu̱mndi ɓu̱rtang, yang nduki nu̱ qaki wora nu̱ ɗa ɓa ku ɓa.

4“Tu̱ gaɓ tu̱ ru̱k maaviku nggur tu̱k tu̱ ze wor za, ‘Zu̱ma ye nduki nang qaki worang za, wonji nga daasa ɗye zu̱mndi, nga dla qur dle ghutiku ndu̱ dleeku ɓang mbu̱nkandi nang khutloki wor ma sarchi nang. Aa nu̱m daasaran. Yang a ɓa nu ma zu̱mndang.’

5“Yang kap ndu̱ nang, nu̱ damta ku ɓa, tu̱ ɗu̱ ku vaanda, njif nggur ɗu̱ kya mbu̱ dam ɓaran, njif nggur ɗu̱kya ma gomar ɓaran, 6yang ɓeenan ku̱skya maavikwang tu̱ shi dlabti ye wor tu̱ tlagha wora. 7Tu̱ memu̱na kujirang su̱bu̱r maɗyi. Tu̱ yang ru̱k sojeku ɓaran ta tlagha nduki nu̱ shiki tlaghar mu̱tang nu̱gha tu̱ va ghai ɓaanda nu̱ gha ru̱m.

8“Kom tu̱ ze maaviku ɓaranang za, ‘Daasar nggar zu̱mnda wa woɗa, yang nduki nang qakyang nu̱ shipa nggar zu̱mnda ɓa. 9Ku̱me nang, mbu ma njiva njiva tun qa nduki nun gwaki wor kap ku̱ ɗa ɓa ma nggar zu̱mndang ku.’ 10Tu̱ maavikwang mbu njiva njiva ta qa nduki nu̱ wor gwaki kap, nduki mbarkandi ndu̱ malkandi kap, tu̱ ye maa nggar zu̱mnda nyel ndu̱ runggiku.

11“Yang nu̱ kujirang viki tu̱ na khuski nggur nu̱ke nu̱ sa lukti nggar zu̱mnda ɓa. 12Tu̱ ze khuskyang za, ‘Rapta, ta vi nu̱ fan waare lukti nggar zu̱mnda kikimnda?’ Tu̱ khuskyang ku̱na gwa ɗye zu̱ri.

13“Tu̱ kujirang ze nu̱ tlu̱narku ɓaran za, ‘Gu̱n ma khaaran ndu̱ saaran nu̱gha, tun mbukti nda nu̱ mbu̱ zhum malkandi, ye maa nu̱ke kaɗa shiki ghoori ndu̱ ku̱ti dliindi.’

14“Wa qa nduki khang yang ka datkya nduki koɗom chele ɓaanda.”

Zhamndi ɗyine Ɓiiri Zhaanggal ye Kaisar

15Tu̱ Parisekwang ɗu̱ ku ta shi sawari ɗyine ɗyi nu̱ke wor ɓu̱ shi ma ku̱ Yesu zu̱ ɗyi galkandi. 16Ta ru̱k nu̱ mbu wor kwang ndu̱ nduki ɓu̱ Khiridus tu̱ ze nda ku za, “Maalu̱m, chem wa zu̱n za to nu̱ zhire, ta shoga kya zhire ɓu̱ ɓalar ɓu̱ Magham ɓara. Aaki wayen shoro, no da njif nggur ndu̱ zhaaji tu̱ duk njif nggur ɓa. 17Yang zu̱ yeremi, ye nar ɓa wa shipa vu̱r me mu̱zhindi zhaanggal ye Kaisar nggomne gwaanji ɓu̱ Roma mu yang wanang ɓa?”

18Yang ku̱me Yesu wa da mbu̱ mu̱nar ɓaanda tu̱ zu̱ za, “Nu̱m saki tu̱ na buuri nga, tun nu̱ mu̱narku? 19Wut ma mu̱zhindi nu̱ka ɓiiki zhaanggalang si ya.” Tu̱ ɗa ɓa ku ndu̱ mu̱zhindi dinari yenda. 20Tu̱ yang ze wor za, “Shipar ndu̱ bu̱lar nu̱ke a ɗyin mu̱zhindi nang ɗya ɓu̱ kiya?”

21Tu̱ tlogha ku za, “Ɗya ɓu̱ Kaisar.”

Tu̱ Yesu ze wor za, “Vu̱r ma ɗyi ɓu̱ Kaisar ye Kaisar, ɗyi ɓu̱ Magham tun vu̱r ye Magham.”

22Nu̱ tu̱kki wanang ku, tu̱ shi lazham ku, tu̱ njig nda ku tu̱ ɗu̱ varan.

Zhamndi ɗyine Jiiri mbe Mu̱ti

23Ye fu̱ɗaran, tu̱ Sadukeku nu̱ka zu̱ki za jiiri mbe mu̱ti nje ɓa ndang a ɓa she Yesu ndu̱ zhamndi. A za, 24“Maalu̱m, Musa wa zu̱ za, mbu̱ nduk wa mu̱ɗ woi kha nda ɓa, ku̱ khachinang ɓu̱r nokhzan ma ku̱ kha woi ye mu̱tang. 25Yang khachinkirku wor mut a nje chele ɓaarem. Tu̱ nu̱ gumapaalyang shi ɓu̱rti tu̱ mu̱ɗ nu̱ kha woi ɓa, tu̱ njig nokhzanang ye mbu ɓaran. 26Tu̱ shi wanang tu̱k ye nu̱ rapndang ndu̱ nu̱ kunungndi ma yir nu̱ mutndang. 27Ve lauɗar san, tu̱ nokhzang mu̱ɗi. 28Yang ɗa, sarchi jiiri mbe mu̱ti, ka khakya ma nokhzi ki chele ɓaanda, ku̱me wa ɓu̱rti nda ku kap ɓaanda ɗo?”

29Tu̱ Yesu tlogha ye wor za, “Tun sagharan ku̱me nun zu̱m ɓalar ɓu̱ Magham ɓa, yang nun zu̱n zalale ɓaran zum ɓa. 30Sarchi jiiri mbe mu̱tang nduki nu̱ka shi ɓu̱r ɓa, yang nu̱ka ɓu̱r ɓar zum ɓa. Ka kha ku wa nu̱ ru̱ktiku ɓu̱ Magham. 31Yang tu̱k alapa nun na ɗyi nu̱ Magham zu̱ki ye nu mbu̱ lagarkatang ɗyine jiiri mbe mu̱tang ɓa? A nje bu̱laran za, 32‘Nga ke Maghamndi ɓu̱ Yibram, Maghamndi ɓu̱ Yishaku, ndu̱ Maghamndi ɓu̱ Nyagham.’ Chin Maghamndi ɓu̱ mu̱tiku ɓa, ɗya Maghamndi ɓu̱ nu̱ nyifiriku.”

33Nu̱ nduki tu̱kki wanang, tu̱ shi lazham pooni shogar ɓaran.

Wopar nu̱ Dukki Gwaari

34Nu̱ Parisekwang tu̱kki za Sadukekwang nu̱ ɗu̱ma nda ɓa, tu̱ taba ku. 35Tu̱ Maalu̱m Taurete nggur buu nda ndu̱ zhamndi ngguri.

36Tu̱ zu̱ za, “Maalu̱m nyi wopa dukki gwaari mbu̱ woparkwa na?” 37Tu̱ Yesu tlogha ye wor za, “ ‘Ndolo Zhinkir gwaanji Maghamndi ɓaaro ndu̱ memu̱na da, ndu̱ nyifi ɓa kap, ndu̱ shaandi ɓaa kap.’ 38Nang ke wopar nu̱ gumapaali, chin dukki gwaari tu̱k. 39Nu̱ rapan wa shipa nu̱ gumapaalyang tu̱k, ‘To ndola nu̱ bing ɓa wa vaaro.’ 40Kap ɓeeni woparku ndu̱ shogar ɓu̱ annabikwang kharan ɗyine wopar rapndi nang.”

Zhamndi ɗyine Masiya

41Nu̱ Parisekwang tabaki nu̱ ye maa da tu̱ Yesu zham wor za, 42“Nu̱m ke kwaari ɓaanu ɗyine Masiya? Ɗya woi ɓu̱ kiya?”

Tu̱ ze nda ku za, “Yi ɓu̱ Dauda.”

43Tu̱ Yesu ze wor za, “Yang shi kikimndi tu̱ Dauda ku̱n she zalale ɓu̱ Jiimbi Shakhshakhndi qa nda za, Zhinkir ɓang gwaanji?” Dauda wa zu̱ za, 44“ ‘Zhinkir gwaanji wa ze Zhinkir ɓang gwaanji, “Khon ɗyin bu̱na nu̱ zu̱ma kope nga sa nu̱ ɗyine nu̱ zhangndiku ɓaaro.” ’ 45Mbu̱ Dauda wa qa Masiya ‘Zhinkir gwaanji,’ yang Masiya ka kha ma woi ɓaran kikimndana?” 46Yang nduk a nje nu̱ ɗu̱maki tlogharan yenda ɓa. Gana fan tu̱k nduka nje nu̱ shiki zhamndi yenda tu̱k ɓa.

Currently Selected:

Matta 22: ttrNT

Highlight

Copy