Matta 21

Yesu wa Vi nu̱ Urshalima

(Mar 11:1-11; Luk 19:28-40; Ykh 12:12-19)

1Nu̱ Yesu ndu̱ nu̱ mburi nda kwang khu̱lki gure Betapaji bing ndu̱ Urshalima ku̱nshe Dleng Zaitunang, tu̱ ru̱k nu̱ mburi nda ku wor rap, 2tu̱ ze wor za, “Vi man mbu̱ gure nu̱ke a gume nu nang. Ba tun a viri tun ka na kooro nggur gu̱ndan ndu̱ woi ɓaran. A kol ma wor tun a ɓasi ya. 3Mbu̱ njif nggur wa shi ɓalar ye nu, tun zu̱ nun za, Zhinerem gwaanji kya shimndan, yang ka ɗa gaɓ ndu̱ wor fan ndu̱ fan.”

4Shi na ma ku̱ nyel ɗyi nu̱ annabi Yishaya zu̱ki za,

5“Zu̱ma ye nduki nu̱ Sikhiyona nun za,

‘Wonji kuji ɓaanu a ɓar she nu,

ɗya nu̱ katar ɗyin, dlaran ɗyine kooro,

a yir ɗyine ye kooro.’ ”

6Tu̱ nu̱ mburi nda kwang ɗu̱ tu̱ ɗa shi ba wa nu̱ Yesu zu̱ki ye worang. 7Tu̱ ɗa ɓa ku ndu̱ koorwang ndu̱ woi ɓaran, tu̱ lu̱pa luktiku ɓaanda nu̱ ɗyine wora, tu̱ lu̱ba tu̱ kha gha. 8Tu̱ tabar nduki khang lu̱pa kaparku ɓaanda nu̱ yiti njivang, tu̱ ɓeenan zha me bu̱n qu̱farku tu̱ ngga nu̱ ɗyin njivang. 9Tu̱ nduki nu̱ke a guma ndu̱ gana da su̱qura wor nu̱ viɗi a zu̱ran ku za, “Zhaaji ve Yi ɓu̱ Dauda! Chin nu̱ke a ɓar mbu̱ dlu̱m Zhinkir gwaanji ɗya nu̱ barka! Zhaaji ve Magham nu̱ viɗi!”

10Nu̱ Yesu viki nu̱ Urshalima, tu̱ maarang njig gu̱laushi, kap a zhamndan ku za, “Na ɗya ki shoɗa?”

11Tu̱ tabar nduki nu̱ke a mbu gaanje Yeswang zu̱ za, “Nang ke Yesu annabi na ɓa ki ghai Nazaret nu̱ Galili.”

Yesu wa Komba nu̱ Gomarku ɓara mbu̱ Rafti ɓu̱ Magham

(Mar 11:15-19; Luk 19:45-48; Ykh 2:13-22)

12Tu̱ Yesu vi nu̱ mbu̱ Rafti ɓu̱ Maghamang tu̱ komba nduki nu̱ke a masar ndu̱ masar ɓara mban, tu̱ tu̱pa tebu̱r ɓu̱ nu̱ paatar mu̱zhindiku ndu̱ ɗye khar ɓu̱ nu̱ masar mbooleku nu̱ yaghai. 13Tu̱ ze wor za, “A nje bu̱laran za, ‘Ka qa rafti ɓang rafti barari,’ yang tun wa gaɓsi ma ye maa tukar ɓu̱ nu̱ muuriku.”

14Tu̱ pugumku ndu̱ zu̱ɓtiku a ɓa she nda mbu̱ Rafti ɓu̱ Maghamang, tu̱ shaana wora. 15Yang nu̱ kuruku rututundi ndu̱ Maalu̱m Taurete kwang naki ɗye lazham nu̱ shikyang, ndu̱ qusonggi nu̱ke a zhaano mbu̱ Rafti ɓu̱ Maghamang a zu̱ran ku za, “Zhaaji a ve Yi ɓu̱ Dauda,” tu̱ shokhna ku.

16Tu̱ ze nda ku za, “Ta tu̱k ɗyi nu̱ke qusonggi nang a zu̱ran?”

Tu̱ Yesu tlogha ye wor za, “I, yang nun na bu̱laran mbu̱ lagarkatang za, ‘To daasaki qusonggi pichichindi ku ndu̱ ɓeelarku ku̱ khamndo ku ɓa goma?’ ”

17Tu̱ yang njig wor, tu̱ vi ɓar mbu̱ ghayang, tu̱ ɗu̱ Betani, ta qan fara.

Yesu wa mi Pontori ɓu̱ Qu̱far Sugar ngguri

(Mar 11:12-14, 20-24)

18Vi dumaaran a gaɓti nu̱ mbu̱ ghayang, tu̱ tu̱k meeri. 19Nu̱ naki qu̱far sugar tleebi njivang, tu̱ ɗu̱ she qu̱farang, yang nu̱ gwa aa nu̱m su̱ ɓa kope dlu̱mndan. Tu̱ ze qu̱far sugarang za, “Gana fan kha na woi tu̱k ɓa!” Tu̱ qu̱farang ghwar varan fan ndu̱ fan.

20Ni nu̱ mburi nda kwang naki wanang, tu̱ shi lazham ku maɗyi. Tu̱ zu̱ ku za, “Shi kikimndan tu̱ qu̱far sugarang ghwar ba fan ndu̱ fanang?”

21Tu̱ Yesu tlogha ye wor za, “Zhire nga zu̱ran ye nu, mbu̱ maito kha nu, yang nu̱ memu̱nanu zhang ye nu ɓa, tun ka ɗu̱ma shi ɗyi dukki ɗyi nang shiki ye qu̱far sugar nang. Aa tun ka zu̱kya ye dleng nang nun za, ‘Ju to nggu̱ɗ nu̱ mbu̱ ɗyim chitndi,’ ka shi. 22Mbu̱ tun wa maita, aa nu̱m tun khuɗki she Magham mbe barari, tun ka gwa.”

Song Maitar Zalale ɓu̱ Yesu

(Mar 11:27-33; Luk 20:1-8)

23Nu̱ Yesu viki nu̱ mbu̱ Rafti ɓu̱ Maghamang a shogar ye nduki tu̱ kuruku rututundi ndu̱ dle gume ɓu̱ Yakhudekwang a ɓa ku she nda. Tu̱ zham nda ku za, “Ɗyi nu̱ke ta shiran ku nang, ta shiran ndu̱ nyi zalalya, yang ki vu̱rki zalale shiran yora?”

24Tu̱ Yesu tlogha ye wor za, “Bu shi nga zhamndi ye nu tu̱k. Mbu̱ tun wa tlogha zhamndi nang ya ngga zu̱ pooni zalale nu̱ke ngaa boote si ma shi ɗyiku nanga ye nu. 25Woɗye ɗa Yokhana gwa zalale baptisme ɓaranang fu̱na, Magham vu̱rki yenda mu yang nduku?”

Tu̱ yang shi sawari chele ɓaanda a zu̱ran ku za, “Mbu̱ chem wa zu̱ za a ɓa she Magham, ka ze rem za, ‘Yang nu̱m saki nun maita nda ɓa?’ 26Mbu̱ yang chem wa zu̱ za, ‘A ɓa she nduku,’ chem a sawa ɗyi nu̱ke ndukiku nang ka shiki yerem, ku̱me aaki wa da Yokhana ɗya annabi.”

27Tu̱ yang tlogha ye Yesu za, “Nyem zu̱n ɓa.”

Tu̱ ze wor za, “Nga yang tu̱k ngaa ma zu̱ pooni zalale nu̱ke ngaa boote si ma shi ɗyikunang ye nu ɓa.

Ku̱rti Ɓalar ndu̱ Khuski nggur nu̱ Qusonggi ɓaran Rap

28“Tun na za kikimndana? Khuski nggur a nje nu̱ qusonggi ɓaran khuzuku wor rap, tu̱ yang ɗu̱ she nu̱ gumang tu̱ ze nda za, ‘Yi ɓanga, ɗu to ɗa shi tlu̱nar meeni mbu̱ damang.’

29“Tu̱ woyang tlogha za, ‘Ngam ɓu̱ ɗu̱ ɓa,’ yang nu̱ shiki kwaari gana fan tu̱ ji tu̱ ɗi.

30“Tu̱ ku̱maandang ɗu̱ she nu̱ rapang tu̱ zu̱ ɗyi nu̱ zu̱ki ye nu̱ guma yenda. Tu̱ woyang tlogha za, ‘Ngga ɗi ku̱man,’ yang nu̱ ɗu̱ ɓa.

31“Mbu̱ qusonggi rapndi nang, ki shiki ɗyi nu̱ke ku̱maandi ɓaranang a shimnda nang?”

Tu̱ tlogha ku za, “Nu̱ gumapaalyang.”

Tu̱ yang Yesu ze wor za, “Zhire ngaa zu̱ran ye nu, nu̱ dlu̱r zhaanggalku ndu̱ man mu̱nggu̱lku ka khan gume nu ndu̱ viri nu̱ mbu̱ kwaaɗar viɗi. 32Ku̱me Yokhana a ɓa tu̱ wuɗ njiv toropndi ye nu, yang nun maita ɓa. Wonji nu̱ dlu̱r zhaanggalku ndu̱ man mu̱nggu̱lku wa maita. Yang kap ndu̱ nang, nun nggoɗ tun maita ɓa.

Ku̱rti Ɓalar ndu̱ nu̱ Ghutiku nu̱ Dlu̱ki Dam Anap

(Mar 12:1-12; Luk 20:9-19)

33“Tu̱k ma ku̱rti ɓalar nggur tu̱k. Nu̱ dam nggur a nje nu̱ shiki dam anap, tu̱ karan gha ndu̱ garki, tu̱ ra ge ɗyooti ye anapang, tu̱ shi gaare kirkandi ma bu ɗyin maarang. Tu̱ nu̱ damang vu̱r nggu̱tan ye nu̱ ghutiku tu̱ ɗu̱ mbu̱ dlar ghai ngguri. 34Nu̱ sarchi ɗakhti ye anapang shiki, tu̱ ru̱k maaviku ɓaran nu̱ she nu̱ ghutikwang ma ku̱ ɗa dlu̱ me ɓaran anapang yenda.

35“Yang tu̱ nu̱ ghutikwang ku̱s maavikwang, tu̱ shi dlabti ye dandang, tu̱ tlagha dandang, tu̱ mbuk dandang ku ndu̱ ndogdiku. 36Tu̱ gaɓ tu̱k tu̱ ru̱k maaviku ɓaran nggur ku tu̱k nu̱ dukki nu̱ guma khangi. Tu̱ nu̱ ghutikwang gaɓ tu̱ she wor ba wa nu̱ shiki ku ye nu̱ gumapaalyang. 37Ve lauɗar san, tu̱ nu̱ damang ru̱k woi ɓaran nu̱ she wor a zu̱ran za, ‘Shwat ka na zhaaji ɓu̱ woi ɓanga.’

38“Yang ba ni nu̱ ghutikwang naki woyang tu̱ ze yenku za, ‘Sui, wonji njif nu̱ke damang ka ɓa khaki ma ɓaran. Tlagha mi nda nu̱ gha, ma ku̱ damang ɓa kha ma ɓaarem.’ 39Tu̱ ku̱s nda ku, tu̱ mbuk nda nu̱ gaanje garuk damang, tu̱ tlagha nda nu̱ gha ku.

40“Yang ɗa, mbu̱ nu̱ damang a ɓa ɗo, ka shikya nu̱m ye nu̱ ghutiku nanga na?”

41Tu̱ ze nda ku za, “Ba mbu̱ aa ɓa, ka tlagha nu̱ mu̱narku nang nu̱gha,” kom “ka vu̱r damang ye nduki nggur nu̱ke ka vu̱r ki me shakhti ɓaran anapang yenda sarchi dlaran.”

42Tu̱ Yesu ze wor za, “Alapa nun na bu̱laran mbu̱ lagarkati ɓu̱ Maghamang ɓa goma? A nje bu̱laran za, ‘Ndogdi ni nu̱ du̱ndiku zhangki ghang, chin khaki ma ndogdi nu̱ dukki boote mbu̱ du̱ndang kap. Na ɗya shir ɓu̱ Magham, yang tu̱k a khar ɗye lazham ye nar ɓaarem.’

43“Ku̱me nang ngaa zu̱ran ye nu, ka lawa kwaaɗar ɓu̱ Magham ɓar kha nu, tu̱ vu̱r ye nduki nu̱ke ka vu̱rki boote mbarkandi. 44Njif nu̱ nggu̱ɗki nu̱ ɗyine ndogdi nang, ka zha ɓar rukhub rukhub, yang njif nu̱ ndogdang nggu̱ɗki nu̱ ɗyine nda, ka mbakhzha nda nu̱ gha.”

45Nu̱ kuruku rututundi ndu̱ Parisekwang tu̱kki ku̱rti ɓalarkwang, tu̱ da mban ku nu̱ke a ve wora. 46Tu̱ shim gwa njiv nu̱ke wor ka ku̱ski nda, yang a sawa tabar ndukyang ku ku̱me wa da ku za ɗya annabi.

Currently Selected:

Matta 21: ttrNT

Highlight

Copy